Af-hayeenka Aqoonyahanada Soomaaliyeed Dr. Maxamed Cali Kalaay oo ka Hadley
go'aanadii shirweynaha Beelaha Soomaaliyeed “go’aamada aan soo jeediney xasuusin
bay nagu tahay….”
Dr. Maxamed Cali Kalaay oo ah Af-hayeenka Naadiga Aqoonyahanada Soomaaliyeed oo
fadhigiisu yahay Magaalada Baydhabo ayaa warqad qoraal ah oo uu kaga hadlayo
shirka dibu-heshiisiinta Beelaha Soomaaliyeed ee lagu soo gebagebeeyey Magaalada
Muqdisho u qaybiyey qaybaha Warbaahinta gudaha iyo Dibada ee ka hawl-gasha
Gobolka Baay.
Qoraalkan oo ahaa mid isugu jira Baaq, taageerid iyo soo jeedin ayaa wuxuu u
qornaa sedan:-
Naadiga aqoonyahanada Soomaaliyeed ee xaruntooda KMG Magaalada Baydhabo waxay si
buuxda u taageerayaan go'aanadii shirka dibu-heshiisiinta Beelaha Soomaaliyeed
ee lagu soo gebagebeeyey wajigiisa Koowaad magaalada Muqdisho 30/08/007, wuxuuna
naadiga soo jeedinayaa in la sii wado dibuheshiisiinta Beelaha Soomaaliyeed,
lana gaarsiiyo dhamaan Gobolada iyo degmoyinka dalka, Naadiga isagoo ka
ambaqaadaya Natiijooyinkii ka soo baxay shirweynaha, wuxuu ku talo bixinayaa in
sida ugu dhaqsiyaha badan loo dhiso Gudiyadii Qaranka ee Dastuuriga ee madax
banaanaa, kuwaasoo ay ka mid ahaayeen.
-
Gudiga tirkoobka Qaranka.
-
Gudiga Calaamadeynta soohdimaha dowlad Goboleedyada.
-
Gudiga Hubka dhigista iyo abaabul ka saarka.
-
Gudiga doorshooyinka.
Ugu dambeyn naadiga Aqoonyahanada Soomaaliyeed waxay dhamaan shacabka
Soomaaliyeed ugu baaqayaan inay u soo jeestaan nabada iyo horumarka dalkooda
iyo dadkooda.
Mar aan weydiiyey shirka dibu-heshiisiinta Beelaha Soomaaliyeed ee lagu soo
gebagebeeyey Magaalada Muqdisho, hadii aan la dhisin gudiyadaan aad adigu
xustey, go’aamada ka soo baxay shirka sideed u aragtaa? isagoo su’aashaasi ka
jawaabaya wuxuu yiri “horta go’aan gaarista waa muhiim, fulinta waa arin kale,
marka waxaan ugu hambalyeyneynaa go’aamada ay gaareen, laakiin gudiyada aan
anagu sheegayno waa dadkii fulin lahaa go’aamada, talada aan bixinayno waa in la
dardargeliyo gudiyadii dastuuriga ahaa oo la dhisaa.
Sidoo kale mar aan weydiiyey hadii aan la dhisin gudiyadii dastuuriga ahaa, ma
waxaad leedahay go’aamadii ka soo baxay shirka dibu-beshiisiinta Beelaha
Soomaaliyeed ma ahan kuwo shaqeyn kara? Waxaa uu ku jawaabey “markii la
sameynayey gudiga dibu-heshiisiinta Beelaha Soomaaliyeed oo la magacaabayey
waxay ahayd in lagu shaqeeyo dastuurka, marka go’aamada aan soo jeediney
xasuusin bay nagu tahay ee ma ahan gudi kale oo aan anagu sheegeyno”.
Mar aan weydiiyey mas’uuliyiinta Soomaaliya marka ay shiraan, intooda badan
waxay gaaraan go’aamo, waxaana lagu soo qoraa waraaqo, taasina qoraal ma soo
dhaafto ee marka arintu jugjug meeshaada jog sow ma ahan?.
Wuxuu ku jawaabey “ horta sidaan dukumiintiga ku xusney shirkaan noociisa
laguma qaban Soomaaliya oo waa midkii koowaad oo loo qabto Odayaal dhaqameedyada
Soomaaliya, baaqeenuna waxaa ku jiray waa shir tusaale wanaagsan ah, ee anagu
ujeedadeenu inaan cambaareyno ma ahan, waxaana la og’yahay in siyaasiinta 14
shir loo qabtey, marka shir Soomaaliya lagu qabtey oo ay Ummadii isku arkeen
anagu waxaan u aragnaa inuu rajo fiican uu leeyahay”.
Maxamed Macallin Cismaan{All-man}Somalitalk Baydhabo.
fatxumaalik@hotmail.com
Faafin: SomaliTalk.com | Sept 4, 2007
Daabaco
Boggan | Print