Ururka Ardayda Soomaaliyeed Ee Dalka Suuriya Oo Guddi Cusub Doortay.

Dimishiq:-Xaflad Casho Sharaf ah oo si wanaagsan loo soo agaasimay laguna qabtay huteel ku yaala xaafadda dimishiq ugu Taariikhda Dheer ayaa waxa ay ururka ardayda Soomaaliyeed ee dalka Suuriya ku soo bandhigeen gudidooda Cusub ee sanadka Cusub hogaamin doona ururkan.

Xafladan oo ay iska kaashadeen Ururka Ardayda Soomaaliyeed, Xafiiska Jaaliyadda Soomaaliyeed, iyo xawaalada qaran oo iyadu kharashka xafladan ku baxay bixisay ayaa waxa ka soo qayb galay Safiirka Soomaaliya u fadhiya dalka Suuriya Md Maxmuud Muuse Taray, Guddoomiyaha Jaaliyadda Soomaalida C/raxmaan Aadan Cali, Ku Xigeenka guddoomiyaha Jaaliyadda Maxmed Daahir iyo Madax Suuq gaynta Xawaaladda Qaran C/kariim ,madax Xisbiga Ardayda u qaabilsan C/casiis arday iyo marti sharaf.

Ugu horayn waxaa xaflada ka hadlay guddoomiyaha ururka ardayda Soomaaliyeed ee dalka Suuriya C/raxmaan Ashkir oo sheegay in ay maanta xafladan u qabteen in ay ardayda iyo bulshada qaybaheeda kale ee ku dhaqan dalka suuriya isku bartaan, laguna ogaado waxqabadka ururka ardayda Soomaaliyeed, wuxuuna sheegay C/raxmaan in ururka arday Soomaaliyeed ee dalka Suuriya La aasaasay 1970kii xilligaas oo ardaydii ugu horaysay ee Soomaaliyeed isku afgarteen in ururkan la aasaaso ka dib markii ardayda wax ka barata dalka Suuriya soo badatay.

Wuxuuna intaasi ku daray in ururkani ilaa iyo xilligaas soo shaqaynayey, wuxuuna sheegay in ay doonayaan in ay dib u soo xoojiyaan xidhiidhkii ururka ardayda hore uga dhaxayn jiray Safaaradda iyo jaaliyada si loo helo iskaashi waxtar lagu gaadho,C/raxmaan Ashkir waxa uu hadalkiisa ku soo gabgabeeyey in dib loo soo celin doono majalad , ama wargays hore ururka ardaydu u soo saari jiray oo muddo hakad galay,dhaqdhaqaaq horlena bilaabi doonaan.

Guddoomiyaha Jaaliyadda Soomaalida ee dalka Suuriya C/raxmaan Aadan Cali oo isaguna xaflada ka hadlay ayaa ku booriyey ardayda Soomaaliyeed ee dalka Suuriya fursada waxbarasho ka helay in ay u dhabar adeegaan waxbarashada oo ay ku dadaalaan sidii ay Jaamacadooda u dhamaysan lahaayeen, wuxuuna C/raxaam ka dhawaajiyey talaabooyinka qaldan ee ay ardayda dalkan Suuriya wax ka barataa ku dhaqaaqaan, taas oo ah ardaygii oo sanad uga hadhsan yahay jaamacadda in uu iska kaga tago isaga oo u hijroonaya dalalka reer galbeedka, taasina ay khasaare ku tahay, ardayda ,Dalkiisa, dalka Suuriya iyo mustqabalkiisaba, wuxuuna sheegay in loo baahan yahay lagama maarmaanna ay tahay in ardayga fursadda qaaliga ah helay in anaanu dayacin ee uu ku fara adeego wax barashadda,wuxuuna balan qaaday in jaaliyaddu la shaqayn doonto Ururka ardayda Soomaaliyeed.

Safiirka Soomaaliya u Fadhiya dalka Suuriya Maxmuud Muuse Taray ayaa khudbad kooban oo uu xaflada ka jeediyey uga mahad naqay ururka ardayda Soomaaliyeed xaflada casho sharafta ah ee ay qabteen, isaga oo tilmaamay in ay tahay xafladdii ugu horaysay ee nooceeda oo kale ah ee ay ururka ardaydu qabteen ee uu ka soo qayb galay muddadii uu xilka hayey, wuxuuna sheegay in uu aad ugu faraxsan yahay xafladan maanta ay soo qaban qaabiyeen Ardayda Soomaaliyeed ee wax ka barata dalka Suuriya ,

Safiirku wuxuu ku booriyey ardayda Soomaaliyeed ee fursadan qaaliga ah heshay in ay ka faa’iideystaan oo aysan lumin, maadaama ayuu yidhi safiirku ay ku yar yihiin inta waxbarasho bilaash ah oo heer jaamacadeed ah helaa ardayda soomaalida, wuxuuna tilmaamay in ay ayyaan darro noqonayso haddii aanu ardaygu isaga oo waxbarashadiisii aan dhamaysan uu ka tago jaamacadda ama dhoof galo, taas oo noqonysa fursad uu isaguna iska lumiyey ardaydii kale ee ka faa’iidaysan lahaydna iska hortaagay taasina ay noqonayso labo khasaare.

Wuxuu sheegay safiirka Soomaaliya u fadhiya dalka Suuriya Maxmuud Muuse Taray in ay faa’iido weyn u noqon doonto ardayda ,Jaaliyadda iyo safaaradda ururka ardayda Soomaaliyeed oo dadaal dheeraad ah muujiya, laguna ogaan karo ardayda Soomaaliyeed sida ay waxbarashadoodu tahay, wuxuuna safiirku ugu danbayntii u dardaarmay ardayda Soomaaliyeed in ay Sumacadda Dalkooda ilaaliyaan , isaga oo aad ugu dheeraaday marxaladda dalka Soomaaliyeed marayo Cidda laga sugayo in ay samata bixiyaanna yihiin Ardayda Soomaaliya wax u soo baratay, wuxuuna hadalkiisa ku soo gabagabeeyey in qofkastaaba halkiisa ku yahay safiir Soomaaliyeed.

Xafladan Casho sharafta ahayd ee ay qaban qaabadeeda iska kaa shadeen ururka ardayda Soomaaliyeed, Jaaliyadda iyo xawaaladda qaran ayaa waxa halkaas lagaga dhawaaqay xubnaha cudub ee sanadka soo socda hogaamin doona ururka ardayda Soomaaliyeed iyada oo xubnihii hore u soo wadayna loogu mahad celiyey dadaalkii ay soo muujiyeen waxaana guddoomiye loo doortay C/raxmaan Ashkir Muuse,ku xigeena C/naasir Ismaaciil,Dhinaca Warbaahinta iyo Aqoonta Yaxya Maxmed Shiikh,Ikraam C/risaaq Xasan ayaa iyadana loo doortay dhaqaalaha, Hibo Cumar ayaa iyadana loo doortay Abaabulka.

Asad Caddaani Ibraahim
Dimishiq Suuriya
asadlaska@hotmail.com