Baraarujin qaybtii 9aad ----- 28-12-2007Dagaalku
waa mid diineed
Itoobiya waxay Soomaaliya haysataa hal sano hadaan
iswaydiino, sanadkaas ay haysatay Soomaaliya, maxay dhibaato
gaarsiisayeen, qoraal kuma soo koobi karno, laakiin waxaa
jira dad qora taariikhda haddii Rabbi idmo maalin baa la
heli doonaa dad ka qora buugaag cadawga dhibaatada uu na
gaarsiiyay.
Horay ayaan u qoray dhowr maqaalo, maanta waxaan kaliya
oo aan idin xasuusinayaa in uu dagaal yahay mid diineed,
arintaasna waa ogyihiin dadka leh caqliga saliimka ah.
waxaan horay uga soo hadlay Dawladihii ka danbeeyay in ay
dumiyaan Maxkamadihii Islaamiga ahaa, ulajeeda arintaas loo
sameeyana waa islaam la diririd.
Waxaa jira buugaag looga hadlay ciwaanka aan soo sheegay
, Hadaba waxaan jeclaystay in aan wax yar kasoo qaato sadex
buug,waxaan rajaynayaa in ay noo noqoto waano taariikhi ah.
1- waxaa jira Buug la yiraahdo Innaga iyo xabashi oo ka
hadlaya taariikda dahsoon ee soomaaliya iyo Xabashida, si
gaar ah taariikhdii Iimaam Axmed Gureey, waxaa qoray Maxamed
axmed Al-caamiri , waxyaabaha buuga ku qoran waxaa ka mid ah
warqadii uu qoray Boqorkii xabashida Menelik 2aad 1883
dawladaha reer yurub ee kirishtaanka ah, ayuuna warqada u
qoray wuxuu yiri isagoo sheegaya xuduuda dalka Xabashida
waxay ka bilaabataa xuduudyada dhabta ahi badda cas ilaa
badyaradada Sanburu(dhulka hadda keenya), wuxuu sheegtay in
Xabashidu tahay jasiirad kirishtaana oo ku dhex taal badweyn
gaala ah(gaalada wuxuu ka wadaa Muslimiinta)14 qani. Wuxuu
sheegtay in uu niyada ku hayo in dhulkaas uu xoog kusoo
qabsado, wuxuu sheegtay in uu aaminsan yahay rabbiga
dawladaha kirishtaanka ah ku hanuuni doono iney u soo
celiyaan xaduudyadii badda ama qayb ka mid ah.
Hadaba arintaas Xabashidu waa wax ay qabto ama diid ama
yeel.
Waxaa kaloo xusid mudan in la sheego Axmed guray oo ragaas
la dagaalamay 15 sano, intuusan dagaalka bilaabin wuxuu ka
shaqeeyay in uu mideeyo Muslimiintii si gaar ah wuxuu qaylo
dhaan u dirsaday Soomaaliya, qaylo dhaantaas oo ay ka
jawaabeen qabiilo badan oo Soomaali ah.
Waxaa kaloo xusid mudan in uu talooyin uu soo gudbiyay
tarjumaha buuga oo ah in aan midowno si gaar ah Culimada iyo
odayaasha, oo ah in Alle laga baqo, xoogeenana aan midayno,
oo aan gaalada meel uga soo jeedsano, khilaafka dhexdeenana
aan hilmaano, Soomaali oo dhan hal doon ah bay saaran
tahay,gaaladuna iyagoo dhan bay u socotaa.
Sidoo kale wuxuu sheegay in Diinta asalladeeda ka midah
in qof kastoo muslim ahi,muslimka kale weli u noqdo.oo u
gargaaro,oo difaaco,oo dhibka gaara ka xanuunsado,
guushiisana ku farxo, gaaladana necbaado, oo uunan gacan
siinin,oo Muslimiinta uga hiilin.waxaan filayaa intaas nagu
filan......
2-waxaa kaloo jira Buug uu qoray Jalaal Al-Caalam oo ka
hadlaya in lagu tashaday in Islaamka la burburiyo,
dadkiisana la baabi,iyo, isagoo ka hadlaya qorshaha naloo
degey wuxuu soo qaatay tobon qodob, waana kan tobankii qodob
ee fiiriya, waxaa la socday faahfaahin badan, marka qodob
qodob adigu u faahfaahso ma jirtaa mise ma jirto,waana mid
wali taagan!!!
1- Tirtirka iyo ka hortaga in Islaamka garsoor iyo xukun
laga dhigto.
2-In qur,aanka la suuliyo.
3-Waa in la kharibaa Muslimiinta akhlaaqdooda, garaadkooda
iyo xiriirka ay Alle la leeyihiin intaba, raaxo iyo tumasho
oo kaliya la jeclaysiiyaa, riwaayado,aflaan,heeso anshaxa
iyo asluubta wanaagsan lagula dagaalo lagu mashquuliyaa,
dumarkooda la fasaadiyaa, laguna diraaoo la nacsiiyaa
xishoodka iyo Xijaabka Islaamka amray, iyo khayrka uu la
dooni, ragana ay dugsiyada iyo xafiisyada kula jiraan oo ay
isku dhafanaadaan oo aan la kala soocin, si xumaha ugu dhex
barbaaro.
4-Midnimada Muslimiinta waa in la baabi,iyo.
5-In Muslimiinta laga shaki geliyo Diintooda.
6-Carabta oo jileecada ku baaqi ahaata.
7-Dunida Muslimka waa in xagga siyaasadda laga dhex aasaasaa
Diktatooriya.
8-Muslimiinta oo laga fogeeyo xooga Warshadaha, layskuna
dayo inaysan waligood ka bixin ku dhaqanka alaabta reer
Galbeedka.
9-Dadaalka joogtada ah oo ay u marayaan sidii Muslimiinta
kartida leh looga fogayn lahaa in ay Dawladaha Muslimka ah
madax ka noqdaan, yaysan hinqan oo kicine ayagoo Islaamka
horumar ku sameynaya.
10-In haweenka la fasaadiyoayadoo dhilaysiga la dhaqan
gelinayo,lana fududeenayo.
Sidoo kale isagoo ka hadlaya dagaaladii dhex maray
Soomaaliya iyo Xabashida 1977,wuxuu sheegay in dagaalkaas
shuuciyadda hub iyo ciidan ku taakulaysay xabashida reer
galbeedkana gaar ahaan Marykanka,ingariiska,faransiiska iyo
Jarmalkuna waxay xooga saareen in aan Soomaaliya hub la
siin. ama aan laga iibin.
Sidoo kale waxa uu buugu ku qoray in hal maalin Masaajid
lagu dilay 1000 qof, oo tukanayey Salaad, arintaasna waxay
ka dhacday Magaalada Qabridahare, wuxuuna sheegay in falkaas
dugaagnimada ah aysan ka hadlin hal Dawlad oo reer Galbeedka
ka mid ahi..Taasina waxay daliil cad u tahay xumaanta ay noo
qabaan, colaada ay noo hayaan bayna ku tusinaysaa..
Arimahaas iyo arimo ka badan baa jira, hada waxa
Soomaaliya ka dhacaya waan u jeednaa waxaan kaliya oo nagu
filan Gaal iyo Gaalo raacba wax ka hadlay ma jiraan.
Dhibaatada lagu hayo shacabkeena, Alle ayaa quraanku
noogu sheegay oo wuxuu yiri:(waxay ka muuqataa caradu
afkooda, waxay qarsan laabahooda yaana ka weyn) suurada
aal-cimraan aayadda 118
Qolada Sheegata golaha amniga ama UN, mar walba kama hadlaan
xasuuqa loo gaysanayo shacbiga Soomaaliyeed, horay waxaa uga
hadlay rag badan oo suugaan ku cabiray in meeshaas ay tahay
xero shaydaan...
Horaa abwaan soomaaliyeed u yiri: Ninna kama dhaxaysee
jamciyad, Nacas qaruumaadka dheh..
3-Buuga sadexaad waxaa la yiraahdaa Tuugo
sharciyaysan!!!!(Official bandit), waa buug ka hadlaya
dhibaatadii loo gaystay qaxootigii galay Kenya 1991, waxaana
buuga qoray Maxamed-deeq C/madar "Haldhaa" wuxuu ku sheegay
in gabdho lagu dhibay xijaabka ay qateen, in kuwo lagu
garaacay, sidoo kale in dad loogu galay Masaajidada, kuwana
salaada markay soo aadan lagu sugo Albaabka masaajidka,
sidoo kale in mar wiil u xabsi ku jiray lagu yiri aad
kaniisadda maanta waa Axad.
Dhibaatada qaxootigaas loo gaystay waa badnayd, waxaase
jiray warbixin ay soo saartay amnesty International bishii
juulaay 1995 waxay ku sheegtay in boqolaal haween ah in la
kufsaday intii u dhaxaysay 1992 ilaa 1993, kufsashadaasna
waxaa sameeyay ciidamada kenya, waxaa Booliska ku qafilnaa
in wax ay doonaan ka samayn karaan.
Waxaa suugaan ku soo koobay wixii ku dhacay Qaxootiga
M/ud C.laahi ciise sangub, gabay qayb ka mid ah waa tan:-
Kadeed iyo dhib baa helay dadkii, kenya soo galay dheh.
Kuuja iyo leeta iyo keen, kaydkii raamsade dheh.
Jeebkaygu koley buu yahay, kaydiyaa lacag dheh.
korkayga xafiis laagu furay, kaambo laaluushaha dheh.
kastankoodu waa boob iyo kiis la daydayasho dheh.
Xasuus: Halkaan waxaan xasuusinayaa dadka soomaaliyeed in
30.12.2006, in la xiray xadka Kenya ay la leedahay
soomaaliya,iyadoo laga xirtay qaxootigii rabay in ay galaan
Kenya kuwaas oo kasoo cararay dhibaatada ciidamadda
Itoobiyaanka, amarkaas waxaa bixiyey dawladda
Maraykanka,iyagoo ku andacoonaya waxaa nasoo galaya
Maxkamadihii, sidaasna waxaa noo sheegay shiikh lagu
kalsoonyahay, oo markaas joogay libooyo-Kenya.Taas waxaa ka
daran in dadkii la damcay in loo gurmado, loona diidey
gurmadkii aadi lahaa!!!!!.Hadaba dadkaas maxay galabsadeen
oo loo dulminayaa!!!!
Alle ayaa noo sheegay waxa Si guud Maanta dadka Islaamka loo
dhibayo, si gaar ahaaneed soomaaliya, Alle wuxuu noogu
sheegay Suuradda al-buruuj aayadda 8 "Waxay ku naceen
dadkaasna ma jiro oon ahayn inay rumeeyeen Eebaha adkaada ee
la mahadiyo"
Hadalkayga waxaan kusoo gaba gabaynayaa Hadalkii Alle,: "Ha
moodin in Alle moogyahay waxa ay daallimiintu samaynayaan.
Wuxuu ugu dib dhigayaa uu,n maalin ay indhuhu libiqsi
deynayaan oo ay degdegsanyihiin oo madaxoodu cirka ku
laalanyahay, daboolka indhahooduna aanu soo laabma hayn,
laabtooduna ay madhantahay" Suuratul-ibraahim 42-43
Sidoo kale Alle wuxuu yiri:"Waase dhib saaran yahay uun(jid
lagu leeyahay) kuwa dulmiya dadka kuna kibra dhulka xaqdaro,
kuwaas waxaa u sugnaaday cadaab daran".
Qoraalkayga waxaa ku soo gaba gabaynayaa duco Illaahay ha
noo aqbalo aamiin, , Ilaahay baan baryaynaa talo saarayna,
mar walba isagaana nagu filan...Illaahay waxaan ka baryaynaa
in uu xaqqa mar walba nagu sugo, gaalana hoojiyo
aamiin,aamiin.
Qaybihii hore ee qormadan halkaan ka akhri.....
Qore: C/raxmaan C/laahi
waaislaamaah@hotmail.com
Daabaco
Boggan | Print
