Puntland ma heli doontaa fursad ay uga badbaado burburkay qarka u
saaran tahay ?
Maamulka Puntland ayaa markii la dhisay waxaa ka soo wareegtay ku dhowaad
tobaneeyo sano iyadoo dhidibada loo taagay sanadkii1998, balse ilaa iyo hadda
ayaa shacabka Puntland ayan maalina helin riyadii nololeed ee ay ku haminayeen
taasoo ahayd inay ku naaloodaan nabadgalyo islamarkaasna ku tilaabsadaan horumar
bulsho oo dhinac kasta ah.
Tilaabadii koowaad ee laqaaday ee wax ku xumaadeen maamulka xagiisa ayaa loo
xusaa in ay ahayd markii si toos ah loogu dooray hogaaminta Puntland C/laahi
Yuusuf oo loo caleemo saaray in lagu qanciyo jagadaas si loogaga nabadgalo
dhibaato iyo kala qoqobid xiligaas ku timaada unkamida maamulka, iyadoo loo
arkayey in uu isagu yahay qofka keliya ee shaqsiyaadka isu tiriya siyaasiyiinta
deegaankaas aan marna cid kale u tanaasulayn.
Waxqabadkii C/laahi Yuusuf waxaa uu ahaa sida la wada xasuusto mid uu uga
faa’iidaysanayey in uu mar ku gaaro meel uu maamul Soomaaliyeed uga tilaabsado,
waxa uu Odaygu galay in uu diyaariyo ciidamo uu ku caburiyo shacabka sida
khaldan ku doortay isaga oo ku beer laxawsanaya in uu u diyaar garoobayo sidii
uu uga difaaci lahaa Puntland duulaan uga yimaada dhinacyada waqooyiga iyo
koonfurta Soomaaliya.
Sidoo kale waxaa uu daabacday lacago been abuur ah oo shilinka Soomaalida ah si
uu dhaqaalo ugu helo gudbinta hadafkiisa mugdiga ku salaysnaa, taasoo uu dhinaca
maamulkiisa uu u xushay xiligaas shaqsiyaad tiisa fuliya oo aan dan ummadeed ka
fakirin kuwaas oo ilaa iyo maanta weli gacanta ay ugu jirto Puntland.
Dhamaadkii waqtigiisii xukun ee hore ayaa C/laahi Yuusuf waxa uu muujiyey sida
uusan ugu qanacsanayn in uu jagada hogaamin baneeyo, waxaana uu dib mar kale ugu
qabsaday xoog milatari markii uu meesha ka saaray maamulkii Jaamac Cali Jaamac
oo xiligaas la doortay, taasoo uu garab milatari uga helay Itoobiya oo Odayga u
xulatay qofka ay ku aaminto deegaankaas.
Waxaa la orankaraa C/laahi Yuusuf mudadii uu madaxweynaha ka ahaa Puntland
maalina dhinac horumar lagama helin xag bulsho iyo xag baladba, waxaana bad iyo
berri ka socday xaaluf qaangaaray taasoo dadka qiimeeya siyaasada Soomaaliya ay
ku tilmaameen in uu ahaa hogaamiyaha keliya ee ka waxyeelada badnaa dagaal
oogayaashii Muqdisho ee tiro beelka ahaa.
Tilaabadii labaad ee hog ku dhaca maamulka Puntland kadib markii C/laahi Yuusuf
loogaga dhawaaqay madaxweyne ku meelgaar shirkii loogu yeeray dib u heshiisiinta
Soomaaliya ee ka socday dalka Kenya muddada labada sano ahayd, ayaa waxa
shacabka Puntland is tuseen fursad rajo oo ay u arkayeen in cid walba oo
timaadaa ay si u dhaamayso Odayga.
Nasiibdaro waxaa ku guulaystay hogaaminta Puntland Cadde Muuse oo loo arkayey in
uu ahaa hogaamiye C/laahi Yuusuf ay si siman uga wada heshiiyeen iska hor
imaadyadii ciidan ee garabyadii ay kala hogaaminayeen dagaalkii sokeeye ee ka
dhacay deegaankaas Puntland, balse ay soo baxday in Cadde uu ahaa nin toos cudud
iyo calaf wuxuu haystay isugu dhiibay C/laahi Yuusuf.
Cadde Muuse ayaa ogaal xumadii jirtay waxaa loo arkayey nin wax weyn ka badali
kara mashaqadii maamul ee ka jirtay Puntland xiligaas, wax lala yaabo ayay
noqotay markii durba laga dhadhansaday in uu yahay maamul ahaan gacan yare
Odaygii hore toos taladiisa ku shaqeeya, waxaana loogaga niyad jabay dhismihii
dowladiisii u horaysay oo sida la xaqiijiyey ahayd mid toos loogu soo yeeriyey.
Shacabka Puntland ayaa mar qura waxay noqdeen kuwo ku baraaruga in ay ku hoos
nool yihiin madax ku noqotay Dulin ka dul baxay oo xaga dhibaatada iyo damiir
la’aanta ayan jirin cid kula mid ah.
Waxaa degdeg u burburay dhaqaalihii gobalka ka dib markii shilinkii la helo uu
noqday mid dhinaca Federaalka iyo C/laahi Yuusuf loo qaado iyo mid jeebka ay ka
buuxsadaan ragga talowadaaga Puntland ku maamula.
Waxaa soo baxay xifiiltan dhaqaale oo mararka qaarkood soo kala dhexgala
mas’uuliyiinta Puntland ee iyagu noqday kuwo aan laga daba hadlin, waxaana
meesha ka baxay muuqaalkii dowliga ahaa ee markiisii horaba harka keliya ahaa,
waxaana timid in baarlamaankii magac u yaalka ahaa iyo xukuumadii ay wada
shaqeentoodii lunto islamarkaasna cid walba ay ku tagrifasho mas’uuliyadeedii
shaqo dhinac kasta.
Cadde Muuse waxaa taas uu ka sii daray markii uu kala xushay raggii ay talo
wadaaga ahaayeen isagoo sheegay in uu wax saxayo, waxaana uu qabtay oo keliya in
wasiirkii arimaha gudaha Xaabasade uu meesha ka saaray isagoo kuwii la
fiirinayey in uu wax ka badalo uu dib u sii magacaabay sida wasiirkii Maaliyada
Gaagaab iyo kii horumarinta Awaare oo uu ka sii dhigay xiriirka caalamiga.
Tilaabadaan isbedel ee Cadde ayaa shaki ku abuurtay dhamaan dadweynaha reer
Puntland oo dhaqan u lahaa ilaalinta nabadgelyada iyo midnimadooda waxayna u
arkeen in tilaabadaasi ay tahay mid wax kala qoqobaysa oo Cadde uu wasiiradiisa
u kala saaray kuwo uu badali karo iyo kuwo uu sharfi karo oo keliya.
Isbadalkii siyaasadeed ee hogaanka Puntland ayaa noqday mid keena isbedel
deegaan oo wax weyn ka badala deegaankii Puntland, taasoo gobalkii Sool uu
degdeg uguba darsamay Somaliland, ayna jiraan deegaano kale oo ay ka bilowdeen
dhaqdhaqaaqyo colaadeed.
Dhinaca kale noloshii ayaa sii xumaananysa idil ahaanba deegaanka Puntland kadib
markii shilinkii uu hoos u dhacay uuna ku yimid sicir barar dhamaan maciishadii
lama huraanka ahayd taasoo loo aanaynayo soo saarista lacago been abuur ah oo ay
si xad beel ah u yaalaan warshadaha daabaca, waxaana hakad galay ganacsigii
iyadoo ganacsatadu ay dadaal ugu jiraan sidii ay hantidooda u badbaadsan
lahaayeen, waxaana yaraatay cuntadii taalay iyadoo meelaha qaar laba xiray
goobihii wax lagu gadi jiray.
Waxaa bilowday socdana shirar ay beeluhu ku doonayaan sidii ay xal uga gaari
lahaayeen dhibaatada maamul ee ku habsatay, waxaana soo baxaya warar sheegaya in
uu jiro diyaar garoow beelaha qaarkood ay ugu jiraan sidii ay gooni gooni
aayahooda uga tashan lahaayeen mar haddii ay arkeen in waxyeelo uun noqotay waxa
ay ka sugaan maamulka hadda jira.
Ilaa iyo hadda ma muuqato wax fursad ah oo laga sugayo in uu sameeyo maamulka
Cadde si uu u badbaadiyo burburka Puntland ay qarka u saaran tahay, iyadoo la
wada ogsoon yahay in uu xiligiisii dhamaaday maamulka Cadde isla markaasna ay
luntay kalsoonidii shacabka ay ku qabeen dhismaha maamul u dhex ah oo baahidooda
ugu adeega.
Shacabka Puntland oo ah runtii kuwo talowadaaga jecel isla markaasna dulqaad u
leh dhibaato kasta oo la soo darista ayaa waxay maanta yihiin kuwo qaadan la’ in
ay dhaxlaan baaba’ dhinac kasta ah, waxaana inta badan qof kasta oo Puntland ah
hor imaanaysa dagaalka ka socda Muqdisho oo wiilashoodii laga dhigay kuwo ka
dhinac dagaalama cadowga soo jireenka ahaa ee ummadda Soomaaliyeed ee Itoobiya
oo maalin walba xasuuq u geysanaysa shacabkoodii.
Reer Puntland ayaa ah kuwo mar walba dhibsada raalina aan ka noqon Karin in
xaluufo loogaga dhigo cadowga Islaamka iyo kan Soomaaliyeedba iyadoo ciidamo si
gaar ah loo dhisay oo loogu yeero Ashahaado la dirir ay ka howlgalaan Puntland
isla markaasna khalad kasta oo ku yimaada siyaasad xumida maamulka hadda jira
loogu yeero mid ay soo abaabuleen urarada diiniga ah, si loogu ugaarsado
dhalinyarada u heelan barashada iyo ku dhaqanka diintooda Islaamka.
Si kastaba xaalku ha ahaadee xaalada shacabka Puntland ay ku sugan yihiin ayaa
ah mid lagu tilmaami karo maxay ku nuugaa maxayse ka nuugtaa mar haddii maanta
wax u dhaqan ayan jirin dad iyo dalba taasoo ay u sii dheer tahay magac xumada
ay sii dhaxalsiiyeen kuwa ay hogaanka u dhiibteen.
Ax’ed Ciise Qulaan
ahmeding@hotmail.com
Faafin: SomaliTalk.com | Jan 23, 2008
|