Biyo Zenawi Baa Nala Cabsiiyey (We Were Baptized
Zenawi)
C/Waaxid
C/hi Khaliif
London, UK
cabdulwaxid@hotmail.com
Masiixiyiinta dhexdeeda waxaad ka maqleysaa kuwo loogu biyo shubay
nabi Ciise (CS) ama hooyadii (RC) ama kaniisadaha ay kala heystaan sida
katooligga oo kale. Laakiin inta la ogyahay taariikhda Soomaailada ma
jiro niman ka horreeyey dhabolifyada Tigreega oo nin u dhashay Itoobiya
ku biyo shubtay!
Soow diintu ma oran qoomkii Ilaahay halaagayo waxaa hormuud looga
dhigaa kuwa inkaar qaba? Yaa garanaya cid Soomaaliya uga dhib badan
Zenawi iyo dabodhilifyadiisa? Maxaa Mbagathi kaddib qof kasta oo
madaxweyne ama wasiir koowaad ama madaxeyne barlamaan sheegtaa ugu ordaa
Addis Ababa xitaa iyadoon mararka qaarkood la dhaarin xubnaha
wasiirrada? Anigu waxaan aaminsanahay inay kasoo barakeystaan oo la soo
cabsiiyo biyo Zenawi ku akhriyey wuxuu aaminsanyahay. Sheydaanka iyo
gaaladu cid aan addeecin oo ka dambeyn waxba uma dhiibtaan. Waxaa la
sheegaa in sheydaanku uusan qofka sixirka barin ilaa uu galo dambiyo xad
dhaaf ah sida iyagoo Kitaabka Qur’aanka ah najaaseeya ama kaadi cabba
ama saxaro cuna. Sidoo kale, Zenawi waxba uma dhiibto qof uusan inta
biyo dhex gesho ku oran la dagaal diinta Islaamka iyo dadkeeda. Saasoo
kale ayaa nimanka Soomaaliya horbooda ugu ordayaan Addis Ababa si ay
usoo galaan khiyaamo ay kula dagaalaan diinta dadkeeda.
Xafladda dadka kiristaanka ahi u yaqaannaan “baptism” oo ah in qofka
dhibco biyo ah lagu daadsho ama la dhexgesho kaddibna lagu soo dhoweeyo
kaniisadda uu markaas ku biirayo. Inta badan carruurtaa u badan laakiin
waxaa jira kaniisad ku doodda in dadka waaweynna lagu sameeyo arrintaas
oo laga daayo carruurta. Xafladdaas kaddib ayuu Zenawi inta caqliga ka
xado ku dhahaa haddii dagaalooge laguu yaqaan waxaad tahay maanta laga
bilaabo nabaddoon caadil ah oo dadka Soomaaliyeed ku hogaaminaya kheyr
aakhiro iyo mid adduun. Haddaad dhaqtar xoolaad tahay waxaad noqoneysaa
midka dadka Soomaaliyeed ee intaas oo sano cudurrada iyo jahliga ku
jiray kana dabiib dhaawaca iyo boogaha oo horumar u horkac. Haddaad
booliis iyo Bisha Cas u soo shaqeyn jirtay waxaad noqoneysaa Jaajuus iyo
mid u shaqeynaya Laanqeyrta Cas. Wax walba waxay noqonayaan cagsigooda.
Madaxweynaha Eretereeya laftiisu wuxuu sheegtay in qofka Soomaaliga
ah ee ka soo taga Zenawi oo isaga ku soo biira noqonayo wuxuu ku
sifoobey cagsigeeda. Hadduu shalay Itoobiya wax ka soo geshay
Soomaaliya, kaddibna uu Asmara tago wuxuu noqonayaa qof u taagan inuu
Soomaaliya wax ka xoreeyo. Ka warran sheekhii inta Asmara taga ka
raadgata jihaadka ama goobjoog ka noqda meel xukunka Ilaahay iyo
qeyrkiis cod loogu qaadayo? Shaki maleh inuu isna caksigii aadayo. Dhul
gaalo ma la joogi karaa iyo lama joogi karo wax nagu cusub maaha. Marka
xukunka Ilaahay qofkii diida meel kasta ha joogee waa qabaneysaa.
Ma garan waxa Nuur-cadde isagoo da’daas jooga oon gaajo heyn u rabo
inuu khaatumadiisa ku khatimo isagoo u shaqeynaya cadowga koowaad ee
Soomaaliya. Hadduu talo maqlayo waxaa u fiican in sida horay loo sheegay
uu is casilo. Ha fiirsho saaxiibkiis Geeddi iyo sida Soomaalidu u
arkaan. Ma filayo qof Soomaaliyeed oo miyir qaba oo jeclaan lahaa iney
ku dhacdo wixii Geeddi ku dhacay xitaa haddii uu qofkaasi faqri yahay.
Marka sidii gabyaa C/Qaadir Xirsi Yamyam Allaha u naxariistee uu gabay
jacbur ah ku lahaa mar madaxweyne Maxamed Siyaad qabsaday Baydhabo si uu
Xamar dib ugu noqdo:
- hadday gaajo heysoo ka baqay dibab inuu aado
- inta land cruiser uu heysto baa ku filan oo uu iibsado e
- kursigiisii Yaaqshid bey niman u qaateenne
- gambar iyo ma dirin buu sitaa meeshu waa ebere
Marka Nuur wuxuu Booliiskii iyo Bisha Cas ka soo shaqshaqday baa ka
badane muxuu ku falayaa in isagoo cimrigaas jira uu noqdo dameerkii
Muuna ee Zenawi? Kiradii Zenawi siiyey dameerkii ka horreeyey ha
fiirsho. Marka xabsi ka buuxsho dadkii muslimiinta ah ee ka badbaaday
gumaadka Tigreega.
La yaab ma leh nimankaas jago-doonka ah ee dadkii Soomaaliyeed maxaa
helay? Maxaa nimankaas lagu taageeraa? Kase warran midka qabiilka uga
soo horjeedda ee aan qaddiyad kale uga dambeyn?
Qofkii Addis Ababa ka biyo diida maaha inuu u cararo Asmara ee waa
ineynu u noqonnaa diinta Islaamka. Waa innaga nala mooddo ineynu
leennahay diinta Islaamka la iskuma xukumikaro waqtigaane ilaa 1960-kii
beynu wax meelo kale laga keenay ku dhaqmeynee maxeynu heynaa? Soow
sidii Ilaah u yiri ma noqon oo ah dadkii iyagoo muslim sheeganaya diida
xukunka Ilaah inuu aakhiro iyo adduunba hoogayo? Gaaladuna waa ku jirtaa
laakiin waxaa dhicikarta gaaladu iney adduunka iska ceyshto inkastoo
ciriiriga galbigu uu ka weynahay kan gaajada iyo cudurrada. Waa
arrintaas darteed waxa dadka muslimiinta ahi u yihiin kuwo ugu liita
adduunka. Waa doqon ninkii la kala safta labada nin e kala xukuma
Itoobiya iyo Eritereeya.
Sidaan horay u iri qofka biyaha Zenawi soo cabba wuxuu qaataa arrin
cagsi ku ah waxa Soomaalida badankeedu aaminsanyihiin. Horay baa
hal-abuur u lahaa:
- seddexdii maqnaanna waa soo socdaanne (Jabuuti, NFD iyo Soomaali
Galbeed)
- nin lagu seexdoow ha seexan
Geeddi wuxuu yiri shuqul kuma lihin NFD iyo Soomaali Galbeed xitaa
haddii Somaliland go’dana dan kama lihi! Sidoo kale meesha Soomaalidu u
arkeysay in xoogga dalku waardiye ugu taagnaadaan difaaca dalka ayaa
dabo-dhilifyada Tigreegu waxay leeyihiin aan seexanno waxaa geyiga
ilaalinaya saaxibadeen Tigree! Marka qof kasta oo raba inuu la shaqeeyo
“dowladdaas” ha isu diyaariyo biyaha Zenawi inuu cabbo. Markaasna aad
aakhiro iyo adduunba hoogto. Marka Zenawi iyo kuwa uu biyaha siisay
waxay na gaarsiiyeen in labadii isku sidkanaaa sii kala socdaan (Koonfur
iyo Waqooyi). Labada “guul” ee ugu weyn ee dowladdii C/hi & Geeddi
gaartay waa Tigree oo Xamar qabsaday iyo Riyaale oo Laascaano qabsaday!
Taageerayaasha korneylku waa u damaashaadeen qabsashada Xamar laakiin
waa ka ooyeen tan Laascaano weliba iyadoo Riyaale Soomaali yahay. Marka
biyaha Zenawi kii cabba iyo kan taageeraba waxa cadowga koowaad u ah
qofka Soomaaligaa. Kan madaxweynaha Eriteriya taageera ama kii kaas sii
taageera waxaa iyagana cadow koowaad u ah qofka Soomaaliga ah.
Qofka inta biyo Zenawi soo cabba raba inuu wasiirradiisa ku dhaarsho
Kitaabka Qur’aanka ah wuxuu ka dhiganyahay qof inta khamri iyo hilib
doofaar la soo baxay intaas oo jeer Bisinka u qabta oo markuu ka dhergo
yiraahda ALXAMADULILLAAHI. Waa kalmado fiican laakiin maaha meel
munaasib u ah.
Biyaha Zenawi ka hor iyo kaddib waxaa socda Qaddarta Ilaahay. Wataas
oo wax ukala soconwaayeen dhabo-dhilifyada waana arrin noogu filan
cibroqaadasho. Marka diin-nacayb darajo lagu gaari waa. Waxaan kula
talinlahaa xildhibaanno-ku-sheegga Baydhabo jooga in intey mar is
dhugtaan ay dhahaan maanta, dabadeedna ay iscasilaan. Ilaaheyna ha u
toobad keeneen. War nimanku miyeysan u jeedin intey jiraan? Goormey
darajo iyo duunyo jaceylku idinka gaboobin?
Soomaalidu waxay dib ugu noqotay meel ka hooseysa meeshii ay joogtay
1991. Ilaah oo na badbaadsha maahee waxaan ku soconnaa meel xun. Marka
biyihii Zenawi meel lagu gaariwaa. Ma la gaaray waqtigii aan u noqon
laheyn xalkii ay Ilaah iyo Rasuulkiisu noo sheegeen? Waxaan idiin
xaqiijinayaa haddaan toobad keenno oon dariiqii saxda ahaa ku noqonno in
hal habeyn isbedel fiican dhacayo Ilaahay idinki.
C/Waaxid
C/hi Khaliif
London, UK
cabdulwaxid@hotmail.com
Afeef: Aragtida qoraalkan waxaa leh qoraaga ku saxiixan
Nin Xildoon Ahi Waddan Ma Xoreeyo:
Waa maxay xil?...
Akhri...