shirkii la xisaabtanka Xukuumada Prof. Geedi  ee Golaha Baarlamaanka uga socdey Magaalada Baydhabo in ka badan hal bil  ayaa shalay dib u furmey, waxaana hoolka shirarka Baarlamaanka soo xaadirey 143-mudane sida uu sheegey Gudoomiyaha Baarlamaanka, Shirkaan shalay ay isugu yimaadeen mudanayaasha ayaa waxaa lagu waday  in Baarlamaanka ay soo hor fariistaan qaar ka mid ah Wasiirada la xisaabtankoodu uu Baarlamaanku ka qabo xasaasiyad weyn, sida kan Batroolka iyo kuwo kale laakiin waxaa u yeeritaankii Baarlamaanka aqbaley Wasiirka Qorsheynta Qaranka iyo Hanti Dhowrka guud ee dowlada, halka Gudoomiyaha Maxkamada Sare ee DFKMG Dr. Yuusuf Cali Haaruur uusan imaan, isagoo jooga Magaalada Baydhabo.

Kulankii shalay oo uu shir gudoominayey Gudoomiyaha Baarlamaanka Md. Sh. Aadan Madobe oo ay wehliyaan labadiisa ku xigeen ayaa ugu horeyn waxaa uu gudoomiyaha xog’haynadiisa u wakiishey in qaab dhismeedka 14-ka Gudi ee Baarlamaanka, Gudoomiyayaashooda iyo sida xubnaha ay ugu jiraan ay u akh’riyaan xildhibaanada, waxaana gudoomiyuhu amrey in sedax gudi oo ay ka mid yihiin Gudiga Arimaha Dibada ee Baarlamaanka, kan Xuquuqul insaanka Haweenka iyo caruurta, Gudiga Maaliyada in isla marka uu shirka soo gebageboowo Gudoomiyayaashooda ay doortaan maadaama qaarkood ay wasiiro noqdeen, halka qaarkoodna xubinimada Baalamaanka gebihaan laga qaadey, iyadoo aan laga baxeynin nidaamka 4.5-ka.

Xubnaha Baarlamaanka Federaalka KMG ayaa markii ugu horeysay u balan qaadey in xubin kasta $50 ay ugu deeqayaan Isbitaalka Magaalada Baydhabo iyo Alle ha u naxariistee Iskuulka loogu magacdarey Dr. C/lla Deeroow, kadib markii qaar ka mid ah Mas’uuliinta Iskuulka ay Baarlamaanka u soo gudbiyeen codsi dhaqaale, iyadoo deeqdan ay tahay tii ugu horeysay oo Baarlamaanka ugu deeqo hawlo muhiim ah oo dalka iyo dadka Soomaaliyeed wax loogu qabanayo intii uu jirey.

Hanti dhowrka Guud ee dowlada

Gudoomiyaha Baarlamaanka Sh. Aadan Maxamed Nuur {Sh. Aadan Madobe} ayaa mudo 48-saac u qabtey inta dalka gudihiisa joogta iyo inta maqana dalka marka ay soo galaan si dhakhso ah ay ku yimaadaan10-Wasiir oo ay ka mid yihiin wasiirka Wasaarada Maaliyada, Wasiirka Arimha Diinta iyo Aw-qaafta, Wasiirka Hawlaha Guud iyo Guriyeynta, Wasiirka Gaadiidka Cirka iyo Dhulka, Wasiirka Macdanta iyo Biyaha, Wasiirka Tamarta iyo Batroolka, Wasiirka Dalxiiska iyo Duurjoogta, Wasiirka Deegaanka iyo Wasiirka Dibu-heshiisiinta, waxaa kale oo la wacay Xisaabiyaha Guud ee DFKMG,Gudoomiyaha Bangiga Dhexe ee Soomaaliya iyo Kaabayaashii kale ee Dowlada iyo Gudoomiyaha Maxkamada Sare inkastoo Hanti dhowrkii loo yeerey markii uu la damcay inuu warbixin siiyo Baarlamaanka laga diidey isagoo aan hadlin Wasiirka Maaliyada in la dhegeysto warbixintiisa.

Wicitaanka Gudoomiyaha Maxkamada Sare ee DFKMG uu yeeray Gudoomiyaha Baarlamaanka ayaa dadka arimaha sharciga ku xeel dheer ku tilmaamey mid sharcidaro ah, islamarkaana ay siman yihiin Awooda Gudoomiyaha Baarlamaanka, Garsoorka iyo Xukuumadda, laakiin warar hoose oo aan helney waxay sheegayaan in uu ka soo horjeedo wicitaanka Gudoomiyaha Baarlamaanka, waxa keli ah ee u yeeri kara ay tahay Madaxweynaha DFKMG Md.Col/ C/llaahi Yuusuf Axmed oo dalka Ethobia safar ugu maqan.

Dhinaca kale Safarka Madaxweynaha ee uu ku joogo dalka Ethobia ayaa dadka qaarkood waxay ka muujinayaan aragtiyo kala duwan ,waxayna qaarkood ku sheegayaan inuu ku maqan yahay hawlo culus oo isbelweyn u keeni kara awooda Dowlada, waxaana la sheegayaa in Madaxweynuhu uu xanibay dhamaan lacagihii qaab deeq ahaan ku imaan jirey ee Soomaaliya iyo kuwa kale ee Dowlada.

Gudoomiyaha labadiisa ku xigeen.

Waxaa habeen hore magaalada Baydhabo lagu diley mid ka mid ah Ciidamada Booliiska ee ka hawlgala Magaalda Baydhabo, Agagaarka Suuq yaraha Mursal mana jiraan wax mas’uuliyiinta Gobolka iyo kan degmada Baydhabo ka Hadley.

Lama garanayo sababaha dilka Askarigaan balse waxaa lagu sheegey in loo diley Qori uu watey, waxaa uuna marayey meel aysan inta badan ciidamada Dowladu ku badnayn

 hase ahaatee qaybaha kala duwan ee Ciidamada qalabka sida midka dhinta diyadiisa laysma weydiiyo, halka kan dhaawaca ahna isaguna uusan helinba daryeel ku filan, waxaa keloio intaa u sii dheer in midka nool uusan qaadan mushaar u qalma, waxaan dalka joogaa Ciidamo Ajnabi ah oo maalintii ku shaqeeya ugu yaraan $25, koodii dhinta ama dhaawacma waxaa uu leeyahay  wax u qalma, isagoo difaacaya dalkiisa, dadkiisa iyo diinta uu aaminsan yahayba, caruurta uu ka tago waxy leeyihiin daryeel iyo wax-barasho marka uu ka noqdo dalkeena waxaan uu ku faanayaa  bal Akh’ristoow isweydii adiga, keena dhimanaya maalin kasta ama dhaawacmaya Ujeedadiisa iyo Cida dilaysa iyo kuwa uu iska dilayo.

Faafin: SomaliTalk.com | Sept 12, 2007   

Boosaaso: Beesha Ismaciil Cali oo Caleema Saartay Boqor Cumar Ismaciil Sanweyne..