SWEDEN - Anagoo kala ah ururka Alkowneyn ee waxbarashada iyo ururka ardada jaamacadaha & jaamiciyiinta ee Sweden, ayaan waxaan halkaan tahniyad iyo bogaadin uga direynaa Dr. Cabdullahi Warsame Afrax oo ku guuleysatay qaadashada shahaadada PhD-da ee caafimaadka.

Cabdullahi Warsame oo hadda 40 jir ah, wuxuu ku koray (barbaaray) magaalada Hobyo, wuxuuna soo maray marxalado kala duwan oo loo qaybin karo afar meelood.

Waqtigii uu ku noolaa Hobyo wuxuu bartay quraanka kariimka ah. Maddaama Cabdullahi uu quraanka ku fiicnaa ayaa macallinkiisa quraanku ka codsaday aabihiis inaan Cabdullahi iskoolka la geyn, taasoo Warsame ku gacansayray macalinkii sababtoo ah wuxuu u arkayey in waxbarashadu tahay arrin muhim ah. Markaas kadib ayaa Cabdullaahi la geeyey dugsiga hoose sanadku markuu ahaa 1970, wuxuuna bilaabay fasalka labaad kadib markii uu ku guulaystay imtrixaan loogu gudbayey fasalkaas, isagoo halkaas ku dhammeystay dugsigii hoose/dhaxe.

Cabdullahi wuxuu dabadeed u soo wareegey magaalda Muqdisho halkaasoo uu qariib ku ahaa, sababtoo ah qaraabada uu halkaas ku lahaa oo ahayd dad iska danyar owgeed. Cabdullahi oo markaas 14-jir ahaa ayaa wuxuu goostay inuu iskiis u shaqeysto wuxuu ka mid noqday ciyaalka guluusyada ka tola harqaamada (dawaarada) ku yaalla suuqa Xamar-weyne, halkaasoo uu nolol maalmeedkiisa ka soo saran jiray. Cabdullahi waxaa niyadiisa mar kasta ku jirtay inuu waxbnarashadiisa sii wato, wuxuuna billaabay inuu waqtina iskool dhigto waqtina uu ku shaqeysto harqaanka. Waxaana u suurto gashay inuu waxbarashadiisa dugsiga sare ku dhammeysto Muqdisho. Cabdullahi wuxuu marar badan isku dayay inuu helo deeq waxbarasho oo dibadda ah laakiin taasi uma aaney suurtogalin.

Kadib wuxuu Cabdullahi, sida dhallinyaro badan oo soomaaliyeed oo kale, ka haajiray waddankiisi hooyo isagoo u ambabaxay dhinaca dalalka carabta. Halkaasoo dantu ay ku qasabtay inuu ka xamaalo, wuxuuna marki hore la shaqeynsan jiray koox dhallinyaro soomaaliyeed ah oo ka shaqaysan jirtay dhismaha guryaha. Kadibna wuxuu u wareegey inuu wado baarbuurta biyaha u dhaamisa dadka reer miyiga ee ku nool saxaaraha waddamadaas. Ugu dambeyntii waxaa u suurto gashay inuu ku shaqeeyo harqaan oo ah shaqadii uu soomaaliya ku soo bartay. Cabdullahi wuxuu go�aansaday inuu shaqeeyo habeen iyo maalin si uu iskula helo lacag uu wax ku barto.

Iska daa lacag u aruurtee waxaa ku adkaatay joogitaanka carriga carrabta, dhinaca kalena dagaalka sokeeye ee soomaaliya oo sii xumaanayay maalinba maalinta ka dambeysay ayaa culeys dhaqaale iyo mid bulshaba ku soo kordhiyay Cabdulaahi, taasoo ugu dambeyntii ku kaliftay inuu Yurub u haajiro. Wuxuu soo galay Sweden sanadkii 1989, halkaasoo uu billabay inuu barto afka waddankaas looga hadlo, wuxuuna ka billaabay barashada afka iswiidheshka �Hur m�r du?� oo macnaheedu yahay; sidee tahay? taasoo sabatay in saaxiibadiisu ugu yeeraan Huurmoorduu. Waxaa markiba u muuqatay inuu fursadiihii waxbrasho ee hore uga lumay uu dib u heli karo hadii uu dadaalo. Isagoo ka faa�iideysanaaya fursadaas qaaliga ah, ayuu Cabdullaahi, mar labaad 20 sano kadib, soo billabay aqoonta assaasiga ah (dugsiga hoose /dhaxe) sanadku markuu ahaa 1990. Saddex sano kadib wuxuu qaatay shahaada dugsiga sare. Bishii Agoosto 1993 wuxuu billabay jaamacaddii ugu horreysay oo ahayd Mid Sweden University oo ku taal waqooyiga dalka Sweden, halkaas oo uu ku hantay shihaadada B.Sc. Ka dib bishii September, 1996 ayuu u wareegey koofurta dalka Sweden halkaasoo uu jaamacaddii labaad (Kalmar University) ku billabay laguna guddoonsiiyay shahaadada M.Sc. sanadkii 1998. Markaas dabadeed wuxuu Cabdulaahi u soo wareegey Karolinska medicine University oo ku taal magaalada Stockholm, halkaas oo uu hadda ku dhamaystay shahaadada PhD oo ah tan aan haatan halkaan uga hambalyeyneyno. Dr. Cabdullahi waa xaqiiq inuu yahay sida loo maleynayo.

Waxaa SomaliTalk soo gaarsiiyey: Cadirisaaq Aaden
abdirisak.aden@telia.com

Stockholm Sweden

LIFAAQ: Bahda SomaliTalk waxa ay hambalyo u dirayaan Dr. Cabdullahi Warsame Afrax dadaalkiisa, Allah na cilmiga uu bartay hakadhigo kii lagu faa'iido. Dhallinta Soomaaliyeedna waxaan ku boorineynaa in aysan weligood ka rajo dhigin sidii ay ku gaarilahaayeen heer sare xagga tacliintooda.

HAMBALYADA CABDULLAAHI WARSAME WAXAA LOOGU HAGAAJINKARAA QORAAGA: abdirisak.aden@telia.com

FAAFIN: SOMALITALK.C COM | MAY 22, 2002

. Ardayda Soomaalida ee ka qalinjebiyey jaamacadaha India: 2002

. Horumarka ardayda Soomaalida Minnesota 2002

BAARID | SEARCH