Sabaankii
Salaad Jeelle & Cawrada Dowladda Federaalka!
Cudur kasta
wuxuu leeyahay daawo marka laga reebo midka
ku dhacay xubnaha dowladda Federaalka, xitaa
caqli-yaridu xal bay leedahay (oo caqligii
qof ka maqan wuxuu ku jiraa walaalkii).
Waxaa ku filnaa weyday inay dalkii geliyeen
gumaysi, waxaa ku filnaa weyday inaan
Xabashidu wax ixtiraam ah u hayn, oo aysan
xitaa kala tashanin cidda ay la dagaalayaan
iyo ciddda ay la heshiinayaan, inay beeshii
ay doonaan la shiraan kalana hadlaan
danahooda. Maalinba maalinta ka dabmaysa waa
ka dhaqan iyo hadal xunyihiin. Waxaad
mooddaa qaarkood inay yihiin ‘machine’ ay
codad badani ku duuban yihiin oo marba meel
laga riixaayo si hadba wixii la rabo ay uga
yeeraan!! Ha isku dayina inaad cawrada u
asturtaan hadii aad aragtaan iyagoo
‘fadhi-xumeeyey’ si aan argagixiso
laydinkugu aqoonsan!!
Ma aha arrin
cusub in qof ama koox ay ka hadlaan
hankooda, inay dhigtaan siriq ay ku
ugaarsaan, ama shamaag ay ku jillaabtaan, si
ay u gaaraan dano shaqsi ama kooxeed. Hase
yeeshee wixii ka dhacay Hotelka Laf-weyn
8-9/04/2007 ma aha wax laga aamusi karo.
Halkaas waxaa lugu “harmay” ama lugu
nijaaseeyey beel ka mid ah beelaha
soomaaliyeed (Abgaal), iyadoo loo sawiray
inay taageersantahay Gumaysiga xabashida
iyo gummaadka aan loo meel dayin ee dadka
Soomaaliyeed. Haddaba anigoo ku hadlaaya
magaca beeshaas waxaan soomaalida oo dhan u
caddaynayaa in shirarkaasi ay ahaayeen kuwa
lugu kala qeybinayo soomaalida si qola
waliba markeeda loo gumaado, ayna taabba
gelin u tahay siyaasaddii gumaysiga ee ahayd
“qeybi oo xukun”.
Horaa loo
yirir “dhacdooyinka taariikhdu waa soo
noqnoqdaan”.
Waxaa la sheegay in berigii ay sii
dhacaysay boqortooyadii Cabbaasiyiinta,
lasoo maray waqti meelaha laysugu yimaado
lugu hadal hayo kuwii shaqooyinka hoose
qaban jirey, sida tima jaryaasha,
kawaanlayda, dhuxullayda, kuwa dadka tooba
iyo kuwa carruurta guda!! Tusaale ahaan
waxaa la maqli jirey “tima jare hebel oo
ka hadlay siyaasadda boqortooyda ee ku
saabsan arrinkaas!!”.. waxaan rejeynayaa
inay soomaalidu noo cudur-daaraan..Haddii ay
magaceenna ku hadlaan kuwo ay aheyd inay
iska aamusaan si aysan naftooda u fadeexayn
intaa la gaarin cid kale!
Shirqoolkii
Imaam Maxamuud.
Dadka shirkaas
soo xaadirey ma ahayn kuwa mudan in wax laga
soo qaado marka laga reebo imaamka beesha
Imaam Maxamuud Imaam Cumar. Imaamka oo la
ogyahy inuu wax badan diiday inuu kasoo qeyb
galo shirarkaas ceebaynta ah, waxaa muuqata
inay saareen cadaadis aad u weyn oo uu
xammili waayay!
Haddaba waxaa
looga fadhiyaa imaamka inuu sida ugu
dhaqsaha badan uga cudur daarto taageerada
uu siiyey gumaadka loo geysanayo dadkii uu
imaamka u ahaa.
Haddii ay
imaamka qanciso inuu imam u noqdo dadka
taageersan Itoobiyaanka oo kaliya, ha ogaado
Imaamku inuu yahay imaamkii ugu horreeyey ee
taageera gumaysi. Sidoo kale ha ogaado in
dadka aan gumaysiga oggolayn ay xaq u
leeyihiin inay doortaann imam kale!! Iyadoo
laga yaabo inay imaamnimadu yeelato garbo
kala duwan sida ay siyaasaddu u leedahay!
Yaa lugu
taageeraayay shirarkaas?
Dadka aan la
socon dhacdooyin ka horreeyey shirkaas, waa
ku adagtahay inay fahmaan ujeeddada laga
lahaa shirarkaas. Shirkaas maalmo ka hor
ayaa saraakiisha Itoobiyaanku waxay canaan
kulul loo soo jeediyay siyaasiyiinta beesha
uga jira dowladda Federaalka iyagoo ku
eedeeyey inay ‘sireen’ oo ay usheegeen inay
dadkoodu 100% taageersanyihiin!! Waxayna si
dhaqsa ah uga dalbadeen inuu caddaato
mowqifka beesha. Taas ayaan keentahay in si
hal-haleel ah loo qabto shirkaas oo aan
lugu taageeraynin dowladda Federaalka balse
loogu niyad dhisaayay Xabashida oo laga
dareemay niyad jab weyn, taasna waxaa
caddaynaysa in sawirrada ka qeyb galayaashu
siteen ay u badnaayeen sawirka geeddi iyo
Zenawi oo isku dheggan, iyadoo mar dambe
meel laga soo helay sawirka C/lahi oo
kaligiis ah!
Waxaan dad
badani ogayn in shirkaas uu ka horreeyey
shir kale oo uu Salaad ka soo qeyb galay,
kaasoo ay isugu yimaadeen dadka deggan
xaafadda Laf-weyn ee degmada Yaaqshiid. Ma
ogi in shirkaasi ahaa shirqool loo dhigay
Salaad iyo in uu isagu yahay qof wacyigiisu
hooseeyo. Dadkii meesha isugu yimid wuxuu
kula hadlay wax ay ka yaxyaxeen ka
qeybgalayaashii, ilaa uu qof istaago oo
yiraahdo “meesha soomliyoo dhan ayaa joogta
ee hadii wasiirka beel ahaan lugu casuumay
dadka kale hallayska fasaxo” markaas ka dib
shirkii waa la xirey, waxaana muuqata in
shirkaan dambe loo soo xulay dadkii uu rabay
halkaasna uu ka jeediyey qudbadiisii
taariikhda gashey!!
Salaad Cali
Jeelle & Raggiisa
Qarni waliba
raggiis! Qofna maaha inuu la yaabo hadalka
salaad iyo ragiisa, maxaa yeelay hawsha
iyaga iyo madaxdooda(xabashida) u talla ma
yara, waxaa suuq-gayn uga baahan badeeco
baartey waqtigeedina dhamaaday, oo aysan
jirin cid ay ka gadmayso, Waxaa laga rabaa
inay dhurwaa ari u ekaysiiyaan, waxaa looga
fadhiyaa inay gumaysi dowlad u ekaysiiyaan!
Waxay ku xiiqayaan inay wadaan nasteexo iyo
dowladnimo, qaarkood waxay gashadeen dhar
culimo, qaar kalena dhar siyaasi, qaarna
dhar ciidan, qaarna dhar oday dhaqameed,
laakiin hoosta waxaa ka muuqda duftooda iyo
miciyahooda, waana sababta ay dadku uga sii
carayaan oo uusan jirin qof wax garad ah oo
aaminsan!!
Yaa ka duubay
salaad hadalka?
Meesha waxaa
isugu yimid waxay ahaayeen taageerayaasha
Itoobiyaanka, Prof. Geeddi iyo Salaad, sidaa
darted waxaa hubaal ah inuu ka duubay qof
aan laga dareen qabin oo ka mid ah dadka ay
u haystaan taageerayaashooda. Haddaba salaad
ma ku waana qaadan doonaa oo ma fahmi doonaa
in dadka u sacbinaaya aysan siyaasaddiisa ku
wada qanacsanayn? Miyaan arrinkaasu caddayn
u ahayn in haddii ay raggiisa ka mid yihiin
dadkii codkaas ka duubay uusan amnigiisu
sugnayn?
Waxaan
xasuustay qiso dhex martey hoggaamihii
Muslimka ahaa ee Salaaxudiin al-Ayuubi iyo
nin ay dakano ka dhaxaysay aadna uu u raadin
jirey. Maalintii dambe ayaa salaaxudiin
wuxuu barkintiisa ka dhex helay warqad dhiig
lugu soo qoray oo ku dhex jirta toorrey
galkeed!! Warqadda waxaa ku qornaa hadalkaan:
“Salaaxuddiinow ma rabo inaan
dhiggaaga faraha la galo, laakiin dilkaagu
aniga waxba ilama aha…maxaad ka ogtahay sida
aan barkintaada ku soo gaaray??, waxaa dhici
karta inaan ahay tin ka mid ah garkaaga, ama
dun ka mid ah cimaamaddaada..haddii ay tani
ku kaafin weydo waxaad heli doontaa wax la
hubo inay ku kaafin doonaan!!”
Qofkii jecel
iyo qofkii neceb-ba dowladda federaalku way
dhimatay (haddiiba ay nolo ku dhalatay)
maamul ahaan. Qofkii aan rumeysan karin ha
isku dayo inuu wax ka ogaado qaabka loo
maamulo dededda iyo garoonka diyaaradaha
Muqdisho iyo dhaqaalaha ka soo xarooda!
Wuxuu ogaan doonaa qof kasta inay dowladdu
tahay mid loogu tala galay wax bur-burin.
Waxaa dhamaaday cimrigii ay ugu tala galeen
kuwii soo samaystay, waxaa la gaaray u
jeedddii laga lahaa, sababta kaliya oo ay
hadda u jirto waxay tahay iyagoo laga
baqaayo inay firaaqada ay bannayso ay
buuxiyaan kooxaha muslimiinta diintooda ku
dheggan, hadii ay cabsidaasi suushana
iyaduna waa suulaysaa!!
Dadka qaar
ayaa aaminsan inay jirto beel soomaaliyeed
oo waddanka xukunta, beelaha kalena sida ay
doonto ka yeeli karta!! Xukun beel
soomaaliyeed waa dhamaaday. Haddii ay jirto
beel waddanka xukunta waa beesha Tigre e ee
dalka Itoobiya.
Waxaa xusid
mudan in dad badan oo reer Muqdisho ah
hadalkooda laga dareemi karo eed ay u hayaan
reer PuntLand iyagoo taas sabab uga dhigaaya
dhaqanka C/lahi Yuusuf iyo raggiisa!! Maxay
tahay dambiga ay reer PuntLand ku leeyihiin
dhaqanka C/llahi iyo Azhari oo aysan reer
Muqdisho ku lahayn dhaqanka Geeddi, Jeelle
iyo Gacma Dheere?
Nimanka
Itoobiyaanka waddanka u gacan geliyey waa
qowlaysato danaystayaal ah, kana kooban
Beelaha Soomaaliyeed oo dhan mana jiro
qabiil iyo deegaan ay ixtiraam iyo naxariis
u haayaan, cidii ka hor timaadana waxay ku
fasaxayaan Itoobiyaan iyo ciddii kale ee ay
heli karaan?
Soomalidu
waxay ku maah maahdaa “Nabar aad filaysay
naxdin maleh”, Muqdihso waxa ka dhacay waa
wax la filayey horeyna loo saadaaliyey. Hase
yeeshee ma noqonin sidii ay ay rabeen
itoobiyaanka iyo saaxiibbadood. Waxaa
muuqata inay itoobiyaanka lama filaan ku
noqotay iska caabinta adage e ay la kulmeen.
Sidaa darted waxay go’aansatay inay sii
maalweeliyaan una soo dejinaan kaarto cusub
oo ay kula dagaallaam dadka diidan
joogitaankooda. Qofka aaminsan in dagaalka
muqdisho dhamaaday waa khaldanyahay, waxaa
la hubaa inuu soo noqon doono isagoo ka
‘waalli’ badan kan a xulafo badan kii hore.
Dagaalku maaha mid ay ku lug leedahay
itoobiya oo kaliya, balse waa mid ay ku lug
leedahay waxa loogu yeelo ‘beesha caalamka’
oo ay ka go’antahay in Soomaliya la
xanuunjiyo maadaama ay ka soo baxeen dad aan
oggolayn inay u ‘rukuucaan’ sayidka weyn ee
mareykanka kuna fikiraaya inay shareecada
Islaamka Dastuur ka dhigtaan, taasoo ah
dambi aan reer galbeedku cafin karin!
Maxaa la
gudboon kooxaha iska-caabbinta?
Dadka aan
oggolanyn Itoobiyaanka ma jiro dariiq u
furan oo aan ahayn inay u diyaar garoobaan
dagaal aad uga culus kii hore. Waa inaan
lugu sirmin xabbad joojinta ay ku baaqeen
Itoobiyaanka, suurta gal maaha inay uga
tanaasulaan riyadii boqolaalka sano ee sida
fufud ugu dhabowday. Waxaa suurta gal ah
inay gacan ka helaan reer galbeedka iyadoo
laga yaabo in caawin kale oo xagga hawada ah
ay soo gaarto, sidaa darted waxaan laga
maarmayn in talada lugu darsado in dagaalka
‘fool-ka-foolka’ uusan suurta gal noqonin
mararaka qaarkood, loona baahdo in ciidanka
la fur-furo si dhaq-dhaqaaqiisa iyo
hawl-galladoodu ay suurta galaan hadii ay
dhacdo in duqayn culus oo ay sameeyaan
Mareykanka oo aan waxba kala hari doonin
dhibaataynta dadka aan isaga jeclayn.
Waxaa lagama
maarmaan ah in gobollada kale gaar ahaan
kuwa ku dhow Muqdisho laga sameeyo saldhigo
guur-guura oo carqaladeeya isu socodka
ciidamada cadowga, si ay ugu khasbanaadaan
inay ilaaliyaan jidadka culayskuna ugu bato
awooddooduna u kala baahdo. Hadddii ay
Itoobiya ku guulaysto dagaalka (alle ma
qaddaree) waxaa la hubaa inaan xasuuqoodu ku
ekaan doonin Muqdisho ee uu gaari doono
intii ay gacantoodu gaarto ee ka mid ah
dhulka soomaaliyeed gaar ahaan meelaha ay
dareemayaan inay joogaan dad laga yaabo inay
mustaqbalka kusoo kacaan.
Dadkii hantida
boobay iyo kacdoonka!
Waxaa dowladdu
ku dooddaa in dadka ka soo horjeeday ay
yihiin dadkii boobay hantidii qaranka iyo
shakhsiyaadka oo diiddan in la xisaabtamo.
Waxaa xusid mudan in dadkii haystay guryaha
dadka iyo hantida dowladda ay badankoodu
taageersan yihiinn dowladda iyo Itoobiyaanka.
miyaan mooryaantii haysan jirtey Balli
Doogle ka mid ahayn ciidanka dowladda?
Miyaan dowladdu u daynin Shabeellaha Hoose
raggii haysan jirey? Miyaanay xildhibaanno
dowladda ahayn isbahaysigii argagaxa? aaway
saxaafadii ka qeylin jirtey ‘indhacadde’
miyaanay arkayn in dowladdu u daysay raggii
indhacadde (intoodii aan maxkamadaha la
shaqeyn) Shabeelaha Hoose intiisa badan??
Mase oohintu orgiga ka weyn?
Qabyaaladdu
sun iyo dawo ma wada noqon karaa?
Waxaa dad
badani ka dheregsan yihiin sidii hawlaha
iska caabbintu ay ugu milmeen qab-yaaladda.
Inkastoo ay dadka qaar leeyihiin waa la
xakamayn doonaa, anigu cuqdad weyn ayaan ka
qabaa in qabyaaladdu ay wax wanaag ah yeelan
karto. Sow qabbiilku nagalama dhaxeeyo kuwii
bahallada ahaa ee dadka cuni jirey? Yaa
damaanad qaadaaya in duggaaggii (qabyaaladdu)
uusan mar kale xarigga goosan doonin oo
uusan ‘dhunxi’ doonin wax kasta.?? Haddi la
maqlo waxaa dagaallamaya itoobiya iyo beel
heblaayo sidee ayaa loogu qancinayaa beelaha
kale in uu waddanku gumaysi ku jiro
arrinkuna iyaga khuseeyo? Nin qabbiil ku
dagaallamaya ma xamili karo waxa dhacaya,
waxaa loo baahanyahay inay howsha wada
galaan inta mabda’ ahaan ka soo horjeedda
qabsiga waddanka meel kasta oo ay joogaan!!
Hay’adaha
xuquuqul insaanka & dhacdooyinka Soomaaliya.
Waxaa aad u
maan gaaban kuwa aaminsan in hey’adaha
xuquuqdu ay caalamka ka dhaadhicin doonaan
in dad soomaaliyeed la dhibaateeyey.
Hey’adahaas waxay ku shaqeeyaan barnaamij
degsan, waxay leeyihiin khad ‘guduudan’ oo
aysan dhaafi Karin. Wax u barooranaya miyaad
aragteen dadkii, xoolihii iyo ugaadhii lugu
halaajiyey Jubbooyinka.?? Dadka loo barooran
karo kuma jiraan kuwa ay dilkooda rabaan
reer galbeedku! Waxay ka hadli karaan
gudniinka, dadka laga hor istaago dhaqan
xumada iyo sababta haweenka loogu yareeyey
baarlamaanka, taasi waa sida ay ku helayaan
maal gelin. Howshooduna waa intaas ee yaan
laysku daalin!!!
Yugandha,
Itoobiya iyo ceegada kabaalka aqalka!!
Intaan
ciidamada Ugandha waddanka imaanin waxaa wax
badan idaacadaha ka hadlay Melles isagoo leh
Muqdisho aad bay u xasilloontahay wax dhib
ahna kama jiraan ee ciidamada Africa ha soo
dhaqsadeen. Arrinkaas wuxuu dhareerka ka soo
daadiyey Ugandha oo iyaduna dano ka lahayd
soomaaliya. Hase yeeshee markii ay cagaha
soo dhigeen ayay arkeen sida ay xaqiiqdu
tahay. Waxaa laga hayaa inay yiraahdeen
“Africa waxay naga dhigatay Eygii gosha lugu
sahniyey”!!
Waxaa jirtey
sheeko gaaban oo ahayd: Laba dhallinyaro oo
reer miyi ah ayaa waxay arkeen qof haween
ah oo xoolo la joogta wayna faduuliyeen oo
waxay ku cadaadiyeen inay la sheekaysato.
Markii ay haweentii iska kari weyday ayay
tiri waxaan deganahay aqalkaas ee caawa
fiidkii ii soo sheeka doonta. Haweentu
markii ay guriga tagtay waxay u sheegtay
Saygeedii (ninkeedii) oo ahaa nin aad u xoog
weyn waxa manta ku dhacay iyo inay nimankii
ay caawa guriga imaan doonaan!
Labadii ardaal
ayaa fiidkii soo aaday aqalkii loo tilmaamay.
Waxayna soo hormariyeen midkood si uu
gabadha ula soo sheeksyto. Ninkii guriga
laha wuxuu isku qariyey tiirka (kabaalka)
aqalka, markii wiilkii (faduusha u socday)
is yiri aqalka gal ayuu cunaha ceego ku
dhegay.. wuxuu raftaba markii dambe waa iska
sii daayay.
Wiilkii la
ceejiyey isagaoo wareersan ayuu u tegay
saaxiibkiis oo meel ku sugayay wuxuuna ku
yiri “war nin yohow aniga qoftaasi sheeko
waa iga diidday ee bal adna markaaga isku
soo day!” wiilkii kale ayaa isna isi sii
daayay, markii uu is yiri aqalka gal ayaa
isna cunaha lugu dhegay! Wuxuu rafto oorafto..
isna waa la sii daayay.. wuxuuna u tegay
saaxiibkiis kuna yiri “war inkaari kugu
dhacdaye maxaad ii sirtay?” markaasuu ku
yiri “ceegada kabaalka taalla uun sow
maaha waxa aad sheegeyso? taas maxaad ka
sheegaysaa aniguba waan soo arkaye?!!”
Sida ay
taariikhdu na barayso haddii waddan la
qabsado dadka waddankaas waxay u kala bixi
jireen, kuwo nacfi ka raadiya oo gaadiid u
noqda, kuwo la dagaallama, kuwo dantooda ka
raacda oo aan waxba iska saarin ,
Soomaaliduna sida haddaba muuqata sidaas
ayay u kala bexeen. Haddaba taariikhdu manta
ayay qormaysaa ee qof kasta ha doorto
dhinacii uu cuslayn lahaa anigoo rejeynaya
in danta guud laga hormariyo tan shakhsiga
iyo beesha.
Wixii aan saxo
waxaa i waafajiyey Allah, wixii aan khaldana
waa naftayda aqoonta yar iyo sheydaan.
Mohamed Ahmed
Wallays
Yaaqshiid-Muqdisho
inawallays@yahoo.com
Afeef: Gabaygan waxaa leh qoraaga ku saxiixan
Faafin:
SomaliTalk.com | April 16, 2007