Xal U Helida Tahriibta

Cadbiraxman Xariri-Saudi Arabia
xariri@hotmail.com

Inkastoo Maamul Goboleedka Puntland uu dhowr jeer isku daydey inuu wax ka qabato mashaqada tahriibayaasha oo aad moodo inay noqotay falaar dhabarka kaga taal umada soomaliyeed, hadana sida muuqata dowlad goboleedku waxaad moodaa inay aakhirkii faraha ka laabatay xal u helida masiibadaas oo ay ukala baxday Doonyo-leeyda mujirmiinta h iyo dhalinyaro dhimashada ka door biday xaalka wadanku yahay filayna in badaase ka xigto nolo karaama leh.

Hadaba marka la eego baaxada mashaqada, lama filan karo in maamul goboleedku gebi ahaanba joojin karo tahriibida iyo safarka dhimashada wata ee ay isku biimeeyaan dadka doonyaha dhimashada raacaa, mana aaminsani in awood kasto oo ciidan oo la isticmaalo ay midho dhalin karto waxaanse ku talin lahaa sidan.

Adeegsiga Bulshada Rayidka ah

Waxaad moodaa inay meesha ka maqan tahay doorkii ama kaalintii ay ahaayeen bulshada rayidka ah ee reer puntland sida Aqoonyahanahda, culimaaudiinka, wax garadka, iyo ganacsatada kuwaasoo wax badan ka bedeli lahaa xawliga ay u socdaan tahriibayaasho hadii ay sameeyaan "Urur ama gudi taageera Tahriibayaasha" waxyaabaha gudigaasi ama urukaasi qaban kari lahaa waxaa ka mid ah

Inay tahriibayaasha ku wacyi geliyaan ugana sheekeeyaan khatarta ay leedahay Tahriibtu kuna qanciyaan inan Yaman tegideedu ayan u qalmin in nafta lagu bedesho, nolol ka duwan ta soomaaliyana ayan Yaman iyo Saudi Arabia toona ool.

In ay doonyo-leeyda la xisaabtamaan, fahamsiiyaana in aan aakhiro iyo aduunka toona la dhaafayn hadii qof islaam ah si ula kac ah bad loogu tuuro oo naftiisa loo gooyo. Lana takooro oo la ogaado kuwa dadka bada ku daadiya ama dila rakaabka

Inay hubiyaan in doonyaha la raacayaa yihiin kuwo u qalma ama iska xejin kara safarka "Seaworthy" ayna uga digaan tahriibayaasha haday arkaan in doonyaha iyo matoorkoodu ay ciladaysan yihiin ayana gaari karin xeebaha yaman.

Inay diiwaan geliyaan dadka safraya

Waxaan shaki ku jirin in dad badan oo ku dhinta badda ay u sabab u tahay iyagoon aqoon dabaasha sidaa darteed wax yaabaha ay qaban karaan bulshada rayidka ahi waxaa ka mid ah inay Tahriibayaasha siiyaan (ama ka iibiyaanba) jaakadaha dabaasha "Life Jackets"

Isku soo duubo la dagaalanka tahriibtu waxay u baahantahay inay ka qaybqaataan dhamaan soomaalida meelkastoo ay joogaanba iyagoo la kaashanaya caalamaka iyo inta ay dhibayso arwaaxda shacabka soomaaliyeed ee badda ku halaagmaysa.

Walaahu Aclam


Cadbiraxman Xariri-Saudi Arabia
xariri@hotmail.com