|
|
| w w w . s o m a l i t a l k . c o m
|
|
"ISBAHAYSIGA
-
ARGAGGIXISADA"
|
Caaqilada
Dagaalka( War Lords) iyo Maxaakinta Islaamka Keebaa ii
Roon?
Tan iyo maalintii la
riday xukunkii Siyaad Barre oo laga joogo in ka badan 15
sano, waxaan dhexqotomay oo waayo aragnimo igu filan ka
hayaa xaaladda magaalada Muqdisho oo ay yarayd muddadaas
inaan arko 6 bilood oo isku xigta oo nabada. Waxaan ku
dhex jirnay 15kaas sano dagaal aan dhammaad lahayn oo ku
sallaysan damac siyaasadeed oo gaara laguna dhexwado
guubaabo qabiil. Sanadba sanadka ka dambeeya waxaa soo
baxayay horseede dagaal cusub oo ku soo caan baxa
dhiigga ummadda soomaaliyeed, kasoo bilow Cali Mahdi Iyo
Gen. Caydiid ku keen Dagaal oogayaasha sanadkan soo caan
baxay ee uu ugu dambeeyay cabdiwaal.
Sidaasoo tahay haddana
waxaa dhanka kale barbar socday, dad aad u fiican oo
usoo jeestay inay wanaagga iyo horumarinta dadkaas
dagaalka lagu harqiyay wax u qabtaan, waxay
sameeyeen meel walba waxbarasho haqab la'aanna,
waxay hirgaliyeen in dhalinta ay ku wacyi geliyaan
inay ka waantoobaan dagaaalka qabaliga ku dhisan ee
ay Caaqilada dagaaladu hagayaan, waxay kasoo
horjeesteen Daroogada iyo mukhaadaraadka dalka
fasahaadinaya ee uu ugu horeeyo Qaadka oo dagaal
oogayaasha halboowle u ah jiritaankooda xag dhaqaale
iyo mid dullayn mooryaanta u dagaalanta. Dadkaas
wanaagga u soo jeestay waxay ummaddaas kala danbayn
la'aantu dilootay intii karaankooda ah u sameeyeen
caddaalad kala hagta oo ka caagan eex iyo laaluush,
waxay sameeyeen gargaar aan lasoo koobi karin oo ay
intii wax haysata ku boorinayeen inay u gargaaraan
kuwa dan yarta ah ee dabku ka bakhtiisan yahay.
Haddaba Caaqilada
dagaalka oo ku caana maala xabaalo badiska
ummadda, waxaa cadowgooda kowaad noqday dadka
wanaagsan ee xarigga illaahay qabsaday. Waxaa
maalinba maalinta ka dambaysa soo yaraanayay
wiilashii ay qaldayeen ee ay daroogada quudka
uga dhigeen, waxaa sii liicaysay magacii
qabiileed ay dadka ku beerlaxawsanyeen, waxaa
soo kobcay oo meel walba harqiyay waxbarasho
nuuraysa oo mugdigii Caaqiladii dagaalka looga
raystay; waxaa meel walba halqabsigeedii noqday
"Qoriga keen Qalinka qaado" oo ah sunta disha
Caaqilada dagaalka.
Wixii xun
Xumaan baa u sugnaatay; Wixii wanaagsanna
wanaag baa u sugnaatay, meel ma wada galaan
labadaas, sidaas awgeed Caaqilada dagaalku
wanaag aragiis waxuu u yahay doorshaan cadar
lagu daadshay iyaga iyo culimada
maxaakiintuna isma arki karaan. Caaqilada
Dagaalka muddooyinkaan waxaa sahankoodu u
ahaa habkii ay ummadda u jeesatay wanaagga
ugu soo celin lahaayeen xayndaabkoodii
dulliga iyo dagaalka joogtada ah, waxaana
shiishku u qabtay tikidka cusub ee la magac
baxay 'Argagixiso'. Waa tikidka ay u arkeen
kii u bedeli lahaa beerlaxawsigii qabiiliga
oo hadda waqtigiiisii dhacay.
WaaTikidka
isku keenay oo walaalo ka dhigay Qanyare,
Bashiir Raage, Muuse Suudi, Ilqayte,
Finish,Cabdiwaal iyo Maxamed Dheere oo
hore dab iyo dhagax u ahaa. Waa tigidhka
jiheeyay in maanta Melez Zenewi Cadale
uu qaato dekadna ka samaysto, kuna
darsado kuwii hore ee Berbera iyo
Boosaaso. Waa tigidhka maanta xiray in
ka badan 15 iskuul oo ku teedsan
nawaaxiga dagaalku ka socdo. Waa
Tigidhka baro kiciyay dad ka badan 3000
qoys oo maato u badan kuna tabaalaysan
darbiyada xaafadaha ka fog dagaalka. Ma
argagixiso aan dagaal ooge ahayn baa
jira. Goormaa macalimiintii ubadka wax
baraysay, culimadii xaqa iyo baadilka
kala sheegaysay noqdeen dillaa iyo
argagixiye. Goormaa Muuse iyo Qanyare
noqdeen u hiisha maatada Muqdisho oo ay
ka badbaadinayaan Argagixiso aan
mooryaantooda ahayn. Goormay Maxaakiintu
wax ii dhimmeem sow ma aha goortaan
dacwo qabo meeshaan u ciirsi tagi jiray.
Maxaakiintu sow kuwa fusuqa iyo
xaaraanta la dagaala ma ahan halka
dagaal oogayaasha lagu kobciyo intii
illaah xaaraameeyay.
Argagixiso aan ahayn Caaqilada
dagaalka Soomaaliya ma joogto.
Argagixiso waxaa ah mooryaanta
dagaal oogayaasha caruurta dugsiyada
noo aada ku harqinay hoobiyaasha, ee
Scape goatka uu soo dhiibay Meles
Senaawi ayaan umadda lagu ciribtirin.
AFeef:
Aragtida qoraalkan waxaa leh qoraaga ku saxiixan
 
Faafin: SomaliTalk.com | Feb 25, 2006
|
|
@Spam!
|
Powered by
www.SomaliTalk.com
All About Somalia and More...
|
|
|
