Daabaco Boggan | Print

WADAADOOW WARANLE NOQO - Qore: YUUSUF XIDDIG

Ilaah baa mahad leh, nabadgelyo iyo naxariis Eebe korkiisa ha ahaato Rasuulkeenii Suubanaa MUXAMMED(nnk).

Waxaan bulshada soomaaliyeed ee damiirkoodu nool yahay kana gubanaya dhibaatada loo geysto dadkooda , uga tacsiyaynayaa gumaadkii aan geedka loogu soo gaban ee loo geystay Culimmadda soomaaliyeed, runtii maalinkasta waa nala gumaadaa, balse midaan waxay uga kulushahay kuwa kale waa ayadoo gumaadka lala beegsaday qaybtii ugu muhiimsanayd ee bulshada, oo haddii ayaga la waayo uu Ilaah noo balan qaaday halaaga, ahna calaamadaha lagu garto dhamaashada dunidan haddii ayaga la waayo, ee walaalayaaloow samir iyo iimaan Alaha nagsa siiyo, ayana shahiidnimadoodii Alaha waafajiyo. kuwii dhibka geystayna ha sugeen ciqaadta ay leedahay, oo Ilaah ha u soo dedejiyo asaa aweedee, hana dhadhansiiyo midaa mid la mida..

Marka haddaan usoo dego dulucda qoraalkeygan aan ku bilaabay "Wadaadoow waranle noqo" ahna in bulshada soomaaliyeed waligeed loo qaybin jiray labadaa qaybood Wadaad iyo Waranle. Fikradaasoo u cuntami weyday waranleyaashii soomaaliyeed mid ka mida, oo u arkay meel ka dhac rag loo geysanayo inay tahay, oo rag oo dhan uu yahay waranle, qaadan karona waranka, ayaa markuu la kulmay wadaad iska laafyoonaya duur cidla ah oo howda oo kitaabka uun uu garabka ugu jiro ku yiri "war wadaad waa sidee mee warankaagii" Wadaadkiina uu ku jawaabay " anagu Ilaah kaliya uun baan ka cabsanaa, oo cid kale kama cabsano" Waranlihiina ayan qancin jawaabtaa yirina "Wadaadoow mas'aladaa iima cuntamin ee bal isu kaayo keena adiga iyo inta kugu raacsan in Ilaah kaliya laga cabsado. maalin hebla iyo geedkii harka weynaa ee hebel hoostiis" Wadaadkiina uu ku dhex dhacay wadaadadii yirina "Maantuu warale ninkii ahaa ugu balaayo batee, oo uguna daran yahay share, ina mariya aan mas'aladaa meel cad kaga soo harnee" Laysugu yimid geedkii lagu balamay, oo wadaadadii ayagoo sugaya waranle, oo kutubtoodii mid mid u daalacanaya, isa soo hor taag waranle oo caraysan gafuurkana cirka u taagaya, oo laba nin oo seefo wata geesaha ka joogaan, qabta yiri, lala bood labo wadaad oo dhinaca soo xigay, oo inta aqal hoori geeskaa kadhisan lala galay qacda iyo caacdu is raacday, seefihiyoo dhiigu tista hayo soo noqde labadii nin, saa waa hadana qabta, sidiiyoo kale lala bood laba wadaad oo dhinaca soo xigay, aqalkii dhexdiisii qacda iyo caacdu is raacday, soona noqde seefihiiyoo dhiigu tista hayo. saa waa qabta haddana, sefleydii haday yiraahdeen la booda labadii idin soo xigtay, waaba wadaadadii haddii hal meesha uu ku haray, oo oodey jabiyeen isna buurteen, balse waa qorshe uu watay waranle, ee gidi la soo qabay oo geedkii hoostiisa lagu soo celi, afmugii furte "War hana laynina war hana laynina" Waranlena ugu jawaab "Maxaan mas'alo ka hadalnaa idinkaaba cadaystay inay jirto cabsi ka sokeysa midii Eebe.
ee maan kala saarno cabsida Ilaah ee asalka ah iyo cabsida caadiga ah ee aad iska caabin kartid iskana celin kartid, ee anigu wadaado ma aanan laynin, waana kuwan afartoodii, ee waa wanankaan idinku casuumayay dhiigoodii waxaad ka dideene, ee maanta ka dib yaan arag wadaad duur cidlo ah iska laafyoonaya"

dhacdadaa caan ka noqotay ee dhex martay Wiil waal iyo Wadaadada. ayaanba wadaad laga waayi jirin ul gacan qabsi ah iyo aableey uu ku waliimaysto oo hilibka ku goosto.

Marka maanta waxaa dhacdadaa igu dhaliyay waa dhibaatada loo geysanayo culimadeenii. oo aan u xiriirinayo iyagoo isaga tagay taladaa wanaagsanayd ee waranlahaa soomaaliyeed, dowlad bur bur sanayd dhowr iyo toban sano, oo intaa qori laysu isticmaalayay, haday wadaadadii gacmaha ka laabteen , oo isku dhiibeen tuug iyo damiir laawe inay qoryaha u qaataan oo danyarta baac sadaan, mar hore ayay u ahayd inay hubka qaataan oo dadka iyo dalka badbaadiyaan, ileyn ayagaa ugu dhaw cabsida Ilaah qorigana xaqiisa marin lahaa, ahna dad sharfan oo aan qoriga magac iyo maal ku dooneyn, noqona lahaayeen badbaadiyayaasha dadka iyo dalka, mana u suurto gasheen dowdar damiirlaawe ahoo dabadhilifa iyo duul xunoo uu wato inay masaajid iska galaan oo culimo ku gumaadaan, haday og yihiin dad wax iska celinaya inay halkaa ku jiraan, naftay u baqan lahaayeen ileyn geeri ma rabaan oo dib bay u guran lahaayeen, balse midaa waxaa ku dhiiro galiyay faramarida ay halkaa ku ogaayeen.

Mida kale ee uu ka faa'ideystay cadawgeenu waa tafaraaruqa ku jira culimadda soomaaliyeed, oo markii ay iyagu is raaci waayeen maalinba mid loo baacsanayaa. Waxay ahayd markii xabashigu isku diyaarinayay inuu weerar ku qaado dalka, inaan ka daawanayay taleefishan waraysi fikrada uu ka qabo safiir maraykanka u fadhiyi jiray xabashi maxaakimta islaamiga uuna yiri "Maxaakimta islaamigu waxay u qayb samaan laba qaybood, kuwa ugu badan oo ah 95% waa dad Suni shaafici suufi ah, 5% waa dad Suni salafi wahaabi ah. Taasoo anigu aan is iri war nacasku ma haduu na rabaa inuu na kala qobqobo, waxa uu ka hadlayo sow uun Suni ma aha, ma shiicaa meesha ka jirta iyo dad kale, uuna yiri' 95% maxaakimtu waxba kama qabaan in xabashiyi ay dalka gasho, oo uma arkaan cadaw, waana lala heshiin karaa. Balse waxa aan heshiiska rabin oo aan xabashi arki karin waa 5% oo ah dad argagixiso ah, kuwaana wadanka waa laga sifeyn karaa, maadaama ay saa u badnayn. Beryo kadibna aan garowsaday ereyada ninkaa, ka dib markaan web site yada soomaalida ka aqriyay dad isku riix riixaya, iskuna eedeynaya Islaax, Itixaad, Ansaar, Alshabaab iwm, oo kuli saan anigu filayo ah 5%uu ninkaa tilmaamay. Marka saan arko dadkeygii waa la darsay, lana ogaaday waxay yihiin...

Ee culimadda soomaaliyeedoow ogaada intaad tafaraaruqa ku jirtaan, oo aad idinku is haysataan in laydinka faa'ideysanayo.
Xabashiguna uu u yimid inuu idinka idin gumaado ileyn waa ashahaado la dirire, ashahaadadana idinkaa dadka bartaan, ee idinkoo ashadaado dadka baraya see ashahaado lagu tirtiraa, in idinka laydin tirtiro maahee EE WADAADOOW MAAD WARANLE NOQOTID oo wax iska celisid yaan si fudud laguu gowricine.

WAA WALAALKIIN

YUUSUF CABDI SAHAL
YUUSUF XIDDIG
yussuf_hiddig@hotmail.com

Faafin: SomaliTalk.com | May 6, 2008
 

Kulaabo bogga  www.SomaliTalk.com  © www.SomaliTalk.com

La soo xiriir: