Waa isku soo dubaridey
Shaafici Xassan Maxamed
E-mail:
mi99mosh@chl.chalmers.se
Sansaan Xornimo
Markii soomaalida loo ballanqaaday daakhiliyada waxay ahayd 1949, waxaana
dadkii madaxbannaanidaas hoose oo toban sannadood ahayd iyo madaxbannaanidii
buuxdey ka dib la filanayey ku farxay ka mid ahaa Cismaan Keenadiid.
Waxay farxaddaasi Cismaan ka keentay in uu tiriyo gabaygaan “Sansaan xornimo”.
Samow Maxamedow xalay war bay, nagu salaameene
Siyaadiyo khabaar lagu farxaa, saabay beledkiiye
Sidii aan jeclaa iyo waxaan, sugayey weeyaane
Gu sidkiis dhammaadiyo hadduu, samanku dheeraado
Waxaad sare u eegtaba kolkuu, saymo di’in doono
Asba saadda wuu muujin jirey, sagal aroortiiye
Adduunkaan salaax iyo kharaab, subaxba waa cayne
Samaan iyo xumaan labadu waa, suu ahaan jiraye
Saacado isdhaafiyo ammuur, socota weeyaane
Dadku way saluugaan ninkii, sigan ayaantaase
Wax badan buu nabsigu nagu sugnaa, ama na saarnaaye
Sansaankii xornimo haatanuu, suurihiis yimide
Siyaasadaha Leegadu waddiyo, waxay samaynayso
Sifaalaha dadkeennii anfacay, ama siyaadaaya
Soojada axwaalkeedakani, waa saraad culuse
Saha maanta joogaa narsiga, sahanki weeyaane
Sucduu noogu daahiray burjigii, saaqidka ahaaye
Wuxuu Eebbahay sahal ka dhigin, sabab ma waayaane
Soomaali Eebbawga turay, seerihii hora’e
Hadday sax u ogaadeen waxay, seegayeen beriye
Samir lagama rooniyo ninkii, suga ilaahaye
Saac baa u soo degey mudday, si xun u noolayde
Suxullada birtii kaga jirtiyo, seetadii jara’e
Surka qool haddii lagaga wadey, siibe xariggiiye
Saxariir addoon laga dhigtiyo, silic ma qaataane
Sarajoogga ceebeed kufriga, kuma salaamaane
”Siyooroow” intay ku celceshaan, ”Siida” ma hayaane
Si baa loo tixgeliyaa intay, salabka qaateene
Soofkooda iyo ruuxa way, sadaqadaystaane
Surweellada waxay ugu jiraan, sahasho duullaane
Rabbi baa ku saacidey xaqay, sabanno waayeene
Niman soori ku cayaartayoy, sixirtay mooyaane
Sifnahooda kale maanta waa, wada salaaddiine
Salsalkiyo kuwii kagu dhexwadey, siraha ceebaalka
Kolkay calanka noo suran arkeen, ama saxiix yaalla
Ama qaar la sababay malaha, wada sukuudeene
Niman baa silsilayoo arlada, saa’id ku ahaaye
Goortii la kala soocmay buu, suulay amarkoode
Sadkay hor u cunaayeen sidii, sun u kharaaraaye
Sinji la isu sheegtiyo qabiil, seero laga yeelye
Sabuubooyinkii iyo dhacii, waa la saamaxaye
Sulux iyo heshiis baa beddeley, kala safnaantiiye
Saymihii colaadeed la daa, salowgii taagnaaye
Wixii siigadii hore ku lumay, laga sokeeyowye
Waakaa siqiir iyo kabiir, siman makhluuqiiye
Safka Meheri sayxuun inta leh, amase reer Suurka
Mukulliga sawaacigu galiyo, suuqa Cadan weyn ah
Sanco iyo intaa laga xukumo, saraha iimaamka
Suldaamada Ciraaq iyo raggaa, suuriyada haysta
Sucuudiga bilaadkiisa iyo, siinadii xaramka
Arlada suubban samihii Xijaas, sabarradii Daa’if
Saldanada Bengaas iyo Tabruuk, saajacyada jooga
Sanuusi iyo Liibiya kurteed, saadada u qiiman
Kuwa bidixda kaga saafsan iyo, siibadaha Tuunis
Bur Saciid Suweys iyo Masriga, socotadii Niilka
Singaad iyo sariiraha Kharduum, nimanka Suudaan ah
Sawaaki iyo siinkii Casmara, soohdintii Xabashta
Soke iyo Danaakilada taal, saaxillada xeebta
Safka Adari saaqii Shawiyo, Sabada guudkeeda
Amxaaruhu intuu saaran yahay, tan iyo Siidaamo
Suud Afrika suuqii Kilwiyo, sabada Nayroobi
Simawalaanga daaraha Salaam, iyo sinaadkooda
Sinjibaar sawaaxili kurtiis, sararihii Keenya
Jahaduu sakibo reer Hindigu, saraha Raanguunle
Bumbey soohdinttediyo intuu, Siikhu ku hoyaado
Saracii Karaaj iyo Bengaal, seliyadii Kaabbul
Meeshuu ku sugan yahay Jabbaan, surimaduu yaallo
Singabuurka Sayloon dhulka leh, Siino iyo Jaawo
Suryada Ustaraalliya xirfaha, lagu samaynaayo
Siyaadada badroolkiyo Kuweyd, sabaha loo dhiibey
Salaaddiinta Iiraan fadhida, sulubyadii Faaris
Arlada samaqaddiyo reer Bukhaar, sahannadii Baabul
Saaxiibbadii Hollanda iyo, siirka Filibiin leh
Serbiyada Isbaanyiyo Madrid, samaha loo qaabay
Saamaha ka haray reer Ondolos, sabannadii Daariq
Sekadahakan Mooskiyo halkuu, sal u lahaa Ruushku
Faransuhu halkuu seexdo iyo, sadaxyadii Baaris
Sijiil iyo Talyaanniga fadhiya, sabadka Miilaano
Suldaannada Turkiga iyo Giriig, reer Suweysarada
Iglan sarabyadeediyo Barliin, saabka lagu meershey
Sinbayr iyo Maraykaniga yaal, badaha saynkooda
Sankuneefle meel uu jiraba, saabyey khabarkiiye
Telegaraamka seeraariyaa, bixiyey sawkiiye
Subax yoonba joornaalladaa, sugaya xaalkiiye
Naloo sayngaree qarantinnimo, sabanka maanta ahe
Saraakiisha iyo dawladuhu, saare feermada’e
Salaamihii naloo soo dirana, siimankaa wada’e
Niyada noo sifowdiyo himmada, socota laabteenna
Iyo waxa ka sii suubanoon, weli sugaalayno
Alle ha noo sakhiro waa adduun, sanac u laabnaaye
Waa isku soo dubaridey
Shaafici Xassan Maxamed
E-mail:
mi99mosh@chl.chalmers.se
Afeef: Aragtida gabaygan waxaa leh qoraaga ku saxiixan