Gabay: Maakhir maammul baa loo dhisoo mahad ilaah weeye

08/12/2007 
Maxamuud Axmed Cabdalle
abdalle@hotmail.com  

---

Waxan halka uga hambalyaynaynaa dhammaan bulsha weynta Soomaaliyeed. Waxan hambalyo gaara u diraynaa dadka Reer Maakhir oo markii ugu horraysay iyagu isku tashaday, samaystayna maamul goboleed cusub. Gabaygan oo uu tiriyey Maxamuud Axmed Cabdalle, wuxu soo baxay bishan Agoosto 12, sannadda 2007-da. Waxa abwaanku u hadiyaynayaa gabaygan dadka Reer Maakhir, wuxuna dhiirri gelinayaa maamulka halkaa dhowaan lagaga dhawaaqay. 

Wuxu Yiri: 

1. Adduunyadan iskala miidhaysee la isku maandhaafay
2. Ee la is mohoobiyi talaa lagu muquunshaaye
3. Nimaan tiisa meel marin aqoon mooyi lagu dhaafye 
    
4. Maakhir maammul baa loo dhisoo mahad ilaah weeye
5. Maahir-baa ka soo baxay nafluhu kala miciin roone
6. Midigtuu Jibriil kaashadaye cidi ma meelayne 
    
7. Waa gobol makhluuqaadka dega lagu mabsuudaaye
8. Waa gobol milgiyo dhaqan da’ weyn lagaga miistaaye
9. Malyuunbaa ku dhaqan aan qabiil lagu masaalayne 
    
10. Waa gobol maqaan weyn sidii Muniyo Baarliine
11. Magaalooyin badan baa ku yaal oo mihiib galahe
12. Sayidkii ka maahmaah kolkuu Badhan muraadaayey 
     
13. Mansabkay Buraan waa lahayd waa mawaad qorane
14. Midhishoo dalxiis loo tagiyo Ceelbuh milicdeeda
15. Dhahar muunadley iyo Carmale waa degaan mudane 
     
16. Waa gobol Mur iyo Maydi iyo midho ka buuxaane 
    Madarka iyo beeraha Galgala mooskii laga beerye
17. Macaluul ma taal iyo darxumo maato li’ataaye 
     
18. Waa gobol mawaashiga hantida Mawlahay dhigaye
19. Maandeeqda geeliyo fardaha Mawle wuxu siiyey
20. Meesiga lo’aad iyo adhiga laga macaashaaye 
     
21. Magar wada ugaadhaa ku badan oon masruuf geline
22. Macdan iyo Batroolbaa ku jira oo manfac u roone
23. Majayahan nimcada taal ayaan cidina moogayne 
     
24.  
25. Waa gobol mahiigaan ka da’o guga mullaaxdiise
26. Muguc wada xareediyo, manqiyo, togaggu waa muushe
27. Cashu waa magool kolay ku tahay milayga jiilaale 
     
28. Waa gobol marsada Laasqoriyo Maydhba gaar u lehe
29. Waa gobol mushtarigiyo ku wacan maal la tabacdaaye
30. Waa gobol masuulkii tashiyo odaygu muuqdaaye 
     
31. Waa gobol bad lagu meeriyoo baahi aan mudane 
    Moolkeeda weyn waxad ka heli madhax aan guurayne
32. Mudka iyo Tarraqaddaa ku filan meel kastaba yaale 
     
33. Waa gobol markay qurux tagtana lala masaynayne 
    waa gobol ishii milicsataa muhasho deynayne
34. Surad iyo Manaabaa ku yaal mool la daawado’e 
     
35. Dayibkiyo Madheedhkaa ka baxa mudhe Galoolkiiye
36. Maygaagga iyo Jiica iyo Qudhac malleexaanle
37. Margoogtiyo Hareeriga bataa muuso kuu qabane 
     
38. Mahwi Ceeri laysugu yimoo gole la maageeray
39. Madaddaalo jaandheer la tumay Muxibbo boodayso
40. Meertadiyo jiibtaa kalgacal muuso kuu qabane 
     
41. Martidoo habeen soo geb tiri oo mir lagu sooray
42. Oo magac Sanaag waa hiddee sharaf la maamuusay
43. Maaweeladiyo sheekadaa muuso kuu qabane 
     
44. Guur mihindiskiisiyo markii xidid la muuneeyo
45. Miisaan hablood iyo halyey la isku meeleeyo
46. Meherka iyo haasawahaa muuso kuu qabane 
     
47. Kolkii muran dhexyaal aadamaha oo la kala maago
48. Muqdarkiyo cirroolaha kolkii talada loo meersho
49. Muddac iyo muddaacaley gartaa muuso kuu qabane 
     
50. Afartaasi mayaygii cirkiyo moodda galabtii dheh
51. Maansooyinkuu Maxamed Nuur meerin jirey waa dheh
52. Mahadhadii Afdhaaliyo, Xuseen mihindiskoodii dheh 
     
53. Soomaaliya masiibadii heshaa maaro loo helaye
54. Anaa miiggan iyo macangagnimo laysku mari waaye
55. Nin waliba muskuu degu jiruu maanka ku hayaaye  
     
56. Masiirkeeni lumay wuxu ku iman taada maammulo’e
57. Micnaha dawladnimo may aqoon mooshinkii hore’e
58. Macluumaadka Fadaraalka waa inan mihiibnaaye 
     
    Gobol wali martabadduu dhistuu, yuu ku meel mariye
59. Mataanay ahaan dani marnaba kala maqnaysiine
60. Maammulkaa saraa loo tartami maalmo dabadeede 
     
61. Muqdishiyo Kismaayaa mardhow Mawle fahansiine
62. Miyirbaa arlada loogu ledi maaxdii nabad weyne
63. Bal maxaa la isku dili gobol waliba waa ismaamuliye! 
     

08/12/2007 
Maxamuud Axmed Cabdalle

abdalle@hotmail.com

GABAYADII HORE EE SHIINE...........