GUUSHA JABHADDA ONLF WAA GUUL
SOOMAALIYEEDAhmed Hassan
somalidoon@gmail.com
Waxa hubaal ah in beryahan
Soomaalida ay ku jiiftay guul darro midba mid riixeyso.Waxa inta
magacan wadaagtaa noqdeen qaar midba mid cuno, ilooba waxa ka
dhexeeya, oo arka uun khilaafkooda. Waxa ay noqdeen dad aan meelna
ku nabadgelin,hadday nabad helaana aan heysan maamul u damqada
dadweynaha. Waxa arrintan ay keentay in cadowgii abed aynu isku si u
arki jirnay, oo muftaax u ah wadajirkeenu, noqdo mid cid kasta oo
rabta madaxnimada qayb kasta oo inaga tirsan.
Hoos-taga cadowga Xabashida kama
fayooba Somaliland iyo Puntland. Waxa dhab ah in labaduba ay madaxa
hoos u dhigaan, kolka Meles la hadlaayo, Koonfurna xoog iyo dilbaaba
lagu qabsaday. Waxa se ka horeysay in dhammaan dagaal oogayaashi
Koonfur ka jiray ahaayeen qaar iyagoo col ah dhammaan la saaxiib ah
Itoobiya.
In Soomaalidu dawlad keliya noqdaan
iyo inay dhowr noqdaan, ma aha wax muhiim ah, hadday cidda ay u
taliyaan dantooda wadaan, gartaana in dhammaan magaca Soomaali
wadaagaan. Inay leeyihiin af, dhaqan iyo diin midaysa. Inay taasina
dhalisay inay yeeshaan cadow . Waxa manta Soomali u jabtay cadow
boqolaal sano ku taamaayey inuu dhaqankooda iyo diintooda goonida ka
dhigtay jabiyo, sidii uu qarniyo hore u baabiiyey ummadahii geeska
Afrika degaanaa.
Waxa dhab ah inaynu dhammaan min
Jabuuti ilaa NFD aynu qoomamo iyo ciil ku jirno. Kan manta nabadda
haystaa, waxa uu ka fakirayaa mustaqbalka oo u muuqda mid madow,
haddaan maanta leysla arag waxa soo fool leh. Ma aha wax lagu farxo
jibinta walaalkaa, marka uu fiyaaradda kuu joogo cadow raba inuu ku
dulaysto.
Jabhadda Ogadenia oo guul taariikhi
ah manta ka soo howsay cadowga, waxa ay diirisay dareenka
Soomaalinimo meel aynu joognaba. Waxa farxay reer Hargeysa, reer
Xamar, reer Gaarisa, Reer Jabuuti, iyo reer Jigjiga. Meel kasta oo
Soomaali jogto waxay u tahay guul iyo farxad aan muddo la arag.
Intii ku diidaysay magaca Ogadenia
oo u arkaayey qabiil, manta waxa ay leeyihiin hambalyo iyo Illaahay
magaciina ha raajiyee, waad na diiriseen. Waa dareen walaalnimo,
waana mid cadowgeena mar kale tustay inaynu nahay ummad weli
dareenkeedu nool yahay.Farxadda iyo murugada oo la wadaagaa, waa
markhaatiga walaalnimo, waana hiil weyn oo been ahayn. Horaa loo
yidhi qosolna hiil noqay. Waxa manta loo baahan yahay inaynu si dhab
ah u qiimayno mustaqbalka. Waa inaynu faca soo socda u tabinaa,
taariikhdii awoowyaashan, hamigoodii iyo summadda goonida inoo ah.
Jiritaanka Soomaalinimadu, waa mid dhammaan ina saran. Badbaadinta
jiritaanka Soomaaligu, waa mid saran reer Soomaliland, Reer Jabuuti,
reer Xamar, reer NFD, iyo geesiyada Soomali Galbeed.
Guusha aynu ka soo howno
cadowgeenu, waa mid aynu wado leenay. Kolkaas waxa loo baahan yahay
inaynu dirirta gudaheena soo afjarno, una guntano badbaadinta
Soomaaalinimada la rabo in Geeska Afrika laga tirtiro. Reer Xamar
waxaanu u baryayaa inay qabiilka dhaafaan, oo qaran dhisaan, inay
xoogood isu geeyaan, kana guulaystaan Cadowga khilaafkoodu keenay
inta aanu ku xidideysan dalka. Sidoo kale waxaan uga digayaa reer
Soomaliland inay dhibaatadii soo gaadhay ilowsiin cadownimada
Xabashida iyo himigooda jiri-taankeena diidan.Marna ma aha in si
kastoo aynu u kalo tango, in Soomaaliga laga soo dhoweysto Cadow
aynaan diin iyo aftoona wadaagin. Ha noqoto Soomaalinimadu mid
ilaalinteeda aynu u simanay, hilkuna dhammaan ina saran yahay.
Guul iyo Wadojir
Ahmed Hassan
somalidoon@gmail.com