Soomaalidu Ma Waalatay ?
Soomaalidu wey waalatay
Duufaamaha siyaasadda ee burburiyay dalkeena hooyo wexey qaar ka
mid ah indheergaradka soomaalida ku qasabtay inay soomaalida ku
tilmaamaan dad waashay . Indheergaratada tilmaantan u
isticmaashay bulshada soomaaliyeed waxaa ka mid ah qoraaga
caanka ah Dr. Maxamed Daahir Afrax. Qoraagani wuxuu buugiisa Dal
Dad Waayey & Duni Damiir Beeshay ... ku sheegayaa in soomaalidu
u waalatay sida shakhsi aadane eh oo kale . Haddaba waa maxay
caddeynta , ama caddeymaha uu qoraagu soo hordhigayo
akhristayaasha si uu uga dhaadhaciyo ansaxnimada tilmaantan (
ama fiiradan ) ?
Sida ay wada ogsoonyihiin akhristayaasha buugga wuxuu Dr.
Maxamed Daahir Afrax farta ku fiiqayaa buug uu qoray ku
takhasusaha cilminafsiga mujtamaca Erich Fromm, magaciisanuna
yahay The Sane Society. Buuga Mr Fromm waa buug ka hadlaya , ama
akhristayaashiisa soo hordhigaya su'aashan ; Macquul ma tahay in
mujtamac dhan uu wada waasho ? Jawaabta Mr Fromm uu bogagga ugu
horeeya kaga horkeenayo akhristayaashiisa waa haa. Haddaba si
aan uga salgaarno micnaha jawaabtani wexey mudan tahay inaan wax
ka ogaanno dalka uu ka dhashay Mr Erich Fromm.
Erich Fromm waa nin ku dhashay, ku soo barbaaray, waxna ku
bartay dalka Jarmalka. Sida aanu kor ku soo tilmaannay waa nin
ku takhasusay cilminafsiga mujtamaca, waana qoraa buugaagta iyo
fiirooyinka cilmiyeed ee uu soo saaray qiimo daran looga hayo
dalalka galbeedka. Qoraalka buuga The Sane Society waa mid uu
sameeyay ka dib dagaalkii labaad ee adduunka. Sida dadka
taariikhda galbeedka, siiba taariikhda dalka Jarmalka u
dhagdhigay ay wada ogsoonyihiin wuxuu dhammaadkii dagaalkii
labaad maddaxa ku istaajiyay aragtida qaas ee ay iska qabeen
dadka u dhashay dalka Jarmalka. Guuldarradii iyo burburkii kaga
imaaday dagaalkii ay la galeen ciidammadii Xulufada oo ay
hor-ordayeen dalalka Ingiriiska, Mareykanka, iyo Midowgii
Soofyeet, waxaa u dheeraa dabool ka qaadiddii dambiyadii
ciribtirka ama xasuuqa ee ay u geysteen dadka ay ugu horeeyaan
juhuudda. Haddaba Mr Fromm oo ah nin cilmi iyo caqli lahaa oo
isku dayaya inuu si maangal ah u fahmo sababta dadka uu ka
dhashay ee jarmalka ay uga dabadhaceen ninkii burburka u keenay
(Adolf Hitler), ayaa wuxuu qoray buugga aan magaciisa kor ku soo
tilmaanay .
Waalashada Shakhsiga
Intaanan Mr Fromm dib ugu soo laaban baan waxaan jeclahay inaan
tilmaan gaaban ka qaadanno waalashadu waxa ay tahay. Akhristow
sida aad adiguba qiyaasi karto waallidu wexey leedahay taariikh
aad iyo aad u dheer. Waa jirro dunida oo idil laga wada yaqaanno,
saa darraadeedna aragtiyada jinsiyadaha kala duwani ka qabaan
jirradani waa kuwo tiro
badan. Taariikhda dadka shiineeska oo ka mid ah dad-dhaqameedka
ugu taariikhda dheer ee dunida waxaa laga helaa sheekooyin ka
hadlaya laba quwadood oo jidhka xukunta
( magacooduna la dhoho ying iyo yang ) , oo dheellitirkoodu
muhiim u yahay caafimaadka jirka iyo kan maskaxda . Taariikhda
jirradani ka leedahay dalkeenna hooyo ma aha mid sidaa u dheer.
Sababaha ugu horreeya waxaa ka mid ah la'aanta
qorraal-taariikheed la uruuriyay, magacyada iyo tilmaamaha kale
ee dadkeennu ula baxo jirradan , iyo aqoonsi la'aanta jirradan
loo aqoonsanayn in ay tahay jirro dhab ah .
Waalashada Bulshada
Haddaba Mr Fromm asigoo ka hadlaya waalashada bulshada buu wuxuu
buuggiisa ku qiranayaa in fikradan ( waalashada mujtamaca ) ay
tahay mid aanan ku taagsanayn cago ay ka soo deynsatay maadada
cilminafsiga mujtamaca . Mr Fromm wuxuu buuggiisa ku sheegayaa
in maadada cilminafsigu aynan aaminsanay waalasho dhaafsan
shakhsiga. Micnaha ma aaminsana in mujtamaca oo idil u wada
waalan karo sida shakhsiga. Asigoo aqoonsan xeerkan guud ee ay
aaminsanyihiin inta ugu badan ee ka mid ah dhakhaatiirta
cilminafsiga, haddane Mr Erich Fromm wuxuu ku adkeysanayaa
fikradiisa ah in mujtamacu waalan karo, balse waalashadani ma
aha waalashada caadiga ah ee inagu soo dhacaysa isla marka aanu
maqalno ereyga waalasho .
Soomaalidu Ma Waalatay ?
Waalashada Mr Fromm uu ka hadlayo waa wax uu ku tilmaamayo
waallidda caadinimada. Sidaanu wada garan karno waallidani ma
aha midda caadiga ah ee sawirka ay maskaxdayada ku beerto
badanaa ina tusayo shakhsi ildaran oo kaligii isla hadlaya.
Haddaba su'aasha aanu is weydiin karno waa middan; Soomaalidu
bulsho-ahaan ma lagu tilmaami karaa dad u waashay sida shakhsiga
ildarada ka muuqato ee isla hadla
(ama "buufiska" qaba ) ? Jawaabtu sidaan u arko waa maya,
soomaalidu ma aha dad waallidda noocan oo kale lagu tilmaami
karo. Sida akhristow iska qiyaasi kartid aragtidaydu ma aha in
waxyaabihii siddeed iyo tobankii sano ee ugu dambeeyay
soomaalidu isku sameysay aan u arko wax caadi ah, ama waxyaabo
dad miir lihi ay isku sameeyaan. Burburka iyo xadgudubyada ka
dhacay dalkeena wexey inagu qasbeysaa inaanu saxno tilmaamaha
aanu isticmaaleyno markaan isku dayeyno inaan helno fiiro ama
tilmaan si buuxda oo sax ah wax uga sheegeysa wixii ka dhacay
dalka , isla markaana aragti cusub inaga siinaya sababaha ey u
dheceen waxyaabaha ka dhacay dalkeenna hooyo.
Sidaan ku soo caddeyn doono qeybta 2-aad ee qoraalkan wata
cinwaanka
" Soomaalidu Ma Waalatay ? " , dadkeennu ma fiyooba . Waxaan
isku dayayaa caddeynta inaaney iska soo horjeedin gebaggebada
aragtidayda koowaad, oo ah in soomaalidu mujtamac-ahaan aynan
waalnayn, iyo aragtidayda labaad ee ah in bulshadu dhinaca
maskaxda ka caafimaad qabin. Waxaan kaloo falanqayn doonaa
waallidda caadinimada, waxa ay ka dhigan tahay, iyo waxyaabaha
ay tooshka uga iifin karto marxalladda adag ee dalkeenna iyo
dadkeennu ku jiraan.
W/Q Mohammed Osman Yusuf (Shaarib)
Email: mohamed01278@hotmail.com