Xulka Kubbada Cagta G/Todheer oo ku guuleystay tartankii cayaaradaha
Somaliland.
Xulka
kubada cagta gobolka Togdheer ayaa ku guulaystay tartankii shanaad ee ciyaaraha
kubada cagta gobolada Somaliland,ka dib markii galabta ay rigoorayaal kaga
adkaadeen xulka gobolka Awdal oo ay ciyaartii kama danbaysta wada yeesheen.
Ciyaartan oo ahayd tii ugu kullayd tan iyo markii tantankani furmay 30-kii
Bishii la soo dhaafay ee July waxa labada xulba ay aad u adkeeyeen difaacoodii
waxana ay is dhaafsanayeen weerar iyo weerar-celis,hase yeeshee markii ciyaartii
muddo socotay ayaa Xasan Cabdilaahi "Xasan Dafe" uu gobolka Awdal u dhaliyay
gool aad u qurux badnaa oo sii shiday xamaasadii ciyaartaas, taasi oo aamus u
diiday tageeryaasha gobolka Togdheer.
Weeraro badan ka dib waxa Xulka gobolka Togdheer u suurto gashay inay iska
soo gudaan goolkii la dheeraa waxana gool qurux badan u dhaliyay Mustafe Maxamed
Axmed oo ka tirsanaa difaaca gobolkaas waxana qeybtii hore lagu kala nastay 1-1
Gool, taasi oo ay tageeryaasha gobolka Togdheer ku qaboobeen.
Qeybtii labaad ee ciyaarta ayaa u muuqatay mid ka sii kulul oo ay si dhaba u
shaqeynayeen talooyinkii Tababarayaashu ay soo siiyeen ciyaartoyga waxa wax
weyni iska bedalay qaab ciyaareedkii qeybtii hore.
Labada kooxoodba waxa ay iska lumiyeen fursado badan oo goolal lagu dhalin
karayay,taas oo sababtay in 90-kii daqiiqadood ee ciyaartaas loogu talo galay ay
ku dhamaato barbar-dhac 1-1 waxana aakhirkii rigoorayaal loo dhigay 9-8 ku
badiyay xulkii metalayay gobolka Togdheer.
Waa markii labaad ee gobolkaasi uu ku guulaysto Ciyaaraha gobolada tan iyo
markii la bilaabay sanadkii 2002-dii, iyada oo koobkii kan ka horeeyay ay
hanteen xulka gobolka Sanaag iyaga oo ka badiyay ama ka qaaday xulkani maanta
qaatay ee Togdheer.
Wasiirka Ciyaaraha Somaliland Maxamuud Siciid Muxumed ayaa hadal uu u
jeediyay labada kooxood ugu baaqay inay isu haneeyaan koobka,waxana uu
ciyaartoyga labada kooxoodba ku amaanay wax uu ku tilmaamay ciyaar wanaagii ay
muujiyeen iyo sida nabadgelyada ah ee ay ku dhamaatay ciyaartaasi.
Ammaanka goobta lagu ciyaarayay waxaa aad u sugayay ciidamo ka tirsan
Somaliland, kuwaasoo isha ku hayay dadka soo galay garoonka iyo dhaqdhaqaaqa
shacabka, si aysan u dhicin iska horimaad dhex mara labada taageero.
Abdifitahaam Ahmed
Hargeysa – Somaliland
Email:
abdifitahaam@gmail.com
Faafin: SomaliTalk.com | Aug
11, 2007
![](/terry/arrowleft.gif)
![](/terry/arrowright.gif)
|