Hindiya Iyo
Waxbarashada
Cali
Cabdalla Shukri
B C A (Bachelor of Computer Application)
Caliga1@hotmail.com
Hyderabad. India
Ka dib markii
akhristeyaal badan oo ku kala nool dunida dacalladeeda ay akhristeen
maqaaladaydii hore ee xiriirka ahaa
(Somalida ka
imanaysa dibadaha iyo guurka gabdhaha Hindida)
ayaa xiriiro ila soo sameeyay iyagoo iga codsaday inaan uga soo
warramo qaabka waxabarasho ee dalkan Hindiya kuwaas oo si gaar ah
iyo si guudba u dalbaday, qaarka mid ah ayaa iga codsaday inaan ugu
soo daaboco webisiteyada si ay ummada oo dhan uga faa’iidaysato.
Ma ahan diyaarinta
aan diyaariyay warbixintan inaan ahay ninka ugu mudan ee ku haboon
inuu warbixin noocanoo kale ah diyaariyo laakiin waxaa jira dad
badan oo igaga aqoon badan oo wadankanna mudo joogay iigana khibrad
dheer waxbarashada iyo nolosha dalkan, anigoo raggaas iga aqoonta
badan talooyinkooda iyo tusaalooyinkooda ka soo uruuriyay ayaan qaar
ka mid ah rajaynayaa inaan talooyinkooda iyo magacyadooda soo
bandhigo kuwaas oo ay ka mid yihiin aqoonyahannada kala ah Maxamed
Xaaji Cabaydh(B Com) iyo Mursal Maxamed (MBA IT) Agra, iyo qaar kale
oo aanan halkan magacyadooda ku xusin laakiin aan beerka ka
ogsoonahay.
Maxamed Xaaji
Cabaydh (B Com):
Marka hore waxaa
haboon inaad ogaato dalka aad waxabarashada u soo doonanayso qaab
dhaqankiisa iyo halka uu ku yaalo, anigoo taas doonaya inaan u
iftiimiyo ardayga ama waalidka jecel inuu ardaygiisa u soo dira
dalkan ayaan wax yar ka sheegayaa dalkan waxa uu yahay iyo halka uu
dhoco.
Hindiya waxay ku
taalaa koonfur bari ee qaarada Aasiya, waxay xad la leedahay xaga
galbeed dalka Pakistan, xaga bari wadamada Bangladesh iyo Burma,
xaga waqooyi China, Nepal iyo Butan. Tirada dadka ku nool Hindiya
waxa lagu qiyaasaa hal bilyan iyo boqol kun oo qof, dadkaas oo kala
aaminsan diimo iyo dhaqano kala duwan sida Hindusm(82.41%),
Islam(12%), Christanity(2.32%), Budhism(0.77%), Jainism(0.41%),
Sikhism(1.99%), Dad dhaqanno aaminsan iyo weliba Atheists (Diinlaawayaal).
Dalkan hindiya wax kasta waa lagu caabudaa laga bilaabo
Jiirka(Dooliga), Daayeerka ilaa Maroodiga wax nool iyo waxaan
noolaynba, isla mar ahaantaana waxaad la kulmaysaa meel laga cunayo
waxyaalahaas ay dadka qaar caabudaan sida Jiirka(Dooliga), Daayeerka
iwm.
Dalka hindiya waa
dal aad u weyn wuxuu ka kooban yahay 28 State iyo Laba
Territory(Gobol maamul gaar ah leh isla markaana aan State buuxa
ahayn). Hindiya waxaa lagaga hadlaa in ka badan 1650 luuqadood,
laakiin dastuurka dalku wuxuu si official ah u aqoonsan yahay 18
luuqadood, Luuqadaha ka dhexeeya dhamaan bulshoweynta hindiya
gobolkay doonaan ha ku noolaadeene waa luuqadaha Hindiga iyo
Ingiriisiga. Waxaa iyana jirta luuqad u gaar ah muslimiinta hindiya
waa luuqada Urduuga oo looga hadlo wadanka Pakistan.
Ardayda
soomaaliyeed waxay bilawday inay hindiya u soo waxbarasho doonato
horaantii sideetamaadkii, waxa iyana u soo qaxay qoysas badan oo
soomaaliyeed markii ay burburtay dawladii soomaaliyeed. Waxay
ardayda soomaaliyeed six ad dhaaf ah u yimaadeen dalkan hindiya
intii ka dambaysay sannadkii 2000, Hada waxa lagu qiyaasaa ardayda
soomaaliyeed ee wax ka barta hindiya ilaa 1500 oo arday iyaga oo
sanadba sanadka ka dambeeya soo badanaya. Maadooyinka ay bartaan
ardayda soomaaliyeed ee ay u badan yihiin waxaa ka mid ah B-COM(Bachelor
of Commerce), BBA(Bachelor of Business Administration), BBM(Bachelor
of Business and Management), IT(Information Technology), Computer
Science, Microbiology, BCA(Bachelor of Computer Application),
Engineering, Kalkaaliyenimada,Lab-Technician iyo weliba Law.
Waxaad moodaa
ardayda soomaaliyeed oo markii hore hal maado wada baran jiray inay
hada ku ilbaxeen dalka hindiya isla markaana ay bilaabeen maadooyin
kala duduwan oo faa’iido u leh mustaqbalkoda iyo bulshadooda. Waxa
iyana jira arday badan oo diploomooyin ku diyaariya laabtana u sii
daayey qaybaha kala duwan ee cilmiga Computerka sida Hardware,
Networking, Programming, Database Management Systems iwm. Waxa kale
oo jira arday badan oo markay dhamaystaan shahaadada kowaad ee
jaamacada sii korodhsada aqoontooda isla markaana diyaariya ilaa
heer Master waxay badankoodu diyaariyaan maadada MBA.
Dalka hinidiya waa
dal ilaahay waxbarasho ku manaystay, waxbarashadu waxay taalaa
gidaar walba, Wado walba waxa ka furan in ka badan toban Mac-had.
Bulshada hindiduna waa dad aqoon leh, waa dad nabadeed oo si fiican
loogu dhex noolaan karo, hadii aanad adigu wax daandaansan cidi ku
daari mayso. Hindidu waa bulsho ilbaxnimo leh, kalama kulmaysid
dalka hindiya wax cunsuriyad ah haba yaraatee.
Magaalooyinka ay
ardayday soomaaliyeed wax ka bartaan waxaa ka kow ah magaalada
Hyderabad oo ah magaalada xarunta u ah ardayda soomaaliyeed, waana
magaalada ay joogaan tirada ugu badan ee ardayda soomaaliyeed, waa
magaalo ay ku badan yihiin dadka muslimiinta ah isla markaana ah
magaalo cimilo wanaagsan, magaalooyinka kale ee ardaydu wax ka
bartaan waxa ka mid ah Madras, Mysore,Agra, Aurangabad iyo Pune.
Hadii ALAHA awooda lihi ogolaado
waxaan jeclahay inay ka koobnaan doonto warbixinadan xiriirka ah
qaybeheeda ugu waawayn kuwan soo socda..
- Waxabarashada Dugsiyada Dhexe
iyo Sare
- Maamulka, Kombuyuutarrada,
Sharciga, iwm.
- Caafimaadka
- Injineeriyada
- Shahaadooyinka Sare(Masters
Degree)
- Nolosha India
- Hindiya ma laga helaa
waxbarasho dibadaha ah?
- Qaabka Hindiya lagu iman karo
- Talooyin
AKhri qaybta
2-aad...