Qore: Maxamed Axmed,
Toronto, Canada. 
Alhudaa1@yahoo.ca


BISMILLAAH ARRAXMAAN ARRAXIIM

Assalaamu calaykum w.w.

Soomaaliya oo aan miraheedii nahay ayaa badanaaba la isweeydiiyaa meesha ay ka kici la'dahay ama ay kadhutinayso. Ma dhabarkaa, ma lawga ishiisaa mise waa lafdhabarta. Nin walba meel buu madaxa saaray, nin walba meel buu xalkii kusheegay.

Xaalka Soomaaliya wuxuu noqday NIN BUKA BOQOL U TALISAY. Abwaan matiraahdid, Aqoonyahan ma tiraahdid, qabqable matiraahdid, ma tiraahdid ruug caddaa gaboobay xaalkuna uu dhibayo laakiin aan xoog hayn IWM. Xataa dad aan udhalan Soomaaliya ayaa yiri annagaa xalkeeda hayna ee ha naloo daayo oo hanala fiirsado!.

Runtu waxay kudhantahay, in dad badani haamiyeen inay helaan meesha SARTU KA QURUNTAY, dadkaasoo la oran karo qaar daacad bay ka ahayd qaarna ay ka ahayd mijo xaabin talooyinka ay bixinayeen iyo kursiga ay soo fariisanayeen. Haddaba su'aashu waxay tahay maxaa Soomaaliya ka dhigay ukun cirka kasoo dhacday, amase Nus bacaad kulumay?.

Waxay aniga ilatahay in wax walba xal leeyihiin, oo wixii aan Gaboow iyo Geeri ahayn ladaaweeyn karo, waana ladhayi karaa boogta, laakiin waa haddii la aqoonsado finkii hore ee ay boogtu kakacday iyo wixii dhaliyey, Soomaalidu ayada ayaa kumaahmaahda BOOG HOOS BAA LAGA DHAYAA!. Laakiin hadda xaalka Soomaaliya waxaa daawadiisa loo waayey korka ayaa la rabaa in daawo looga shubo isagoo nabarii hoos ka humbuluuluqay!.

Haddaba togba taagtiisuu rogmadaaye, biyana meel godan bay isugu tagaane, haddaan hoos udhaadhacno waamaxay QODOBADA AASAASIGA AH EE QUUSTA KA DHIGAY QARANIMADII?.

Nin ani yiri RAG ISKA SOOCYE, waxay ilatahay in dhibaatadu tahay ciqaab Alle oo kadhashay dhaqankii hore ee uu shacabkeennu caadaysan jiray, anoo aaminsan in cillada dadka qaarkiis kasoo bilaabayaan burburkii Soomaaliya ee 1991-kii, in dhibaatadu ka horreeysey waqtigaas, ayna kasbeen arrimahaan soo socda:

1) SHEEGASHO ISLAAM AAN INTIISA BADANI UURKA JIRIN:

Waxaa jirtay in Soomaali haddaan nahay aan kufaani jirnay 100% Muslim baan nahay(taasna aanan waxba kaqabin), hayeeshee waddanka intiisa kaleba haddaan iska dayno magaala madaxdeennii oo dadka intii Cilmi rabta ama xoog haysa oo shaqo doon ahiba ay usoo hayaami jireen, haddana magaala madaxdaas waa MUQDISHEE ay kafurnaayeen meelo badan oo khamro lagu cabo(goballada intooda kalana sidoo kale), iyadoo ay jireen caddad badan oo shacbiga kamid ah oo khamrada caba. Sidoo kale Xijaabka oo haweenka intiisa badani aysan qaadan jirin Islaamiga ah, dhallinyarada oo intooda badani kumashquul ahaayeen cayaaraha, filimada iyo riwaayadaha , iyo dawladdii waddanakaas Muslinka ah oo marna lahayd shuuci baan nahay marna galbeed baan nahay, islamarkaana u taagnayd caburinta diinta Islaamka iyo ehelkeedaba.

Arrimahaas oodhan waxaan ugu yeeri karnaa Islaam aan uurka jirin, hayeeshee wuxuu ahaa mid lagumacaansado sheegashadiisa, kaddibna waxay kasabtay in Ilaaha korreeyaa uu samada kadaalacday sida wax usocdaan, inkastoo uu samirkiisa nagu daboolay muddo badan, kaddibna wuxuu Alle nagu ciqaabay sheegashadaas iyada ah ee aan ka runsheegi weeyney.

2) KUTUMASHO & LIIDID DAD AADAN DHALASHO IYO DHIIG MIDNA KA FIICNAYN:

Sida uu quraankeenna qiimaha badani qoray ALLE wuxuu noosheegay, in asagu na abuuray aaddoomihiisana aan nahay, ciiddana aan ka nimid, iyadana nalaku aasi doono. Sidoo kalena uusan jirin qof Ilaahay xiriir gooni ah horay ula lahaa ama qaraabo la' ah, hayeeshee uu qof walbaa Ilaahay ugu udhawaanayo inta uu camalkiisu le'egyahay iyo Ikhlaaskiisu. Mid gaaban iyo mid dheer, mid cad iyo mid madoow, mid luga la' iyo mid luga leh, mid aabihiis joogo iyo mid aabbihiis dhintay, mid timo adag iyo mid timo jilicsan, dadku mar haddii ay Muslim yihiin inay siman yihiin baa Alle noosheegay, laakiin sida aan soo sheegnay waxaa lagu kala hormarayaa camalka suubban oo rasuulku noo jideeyey.

Laakiin maxaan samaynay haddaan Soomaalida 100% Muslinka ahayd nahay?. Waxaan ujeediney diintii Ilaahay xagga kale, annagoo niri dadku wuxuu uqaybsamaa LAAN DHEERE & LAAN GAAB, Timo adag iyo Timo jilic, Mid aabbihiis hilib cunay iyo mid uusan cunin, mid laga guursado iyo mid aan laga gursan karin, mid xoog weeyn iyo mid xoog yar, mid doowladda udhoow iyo mid doowladda kadheer IWM.

Dabaqadahaas aan Ilaahay raalli ka ahayn laguna duudsiyey dadkaas Walaalaheen ah oo la dulmay laguna dulsocday ayuu ahaa qodobka labaad ee keenay in caro Alle nagu habsato, carrigeenniina ay ceeryaamo ka qiiqdo, meeshii loo cararo ama la ciirsi bidaana ay noqoto cadaab kale oo kasoo daran kii horay looga soo carararay, tani waxay noqotay mid Soomaaliya kadhigtay nus bacaad kudhumay, bal adigu kaalay oo kasoo saar ciidda dhexdeeda!.

3) GUBIDDII WAQOOYI GALBEED(Now Somaliland) & GURBAANKII LOO GARAACAY:

Rasuulku(NNKH) wuxuu yiri: "Walaalkaa gacantiisa qabo, haddii uu dulman yahay iyo haddii uu wax dulminayaba".Dawladdii jaa'irka ahayd ee dalka katalinaysay waqtigaas markii ay dayuuradaha ladul tagtay dad walaaleheen ah oo Soomaali ah, marna Muslin ah, isha ayaa laga fiirsanayey, isla markaasna waa loo riyaaqsanaa(dawladda haba la raalli galiyee), laakiin waxay ahayd camal fool xun oo aan Alle raalli uga noqonayn addoomihiis sheeganaya Muslinka, inay gubaan dad walaalahood ah oo xaq uleh sidoodoo kale nolol iyo xornimo. Haddii aad itiraahdid anigu dambiga wax kagama jirin, ama dawladda wax ugama jirin, waxaan kuweeydiiyey xaggee kamaraysaa xadiiska aan kor kusoo sheegay ee leh gacanta qabo walaalkaaga daalimka ah.

Ilaahay waa noo naxariisan lahaa haddii aan mudaharaadyo iyo qaylo aan kumarno jidadka Soomaaliya kamidka ah, annagoo muujinayna inaan kasoo horjeedno Muslin dhibkiis, raallina aanaan ka ahayn, waxayna sidoo kale ubadnaan lahayd ugu yaraan in cilladii dhacday iyo xasuuqii uusan sidaa ubaaheen ee uu joogsan lahaa ugu yaraan. Tani waxaan qabaa inay tahay dhibaatada Saddexaad laakiin kuxigta xagga weeynanka iyo khatarnimada midda "sheegashada Islaamka aannaan ka runsheegin badankeennu", sida: xijaabka dumarka oo aan ladryeeli jirin dadka qaarkiis, xaaraan iska dhawrka oo aan buugga dad ugu jirin , xalaal quudashada oo yarayd, xatooyada xoolaha dadweeynaha oo baahsanayd.

Haddaba aniga oo soo gunaanadaya waxaa walaalaha xusuusin lahaa, in saddexdaas qodob daawadiisa laraadsho, Allana loo toowbad keeno, Shucuubta ladulmayna laxaalmariyo lagana dambidhaaf dalbo, layskana daayo darbi-madax-ladhaca iyo daaweeynta cudur aan markiisii hore la raadin wixii dhaliyey.

Fiiro gaar ah: Dhibaatada dhacday 1991-dii, waa dhib laga danqado haddana taagan, laakiin wuxuu hadalkaygu kusalaysanaa maxaa dhaliyey dhibaatadaas hore, sidoo kale caam ahaan wixii la dulmay oo Soomaali ah Ilaahay xaqooda waa siin doonaa goor uusiiyaba, kuwii wax dulmayna hadday adduunka cayshaan, aakhiraysan carari doonin, sidoo kale xalka biyo kama dhibcaanka ah guntana kuhaya nabad waartaa waa in ladoorto qof Ilaahay iyo rasuulkiisa yaqaan.


ILAAHAY XAQA HANA TUSO.....KADDIBNA KUWII RAACA HANAGA DHIGO.

 FAALADII HORE....

 Qore: Maxamed Axmed,
Toronto, Canada. 
Alhudaa1@yahoo.ca

Faafin: SomaliTalk.com | March 12, 2003

Afeef: Aragtida qoraalka waxaa leh qoraaga ku saxiixan

Powered by www.SomaliTalk.com
All About Somalia and More...