Dowlada Hoose ee Garoowe oo qaaday Olole Balaaran oo Nadaafadeed.
Garoowe: 24/12/2007 Dowlada Hoose ee Garoowe ayaa qaaday Olole
Nadaafadeed oo ay ka samaynayso magaalada dhamaanteed. Ololahaan
dhinaca nadaafada ah ayaa waxaa soo qaban-qaabisay D/Hoose ee Garoowe
oo uu hormuud ka ahaa Gudoomiyaha Golaha Degaanka Garoowe, ahna Duqa
Caasuumada DGPL, C/qaadir Cismaan Samatar(Food-cadde) waxaana ka
qayb-qaadanayey masuuliyiin ka tirsan Golaha Degaanka Garoowe,
Shaqaale aad u fara badan, gawaarida,nooca Soomaalidu u taqaan
Iska-Roge. Ololahaan oo ah kii ugu balaarnaa ee dhinaca nadaafada ah
ayaa waxaa halku dhegyo u ahaa erayo sida" Inta Qashinku kuu jiraa,
cudurku kuu jiraa,"Nadaafadu waa Iimaanka barkiis," Gurigaaga ka
qaad qashinka, hana geyn guri kale," Sii jidka xaqiisa hana, ku
shubin biyaha wasakhda ah laamiga iyo jidadka dadku marayaan ee ku
shub haamaha aanu ugu talo galnay, IWM.
Ololahaan oo bilowday 24/12/2007, ayaa la sii wadayaa tan iyo inta
laga dhigayo nadiif goobaha qashinka dadku ku qubeen, sida meeshuu ka
bilowday olaluhu oo ah, buundada dhinca bari ka xigta magaalada ee loo
yaqaan Ex-Control, Suuqyada, meelaha ay degan yihin dadka soo
barakacay, jidadka magaalada dhexmara, wadada wadnaha lo yaqaan ee ugu
muhiimsan wadooyinka Garoowe taas oo isku xirta magaalada iyo goobaha
ugu muhiimsan magaalada sida , Isbitaalka Guud ee Garoowe,
jaamacadaha, PSU, GTEC, dugsiga sare ee Gambol, Xarunta Agoonta
Garoowe, Xerada Ciidamada ee 54-aad iyo meelo kale oo aad muhiim u
ah.
Qashinkaan ayaa waxaa la, geynayey goob loogu talo galay oo magalada u
jirta masaafo dhan 9 Km, halkaas oo markaba dab lagu qabad-siinayey si
aan cuduro uga dhalan.
Shacabka reer Garoowe ayaa aad ula dhacsan shaqada ay wado dowlada
Hoose ee Garoowe, oo ay ku tilmaamaan tii ugu shaqada badneyd ee abid
so marta, iyadoo D/Hoose ay shaqooyin muhiim ah ka qabatay guud ahaan
bilicda caasumada sida jidadka oo ay u samaysay jidad dhaadheer oo
waasac ah kuwaas oo soo jiitay in magaaladu ay aad u sii fido oo
qiimahoodu uu gaaro halkii ugu sareeyey halka aan awal xataa lacag
la'aan lagu qaadan jirin, iyadoo sidoo kalena ay halkaas ka dhismeen
guryo aad u qurux, waxaa sidoo kale ay D/Hoose ku guulaysatay
qaab-dhismeedka magaalada oo kaba qurux badan qaar ka mid ah
caasuumadaha caalamka.
Hadaba, inkastoo ay shacabka Reer Garoowe aad ula dhacsan yihiin
shaqada Dowlada Hoose u hayso, hadana nasiib daro waxaa muuqata in
shacabku ay ka gaabiyeen doorkoodii oo aysan si wadaninimo ah u bixin
canshuurta intooda badani, sidoo kalena aysan ku tabarucin wax-qabad
ku aadan degaankooda, sidi lo horu marin lahaa , sidaas darteedna ay
ku culus tahay D/Hoose in kaligeed daboosho baahiyaha jira.
Si kastaba, waxaa la filayaa in Ololahaan balaaran uu soo geba-geboobo
maalmaha fooda inagu soo haya(Insha-Allaah).
Gooni , Garowe Faafin: SomaliTalk.com | Dec 25, 2007
|
Daabaco
Boggan | Print