Iyadoo
Maalintii Khamiista ahayd uu Dekedda Caalamiga ah ee
Muqdisho uu ku soo xirtay markabkii ugu horreeyay 11-sano
kaddib ayaa waxaa arrintaani si weyn ugu riyaaqay shacabka
Soomaaliyeed, meel kasta oo ay joogaan gaar ahaan kuwa ku
nool Gobalka Banaadir, waana waxqabadkii ugu weynaa ee
golaha Maxaakiimta Islaamiga ah ay qabtaan, waxaana
maalinkii uu ku soo xirtay markabkaasi ilaa iyo maanta ku
qulqulaya Dekedda weyn dad fara badan oo aan weligood arag
wax Markab, qaarkood waxay ku dhawaaqayeen ereyo ay ka mid
ahaayeen ”ka Naxoow Nafta waa”.
Sheekh Shariif
Sheekh Axmed oo ah Gudoomiyaha Golaha Maxaakiimta oo ka
hadlayey Munaasabaddii lagu furayay Dekedda weyn ee
Magaalada Muqdisho ayaa waxa uu yiri ”Furintaanka Dekedda
waxaa ka naxaya caddowga Soomaaliyeed oo ay ugu horeyso
Itoobiya, kuwa u shaqeeya Caddowga Soomaaliyeed iyo cid
kasta oo aan dooneyn horumar Soomaaliyeed, marka waa in aan
fursaddaas qaaliga ah ilaashanaa”, waxa uu intaasi sii
raaciyey ”Adinku waad faraxsan tihiin, laakiin caddogeenu
waa uu naxsan yahay”.
Sheekh
Xasan Daahir Aweys oo isna ka hadlay munaasabaddaasi, ayaa
waxa uu sheegay in furitaanka Dekedda uu tusaale u yahay
wanaaga iyo is bedelka cusub ee ka dhacay dalka gaar ahaan
Muqdisho.
Mareeyaha
Dekedda Sheekh Cumar Axmed Weheliye ayaa isna sheegay in
furitaanka Dekedda uu yahay mid si weyn ugu farxeen shacabka
Soomaaliyeed oo iyagu mudo 16 sano ah ku soo jiray
dhibaatooyin dhinaco badan leh.
Gen. Cali
Xaashi Baraale oo isna ka hadlayey Munaasabaddii lagu furay
Dekedda ayaa waxa uu yiri ”waxaa ayaan daro ah in maanta nin
Mas’uul sheegayana uu yiraahdo in Deegaanadeena ay ku sugan
yihiin ciidamo Itoobiyaan ah oo tababar siinaya
ciidamadeena, Askarina marka tababarka la siinayo waxaa la
yiraahdaa, Caddowgaada koowaad waa kuma, waa inuu si hal
haleel ah u yiraahdo caddowgeyga Koowaad waa hebel, marka
askariga haatan tababarka la siinayo muxuu noqonayaa
caddowgiisa koowaad, su’aashaas waxaan u daynayaa shacabka
Soomaaliyeed”. Dekedda Furintaankeeda waxaa si weyn ugu
farxay Bulshada Soomaaliyeed meel kasta oo ay joogaan, hase
yeeshee shacabka , waxay is weydiinayaan Dekeddaani is bedel
ma ku sameyn doontaa Maciishadda iyo waliba Dakhliga ka soo
xaroon doona waxa lagu qaban doono. Nin Odey ah ayaa waxa uu
yiri ”Aad baan u soo dhaweynayaa furitaanka Dekedda, basle,
waa in shacabka ay dareemaan maalmaha soo socda is bedel
weyn oo ah hoos u dhac dhinaca maciishadda ah, haddii aysan
tasi dhicina waxba kama duwanaan meyso Dekeddii Ceel
Macaan”, waxa uu intaasi sii raaciyey ”waa og nahay in
Ganacsatada Soomaaliyeed qaar ka mid ah ay yihiin kuwo dhiig
miirad oo doonaya in ay mar kasta faa’iido helaan, waxaan
kula talinayaa Maxaakiimta in Ganacsigu uusan noqon Ganacsi
Miileysi ah oo uu noqdo Ganacsi furfuran oo Xor ah, haddii
uu Miileysi noqdo oo ay Ganacsatu ku heshiiyaan in qolaba
mar ay keento Badeecooyinka taasi dhib ayaa ugu jira
shacabka Soomaaliyeed, waana ka dagaalami doonnaa”.
”Ganacsatada nin walba badeeco gaar ah ayuu keensaday oo aan
lagu faragelin isaga oo leen ka soo xirta shirkadda uu wax
ka soo qaadanayo, taasina dan uguma jirto bulsha weynta
Soomaaliyeed’ ayay tiri Haweenay ganacsi yar ku haysata
Suuqa Bakaaraha.
”Waxaan
maqalnaa shirkaad hebel oo keenta Caanaha hebel, Shirkad
hebel ah oo keenta Bariiska noocaas ah, Ganacsade Hebel
keena Naftada, Ganacsade hebel oo keena Baasiinka iyo
Ganacsade Hebel oo keena gaaska, waxan u arkaa mid Gacan
keliya ku jirta (Monopoly)” sidaa waxaa ku hadlay nin
Gaadiidley ah oo ugu baaqay Maxaakiimta in ay la socdaan
xaaladda Ganacsatada Soomaaliyed.
”Anigu
waxaan ahay nin ganacsade ah, waxaan doonay in aan ganacsi
ahaan u keeno Baasto ay bulshadu aad u jecel yihiin, markii
aan heshiis la soo galay shirkaddii oo aan ka soo dedejiyey
Dekedda Ceel Macaan, ayaa ninkii ganacsatada ahaa ee
Baastadaasi horey ugu soo degi jirtay ayaa waxa uu u tagay
shirkaddii aan ka soo qaatay Baastadaasi, wuxuuna ku yiri ’
Mar dambe idiin kama qaadanayo Anaa noocaan idinka dalbay ee
maxaad ninkaas u siiseen’, waxaana loo sheegay in dib dame
loogu noqon doonin, dib ayaan ugu laabtay shirkaddii oo ugu
tagay inay mar kale iga iibiyaan Baasto, waxayna i
yiraahdeen, raali ahow ee booskaan nin baa horey u xirtay,
sidii ayaa la iiga joojiyey, waxaan sameeyo ayaan garan
waayey, waxaa ii soo baxday in ummadda Soomaaliyed ay dhiig
Miiranayaan Dhowr Ganacsato ah oo isbahaysatay oo mid waliba
gooni wax ula soo dego oo cid kale aysan waxba u ogoleyn”
ayuu yiri. Shacabka Soomaaliyeed waxay Maxaakiimta uga
fadhiyaan sidii ay u joojin lahaayeen ganacsigaas ku jira
gacanta keliya, haddii ay taasi dhici weyso waxaa dhici
doona kacdoon la mid ah kii lagu qaaday Hogaamiye
kooxeedyadii.