Nacab aad Qaran Wadaagtaan
A. M. Yusuf | wayeel@opermail.com
Xamar, Abriil 18, 2007
QEYBO ka mid ah gobollada dalka
Soomaaliya, iyo gaar ahaan
magaalada Muqdisho, ayaa dad
rayid u badnaa lagu gumaaday,
lagu na waxyeelay dagaallo,
kuwii ugu foosha xumaa oo ay
weligeed ba aragto il
Soomaaliyeed. Kumanaan Soomaali
ah ayaa la xasuuqay. Kumanaan
kale na waa la dhaawacay, la
iimeeyay, la naafeeyay, la
cuuryaamiyay, la indhatiray, ama
ba la dacdarreeyay. Tirooyin
kale, ayaa loo dhoofiyay, weli
na loo dhoofiyaa dalka Itoobiya:
halkaas oo lagu shubo Auschwitz
dahsoon, xeerooyin lagu takooro
Muslimiinta—xabsiyo sinjiga
Soomaaliyeed lagu jirdilo, lagu
kufsado, lagula na sammeeyo
falal ka baxsan xeerarka
quruumaha adduunka. Tusaale waxa
kuugu filan Soomaalidii badnayd
ee Kenya laga qafaalay, si
Tigreegu uu uga sii iibsado
Maraykanka. Maalaayiin Soomaali
ah ayay murugadu, qofkood ba, si
uun u wareentaa. Hablo badan,
foodley badan, ayaa lagula kacay
faraxumeyn aan ay weligood ba
cidna kula dhiirrateen, haddii
Tigreegu aan uu gumeysteen,
hooygoodii na aan uu xoog kaga
muquunsadeen. Kumanaan carruur
ah ayaa la baday silicii
agoonnimo ama ba rafaadkii
rajaynimo; sidaas oo kale, aabbe
iyo hooyo badan ayaa iyagu na la
goblamiyay. Dhowr bilood kahor,
degaanno ka bedqabi jiray
cabsida iyo gaajada qaarkeed,
ayaa laga dhigay gelengel iyo
Gooddigii Bancawl oo kale.
Soomaali badan ayaa maanta ku
hoos saxariiraysa “geedkii
fakhriga”. Cidla', ceella', iyo
ciirsila'— dowladla'aan! Jawrfal
awgii, guryo badan ayaa waddaro
lagu burburiyay; dadkii degenaan
jiray na lagu qasbay in ay ka
huleelaan; ama si ulakac ahayd
ayaa ba duqeyn loogu barakiciyay.
Dad ayay ahaayeen isugu jiray
waayeel, bukaan, iyo carruur
weliba uu dhallaanku ku badnaa.
Haddii hal erey lagu sheego, dad
waxa ay ahaayeen ka koobnaa,
maati.
Sida muuqato, maxaysatadii
Tigreega ayaa xalay, mar kale
mdaafiic ku garaacday xaafadahii
Xamar qaar ka mid ahaa.
Indhoweyd ba, Soomaali badan
ayay darxumo ku ag diloonaysay
Tabeelle Abroone, agagaarka
ruunkii Xaawa Cabdi, iyo kuwo
kale ee u kala dagaagay gobollo
kale, kuwaas oo saboolnimadu ay
horey ula ciirtay. Dadkaas iyaga
ah, ma ayan qaadi lahayn cudurro
halis ah haddii ay heli kari
lahaayeen biyo yar oo ay ku
mayrtaan; si horleh na, ugu ma
ayan sii dhici lahayn jirrooyin,
maalintii ba, saameynaya nolosha
boqollaal dilane. Soomaalidii
ugu adkeysiga iyo caafimaadka
badnayd ayaa safmar hadba u u
sii liicaysa ama haatan ba ku
nool nolol saabbirnimo, nolol
bukaannimo, taasoo ah mid weliba
aad u tayo liidato. Maxaa yeelay,
Tigreega macatabka xiran uma
maamulo dalka si ugu gargaaro
ama uu quudiyo; bal se waxa uu
dalka u qabsaday si uu
Soomaalida uga cunaqabateeyo
hungurigoodii. Halkii iyaga lagu
daryeeli lahaa; oontii
Soomaaliya ayuu Woyanehu sahay
uga dhigaa jirrigii uu ku
dabargoyn lahaa Soomaalida.
Hanti weyn, canshuurtii
dekeddaha iyo gegooyinkii
Soomaaliya, ayuu Tigreegu
maalintiiba ku bixiyaa si loo
xasuuqo geesiyadii, iyo
shacabkii reer Soomaaliya.
Suuqii Towfiiq, Suuq Bacaad, iyo
Suuqii Bakaaro waa ay aamuseen.
Dukaamadii, gedisleydii,
ganacsatadii, waratadii,
kudhacdii, dahableyaashii,
wershadihii waxsoosaarka iyo
ilihii dhaqaale waa ay wada
joogsadeen. Naadadii dallaalkii
waa ay aamustay; sidaas oo kale
na idaacahii iyo hirarkii
wakaaladihii wararka ayaa iyagu
na wada caariyeen. Yeerta keliya
ee la maqlayaa caawa waa guuxa
taangiyada Tigreega, reemida
madaaficda, iyo mashaxaradda
hubka kala kaan ah.
Aay Culumo, xaafadda If ya
Aakhiro ayay guri ku lahaan
jirtay. Islaan weeye qiyaastii
70 sano jirsatay, taas oo aan
saakayto kula kulmay xaafaddii
Gubta—geed hoostii. Oohin awgeed
iyada oo la hinraageysa ayay
iiga tiri, “gurigeygi, saw u
dhammaay, kurtigiis,
igaarkaygiyow, ogaaw dhulkaa la
dhigee! Inya madfac ku dhufteen,
asaw anigoo saas u deyoow haayo,
aaw ho'h isla yiri. Gebertaydaan
iyo ilmahaan agooma ooy dhashay,
shaantaan cunug, ya aniga,
lafahaanya bes aan mihi kala soo
fakannay. Ma haysanno abbuul aan
cimilada ka galno. Ma haysanno
wax aan cuno. Ma haysanno waxaan
cabno. Roobka nagu da'awhaaya
na, adbo waw jeeddaa! Saatan
hee, walleen xansuuq ka walax
maaha?”
Gabadhii aay Culumo, Miinaay,
ayaa iyadu na igu tiri, “Mooggii
guryaheenni la gubay,
buuladeenni na ay jabjabtay, aan
waxaan ka maqlay raadiyahaan
xun, Salaad Cali Jeelle oo iska
warramow haaya. Kuma lahoo:
‘guryahoodi muggaan garaacnay,
argagixisadi wax kud dilay, ya
wax kala kudeey naqdeen!’ ”
Indhaha Miinaay daaf dartii
lama guduudan; ogow se, waxa
caseeyay qaacii iyo holacii ay
xalayto isugu biimeysay si ay
wax uga soo caysanto agabkoodii
qiiqaabayay, iyo, maleha,
ilmadii badnayd oo ay indhaheedu
qubeen; iyada oo tafta
maradeedii dhabannada
marmarinaysa, ayay sheekadii
iigu sii gunudday, “libta aw
Salaad ku faanaayo—ma Imaamka
Soomaalideeys ka leh, mase
Imaamka Amxaaradeeys ka leh?”
“Xabashiinigu, inya
Soomaalida kale laayo, ogaaroo
qolo kaleento deysa haayee!”
ayay duq Culumo la soo boodday.
Gaalada Tigreega nacaybka ay u
qabto, qalimmadii balanbaalista
oo kale iyada oo uu foolkeedii
ugu shaqlan yahay, ayay Miinaay
igu tiri, “horta, yaa ii
sheegaayo? Tigreegaan xaw naga
soo jershay? Xaase Soomaalida
dhexdeera ka galay?”
Aay Culumo iyo geberteeda
Miinaay ahayd, waxa ay i
weydiiyeen su'aalo aanan anigu
ba weli helin jawaabahoodii.
Weydiimo igu dhaliyay eedaysi
badan. Weydiimo igu dhaliyay
weydiimo kale. Haddaba, sida
Tigreegu uu ku yimid Soomaaliya,
iyo cidda qabsashada iyada ah
loo aaneyn karayo gebi
ahaanteeda, ayaan ka wareystay
oday Soomaaliyeed, kaas oo
lixdanmeeyadii soo ahaan jiray
xeerilaaliye guud.
“Megangooye,” ayuu iigu
warceliyay.
Waxa aan dabadeed ka
codsaday, “Ma ii qeexi kareysaa
nuguurta magangooye?”
Odaygii waxa uu ii tibaaxay
in magangooye uu yahay qof ku
ballanfuraya dadkiisa, hagranaya
na xil kasta ee loo dhaariyo.
Waa taroox ogaan u maleegaya
dhagar qaran. Halkii uu
umaddiisa ku wanaajin lahaa, waa
ba xildhibaan ku ajaraya
dadkiisii isla xilkii uu iyaga
dartood u xambaarsaday. Waa duul
u doorsoomaya gedda abbaanduule
ku wadeeceynaya ama ba u
baylihinaya cadowgii dalkiisa
xogtii uu ka kaayi ama ba ka
waabin lahaa sida dhufaysyada,
saldhigyada, xarumaha, iyo
xafiisyada—xooggii dalkiisii na
faraya in uu is dhiibo, kii oo
aan weliba laga adkaadeen. Waxa
kale ee uu ku tilmaamay: qof hub
u guranaya, dagaalyahanno u
qafaalaya, u na carbinaya si uu
ugu weeraro ama ugu wiiqo isla
dalkiisii uun. Haddii si kale
aan kuugu qeexo, ayuu qareenkii
qaranka igu yiri, waa qolo wax
ka abaabuli shirqool, mid weliba
na uu nacab ku qabsan lahaa
dalkoodii. Mardabeeyeyaal weeye
aan milgeyn kareyn nidir, kii
wal oo ay wax uun ku
ballanqaadaan ba. Si kooban,
cidda wacadkii kasta ba beenin
ama cidda kalsoonidii kasta ba
dhantaali; waa megangooye.
Qeexitaankaas faahfaahsan
kadib, ayaan anigu na
xeerilaaliyehii ku yiri,
“haddaba, dagaalooge waa
megangooye! Waa khaa'in, Alle ya
Rasuul ka furtay, sow maaha?”
“Cid kasta ee uu cadowgu ku
daneysto ama qof kasta ee
cadowga gacan ku siinaysa
qabsashada dalkiisii waa
megangooye.” Waayo xanaaq dartii
ayuu hadalkii uga soo bixi
waayay; sidaas awgeed na warkii
ayuu cabbaar ka hakaday. Iyada
oo ay dibnihiisu wada
dubaaxinayaan ayuu misana igu
yiri,“qof kasta ee Soomaalida ku
boorriya in aan Tigreega dalka
ku soo duulay halgan la iskaga
caabbin ama qof kasta ee
Soomaalida wanaag u tusinaya
joogista Tigreega, isagu na, waa
megangooye kale.”
“Tigreegu, gartay oo, waa ii
nacab; fir na, iima gelin.
Dagaalooge se, dhalyo ayuu ila
wadaagaa. Tigreega gumac ololaya
ayaan ku cagaajin. Dagaalooge
se, sideen ula xaalaa?”
“Maandhe, aniga talo iga hoo.
Dagaalooge waa gaal. Gaal na,
waa nacab aan adiga marnaba kula
walaal noqon doonin.” Sidii
barehii dugsigii hoose, sitaahoo
uu hawlguri i siin lahaa ayuu
waraaq iigu qoray,
“Antaradhaafka gurracan iyo
xeerka ciqaabta ka yaal
megangooyanimada, ka sii baro
qoraalkan: ‘Sharcinimada
Ciidanka Itoobiya ee Dalka
Jooga’. Baaristii, gorfeyntii
iyo qalinkii Prof. Dr. Faarax
Cabdullaahi Macallin.”
A. M. Yusuf | wayeel@opermail.com
Xamar, Abriil 18, 2007