Waraysi: Madaxa Ururka Ardayda Soomaaliyeed ee MCTC, Minneapolis....
C/laahi Maxamed Aadan Madaxa Somali Student
Association ee (MCTC) |
Waxaa
Somalitalk.com usuuragashay inay waraysi layeelato C/laahi Maxamed Aadan
oo ah Madaxa Somali Student Association ee ka dhisan Gobolka Minnesota
(MCTC). Cabdulahi waa arday ka dhigta culuumta Business Accounting
MCTC: Minneapolis
Community and Technical
College. SSA waa ururka ardayda Soomaaliyeed ee uu leeyahay Iskuulkaas.
Somalitalk:
C/laahi kusoo dhowow Somalitalk.
C/laahi:
Waad Mahad santahay
Somalitalk.
C/laahi goormaad bilowday iskuulka MCTC inaad arday ka noqoto?
C/laahi:
Waxaan bilaabay sanada 2003 illaa hadana waan wadaa wallow aan mar mar
fasax ka qaatay.
Somalitalk:
Maxaa kugu kalifay inaad noqoto Madaxwaynaha ururka SSA?
C/laahi:
Su’aal wanaagsan weeye, waxaa igu kalifay inaan qabto jagadaan arimo
badan oo ay kamid yihiin, baahida ay ardaydu u qabto wax qabad iyo anoo
jecel inaan wax uqabto ummadayda, waxaana jecelahay markaan arko wax
dayacan inaan buuxiyo, mana aaminsani inaad dib isu dhigto adoo aaminsan
inaad wax qaban karto, mana daawan karo iyadoo ummaydu dayacantahay.
Somalitalk:
Goormaad madax u noqotay
ururka ardayda? Maxaase lagugu doortay?
C/laahi:
waxaan noqday Madaxa ururka SSA oo la idoortay 05/02/2007 Marka hore
marka larabo in qof ladoorto waxaa laga fiiriyaa waxyaabo badan, waxaana
jira sadex arimood oo sabab ka dhiga inuu qofku madax noqdo. Qof wuxuu
madax ku noqdaa waxqabad, qofna qoys ahaan ayuu kunoqdaa sida haduu
kasoo jeedo qoys madax ahaa iyo madax xaaladu abuurto, sida hadii arin
dag dag ah oo aan la filayn timaado oo qof wax maamulo, halka inta
kalena ay wali yaabanyihiin. Hadaan dib ugu laabto su’aashaada aniga
waxaan iskuulka ka ahaa xubin firfircoon, waxaana xog haye u ahaa SSA
2004 illaa 2005. Marna waxaan ka mid ahaa gudi Muslim Student
Association ay u magacoday arin kusoo korortay horaantii sanadkan
Iskuulka taasoo ahayd in Joornaal Iskuulku leeyahay lagu daabaco Sawir
gacmeed lagu caynayo Nabi Maxamed csw. Arintaasna aan ka qaatay kaalin
taasaana ahayd sababaha ugu wayn ee aan kusoo baxay xiligii doorasha oo
aan helay cod farabadan oo gaaraya 102 cod.
Qolka laga dhigay Masjidka cusub ee MCTC
Somalitalk:
Maxaad qabatay intaad
madaxda u ahayd ururka SSA?
C/laahi:
waxyaabaha aan qabtay lama soo koobi karo, waxaase kamida inaan kusoo
kordhiyey iskuulka Masaajid kuyaala dabaqa shanaad, markii hore waxaa
lagu tukan jiray masaajid yar oo kuyaala dabaqa sadexaad, kaasoo aad
ciriiri u ahaa inta la iska sugayana aradayda qaar galaasyada ka daahi
jireen, maadaama raga iyo dumarku aysan isla tukan Karin goobta oo yar
daraadeed, marna wiilasha ayaa gali jiray marna gabdhaha, arintaasna
ma’ahan midaan kaligay fuliyey waxaa illa suurta galiyey ardayda, aadna
waan ugu Mahad celinayaa. Sidoo kale waxaan qabtay 7/20/2007 Shir aan
ugu magac daray (Noloshii iyo Taariikhdii wanaagsayd ee Aadan C/lle
Cismaan) oo ay kasoo qaybgaleen dadcaan ah oo dagan Gobolkaan Minnesota
sida; Raysal wasaarihii hore C/risaaq Xaaji Xuseen, Taliyiihii hore ee
ciidanka Police-ka Soomaaliyeed Jen. Maxamed Abshir Muuse, Pro. Axmed
Siciid Samatar iyo dadkale oo aad loo xushmeeyo.
Kulankii lagu qabtay MCTC ee kusaabsana
Noloshii iyo
Taariikhdii wanaagsayd ee Aadan C/lle Cismaan
Somalitalk:
Arintan kusaabsan in Nabi
Maxamed la caayi rabay yaa qorayey? Maxaase looga danlahaa?.
C/laahi:
Een wiil dhalinyara ah oo aan diin haysan ayaa waxa uu damcay inuu qoro
sawir gacmeed cay ah oo Nabi Maxamed scw kusaabsan, wuuna qoray wuxuuna
u gudbiyey website iskuulku leeyahay, qaybtiisa joornaalka oo kasoo baxa
iskuulka, iskuulkastana wuxuu leeyahay city webpage wax la dhaho,
keenana waxaa la dhahaa
CityCollegeNews.com. Markuu
dhameeyey wuxuu u geeyey qaybta qaabilsan tifatiraha joornaalka si loo
daabaco, markay arkeena waxay dhaheen arintaa waxay abuuri kartaa
xiisad, waxaana noo yidmid qofkamida tifatirayaasha oo arintii nala
socodsiiyey. Markaan ogaaday arintii markiiba waxaan e-mail u qoray
Madaxwaynahay Iskuula Phil Davis lana socodsiiyey arinta kana codsaday
inuu il gooni ah ku eego arintaan oo aan ahayn mid sahlan. Arintii waxaa
loo qaban qaabiyey shir ay kasoo qayb galeen ardayda Muslimiinta ee
iskuulka dhigata, Ninkii qoray iyo tifatirayaashii daabici lahaa iyo
Madaxwaynihii iskuulka iyo shaqaalihiisii qaar kamida. Meeshaas waxaa ka
dhacday dood culus oo aad u kululayd kuna saabasanayd madaabici kartaan
iyo waan daabacaynaa waxaan xaq u leenahay inaad cabiro dareenkeena,
sidaana waxaa dhigaya sharciga maraykanka (freedom of expression and
speech) ardaydiina waxay yiraahdeen hadii la daabaco iskuulka waan ka
baxaynaa.
Howshii meeshaas
uga harin gudi ayaa la sameeyey, gudigii ayaa la igu daray la igana
codsaday inaan soo diyaariyo ajandihii, kadib iyagaa shiray
(tifatirayaashii Joornaalka iyo shaqaalihii website-ka ) markay isku
mari waayeen hala daabaco iyo yaan ladaabicin cod ayey qaadeen, codkiina
waa is leekaadeen, kadibna Madaxa tifa tirayaasha ayaa go’aamiyey in la
daabaco. Arintaas waxaa diiday kala bar kamida gudiga tifatirayaasha iyo
shaqaalihii website-ka oo ku dhawaaqay inay is casilayaan hadii la
daabaco. Anaga dhinaceena ayaan ka dadaalaynay iskuulkana tusaynay
khasaaraha soo food saari doonta haday falaan arintaas. Kadibna
qoraalkii halkaas ayaa lagu joojiyey, iskuulkana waan uga Mahad celinay
dadaalkaas ay nala galeen, sigaara waxaan waraaq ugu qoray website kii
arintaas qori lahaa.
Somalitalk:
Ardayda Soomaalida ah ee dhigata MCTC intee lagu qiyaasaa tiradooda?.
C/laahi:
Waxaa lagu qiyaasaa ardayda Soomaalida 250-350 ardayda Muslimiinta oo
dhan waxaa lagu qiyaasaa ilaa 500 oo arday.
Somalitalk:
Maxaa hada ku tala jirtaa inaad qabato?
C/laahi:
Waxyaabo badan ayaa madaxayga kujira waxaase ka xusi karaa laba arimood;
hada waxaa lagalayaa fasax, marka lasoo noqdo waxaan kutala jiraa inaan
sameeyo meel dadka waxbarasha kujira noocay rabtoba ha ahaatee ay
doodaha iyo fikradaha isku dhaafsan karaan, khaasatan waxyaabaha ardayda
khuseeya. Sidoo kale Iskuulka ayaa wuxuu ka shaqaynayaa inuu ardayda
Muslimiinta u sameeyo meelay ku waysaystaan, Madaxwaynaha Iskuulka Phil
Davis ayaa iga codsaday inaan ka caawisyo survey laga qaadayo ardayda
Muslimiinta ah oo ku aadan sida ay ugu baahan yihiin goobta waysada.
Survey-diina waan dhamaynay waxaana iska kaashaday MSA iyo SSA waxaana
soo buuxiyey 374 arday. Jimcihii lasoo dhaafay 12/14/07 ayaan
Madaxwaynaha Iskuulka u gaynay survey-gii kadibna waxaan kormeer kumaray
meelaha ugu haboon ee laga samayn karo waysada, wuxuuna noo sheegay inuu
u gudbin doono Broad of Trustee iyo madaxdiisa inay howshii waysta isaga
kasoo dhamaatay kadibna uu war kusoo celindoono. Sidoo kale wuxuu
sheegay Madaxwaynaha Iskuulku inay lasoo xariireen Iskuulo kale oo
gobolka kuyaala Madaxdooda kana codsadeen inuu la wadaago sida uu u
samaynayo goobta waysada, tasoo madaxwaynuhu sheegay inay dhiira galin u
noqotay. Arintaas haday hirgasho oo noqonaysa iskuulkii ugu horeeyey ee
Minneapolis oo arintaas sameeya. Waxaa kaloo xusim mudan in Madaxwaynaha
Iskuulka arintaan goobta waysada oo uu samaynayo uu ku weeraystay
Joornaal afdheer oo kasoo baxa Minnesota (Star tribune) kana qoray dhow
maqaal oo lid ku ah arintaas [Akhri:
Shariah in Minnesota? - Startibune March 27, 2007] . Kadibna
Madaxwaynuhu gaashaanka ku dhuftay wuxuuna sheegayna inuu daboolayo
baahi jirta oo ardaydiisu qabto haday noqon lahayd dhinaca Safety-ga iyo
caafimaadka ama saxmada ardayda Muslimiinta ah oo markay waysaysanayaan
aan fursad siinayn ardayda kale taasoo kaliftay inay ardayda kale
cabasho kamuujiyaan, ee uusan ka eegayn dhinaca diinta ee Joornaalku
arkay.
Somalitalk:
Ugu danbayntii C/laahi Maxaad ku dooratay Iskuulkan? Maxaadse kula talin
lahayd ardayda doonaya inay aadaan College?
C/laahi:
Waxaan ku doortay Iskuulkan dhowr arimood, marka hore waa iskuul ay
kabadan yihiin 50% dadka qoxootiga kuyimid Maraykan aadna maqlayso 40
luuqadood in kabadan maalintii, taasoo kaa caawinaysa inaadan dareemin
qalo. Arinta labaad wuxuu kuyaalaa Downtown Minneapolis oo waxaa sahlan
sida aad ku gaari karto, sidoo kale waxaan aamin sanahay inuu yahay
Iskuulka ugu horeeya xaga barasha luuqada ingiriiska ee gobolkan.
Intaana waxaa kuu dheer hada inaad ka helayso meel aad ku tukato, meel
waysana la rajaynayo. Waxaan kula talin lahaa ardayda rabta inay
dadaalaan inay kabilaabaan MCTC. Ugu danbayntii waxaan rabaa inaan
fursadaan ugu Mahad celiyo kuxigaynkayga Faysal, Ibrahim Galoney, Madaxa
MSA Al-Xaq, Madaxa Iskuulka Phil Davis iyo Somalitalk oo fursadaan
qaaliga ah isiisay, waad mahadsantihii dhamaantiin.
Waraysigaas waxaa
idiin Somalitalk Minneapolis
Daabaco
Boggan | Print
