Daabaco Boggan | Print

Inj. Cumar C/nuur Nuux (Nabaddoon)
Omarabdinur@hotmail.com 

---

Inj. Cumar C/nur Nuux (Nabaddoon)

BAAQ (Gabay)
 

Maansadaan BAAQ waxaa tiriyey Inj Cumar C/nuur Nuux – Nabaddoon. Waxay maansadu soo baxday 18/07/2005. Inj. Nabaddoon oo ka maansooda xaaladda dalka gaar ahaan dhanka nabadgelyada iyo jiritaanka qarannimo ayaa gabaygiisii ugu danbeeyey wuxuu ahaa gabaygii Dhallaanruug ee soo baxay bishii Jan 2004. Intaas wixii ka danbeeyey abwaanku waa ka gaabsaday (marka laga reebo gabay kaftan-dhable ahaa oo dhexmaray Geeddi iyo Qanyare), isagoo eegayey bal in dhallaanruugyadii dhaqankooda wax ka baddalaan, maaddaama maamulkii oo dhan iyagu qaybsadeen. Gabaygaan oo tusaaleyn, baaq iyo bayaan isugu jira wuxuu leeyahay:
 

1. Haddaan baahi qurgooyo
2. Laga baaqsan karaynin
3. Baqtigu wayska xalaaloo
4. Naftu way ku badbaadi
5. Waxa taa u banneeyana
6. Rabbi baariya weeye!!
    
7. Beryaan aammusanaayoo
8. Dagaal ooge bahoobiyo
9. Dawladdii Em-bagaati (Mbagathi)
10. Aan ka qaaday bannaanka
     
11. Mar haddii baddankoodi
12. Maamulkii laga buuxshay
13. Bog cad bay furayaan iyo
14. Beryaan taas islahaaye
15. Bal aan maanta u baaqoo
16. Bayaankaan u hibeeyo.
     
17. Ilmaheenna bacaadka
18. Iyo boodhka dhex jiifa
19. Ka basaasay tacliinta
20. Madaxdii barritoole
21. Haddii aan la barbaarin
22. Burburkii ina gaaray
23. Saw kasii badan maayo?
     
24. Ruux bukaan la il liita
25. Misna beerka u yaalla
26. Dhakhtar baaniya haysan
27. Haddaad baacugga laaddo
28. Saw bestiis noqon maayo?
     
29. Haddii Beebbe xalkeeno
30. Ama Baalcas ka rayso
31. Dhaaxaa laysku basbeelay
32. Hargeysaba burburkeedi
33. Barre saw ma tijaabin
34. Janankii barbarriiqday
35. Halkee Baydhabo geeyey?
     
36. Kan haddeer bururaaya
37. Balcad saw gubimaayo
38. Nin balaaya hurshaaba
39. Kolley waa ku baxaaye
40. Boqolaal kun dadkeenna
41. Oo badbaado sugeysay
42. Baylah saw noqon mayso?
     
43. Intaad boobe cabbeys iyo
44. Buntukh aad la ordeysid
45. Baladweyn u fariiso
46. Bari koox uga yeero
47. Kooxda Baydhabo joogtiyo
48. Bakool hayska horkeenin
49. Baladxaawiyo Luuqna
50. Barre Hiire ha keeno
     
51. Beeraleyda Afgooyiyo
52. Reer Baraawe xusuuso
53. Boholyow qaran bay
54. Dhammaantood la bukaane
55. Dadkaas waa birlabtiiye
56. Ka badbaadi wax yeelloo
57. Hal barkiis ha ku sheegine
58. U bannee dhinacooda.
     
59. Ha go’doomin Banaadir
60. Waa bu’dii waddankeenna
61. Balaayaa habsatoo
62. Muddo soo barkaneyde
63. U bidhaami jaceylkoo
64. Ugu baaq nabad buuxda
     
65. Hadal bootiyo faan iyo
66. Badda baan ku shab siinin
67. Waxba soo badin mayso
68. Haysku baabi’in reerkee
69. U bidhaami jacaylkoo
70. Ugu baaq nabad buuxda
     
71. Dadku waa u bislaaday
72. Dawlad bay u bukaane
73. Colaad baase dilootay
74. Burcadna waw talisaaye
75. Ha ku biirinnin hooge
76. Ugu baaq nabad buuxda.
     
77. Ninna Beebbe dushiisa
78. Balad soo halakoobay
79. Dadku uu bahaloobay
80. Kuma baanan karaayee
81. U bayaani dastuurka
82. Barnaamij dawlo horkeen
83. Inta joogta baxnaani
84. Waxna baadi ku doon.
     
85. Kaligaa ha la boodin
86. Xogta waa la badshaaye
87. Isku biiri aqoonta
88. Baarlamaanka u yeero
89. Dhanka loo bato fiiri
90. Hana boobin codeynta
91. Sumcadday bi’iyaane
92. Baqshiish eex ha dulsaarin
     
93. Baladkii Xamarweyne
94. Iyo suuqa Bakaaro
95. Barbarkaad ka istaagto
96. Burcad baa miraneysa
97. Cidna aan bixineynin
98. Buulo-xuubey dhexdeeda
99. Iyagoon baqaneynin
100. Waa kuwii u bareeroo
101. Yaxye beerka ka toogtay
      
102. Isbaaraa iska buuxda
103. Baabuurtaan soconeynin
104. Dadku waa u Buskeeti
105. Barqadii la cunaayo
106. Waxba yaan la biqlayne
107. Qorshe baahsan u keena
108. Baarlamaan ha heshiiyo
109. Dalku maahan Bakaaree
110. Buqco maamul ka doonta
111. U bareera go’aankaas
112. Berri aad aflaxdeene.
      
113. Intaas wayga bayaan iyo
114. Baaqii aan u diraayey
115. Kuwa beebbaha saaran iyo
116. Kuwa baadda ku haysta
117. Xaruntii baladkeenna
      
118. Bulshoy wayga xasuusin
119. Waxa baabu’u haysto
120. Ubadkeenna basbeelay
121. Bukaan aan cidi eegin
122. Qaran baylah ku raagay
123. Birta loo tumanaayo
124. Waxa laysku baduugay
125. Burburee kala yaacay
126. Ba’ee saw adi maaha?
      
127. Badgariirkiyo roobka
128. Waxa aan ka badbaadin
129. Birmad aan cidi siinin
130. Badda loogu xabaalo
131. Suntii Boon iyo Rooma
132. Cidna looga baqaynin
133. Burburtee kala yaacday
134. Ba’ee saw adi maaha?
      
135. Aqoon loo baxsadaa iyo
136. Cilmi baa dad badbaadshee
137. Saraakiil billanayd iyo
138. Duqii beesha hagaayey
139. Waxa booca jaraaya
140. Ba’ee saw adi maaha?
      
141. Dib u baadh ficilkaaga
142. Bil dhacdaad u egtee
143. Iska baacso qabyaalad
144. Waad barooran hadhow’e
145. Ama boodhka ka qaado
146. Baluugleey calankaaga
147. Dulli aad ka baxdoo
148. Aad badhaadhe heshee
149. Bulshoy taas kala dooro.
      

===Dhammaad====

W. T. Inj. Cumar C/nuur Nuux – Nabaddoon
omarabdinur@hotmail.com

• Akhri Gabaygii Dhallaanruug

Faafin: SomaliTalk.com | July 20, 2005

MAANSADA HORE

MAANSADA XIGTA

Kulaabo bogga  www.SomaliTalk.com