Wararkii June 27, 2006
. Sheekh Shariif oo ka qaybgalay Xafladdii Gabagabada
Sanad-Dugsiyeedkii 2005-2006 ee dugsiga Imaam Shaafici
. Is bedelkii ka dhacay Muqdisho oo saameyn ku yeeshay Puntland iyo Soomaaliland..
. Sheekh Xasan Daahir Aweys oo sheegay in ay soo dhaweynayaa cid kasta oo
dooneysa...
. Culumaa’u-diin ka yimid Puntland oo soo gaaray Muqdisho si ay...
. C/llaahi Yuusuf oo warqad qoraal ah u diray Dowladda Sweden...
. Golaha Guurtida Hawiye oo Maxaakiimta ka dalbaday in ay..
. Wafdi ka socda SCG oo gaaray Muqdisho...
. Ururka dalalka Islaamka oo ergo u diraya dalka Soomaaliya.
. Baabuur badan oo cadowga meelo kala duwan lagaga gubay.
Sheekh
Shariif oo ka qaybgalay Xafladdii Gabagabada Sanad-Dugsiyeedkii 2005-2006 ee
dugsiga Imaam Shaafici...
W/D Amiin Yuusuf Khasaaro |
Muqdisho | E-Mail
amiinkhasaaro@hotmail.com
Ardayda iyo waalidiinta ka soo qayb galay xaflada
oo uu lahadlayo Sh. Shariif
Waxaa Dugsiga Imaamu Shaafici
ka dhacday xaflad lagu soo gabegabeynayay sanad dugsiyeedka 2005-2006, waxaana
ka qaybgalay qaybaha kala duwan ee Bulshada, Walaadiinta iyo marti sharaf kale
oo uu ku jiray Guddoomiyaha golaha fulinta ee Maxaakiimta.
Guddoomiyaha dallada FPENS oo k ahadlaya
xafladda
Xafladdaas oo si heer sare ah loo soo agaasimay
ayaa horeyntii waxaa halkaasi warbixin ka soo jeediyay Guddoomiyadda Dalladda
FPENS, Axmed Sheekh C/llaahi waxa uuna sheegay in Dugsigaani uu ahaa dugsigii
ugu horeeyay ee gaar loo leeyahay ee la furay waqtigii ay jirtay dowladdii hore,
waxa uu sheegay in Imtixaanka u fariisteen 4168 arday, waxaana gudbay 3882 arday,
oo u dhiganta 92.3%, waxa uuna sheegay in ay Dugsiga Sare ka qalinjabiyeen
dufcaddii sideedaad. Waxaa kaloo uu sheegay in 500 oo arday ay siiyeen
abaalmarino kala duwan oo qiimahoodu sarreeyay.
sheekh_shariif_oo_xaflada_ka_soo_qeyb_galay
Waxaa kaloo halkaasi ka hadlay
Sheekh Shariif Sheekh Axmed oo mu’asasadda Imaamu Shaafici ku ammaanay sida ay
ugu dadaaleyso in Ubadka Soomaaliyeed ay helaan Waxbarasho tayeysan, waxaa kaloo
uu sheegay in ay laba-laabi doonaan ammaanka magaalada Muqdisho.
maamulaha schoolka ahna guddoomiyaha fpens
Ardaydii kaalimaha hore galay, haddii aan soo
qaadano ee
Dugsiga Sare.
- 1. Axmed Max’ed C/qaadir Nuur.
- 2. Cayduruus Xassan Cabdule.
- 3. C/raxmaan Max’ed Sheekh Muxumad.
Dusiga Dhexe.
- 1. Cali Max’ed Yuusuf.
- 2. Axmed Macallin Cusmaan Yuusuf.
- 3. Maymuun Xuseen Max’ed Xasan.
Is bedelkii ka dhacay Muqdisho oo saameyn ku yeeshay
Puntland iyo Soomaaliland..
Is bedelkii ka dhacay Magaalada Muqdisho ayaa
waxaa si weyn u soo dhaweeyay bulshada Soomaaliyeed meel kasta oo ay joogaan ha
noqoto dalka gudihiisa iyo dibaddiisa, is bedelkaas oo dadku si aad ah ugu
diirsaday, ayaa dhanka kale marka la fiiriyo waxa uu is bedelkaasi saameyn ku
yeeshay sida Maamulada Puntland iyo Somaliland.
Haddii aan soo qaadano Maamul Gobaleedka
Puntland marka la fiiriyo dhinaca dadweynaha si weyn ayay u soo dhaweeyeen is
bedelkaasi, waxayna damceen in ay ku soo dhaweeyaan banaanbaxo, hase yeeshee
waxaa arrintaasi diiday maamulka ka arrimiyaha maamul Gobaleedkaasi, waxaana
dhacday in qaar ka mid ah dadkii abaabulayay banaanbaxyadaasi xabsiyada loo
taxaabo, kuwo kalana waxaa loo jeediyay digniino aad u kulul, hase yeeshee
culuma’udiinka Maamul Gobaleedka Puntland ayaa iyagu arrimahoodii qarsan oo
waxay sheegeen in ay si aad ah u soo dhaweynayeen is bedelkii ka dhacay Magaalada
Muqdisho waxayna sheegeen in is bedelkaasi loo baahan yahay in la soo gaarsiiyo
qaar ka mida gobalada dalka, sidoo kale Guddoomiyihii Golaha Wakiilada Puntland
ayaa isagu waxaa laga dareemay taageero uu u hayo is bedelka ka dhacay Magaalada
Muqdisho waxaynta taasi keentay in laga qaado xilkii.
Haddii aan u leexano
dhinaca Soomaaliland, inta badan dadweynaha si weyn ayay u soo dhaweeyeen is
bedelkaasi, waxaana dhacday in Masaajidda qaarkood ay Culumadu ku dhawaaqayeen
“waa in si deg deg ah loo taageeraa waxa ka dhacay Magaalada Muqdisho”, waayo
ayay yiraadeen “is bedelkaasi waa mid si weyn loogu baahnaa in uu ka dhaco
koonfurta Soomaaliya, maadaama mudo 16 sano ah ay dhibaato ku jireen”, hase
yeeshee maamulka Daahir Riyaale wareegto uu soo saaray waxa uu ku diiday in aan
wax taageero loo muujiyo is bedelka ka dhacay Magaalada Muqdisho.
Sheekh Xasan Daahir Aweys oo sheegay in ay soo
dhaweynayaa cid kasta oo dooneysa...
Sheekh Xasan Daahir Aweys oo dhawaan loo
magacaabay Guddoomiyaha Golaha Shuurada ee Golaha Maxaakiimta Islaamiga ah ayaa
waxa uu sheegay in ay soo dhaweynayaan cid kasta oo dooneysa in ay ka taliso
maslaxadda ummadda Soomaaliyeed.
Mar wax laga weydiiyay bal in ay xiriir la
sameyn doonaan Dowladda Itoobiya ayaa Sheekh Xasan waxa uu ku jawaabay “Itoobiya
haddii ay la timaado wanaag, waan soo dhaweyneynaa, laakiin haddii ay ka
shaqeyso dibindaabyada shacabka Soomaaliyeed, waanu iska dhicineynaa, xitaa aanu
tabar yaraano”.
Sheekh Xasan Daahir waxa uu sheegay in uusan
ku jirin Liiska Argagixisada ah ee Mareykanku raadinayo balse waxa uu qiray in
hanti uu leeyahay ay xayirtay Dowladda Mareykanka, waxa uuna sheegay in taas uu
kala mid yahay dadkii ay Dowladda Mareykanku lacagahoodii ka xayirtay.
Sheekh Xasan waxa uu soo dhaweeyay heshiiskii
ka dhacay Magaalada Khartuum ee dhex maray Dowladda Federaalka iyo Midowga
maxaakiimta Islaamiga, uuna sheegay in loo baahan yahay in labada dhinac ay si
dhab ah u fuliyaan heshiiskaai.
Culumaa’u-diin ka yimid Puntland oo soo gaaray Muqdisho
si ay...
Waxaa magaalada Muqdisho dhawaan soo gaaray
Culuma’udiin ka socda maamul Gobaleedka Puntland, waxayna Culuma’udiinkaan marti
u yihiin Golaha Maxaakiimta Islaamiga ah.
Sababaha ay u yimaadeen ayaa lagu sheegay inay tahay sidii ay u ogaan lahaayeen is bedelka cusub ee ka dhacay Magaalada
Muqdisho iyo sida uu ku bilowday kacdoonka shacabka ee lagu riday
Qabqablayaashii dagaalka.
Culuma’udiinkaan ayaa waxaa wehliya Waxgarad
iyo
Dhallinyaro oo iyana doonaya in ay eegaan is bedelka cusub iyo waaga cusub ee u
baryay magaalada Muqdisho, waxaana la filayaa in ay kulamo la yeeshaan
mas’uuliyiinta sarsare ee Golaha Maxaakiimta Islaamiga ah ee Soomaaliyeed.
Maamul Gobaleedka Puntland ayaa isagu dhawaan
waxa uu soo saaray wareegto ah in aan wax taageero ah la siin karin is bedelka
ka dhacay Magaalada Muqdisho.
C/llaahi Yuusuf oo warqad qoraal ah u diray Dowladda
Sweden...
Madaxweyne C/llaahi Yuusuf Axmed ayaa warqad
qoraal ah u diray Dowladda Sweden waxa ayna warqaddaasi ku saabsaneyd sida ay
Dowladda Federaalka uga xun tahay dilkii loo gaystay Weriye Martin oo dhashay
wadanka Sweden oo dhawaan lagu dilay fagaaraha Tarabuunka, isagoo halkaasi ka
duubayay banaanbax aad u balaarnaa oo looga soo horjeeday in dalka la keeno
ciidamo shisheeye.
“Aad baan uga xunnahay dilkaasi, waxaana
ballanqaa-deynaa in aanu baarintaan ku sameyno” ayuu yiri Madaxweyne C/llaahi
Yuusuf oo sheegay in ay soo dhaweynayaan cid kasta oo gacan ka gaysaneysa
baaritaanka dilka weriyahaasi.
Inta badan weriyaasha lagu dilay dalka kuwo
dilkoodu ku saleysnaa arrimo siyaasadeed. dilkaan midkii ka horeeyay waxa uu
ahaa dil loo gaystay gabar weriye ahayd oo u shaqeyneysay Idaacadda British Brodcasting Corporation
waxaana dilkeeda lagu soo beegay xiligii ay Dowladdu kala qaybsaneyd.
Golaha Guurtida Hawiye oo Maxaakiimta ka dalbaday in
ay..
Muqdisho: Xafladdii dugsiga Shaafici ...
|
War-Saxaafadeed ka soo baxay
xafiiska Golaha Guurtida Hawiye ayaa waxaa si weyn loogu soo dhaweeyay
heshiiskii Magaalada Khartuum ee dalka Suudaan ku wada gaareen Dowladda
Federalka iyo Midowga Maxaakiimta Islaamiga ah, wuxuuna Golaha ka codsaday
labada dhinac in ay si deg deg ah u fuliyaan go’aanadii ka soo baxay
heshiiskaasi.
Golaha waxa uu cambaa-reynayaa
dilkii loo gaystay weriyihii u dhashay wadanka Sweden ee dhawaan lagu dilay
Fagaaraha Tarabuunka, waqtigaas oo uu halkaasi ka dhacayay banaanbax looga soo
horjeedo ciidamo shisheeye oo dalka la keeno, waxa uuna Goluhu ka codsaday
Golaha Maxaakiimta Islaamiga ah in ay si dhaqsi leh gacanta ugu soo dhigaan
kuwii gaystay falkaasi ayna hor keenaan, sidoo kale goluhu waxa uu aad uga
xumaaday xayiraaddii lagu soo rogay Shabakadda Warbaahinta shabeele ee gobalka
Bay, waxa uuna goluhu sheegay inay ayaan daro tahay in Dowladdu is hor taagto
Xoriyad qawlka, waxaana qoraalkaan ku saxiixnaa Afhayeenka golaha Guurtida
beelaha Hawiye, C/llaahi Cabdule Weheliye.
W/D Amiin Yuusuf Khasaaro
E-Mail
amiinkhasaaro@hotmail.com
Wafdi ka socda SCG oo gaaray Muqdisho.
Wafdi ka socda ururka Somali Concern Group (SCG) oo uu hoggaaminayo
Guddoomiyaha ururka SCG Mudane Abdirahman Omar Osman (Eng. Yarisow)
iyo Mudane Mohamoud Ahmed Nur (Tarzan) oo xubin ka ah guddiga fulinta
ururka SCG ayaa tegay magaalada Muqdishu, si ay wada haddalo ula soo
yeeshaan dhamaan qeybaha bulshada ee ka jira Muqdisho, si kacdoonka
shacabka uu u noqon lahaa mid miro dhala. Eng Yarisow iyo Tarzan ayaa
maanta la kulmay guddoomiyaha Muqdisho Mudane Cadde Gaabow.
Guddoomiyaha SCG Eng. Yarisow ayaa sheegay in tagidooda ay muhiim u
tahay shacabka soomaaliyeed, gaar ahaan shacabka degan Muqdisho, uuna
sheegay inay u tagayaan inay fikir ka geestaan sidii kacdoonka
caqabadaha ka hor imaan kara xal waara loogu heli lahaa. Isagoo
sheegay in kacdoonka shacabka oo ay hoggaaminayaan Maxkamadaha loo
baahan yahay in la taageero oo laga wada shaqeeyo sidii kacdoonka u
noqon lahaa mid kalsooni buuxda ku abuura dhamaan bulashada ku dhaqan
Muqdisho iyo Soomaalida inteeda kale. Isagoo hadalkiisa sii wata ayaa
Eng Yarisow waxa uu sheegay in shaqsiyaadka ama qaar ka mid ah
bulshada ee dareensan in kacdoonka khaladaad ku jira in looga baahan
yahay inay welwelkooda ku mujiyaan si saraaxad leh oo la wada hadlo,
lana iska daayo wararka ku tiri ku teenka ah ee aan salka iyo raadka
toona laheyn.
SCG ayaa u soo jeesatay sidii waddanka qilaafaadka jira loo yareyn
lahaa oo danta guud loogu soo wada jeesan lahaa. Xoghayaha ururka SCG
Mudane Abdullahi Telfoon ayaa isagan laba usbuuc ka hor tegay
Muqdisho, iyadoo uu Xasan Xundubeey uu isaga in mudo ahba uu ku sugnaa
Muqdisho.
Caqabadaha hor yaalla kacdoonka cusub ayaan yareyn, ha yeeshee loo
baahan yahay in shaqsi walba oo Soomaali ah uu kaalinta uga aadan ka
cayaaro, si wadajir wax loogu wada qabsado.
Somali Cocnern Group
somali@somaliconcern.org
Magaaladda Helsinki ee dalka Finland, waxaa
lagu qabtay habeenimadii Xalay25 Juun, 2006 ...
 Helesinki
(26.06.06) Xaflad weyn oo xuskii maalintii madax bannaanida Somalia Gaar ahaan
Gobolada Waqooyi oo ay ka soo wereegtay 46 sanadood oo Caln Soomaliyeed Ciida
Laga Taago oo Xora.Ugu horayntii Waxaa
shirka lagu Furay Aayadaha Quraanka kariimka Kadibna waxaa lagalay Ahmiyada
Munaasabadani lee dahay oo ah maalintii ugu horaysay oo Gumaystihii Dalku uu
qaybo kamida ka baxay taa soo ay aad u xasuustaa dadkii uu xanuun ka Gumaysigu
soo taabtay iyo inta wax aqrisa ee og taariikhdu waxa ay qiimo uleedahay
qoomiyad jirta oo caalmka ku nool runtiina waxaa hadalo qiimo leh ka soo
jeediyay Masuuliyiin aad u fara badan oo goobta joogay iyo dhalin yaro fara
badan Odayaal iyo Haweenka iyadoo halkaasi ay runtii joogeen dhamaanba Bulshada
Kala duwan ee Soomaalida wadankan Finland Kunool Iyadoo aanu ognahay Qaxooti
hadana kusugan wadan aynaan lahayn hadana waa ilaahay mahadi hadana aynu manta
xusayno markii ugu horaysay ee uu Gumaystuhu inaga kacay taas waa wax Alle loogu
mahadnaqo sababtoo ah Xornimada iyo waxa ay tahay runtii siwayn ayaynu
udhadhaminay maadaama aynu joogno qurbaha aynu hada kusuganahay waa oraahdii ay
ku celcelinayeen odayaashii soomaaliyeed ee ka qaybgalay Xaflada iyo waliba
hooyooyinkii ku buraanburayay macaanka xornimada iyo duco ay u ducaynayeen in
ilaahay uu dhibaatda ka saaro Soomaaliya iyo isbedelada soo kordhay in ilaahay
ka dhigo kuwii ilaahay wax san ka dhigo Kadibna waxaa hadalka qaatay oo ka
sheekeyay Munaasabadan iyo Qiimaha ay lee dahay Gudoomiyaha Soomaaliy Liito C/risaaq
Xasan Maxamed Runtiina ku dheeraaday Xornimada sidii loogu soo halgamay iyo
Taariikhdii ay soo martay iwax aanu ka sheekayn karno ma aha lakin waxaad moodaa
mirihii laga guran lahaa in lagu ciyaaray balse soomalidu ay maskaxdooda ka
shaqaysiiyaan qaas ahaan kuweena wax bartay ee dalkii wax ka badali kara waxna
ku kordhin kara waana wax loo baahan yahay oo umad walba waxaa wax ka badala
kuwooda wax ubartay mid maadiy iyo Cilmi diin Labadaba Waxaa kaloo halkaasi ka
hadlay Rug cadaa siyaasdeed oo aanan magacyadooda ku soo koobi Karin iyo waliba
abwaano halkaasi ku soo bandhigay gabayo qiira leh oo dadkii dad a ahaa ee ka
soo qaybgalay xaflada waayo waayo xasuusisay Runtii waxa ay ahayd xaflad aad u
qiimo badan Waxa ay ku dhamaatay jawiy aad u quruxbadan.
Galabtana waxaa dhici doona Cayaar Kubada cagta
ah oo afar kooxood ku hardamiy doonaan oo lagu gudoonsiin doono kooxdii ku
guulaysata koob loogu magacdaray Munaasabada 26Juun waxaana soo qaban qaabiyay
Ururka SUOMEN Somali Urheliluliito Daawasho wanaagsan iyo Galabta 16.00 Hadii
Ilaah Yiraahdo.
mseraar dahir |
musseseraar77@hotmail.com
Barnaamijkii Radio Xoriyo
27 Jun 2006
Baabuur badan oo
cadowga meelo kala duwan lagaga gubay.
Dagaallo cadowga
lagu naafeeyay.
Ururka dalalka
Islaamka oo ergo u diraya dalka Soomaaliya.
Qorshihii ciidan
keenista ee dawlada Soomaaliya oo dib u dhacay.
======================
Wariyaha RX uga soo
warrama Ogaadenya ayaa noo soo sheegay baabuur dhawr ah oo ciidammada
gumaysiga Itoobiya lagaga gubay meelo kala duwan oo Ogaadeenya ka mid ah.
Markii ay
taariikhdu ahayd 01/06/06 Bukudhabo oo degmada Awaare ka tirsan waxaa
ciidammada cadowga lagaga gubay baabuur Uuraal ah, waxaana halkaas ku bas-beelay
baabuurkii iyo wixii saarnaa oo dhan.
10/06/06 Garawo, oo
degmada Dhagaxbuur ka tirsan, waxaa sidoo kale ciidammada cadowga lagaga
gubay hal baabuur, iyadoo ay halkaas ku bas-beeleen baabuurkii iyo wixii
saarnaa oo dhan.
18/06/06 waxaa
ciidammada cadowga baabuur Uuraal ah lagaga gubay meesha lagu magacaabo
Qarsoodi, oo ka tirsana degmada Shilaabo. Baabuurkaas iyo wixii saarnaaba
waxba kama bixin.
Dagaallo cadowga
lagu naafeeyay.
05/06/06
Wayla-Cadde, oo gobolka Nogob ka tirsan, dagaal ka dhacay waxaa ciidammada
cadowga lagaga dilay 6 askari, 7 kalana waa lagaga dhaawacay.
06/06/06 dagaal ka
dhacay meesha lagu magacaabo Qarbo, oo u dhaxaysa Gari-go’an iyo Garbo,
waxaa ciidammada caga-jiidka ah ee Itoobiya lagaga dilay 6 askari, 6 kalana
waa lagaga dhaawacay. Ciidammada gumaysiga ayaa sidii caadada u ahayd waxay
ku gaydhadeen dadwaynihii deegaankaasi degganaa, waxayna dab qabadsiiyeen oo
guud ahaanba gubeen tuulada Qarbo.
12/06/06 dagaal ka
dhacay meel Garbo dusheeda ah waxaa ciidammada gumaysatada Itoobiya lagaga
dilay 3 askari, 4 kalana waa lagaga dhaawacay.
22/06/06 Cali
Fan-cad, oo Sagag ka tirsan waxaa dagaal iskaga hor-yimid cutub ka tirsan
ciidammada xoreynta Ogaadeenya iyo malleeshiyo Dabaqoodhi ah oo cadowgu soo
dirsaday, waxaana halkaas malleeshiyadii Dabaqoodhiga ahayd lagaga dilay 2,
mid kalana waa lagaga dhaawacay. Waxaa sidoo kale laga furtay qoryihii ay
wateen oo dhan
23/06/06 dagaal
magaalada Garbo ku dhex-maray ciidammada xoreynta Ogaadeenya iyo kuwa
cadowga Itoobiya, waxaa ciidammada cadowga lagaga dilay 4 askari, 6 kalana
waa lagaga dhaawacay.
Ururka dalalka
Islaamka oo ergo u diraya dalka Soomaaliya.
Ururka dalalka
islaamka, oo dhawaan shir heer wasiiro ah ku yeeshay waddanka Azerbijan,
go’aan ku gaadhay in dalka Soomaaliya loo diro ergo xaaladda soo qiimaysa.
Ururka Dalalka Islaamka ayaa sheegay inay lagama maarmaan tahay in la
taageero dawlada ku meelgaadhka ah ee Soomaaliya, si ay wax uga qabato
arrimaha nabadgelyada iyo dib u-heshiisiinta.
Ururka Dalalka
Islaamka ayaa sidoo kale go’aansaday inuu dalka Soomaaliya ka furto xafiis
isku duba-rida arrimaha mucaawanooyinka loo fidiyo dalka Soomaaliya, iyadoo
dalalka ururkan xubnaha ka ah laga codsaday inay diyaariyaan miisaaniyadii
uu xafiiskaasi ku hawlgali lahaa.
Kulan-hoosaad uu
ururka dalalka islaamku ka yeeshay arrimaha Soomaaliya waxaa ka qayb galay
xubno sarsare oo ka socda dawlada ku meelgaadhka ah ee Soomaaliya, kuwaasoo
ururka ka codsaday inuu dawlada gacan ku siiyo sidii ay nabadda iyo kala
danbaynta u soo celin lahayd.
Qorshihii ciidan
keenista ee dawlada Soomaaliya oo dib u dhacay.
Qorshihii ay
dawlada ku meelgaadhka ah ee Soomaaliya ku doonaysay inay Soomaaliya ku
keento ciidamo shisheeye ah oo ay ku jiraan kuwa dalalka deriska la ah
Soomaaliya ayaa dib u dhacay, sidaas waxaa laga soo xigtay ilo
diblumaasiyadeed oon daboolka laga qaadin.
Qorshahan ayaa dib
u dhacay, ka dib markii ay dhammaan dalalka daneeya arrimaha Soomaaliya ku
taliyeen in laga dhur-sugo wadahadallada u dhexeeya dawlada ku meelgaadhka
ah iyo maxaakimta islaamiga iyo sida uu u hirgalo heshiiskii hordhaca ahaa
ee labada dhinac isla gaadheen toddobaadkii hore.
Dib u-dhigista
qorshaha ciidamo keenista ayaa la sheegayaa in lagala hadlay dawlada ku
meelgaadhka ah ee Soomaaliya, urur goboleedka IGAD iyo Midowga Afrika.
Arrintan ayaa la
sheegayaa inuu saamayn wayn ku leeyahay socdaalkii ay dhawaan gobolka ku
tegtay kaaliyaha xogahaya arrimaha dibada ee Maraykanka u qaabilsan arrimaha
Afrika, taasoo la sheegayo inay dalalka gobolka kala hadashay sida ayna
munaasabka u ahayn in hadda ciidammo shisheeye la keeno dalka Soomaaliya,
balse ay lagama maarmaan tahay in laga warsugo sida ay noqoto wadashaqaynta
dawlada ku meelgaadhka ah iyo maxaakimta islaamiga.
Dawlada Maraykanka
iyo Qaramada Midoobey waxay labaduba taageereen heshiis toddobaadkii hore
magaalada Khartuum ku dhexdmaray dawlada ku meelgaadhka ah iyo maxaakimta
islaamiga, kaasoo ay qabanqaabadiisa lahayd Jaamacadda Carabtu.
27
Jun 2006.
Axmed Gaal-Eri
Info@radioxoriyo.com
raadioxoriyo@yahoo.com
Radio Xoriyo waxaad ka dhegaysan kartaa Mawjadda 25 MB ee dhererkeedu yahay
11865 KHZ,iyo internetka Radioxoriyo.com,Ogaden.com Maalmaha Talaadada iyo
Jimcaha 7: 30PM waqtiga Afrikada Bari
Faafin: SomaliTalk.com | Jun 27, 2006
Koonfur Afrika ma aqoonsana dalka la
baxay Somaliland....
| 
Daabaco
Boggan | Print
