Horumarka dhaqaale ee dunida oo u dhexeeya
firkadii Adam Smith iyo “Miskiin baa misko la fuulo leh”!!!
W.Q.Siciid Xuseen Ciid.
shariifka@yahoo.co.uk
“Horumar” ama “development” waa kalmad soo jiidasho leh, taasoo si weyn aay u
baadi goobayaan wadamada dunida oo dhami weliba kuwa dunida sadexaad.iyadoo
Qaramada midoobeyna aay cusbada ka badisey kadib markii aay ka dhigtay yool
caalami ah (United Nations Sustainable development Goals, UN Mellinium
Development Goals etc)
Hase yeeshee raacdada loogu jiro horumar sida laga fahmi karo aragtiyaha iyo
falsafadaha socda waxay muujinayaan in waxyaalo badani aay qasan yihiin.waxaa
dhawaan soo baxay buug lagu daah rogayo goldaloolooyinka horumarka. Kaasoo si
qayaxan uu Oswaldo De Rivero, oo ah diplomaasi ruug cadaa ah oo u dhashay
wadanka Peru waqti dheerna u fadhiyey dalkiisa qaramada midoobey iyo WTO, u daah
rogay caqabadaha muga leh ee hor yaala dalal badan oo Asia, Latin America iyo
Africa ah. Waxuu si xirfadnimo leh u sharxay mashaqooyinka isa suran ee ku
gudban dalalkaasi gumeysiga kasoo doogey horumar aay gaaraan nus qarni ka dib
intii aay samaysteen haykalka dowladnimo ah ama aay ku dhawaaqeeyn inay dowlado
yihiin.
Mushkilada horumarku waxay salka ku haysaa raadraac taariikheed laga soo bilaabo
xiligii aay yagleelmeen jiritaanka dowladaha xorta ahi, kaasoo ku beegan
sanadkii 1648,xiliyadaas oo aay gabaabsi ahaayeen dagaaladii diimeed ee yurub ka
holcay,islamarkaana u gogol xaaray in yurub aay u qaybsanto wadamo leh qaranimo
buuxda oo xor ah oo aay boqortooyooyin ku amar ku taagleeyaan.kadib waxaa yimid
xoriyadii maraykan(1776) iyo kacaankii faransiiska(1789) halkaas waxaa
boqortooyooyinkii lagu badashay nimaadka dimoqraadiyada iyo awooda
shacabka,iyadoo macnayaal cusub loo sameeyay sareynta shacabka,arimahaani waxay
u gogol xaareen curushada afkaar xag jirta sida shuuciyada .iyadoo aakhirkii aay
ku dhamaatay in dowladaha waxii isku isir,af ama diin ahiba aay dowlad isku
noqdaan halbeega dhaqaalahuna uu noqdo waxsoosaarka umadeed(Gross National
Production GNP) kaasoo halbeeg looga dhigayo barwaaqada umadaasu ku
nooshahay.sidaas ayaa khuraafada horumarku u noqotay ujeedo aay daba rucleeyaan
dhamaan umadaha dunida oo dhami.
Fikradaas horumarka waxaa loo safriyay wadamadii mudada dheer ku hoos jirey
gumeysiga yurub kadib gabagabadii dagaalkii labaad ee dunida, iyadoo aay sare u
kacdey dareenkii umadnimo ee dalalkaas,halkaas oo koox walba oo banii-aadam ahi
aay isku aragtay inay leedahay jiritaankeeda gaarnimo ee luqadeed,diimeed ama
dhaqan. Codsatayna xaqeeda aayo ka talin iyo helitaanka dowlad matasha oo xor
ah. Iyagoo aan qiimeyn waxa aay haystaan ee agab dhaqaale ah oo u
suurtagalinaysa inay noqdaan umad isku filan oo xornimadeeda dhowrata iyadoo aan
cidna quudkeeda ka sugin.
Waxaa halkaas ka dhashay inay soo baxaan wadamo dowlado noqday kuwaas oo aan
haysan haba yaraatee wax aay dowladnimo iyo umad xor ah aay ku ahaadaan, waxaa
cadaatay inay riyo ahayd in xoriyada aay ku lamaan tahay horumar degdeg ah oo
dalalkaasu gaaraan.
50 sano ka dib markii aay dowladahii la gumeysan jirey aay xoroobeen waxaa iska
cad inaysan ku guuleysan inay gaaraan horumarka dalalkii gumeysan jirey aay
haystaan xitaa aaysan u dhawayn.waxaana halkaas ka dhashay in dowladahaasi aay
isku badalaan kuwo ku dhisan tuugsiga caalamiga ah.
Waxaa xusid mudan in Dr Boutros Boutros-Ghali xoghayihii guud ee qaramada
midoobey waagii uu ahaa uu ku fashilmey isku daygiisii ahaa maareynta mujtamac
dowli ah oo ku qotoma in barwaaqada caalamka la wadaago, inkastoo uu isku dayay
hadana waxaa ka hor yimid diidmo adag oo wadamada horumarey aay ku horjoogsadeen
arinkaas waana tii uu u waayay kursigii Q.M.in mar labaad loo doorto.
Waxaa xoriyadahaas lagu hungoobey aay keeneen in dagaalo lagu hoobtey iyo
shaqaaqooyin duugnaa oo lagu ilaawey halgankii gobonimo doonimadu uu markiiba ka
curto wadamo badan oo ka mid ah Africa, balkaanka,Afghanistan,Colombia bariga
dhexe,Qaramada Midoobey waxay noqotay mid gabtay inay xakamayso qooqa dalalka
awooda leh,Dr Boutros Boutros-Ghali go,aankii dalalka hodanka ahi aay
doorashadiisii labaad ku horistaageen waxaa asal u aha iyagoo diidanaa inay wax
u huraan joojinta qulqulatooyinka umadaha faqiirka ah ka dhex aloosan ee ka
durugsan. Taasoo aay ku xeerinayeen sumcada madaxda wadamadaasi dadkooda codka
bixiya ee aan dan iyo heelo midna ka lahayn in canshuurahooda lagu bixiyo
xalinta wadamo ka fog ama aan waxba ka khuseyn ama aay caruurtoodu ciidamo ahaan
ugu diraan dalalkaas, iyagoo ficilkoodu lahaa “khalii xaaraami yamuut”.
Arintaani waxay kashifeysaa in dunida aay haysato dhibaato akhlaaqeed (ethical &
moral crises) taasoo aay weheliso faafida dhaqanka dukaameysi (consumerism) oo
la doonayo in lagu faafiyo dunida oo dhan si aay booska uga riixdo dhaqamadii
kale ee dhowrista ujeedooyin wadaniyadeed ama diimeed.taasoo ku kaliftey
malaayiiin dhalinyaro ah inay ku hoobtaan dagaalkii labaad ee dunida iyagoo
difaacaya qabka wadaniyadeed ee dalalkooda, taasu waa taariikh wiilka germalka
ahi maanta waxuu u dhimanayaa credit card-ka jeebkiisa ku jira inuusan maran
khudbadihii xamaasadeed ee hitlar waa sheeko lasoo dhaafey.
Isjiidjidki dagaalkii qaboobaa ee labada quwadod ee bariga iyo galbedku waxuu
siiyay shirkadaha gooni-goosatada(capitalist multinational corporations) fursad
aay ku faafaan wadamada dunida oo dhan xitaa kuwii shuuciga ahaa, kororka
shirkadaha gaamurey ee caalamiga waxaa laga dareemi karaa 1960 waxay ahaayeen
7000 shirkadood oo qura, halka 1989 aay gaareen 37,000/.(shirkadahani waa kuwa
ka howlgala meelo ka baxsan wadamadii asalka aay ka abuurmeen ama joogitaan ku
leh qaaradaha aduunka badankood).halka 2002 aay ahaayeen 63,000 shirkadod oo
caalami ah, shirkadahaani xuduud iyo khariidad midna maleh.
Coco-cola,Pepsi,Walmart, GE iyo McDonald waa wejiyada durba kusoo dhacaya
miskaxdaada, tusaale ahaan McDonald waxay dunida ku leedahay 18,700 makhaayadood
oo aay galaan maalin walba 33 milyan oo macaamiil ahi, qoraaga caanka ee New
York Times Thomas Friedman ayaa ku doodey in McDonal laba dal oo aay
makhaayadaheedu ku yaalaan oo dagaal dhex maray aaysan jirin. Taas oo ujeedadu
aay tahay in wadamada makhaayadaha McDonaldn laga furaa aay yihiin dalal heerka
maciishadu iyo qaab nololeedka dadku uu gaarey heer tamashle ah oo aay dagaal
uusan boos ku lahayn qorshahooda.
Shirkadahaani waxay noqdeen shabakado baaxad leh oo awooda inay maamulaan
dhaqaalaha aduunka iyagoo aan dowladaha waxba waydiin,waxaa cadaatay in xitaa
dowladaha waawayni aaysan waxba ka qaban Karin shirkadahaan ama aaysan hor
joogsan Karin qorshayaashooda,iyadoo aalada kombuutarkuna aay sii kordhisey
awooda khayaaliga ah ee shirkadahaasi kadib markii shabakada netku aay noqotay
meesha laga hago iyadoo aay dhici karto in qiimaha lacagi aay dhulka
gasho,malaayiin shaqaale ah aay shaqo beelaan islamarkaana aay masalafaan
shirakaad badani.
China oo ahayd ilaa waqti dhow dalka hormuudka u ahaa dalalka soo koroya ee iska
caabinta qooqa shirkadahaas ayaa iminka waxuu u muuqdaa inuu isku dhiibey,iyadoo
gobolo badan oo kamid ah xeyndaabyada dhaqaale(Special Economic Zone)aay ka
baxeen awooda dowlada oo aay ka taliyaan shirkadahaasi gaamurey.
Qaramada Midoobey waxay ku qiyaastaa in shan bilyan qof aay ku nool yihiin
magaalooyin sabool ah, taaasoo u dhiganta 70% tirada dadka dunida .tani waxay
hulaaban tahay khatar weyn oo ah inay faraha ka baxaan dhibaatoyin degaan,
nololeed caafimaad iyo in dowladahu aay gabaan inay xakameeyaan maamulka
magaalooyinka isku raranta ah ee xadka dhaafey.
Shaqo la,aanta caalamiga ahi waxay ku khasabtay dalalka soo koraya inay qalqaalo
weyn u galaan sidii shirkadaha waawayn aay dalkooda ugu soo dhawayn lahaayen si
bal dadkooda shaqo la,aantu dilootey aay shaqo uga helaan islamarkaana aay
waxuun farsamo ah uga kororsadaan si aay wax soosaarkooda wax uga
tarto.haseyeeshee shirkadaha gaamurey maalgashigooda 70% waxay galiyeen 24-ka ee
warshadaha hore uga marey, halka waxii mashaariic ah ee kasoo hara aay u
weeciyaan dalalka koonfur bari Aasiya iyo dowladihii soofiyeetigii dhacay iyo
qaar ka mid ah latiin ameerica. Waxaa usoo hara dalalka soo koroya mashaariicda
waxsoo saarkeedu liito islamarkaana deegaanka aafo ku ah.
Intaas waxaa dheer in wadamada soo koroyaa mashaariicdaas aay ku bedeshaan in
taladooda iyo haybada madaxbanaanidooda aay baayac gasho,taasoo tumaati ku
noqota xoriyadii aay darteed u soo halgameen,midaani waxaay gaartey in wadamo
aay ka mid tahay Porto Rico iyo jasiirada Balarwey aay diidaan inay ka xoroobaan
maraykanka si aaysan banaan ugu soo dhicin, halka jasiiradaha Comoros aay ka
ciilkaanbiyeen xoriyadii aay France ka qaateen kadib markeey isku filnaansho
dhaqaaleed aay ku gaari waayeen xornimadii aay ka heleen!!!.
jeebweynta dhaqaalaha dunidu waxay danaynayaan mashaariic faaiido degdeg ah leh
islamarkaana degdeg looga bixi karo hadii loo baahdo, waxa aay xeerinayaan oo
kaliya waa masuuliyada dadka saamileyda ah ee shirkadahooda saamiyada ku leh
kuwaas oo aan cid taqaanaa jirin ,taasoo ka dhigan in dad aan la aqooni oo aan
cid dooratey jirin aay yihiin kuwa go,aaminaya qiimaha lacagaha dunida,qiimaha
quutul daruuriyaadka,tamarta,xadiga shaqo-shaqaale dhowrsanaanta deegaanka ee
dalalkaas tani waxay hal bacaad lagu lisey ka dhigaysaa mabaadida
dimoqraadiyada.
Wadamada soo koroyaa waxay maanta joogaan marxalad adag,waayo wadamada
warshadaha horey uga maray waagii hore isbaaro uma dhigan jirin talaabida ama
hayaanka tiknooloojidaha laga soo bilaabo xiligii kacaankii warshadaha taasoo
ugogol xaartey in aaya koobiyeeysato farsamooyinka cidii doontaa oo karti iyo
aqoontaas lehi, maantase waa adag tahay midaasi waayo tiknooliyadii iyo
farsamooyinkii waxaa loo samaystay sharciyo lagu waardiyeeysto oo lagu dhowrayo
xuquuqda lahaanshaha ikhtiraca fikradeed(Intellectual Property Rights) waxaana
xaalku u muuqdaa jugjug meeshaada joog, waxaa taas ka sii daran in dadkii wax
ikhtiraaci lahaa ee u dhashay dunida soo koreysa si joogto u guranayaan wadamada
hore u maray iyadoo halkaas inta la geysto oo dhaqaale fiican la siiyo lagu
shaqaysanayo taasoo seejinaysa wadamadii aay u dhasheen inaysan waxtar umadeed
aaysan ka helin miskaxdii dadkooda,tusaale ahaan shirkada sida uga macaashtay
software-da ee uu leeyahay ninka ugu hodansan dunida Microsoft shaqaalaheeda 60%
waa Hindi uu kasoo uruursadey India kuwaas oo halkaas uu ku maalo garaadkooda
aakhirkana iyagoo cimriyey oo miskaxdoodu daashay ayuu soo fasaxayaa inta badana
waxayba la qabsadaan barwaaqada dalalkaas oo waay adag tahay inay dib ugu
laabtaan dalkii aay ka yimaadeen mar haday green card iyo dollar isku
haystaan!!.
Xitaa shaqaalaha wadamada horey u maray qudhoodu ma faraxsana waayo qaabka
hantileydu aay waxsoosaarka u maamulayaan maanta waa in laga dhigo waaxyo wax
soo Saar oo badankiis ku tiirsan tiknooloojiyad iyo mashino ootoomaatik ah,
taasoo hoos u dhigaysa awoodii ururada shaqaalaha iyo gorgortan wadareedkooda-
(Collective bargaining).
Dowladaha hodanka ahi ama jeebweynta galbeedku waxay si weyn iskaga
indhatirayaan dadaalkii gaarka ah ee Adam Smith –Aabihii cilmiga dhaqaalahu- uu
siiyey xubinta akhlaaqeed ee dhaqaalaha, waana isagii cadeeyay in danta
shakhsiga ahi aaysan noqon Karin mida dabada ka riixda horumar dhaqaale, hadii
aan lagu dabrin hab-dhaqan macquul ah, dowlada ayaana masuul ka ah inay u
kafaalo qaado maciishad isku dhow shaqaalaha taasoo qayb ka ah shaqooyinkeeda
dastuuriga ah.
Waxay ku adkeysanayaan jeebwayntu galbeedku in dhaqaalaha aay maamusho gacan
qarsoon oo aan aqoon akhlaaq iyo damiiir midna iyadoo suuqa dhaqaalaha uu kusoo
baxayo qofkii ama shirkadii awooda inay kobocdo iyadoo la jaanqaadeysa duruufaha
jira, halka mowjadaha suuqu aay cagta marinayaan cidii aan awoodin tartan.
Macnihii horumarka waxaa loo badalay in la faafiyo dabeecada
waxgadashada(consumerism)waxaana daraasado aay sameeyeen bangiyada aduunka lagu
sheegay in 900 malyan oo qof oo ka mid 6 bilyan ee dunida guudkeeda ku dhaqan oo
kaliya ahi ay awoodi karaan inay gataan kaararka lagu galo xayndaabka
dukaameysiga
Dabeecada dumeekeysigu waa mid khatar ku ah degaanka,waayo maalin walba waxaa la
nabaad guurinayaa dhul beeraad baaxad leh si looga dhiso guryo iyo warshado iwm
waxaa si naxariis daro ah loo jariifayaa kheyraadka kaluunka iyadoo aan loo
aabayeeleyn, waxaa si joogto ah wadamada soo koroya loogu aasaa dhulkooda
wasakhda warsshadadaha dalalka hore u maray(Somalia tusaale u qaado)
Arimahaasi waxay keenaysaa in wiilka maraykan ku dhashaa uu yahay culeys ku soo
kordhay degaanka 35 jibaar in ka badan culeyska degaan ee uu soo kordhinayo
cunuga ku dhasha India ama Barazil waayo 35 jeer ayuu ka awood gadasho badan
yahay.
Qiyaasahu waxay sheegayaan in sanadka 2020 tiradaha dadyowga dunidu aay gaari
doonto 8 bilyan oo 6.6 bilyani aay ku nooshahay dalalka danbeeya dhaqaale ahaan,
halka 3 bilyan aay ku nooshahay nolol af-iyo gacan isla waa ah,840 aay gaajo la
ildaran yihiin ,boqololaal milyana aay shaqo la,aan gidaarada la fadhiyaan,waxaa
taas ka daran in 550 magaalo oo baaxad weyni aay hoy u noqonayaan magaalo walba
hal malyan oo kuwaas ka mid ah arimahaani waxay hordhac u noqon karaan in falal
danbiyeedyadu aay sare ugu faafaan magaalooyinkaas degaamaduna aay u wasakhobaan
si aan hore loo arag,halkaasna aay ka dhashaan masiibooyin aan hore loo arag.
Arintaani waxay su,aal weyn dul dhigaysaa heykalada dowlado la moodka ah ee ka
jira wadamada soo koroya badankood oo islamarkaana gabay inay shacabkooda aay u
xasiliyaan luqmada cayshka ah,waxay tani isweeydiin ka keenaysaa khariidadadihii
gumeysigu ka tegayay dalalka dunida sadexaad iyo qaababkii uu isku raaciyey in
dib loo eego aay tahay mid khasban,waayo dowladaha yurub waxaa yagleelkooda asal
u ahaa isbahaysi luqadeed,taariikheed,diimeed(mad-habeed) ama umadeed oo si xoog
leh iskugu xirayay taasoo suurtagalisey inaay noqdaan dowlad waliba mid isla
jaanqaadi karta islamarkaana noqon karta qaran ujeedo iyo himilo leh
islamarkaana abuurtey dabaqad dhexe iyo suuq balaaran iyo nidaamyo dimoqraadi ah
oo aay isku xukumaan.
Halka dalalka dunida sadexaadna uu xaalku sidaas ka duwan yahay tusaale ahaan
dowladaha carabta oo aay ka dhaxeyso inta badan waxyaalaha hal dowlad ka dhigi
kara ayaa waxaa lookala dhantaalay dowlado yaryar oo aay dhacayso in hal qabiilo
aay ku kala oodan tahay 3 dowladood ama 5, Dowladaha dunida sadexaad qaar badan
oo ka mid ahi iska dhaaf inay horumar gaaraane waxay culaab ku yihiin shacabka
dalalkaas iyo dunida inteeda kale oo kax ka taagan tuugsidooda deeq ama deyn
doonka ah.
Wadada kaliya ee u furan waa inay u jiheystaan koboc farsamo oo tartiib ah sida
aay yeeleen wadamada bariga fog ee Malaysia, outh Korea, Taiwan and Singapore
iyo South Korea oo ah dalalka kaliya ee madaxa kala baxay dalalka soo koroya
inkastoo horumarkii yaraa ee aay sameeyaan aay iyo inay lugaha la galaan
mashaqooyin iyo kharbudaado daakhili ah oo ka dhashay quusta iyo rajo xumada ka
dhalatay hungowga dowlado waxtar u noqda dadkooda kadib dagaalo gobonimo doon oo
lagu riiqday.
W.Q.Siciid Xuseen Ciid.
shariifka@yahoo.co.uk
PhD Candidate
Afeef: Aragtida qoraalkan waxaa leh qoraaga ku
saxiixan
Faafin: SomaliTalk.com | May 24, 2007
![](/terry/arrowleft.gif)
![](/terry/arrowright.gif)
|