bismillaahi, wassalaatu
wassalaamu calaa rasuulilaahi
Hordhac
Afartan iyo toddoba sano
kadib markay labadii gobol ee
Soomaaliyeed ee Ingiriiska iyo
Talyaanigu kala gumaysanayeen ay
xoriyadda qaateen ayaa waxaad
mooddaa in aan wali baadigoob
ugu jirro wixii xilligaa la
baadigoobayey oo ahayd
madaxbannaani, sharaf iyo
horumarar. Qof is indhatirayo
mooyee waxaa cad inaanan xor
ahayn maanta, xorriyadna ayna
noosoo naasa caddayn haddaanan
halgan hufan oo adag ugalin.
Xaqiiqda aan maanta hoos jiifno
ayaa waxay tahay in meeshii
horaan ay Talyaani, Xabashi,
Faransiis iyo Ingiriis
nadillaali jireen uu maanta
Tigree booskoodii
iskuwadadhaxlay oo uu inagu
daray lixdanka malyuun ee ee uu
kudullaysto dalka loogu yeedho
Itoobiya. Wax walba waxaa
kaagasii daran in inaan yarayn
oo innaga mida ay
kuqanacsantahay oo ay raalli
katahay arrintaa. In kale oo
innaga midana ayna danba
kalahayn oo ayna xiisaynaynin
xaalku meeshuu marayo iyagoo oo
ay kahoos baxday in kol aan
dheerayn dhulkooda lugu
adoonsan sitoosa iyo si
dadbanba. Waxaa wax aad loola
yaaba ah in dad aan kabadnayn
afar malyuun oo dadkooda aqoonta
leh ama indheer garadka ah ay
farakutiris yihiin inay afartan
malyuun oo muslimiin ah iska
dullaystaan ooy waliba
dillaalaan magacoodana caqdiya
kala duwan kusoo qaataan. Waxaan
jeclaystay marka inaan bal wax
yar kadhaho mashaqada iyo
musiibada taagan iyo siday iigu
muuqato.
Raad ba’ay iyo Reer Ba’ay
Soomaalida beeralayda ah iyo
kuwa xoolodhaqatada ah, siiba
kuwa tabcada gallayda iyo kuwa
dhaqdo lo’da ayaa waxay
kuhalqabsadaan labadaa weedh ama
murti een cinwaanka kadhigtay.
Raad ba’ay sidaan soo wariyey
waxaa loola jeedaa oo
laxusuusinayaa qof dhaqanayo
lo’. Lo’da sideeba ceeb malaha
oo waa nacfi uu alle (SWT) dadka
kumannaystay ee waxaa weedhan
dusha looga saaray, in siday uu
qiimo badan tahay oo u caano
macaantahay loona jecelyahay
ayaa markuu jiilaal daran
yimmaado ay billaabi inay dabar
go’do oo uusan mar marka
qaarkood hal neef kasoo hadhin.
Sidaan qiyaasay marka qof
indheergarada oo u fiirsaday
arrintaa soo noqnoqoto dadkana
ay katabaabushaysan waayeen ayaa
murtidan allifay “raad ba’ay”.
Siduu shakhsiga lo’da leh maalin
walba ugu raad joogo ayay abaar
ama jiilaal daba dheerady dartii
u le’an, halkaana raadkeedii uu
qaadi jirey ayaa kutirtirmi. Waa
arrin marka jirto oo dad badanna
soo martay kuwa kalana sugi.
Midda reerka ba’ay iyada
lafteeda waxba kama fogo midda
hore oo waa weedh ama murti
iyana kubaxday kadib markuu qof
ufiirsaday tacabka latabcado ee
gallayda iyo marmarka qaarkood
halka ay wax kudanbeeyaan.
Gallaydu waa quud aad uqiimo
badan walow ayna soomaalida uga
faa’iidaysan siyaabo badan oo
looga faa’iidaysto aduunyada
inteeda kale, haddana dadka
tabcada aad ayey uqadariyaan una
jecelyihiin. Marka la abuuro oo
ay soo baxdo oo ay baaldhoorka
bannaan usoo tuurto qofkii isha
laraaco kama daalo daawashadeeda
quruxda ay leedahay, haddana
saas ooy tahay waxay aad ugu
nugushahay qorraxda iyo
cudurrada kudhaco dhirta. Qofbaa
dhul masaafo ah abuuranayo
markay usoo baxdo oo uu aad ugu
bogo billaabana inuu caashaqo
iskuna dayo bal inuu qiyaaso
inta jawaan ee ay u noqoni
markay soo go’do ayaa halmar ama
cudur kuhabsadaa ama roob yari
dartii ay dhadhaa. Qofka ay
utabcanayd aadkana ugu rajada
waynaa qiyaastii wuxuu ula
dhaqmi jirey beertaas sidii heer
uu leeyahay oo kale, xoolaha
kaceli yayna kaa daaqine, duur
joogta iyana habeenkii kaceli,
fal oo cawska iyo dhirta kale ee
qoyaanka iyo rayska
kucidhiidhini kajaf iwm, kadibna
xaalad timid awgeed ayuu asagoo
faro madhan kadhaqaajiyaa.
Halkaana waxaa kadhalatay
murtida “reer Ba’ay”.
Dawladnimadii oo sayn
lagasoo rifi waayey
Wax walba oo lasammeeyey iyo
nidaam kasta oo lasoo
dhoodhoobay ama dimuqraadi
haloogu magacdaro ama millatari
kalitalisnimo ah haloogu yeedho
ama Ummadaha Midoobay qorshe
hakeento ama Maraykanka
kummaanan kun oo asakri keen oo
yidhi soomaalibaan badbaadin wax
walba oo lasammeeyey
dawladnimadii waa lagasii
fogaanayaa in loo dhawaado
iskadhaafee. Waxaa jirto sheeko
ama murti ay soomaalidu
kusheekaysato oo markaad sii
fiiriso aad fahmi inayba
katurjumayso qaabka iyo dhaqanka
aan soomaali ahaan leennahay ama
u noollahay. Waxay murtidu ahayd
sidan: Ninbaa xaabo uu dabka
kushito doontay, hawdka ayuuna
tagay oo uu xoogaa xaabo ah soo
urursaday markuu isyidhi qaad
ayey kucuslaatay oo uu qaadi
waayey, markuu xaal halkaa
marayo ayuu fekeray baa layidhi
oo uu xal raadiyey xoogaa kadib
ayuu go’aan kugaadhay inuu si uu
xaabada uqaado uu kukordhiyo in
kale, bal inay fududaatoo oo ay
garabka uqabato kadibna uu
halkii uu larabay ula aado.
Markay noqoto dawlad raadin
waayadan danbe waxaaba soo baxay
eray bixinno cusub oo si kama ah
ubaxay, “dawlad gacan kurimis
ah” iyo “dawlad lasoo
dhoodhoobay” ayaa kamida
halkudhagyada ay adeegsadaan
kuwa laga qadiyey waxaas lasoo
dhoodhoobay ee dawladnimada
loogu yeedhay. Qolyahan
isticmaalayo murtidaas qiimaha
kufadhido waa uun kukacso ritiga
ee maba ay fahamsana waxa ay
leeyihiin ama hadday fahamsan
yihiin daacad kama aha weedhaas
ay kudhawaaqayaan.
Markaan hadda fiiriyo
qolyahan dawladnimada ceebeeyey
ee jinsigii Soomaaliga ahaa
wixii karaamo uhadhay masaxay ee
ciidan xabashibaan soomaaliya
kuxukumaynaa yidhi qisadan laga
sheekeeyey ayaan soo xusuustaa.
Soomaaliya oo teedii lasilicsan
oo kitaab kasta oo loo rogay iyo
dawo kasta oo lugu dayey cudurka
hayo lafahmi waayey ayay
xabashibaan kudawaynaynaa
dhaheen.
Waxay ahayd inay kolka hore
bal ukuurgalaan hadday daacad
yihiin siday tahay xabashidu iyo
siday ula dhaqanto dadka kuhoos
nool ama dadkeedaba iyo waxa ay
kukordhin karto haddayba
keensadaan. Muddo sanado kabadan
ayey wehel u ahayd ooy garab
taagnayd difaacaysana illaa iyo
haddana hal shay oon dhib,
sumcad xumo iyo jahowareer ahayn
oy kusoo kordhisay malaha waana
wax lahubo inay kasii dari oo
illaa marka danbe ayba ayaga
laftooda kusoo jeedsan.
Halkaa waxaa kaagasoo bixi in
xaabadii dawladnimada ahayd ee
aynnu Soomaaliyoo dhan qaadi
waynay inay dusha uriteen laba
nin oo midkood kudooday inuu
afartan sano usoo halgamayey
inuu kursiga dawladnimada hanto
sidaa awgeedna uu asagu xalka
iyo horumarka hayo, meesha
kakalana kudooday soddon sano
ayaan wax soo baranayey oon
cilmi korodhsi kujirey ee jagada
maamulka ee ugu sarrayso ii
dhiiba. Dhibkii loo caal waayey
ee laqaadi waayey culayskiisa
ayey xabashi oo kasii culus 100
jeer dusha kasii saareen bal
inay fududaato.
Sidoo kale baadidoonkii
dawladnimo ee muddada dheer loo
xusul duubayey kolbana wax
ladhoodhoobayey wuxuu
kudanbeeyey sida raad ba’ay iyo
reer ba’ay oo kale oo saynna
lagasoo rifi waa.
Ikhlaas li’i
Soomaalida waa dad afka
kanool dhaqan ahaan oo
waxtarkoodu iyo kartidoodu inta
badan afka kujiro oon addimada
dhaqdhaqaajin. Waana sababta
keentay inay dad aad inooga yar
aadna innooga aqoon yar ay
nadillaalaan maanta, maxaa
yeelay waa dad yaqaanno shaqada
sugi iyo waddada loo maro inta
baddanna aan afminshaarro ahayn.
Haddaad lasheekaysato qofka
Soomaaliga ah ood kawaraysato
siduu u’arko xalka Soomaaliya
wuxuu kuu sheegi inta badan
wanaag iyo khayr meesha
qalbigiisu kasoo horjeedo waxa
uu sheegi asagoo doonayo inuu
adiga kuqanciyo oo qudha.
Markay dhabta timmaado 100%
wixii uu sheegayey wax kaduwan
ayuu kudhaqaaqaa lamana moodo
nin xoogaa kahor wanaag
sheegayey. Taas waxaa daliil u
ah markay Soomaalidu shir ama
urur ama nidaam dawladeed isugu
timmaaddo oo layidhaa tallaabo
halla qaado waxaa lugu billowdaa
khilaaf iyo isqabqabsi aan
billow iyo dhammaad midna lahayn
oo meesha kasaara wixii la’isugu
yimid. Hadday marka dadkaa is
khilaafaya daacad kayihiin waxa
ay isugu yimmaadeen oyna
khayaano, dhagar iyo qalbi
qalloocan meesha oolin dhibkaa
madhaceen. Labo unbayna mid
noqoni;
1- in dadka meesha isugu
yimid ay been isu sheegayeen oo
ay dano kale hoosta kuwataan
saasna khilaafka kuyimmaado, 2-
ama in dadka meesha isugu yimid
aynaba ogayn waxa ay meesha
uyimmaadeen iyo waxa lugu hayo
taas oo sabab unoqoto khilaafka
iyo jahowareerka. Sideedaba
waxaa hirgala shay daacad laga
yahay oon dano kale oo gaara aan
jeebtuugga lugu sidan. Waxaa
caado inoo ah soomaali inaan
israadsanno oon isu imaanno oon
is urursanno annagoo walaal
isugu yeedhayno kadibna khilaaf,
burbur iyo colaad aan kukala
tagno sida qaalibka ah.
Waxaa hadda marka isasoo
tarayo muddo dheerna sheekadeeda
lahayey inay labadii attoore waa
kornaylkii iyo barofasarkiiye ay
is qallacsan yihiin oo ay tii
ugu xumayd kamarayso. Hadaad
ufiirsato marka xaalkooda iyo
siyaasiintii kahorraysay ee
cilmaaniyiinta ahayd ee
soomaaliya soo martay waxaa
kuusoo bixi in dhammaan
qalbigooda iyo qawlkoodu is
khilaafsanaa, macnaha afkana
waxbay kasheegan jireen
uurkoodana wax kale ayaa
kaguuxayey.
Meesha kornaylka loo jeedo
inuu danaynayey oo qudha inuu
mar madaxwayne loogu yeedho si
‘uu u amarkutaagleeyo, waxaa
hoostiisa kusilicsan malaayiin
soomaali ah, waxaa masaajiddii
nijaaseeyey kaafir Tigree ah iyo
munaafaq layidhi askari qaran
baad tahay oo muqayilsan,
saasooy tahay innaba hayaraatee
kama muuqato damqasho iyo dareen
xitaa inay dadkuu lahaa waan
mathalaa ay dhibaato haysato oo
ay silic kunool yihiin. Wax
walba waxaa uga daran niman ay
iskasoo horjeedaan oo uu uga
baqay inay kursiga karidaan oo
qudha. Waxaa halkaa kaagasoo
bixi inuu dhaartuu kudhaartay
iyo ballantuu qaaday ayna sal
iyo baar toona lahayn, sidoo
kale inuu ninku lahaa caqli
geeljire oo ah yaanan lugu
lagdin ee wax iskadhici “rag
ciil cadaab kadooray” ayey ahayd
murtidii jahliga kudhisnayd ee
ay kuhalqabsan jirtay
Soomaalida. Sidee marka qofkaas
iyo qof la’aragti ah dal iyo dad
wax ugu qaban umaba soo jeedee!.
Markuu hunguriyeynayey kursiga
niyadiisa kuma jirin inuu dad
wax taro inuu xukumo mooyee oo
hadday xukunkiisa diidaanna uu
ciqaabo oo uu waliba uu
kuciqaabo waxaan hore loogu
ciqaabin waana inuu cadowgooda
kufriga ah ugacan galiyo.
Barofasarka asaga xaalkiisu
wuxuu kusoo koobmay shilimo
ururso oo waxaad mooddaa
maadaama uu Meles meesha
qotomiyey waagii horena uu
khasnaji u ahaa Meles in meesha
uu ukeenay inuu lacag labadooda
uga ururiyo. Innaba hayaraatee
kama muuqato damqasho iyo
masuuliyad iyo xilkasnimo midna.
Muddadii uu kumagacawnaa jago
ceebeedka wuxuu kadhammaan
waayey safar lacag urursi ah.
Waxaase kaba sii daran nin
Ra’iisalwasaarenimo sheeganayo
oo lagu eedaynayo waxyaabo aad
uliito oon filayo taariikhda
inaan qof kale oo madax dal ah
aan lugu eedayn waana
Mukhalasnimo. In inta dadka
lacag laga qaato wafti ahaan dal
kale lugu galiyo ayaa aad loogu
eedeeyaa. Markaad soo koobto
waxqabadkiisa iyo xarakaadkiisa
wuxuu kusoo koobmi lacag illaa
ay markii danbe odaygii adeerka
u ahaa ay iskuqabsadeen oo ay
qir iyo qir iyo kala celiyaay ay
kagaadhay. Ballantii uu qaaday
iyo dhaartii uu maray 100% wuu
garab maray wuxuuna kusoo koobay
hawlihiisa wax urursi iyo islaam
ladirir isdii asagoo islaamka
dabargoyn karo.
Ugu danbayntii
Waxaa inasoo maray fashil
fara badan oo siwalba oon
yeellay inaga hadhi la’, waxa
ugu wacanna waa qalbigeenna iyo
qowlkeenna oo is khilaafsan. Wax
fiicanna waannu sheegi wax xunna
waan sammaynaynaa had iyo goor.
Laba shay ayuu marka xalku
kujiraa aniga aragtidayda:
- In aan ikhlaas la’imanno
oo islaanimada aan
sheeganayno ayna af qudha
noqon ee ay noqoto mid hagta
dhaqankeenna iyo
nolosheenna. Innagoo
kabillaabayno inaan is
waafajinno qowlkeenna iyo
qalbigeenna oon sheegno
wixii aan doonayno iskana
dhaafno afminshaaraynta
joogtada ah ee qof walba loo
sheegi wuxuu rabo inuu
maqlo.
- Inaan garwaaqsanno
inayna dawlad aan 100%
islaam kusalaysnayn ayna
ka’istaagayn geesk afrika
siiba dhulkeenna. Maxaa
yeelay inta kale waynu
iskukhilaafsannahay marka
laga reebo diinta islaamka,
waana iyada waxa isu kaayo
keeni karo oo mabda’ kale
dhulkeenna horena uga
shaqayn waa haddana
kashaqayn maayo. Qofba
qofkuu ka alla cabsi badan
yahay ayuu kadaacadsan
yahay, maxaa yeelay camalka
fiican wanaag iyo hufnaan
ayuu kordhiyaa sidoo kalena
iimaan ayuu siyaadiyaa
meesha xummaanta, xiqdiga
iyo akhlaaq xumada ay
siyaadiyaan baadil iyo
dulmi. Haddaynu marka
dawladnimo rabno waa inaan
aaminnaa inay kusalaysnaato
diinta islaamka, sidoo
kalena ay hogaamiyaan dad
diinta u go’ay oo lagu
yaqaanno cabsi alle iyo
cibaado suuban. Haddii kale
waa raad ba’ay iyo reer
ba’ay oo joogto ah.