• QAAR KAMIDA DHAAWACII DADKII KU DAGAALAMAY YAMAARUGLAY OO LA SOO GAARSIIYAY GALKACYO.
• MADAXWAYNE KU XIGEENKA PL OO BOOQASHO KU YIMID GALKACYO.
• MADAXWAYNAHA PL OO DIGREETO KA SOO SAARAY MADAXTOOYADA BOOSAASO.
• BAAQ NABADEED BEELAHA KU DAGALAMAYA HOWD (AAGA YAMAARUGLAY) EE GOBOLKA WARDHEER

QAAR KAMIDA DHAAWACII DADKII KU DAGAALAMAY YAMAARUGLAY OO LA SOO GAARSIIYAY GALKACYO.

Sahro Siglan
Galkacyo: (Somalitalk)
sahrosiglan@hotmail.com

Waxaa saaka aroornimadii isbitalka wayn ee magaalada Galkacyo la keenay dhaawac tiradiisu gaarayso 10, ruux oo laga keenay deegaanka yamaarugle oo ka tirsan kililka 5,naad ee is-maamulka Soomalida ee dalka itoobiya.

dhaawacan ayaa ka mid ahaa dadkii shalay uu dagaalka ku dhexmaray Yamaarugle, dagaalakan oo bilowday 7, aroornimo istaagayna 11, aroornimo ayaa gaystay qasaare lixaadle oo isugu jira dhimasho iyo dhaawac intaba.

Dagaalkan ayaa la sheegay in si kafool kafool ah la iga horyimid laguna dagaalamayay gudaha Yamaarugley, ayadoo la sheegay in dhimashadu gaarayso illaa dhowr iyo toban qof halka dhaawacana lasheegay in uu gaarayo 22, qof.

Mar aan la xiriiray magaalada caabudwaaq ayay ii xaqiijiyeen in la keenay 12 qof oo dhaawac ah afar kamid ahna ay culus-yihiin ayadoo sidoo kalana mar aan soo indha indheyay dhaawaca isbitalka Galkacyana la ii xaqiijiyay in 3 kamid ah uu dhaawacoodu culusyahay balse shaqaalaha gacanta ku hayey Somalitalk u sheegeen in lagula tacaali karo dhaawacooda isbitalka haatanna loohayo adeegooda caafimaad.

Dagaalkan ayaa ka danbeeya kana soojeeda isku qabsi dhul waa hore laga qodayay barkad, waxaana in mudo ahaydba ay labada reer isku dilayeen si gaadmo ah balse aysan weerar kanoo kale ah iskaga hor-iman, ayadoo  dhow casho ka horna dhowr qof lagu dilay deegaanka bali-haraale taasna ay haatan dhalisay in si cad ay beeluhu isu arkaan.

Majiraan cid ilaa haatan kala dhex gashay waxaase jira warar sheegaya in ay jiraan abaabul lagu doonayo in lagu kal dhexgalo beelahan" Waxaana magaaladan Galkacyo ka socda qabanqaabooyin ay wadaan odayaasha gobolka Mudud oo ay ku doonayaan sidii ay u tagi lahayeen goobaha uu dagaalku ka jiro.

Isla dhanka kale ayaa isna sheegaya in ay socdaan kicin dagaal oo laga wado labada dhanba.

MADAXWAYNE KU XIGEENKA PL OO BOOQASHO KU YIMID GALKACYO

Waxaa maanta soo gaaray magaalada Galkacyo wafti balaaran oo uu hogaaminayo madaxwayne ku xigeenka PL Xasan Dahir Afqurac

Madaxwayne ku xigeena ayaa isla saaka soo gaaray magaalada Galkacyo, waxa uuna shir gaaban la yeeshay qaar kamida masuliyiinta maamulka Gobolka, waxa uuna ka warbixiyay xaalada safarkiisa oo uu sheegay in ay tahay'

Sidii loo xoojin-lahaa Amaanka Goboka iyo in ay soo kormeeraan Airport-

ka magaalada oo maalmahanba uu dhisme dayactir ah ku socday.

Madaxweyne ku xigeenka ayaa isla saaka waxa uu soo kormeeray garoonka waxaana ku wehliyay booqashadiisa wasiiro, agaasimayaal guud iyo ku xigeeno,  waxaana ka mid ahaa, kusimaha Taliyaha Ciidamada Daraawiishta PL C/samad Cali Shire, Taliayaha ilaalada ciidanka badda PL, Xiif Cali Taar.

Madaxweyne ku xigeenka ayaa isla saaka sheegay in uu ubaxayo safar gaaban oo uu bariba ku soo laabanayo Galkacyo lana shiri doono maamulka iyo masuuliyiinta bari galinka hore.

MADAXWAYNAHA PL OO DIGREETO KA SOO SAARAY MADAXTOOYADA BOOSAASO.

Digreeto saaka ka soo baxday xafiiska Madaxwaynaha DGFSPL, ayuu ku shegay in la joojiyo maarta iyo biraha daxalaystay ee laga dhoofiyo Gobolada PL, madaxwaynaha ayaa si rasmi ah shaaca uga qaaday in cidii lagu arko laga qaadayo talaabo sharci ah waxa uuna sidoo kale Madaxwaynuhu ku muujiyay digreetada maanta uu ka soo saaray xafiiskiissa boosaaso ay ku cadahay in gaarigii lagu qabto oo wada birahan isna uu lamid yahay kan beeca gaysanaya.

Isla saaka ayadoo ay soo baxday digreeto madaxwayne ayaa hadana waxaa saaka ka baxay Galkacyo gaari wayn oo noociisu yahay isjiid wadayna biraha daxalaystay.

Ma'ahan markii ugu horaysay ee birahani laga dhoofsho Gobolada PL, balse waa markii ugu horaysay ee uu ka hadlo madaxwayne. mana jirto cid kale oo si rasmi ah uga hadashay oo ka horaysay madaxwaynaha. 

Sahro Siglan
Galkacyo: (Somalitalk)
sahrosiglan@hotmail.com

Faafin: SomaliTalk.com | May 23, 2005