GALEYR IYO XUKUUMADDIISA OO LA CASILAY!! Qiyaastii kowdii duhurnimo oo daqiiqado la` ee maanta Axadda ee waqtiga Somalia ayaa la soo gebagebeeyay codayntii baarlamaanka kmg ee kalsoonida xukuumadda kmg ah... Natiijada bilawga ahi waxay leedahay:   141 u codeeyeen in la rido xukuumadda   029 u codeeyeen inaan la ridin   004 ka aamuseen Natiijadii halkaas waxay ku noqotay in xukuumaddii Dr Cali Khaliif dhacday Maxaase ka dambeeya????? Waxaa aad loo saadaalinayaa in Ra`iisal wasaare uu noqdo Xasan Abshir Faarax; Waxaa kale oo la filayaa in wasiirada badankoodu amaba dhamaantooodba soo noqdaan!!!! Waxaase dhici karta in shirka Nairobi dhismahaas wax ka bedelo... Shirka waxaa isugu imanaya Dawladda KMG (Wafdi C/qaasim hogaaminayo); iyo kooxaha mucaaridka Koonfurta, SRRC iyo Odayada Puntland... waa war aan ka helay xog-ogaal aad ugu dhow-dhow DKMG 2001-10-28 War ay soo werisey hay'adda wararka ee shiinaha ayaa sheegay in "Saalax Nuux Ismaaciil oo kamida xildhibaanada DKG uu codbixinta kalsooni kala laabashada Cali Khaliif ku tilmaamay arin mu'aamaraad ah oo ay ka dambeeyaan madaxweynaha iyo guddomiyaha baarlamaanka, isaga oo sheegay in hirgelinta arintaan loo adeegsadey lacay iyo qabiil". Warkan oo ingiriis ah akhri halkan DoodFuran: codkaaga dhiibo

October 28, 2001

Kulankii Baarlamaanka ee maanta laguna qabtay xarunta ku meel gaarka ah ee Baarlamaanka ayaa kalsoonidii lagala noqday xukuumadda Cali Khaliif, kaddib markii 141 xildhibaan oo ka mid ahaa 178-dii xildhibaan ee kulankaa ka soo qayb galay ay codkooda ku dhiibeen in ay kalsoonodii kala noqdeen Xukuumadda KMG.

Kulankaan ayaa ahaa kii ugu ballaarnaa ee ay xildhibaanadu isugu yimaadeen, iyadoo maalmahanba la sugayay natiijada daba dheeraatay ee kalsooni kala noqoshada Xukuumadda, waxayna codbixinta maanta oo buuq la�aan ku dhacday taageeray Xukuumada oo codkooda ku bixiyay in aan la ridin 29 Xildhibaan, halka 4 Xildhibaan oo kale ay ka aamuseen.

Motion-kan ayaa waxaa horay u soo bandhigay 14 Xildhibaan, sida uu qabo Axdiga KMG iyo weliba xeer hoosaadka Baarlamaanka oo qaba in motion kasta ay soo bandhigi karaan ugu yaraan 10 Xildhibaan isla markaasna 5 cisho gudahood uu baarlamaanka uga doodayo.

Kulankan saakay dhacay ayaa ahaa kii 16-naad ee Baarlamaanka waxaana intii uu socday motion-kan is qortay 78 Xildhibaan si ay ra'yigooda uga dhiibtaan motion-kan, waxaa hadashay 40 Xildhibaan, iyadoo inta hartayna ay ku kaaftoomeen saaxiibadoodii ay isku aragtida ahaayeen, taasina ay keentay in si deg deg ah loo gudo galo cod qaadistii kalsooni kala noqoshada Xukuumadda.

Guddoomiyaha Baarlamaanka C/lla Deerow Isaaq ayaa ku dhawaaqy natiijadii kama dambaysta ahayd ee codbixintaas, wuxuuna caddeeyay in dhammaan Xukuumaddii Cali Khaliif ay dhacday, balse ay shaqada sii wadayaan inta mid bedesha la soo magacaabayo.

Sida uu qabo axdiga KMG, Madaxweynaha ayaa haysta muddo 30 cisho si uu u soo magaabo Ra'iisul Wasaare cusub, iyadoo sidoo kale uu R/Wasaaruhu isna leeyahay fursad intaa la mid ah.

Ma jirto cid ilaa iyo imminka la saadaalinayo in ay buuxiso jagada R/Wasaaraha inkastoo ay jiraan rag la magac hayay, balse waxaa cajaladda xaga kale u rogay kulanka uu Madaxweynuha DKG sheegay ee dhawaan ka dhacaya dalka Kenya ayna isugu imaanayaa Dowladda KMG iyo kooxaha ka soo horjeeda. Waxaana la saadaalinayaa in Madaxweynuhu uusan ku sii dhawaaqi doonin qofka hoggaamin doona xukuumadda soo shanqaraysan inta uu ka soo afjarmi doono kulanka madashiisu tahay Nayroobi.

Ku xigeenka R/Wasaaraha isla markaana ahaa ku simaha R/Wasaaraha Cismaan Jaamac Kalluun oo ka hadlayay Go'aanka Baarlamaanka oo uu kalsoonodii lagala noqday xukuumaddiisa, wuxuu sheegay in ay ogol yihiin go'aanka ka soo baxay Baarlamaanka. 'Cid diidi kartaa ma jirto' ayuu yiri Cismaan Jaamac oo xusay in Baarlamaanku uu ahaa kii markii horeba siiyay kalsoonidii ay ku shaqaynayeen, haddana uu leeyahay la noqoshadeeda, R/Wasaare ku xigeenka oo hadalkiisa sii wata wuxuu sheegay in ay sugayaan nidaam Xukuumad cusub lagu soo dhiso, iyaguna ay sii noqon doonaan sii hayeyaal inta la keenayo cid ay xilka ku wareejiyaan.

Hoos ka akhri Cali Khaliif oo aqbalay go'aanka baarlamaanka.... [Cali Khaliif waxa uu Ra'iisul wasaare u ahaa Dawladdii lagu soo dhisay Carta October 8, 2000 ilaa October 28, 2001]

Abdulahi M. Hassan (Black)
Muqdisho

. BANNAAN BIXI MUQDISHO
. XEERKA DHIGAALKA AFSOOMAALIGA

Galaydh oo Aqbalay Go'aankii Xilka Looga Qaaday

November 1, 2001

Dr. Cali Khaliif Gallayr oo 28/10/2001 baarlamaanka ku meel gaarka ah uu kalsoonidii kala noqday xukuumadiisa isagoo dalka ka maqan ayaa markii ugu horeysay ka hadlay go'aankaa uu ku waayay kalsoonida Baarlamaanka.

"Waan xusmaynayaa go'aanka Baarlamaanka, waana aqbalay" ayuu yiri Md. Cali Khaliif Gallayr oo golehiisa Wasiirada iyo saaxiibadiisa kaleba ugu baaqay in ay go'aankaas qaddariyaan.

Cali Khaliif Gallayr oo xukuumadiisa hal sano iyo dhowr bilood oo keliya jirtay ayaa hadalkiisa ku xusay in go�aanka Baarlamaanka uu yahay mid horseed ah dimoqraadiyadda iyo fulinta axdiga KMG.

Ra�iisul Wasaare Cali Khaliif Gallayr wuxuu hadalkaa oo uu saxaafadda ugu talo galay ku sheegay in uu la shaqayn doono Dowladda KMG, isla markaana uu xilka si wanaagsan ugu wareejin doono Ra'iisul Wasaaraha la soo magacaabo.

Dr. Cali Khaliif wuxuu hadalkiisaan mahad ugu celiyay Madaxweynaha KMG iyo Guddoomiyaha Baarlamaanka C/lla Deerow Isaaq.

Dr. Gallayr oo la soo xiriiray Golihiisa Wasiirada ayaa uga mahadceliyay sidii ay ula shaqeeyeen intii uu hayay Xilka Ra�iisul Wasaaraha, wuxuuna ugu baaqay in inta harsan ee ay xilka u hayaan Ummadda ay sida ugu habboon uga soo dhalaalaan.

Dr. Gallayr wuxuu sheegay inkastoo waqti adag dalku ku jiray haddana Xukuumaddiisu ay wax badan qabatay, haddii ay noqon lahayd siyaasadda dibadda iyo tan gudaha, uuna ku raali yahay in xilka banee la yiraahdo.

Cali Khaliif ayaa maanta oo khamiis aha laga sugayay in uu muqdishu yimaado, balse qaar ka mid ah Golehiisa Wasiiradda ay ii sheegeen in uu dib ugu dhacay ilaa iyo horraanta todobaadka fooda nagu haya.

Hadalkan Cali Khaliif ayaa si weyn uga duwanaa hadalo Muqdisho la isla dhex marayay oo saadaalinayay in uu si carro ah uga jawaabi doono, go'aanka Baarlamaanka, maadaama wareysiguu ugu dambeeyay ee uu bixiyay ay erayadiisu aad u ad-adkaayeen.

Abdulaahi M. Hassan (Black)
abdulahiblack@yahoo.com

Golaha Baarlamaanka KMG oo Maanta Yeeshay Kulankii la Wada Sugayey

Waxaana uu xirmay dood dheer kadib, iyadoo la'isugu soo laabanayo Berrito

October 21, 2001

Waxaa furay kulankaa sida caadada ahayad Guddoomiyaha Baarlamaanka C/lla Deerow Isaaq oo xildhibaanada u sheegay in loo baahan yahay in la xasuusto xilka ballaaran ee loo soo qaaday ummadda, isla markaana la ilaaliyo nidaamka, loona hoggaansamo sharciga goluhu leeyahay, wuxuuna xildhibaanada ka codsaday in si hufan looga doodo motion-nada horyaala.

Guddoomiyaha Guddi hoosaadka Golaha Baarlamaanka u qaabilsan baarista xukuumada, Xildhibaan Duuliye Sare Cabdi Cusmaan Faarax, waxaana uu sheegay in intii ay baarista ku jireen aysan wax gacan ah kala kulmin dowladda KMG ah, ayna waqti badan ku qaadatay in ay helaan akhbaar dhab ah oo ku aadan sida ay dowladu u maamushay howlihii loo xilsaaya oo ay ugu horreyso lacagihii yimid, balse ay waayeen cid u fududaysa.

Warbixintiisa kaddib, waxaa halkaasi ka hadlay Dr. Faarax Xasan Maxamed oo ah xildhibaankii ugu horreeyey ee soo gudbiya motion-ka lagala noqonayo kalsoonida xukuumadda KMG ah, wuxuuna ku magacaabay motion-kaas badbaadinta iyo samatabixinta Qaranka Soomaaliyeed. Waxa uu sheegay in xukuumaddu ay la soo ifbaxday hoggaan la�aan, oo ay ku dhaqmi weyday sharcigii, iyadoo isla markaana ilaalin weyday Axdigii KMG ah. Xildhibaanku, waxa uu taxay liis aad u dheer oo uu ku soo ururiyey waxyaabihii xukuumaddu wax ka qaban weyday, waxaana ka mid ah ayuu yiri iyadoo dhammeystiri weyday maamulka xukuumadda.

"Waxay ku guuldarraysatay sharci u dejinta maamul goboleedyada, waxay la imaan weyday qorshe jaango'an oo ku aaddan horumarinta dalka, waxaana soo if baxay kala dambayn la'aan iyo is qabqabsi iyo weliba is eedeyn u dhexeeya xubnaha xukuumadda, iyadoo weliba ay dhacdo mararka qaar inay is dacweeyaan iyagoo garsoor ugu tagaya odoyaal iyo qabaa'il" ayuu Dr. Faarax ku yiri liiskiisa.

Intaa kaddib waxaa mar qura Golihii Baarlamaanka is qabsaday buuq iyo sawaxan ay wadeen qaar ka mid ah xildhibaannada oo markaa aysan muuqan wax aay diiddan yihiin iyo waxa ay doonayaan, waxaase cad in ay aragtidaas xildhibaanka diidanaayeen, iyadoo Guddoomiyaha Golaha uu ku dhawaaqayey in xildhibaan kasta uu is qoro si uu aragtidiisa uga dhiibto motion-ka taagan.

Buuqaas oo dhowr daqiiqo socday kaddib, waxaa microphone-ka qaatay Cabdalla Deerow oo sheegay in xildhibaanku uu xaq u leeyahay inuu ra'yigiisa ka cabbiro Golaha gudihiisa, wax diido, waxna oggolaado, "balse xaq uma laha inuu qas iyo buuq Baarlamaanka ka dhex abuuro" ayuu yiri.

Waxa uu sheegay in kulanka maanta uu xiran yahay, dooduhuna ay beri billaaban doonaan, waxaana lagu ballamay in 09:00 subaxnimo la isugu yimaado kulankaa, oo lagu tilmaamay mid xasaasi ah.

Guud ahaan kullanka maanta oo ahaa mid si weyn loo sugayay ayaan ilaa iyo hadda la saadaalin Karin in kalsoonida lagala noqon doono Dowladda Cali Khaliif iyo in kale, inkastoo qaar xildhibaanda ka mid ah oo aan la kulmay ii sheegeen in [hadii la isku raaco] miisaamku u janjeero in kalsoonida laga xayuubiyo dowladda Cali Khaliif oo iminka booqasho ku jooga magaalada New York.

<> : <> : <> : <> : <> : <>

<> : <> : <> : <> : <> : <>

<> : <> : <> : <> : <> : <>

MOGADISHU WEEKLY REPORT

SOMALIA RELATED NEWS - CLICK HERE