Wararkii: Sept 5, 2007
- Prof. Ibraahim Caddow “Inta badan Madaxdii Maxaakiimta waxay ku sugan
yihiin dalka gudihiisa gaar ahaan Muqdisho”
- Baarlamaanka oo ku kala qaybsamay u yeerida Max’ed Dheere, Darwiish iyo
Cabdi Qaybdiid
- Ilaa iyo 500 oo ergo oo ka qaybgaleysa shirka Asmara
- Xarunta Ismaaciil Jimcaale oo cambaareysay xadgudubyadii ugu dambeeyey
ee Magaalada Muqdisho ka dhacay
- Beesha Reer Xaaji Suleymaan oo kulan shalay la qaatay Madaxweynaha DFKMG
C/llaahi Yuusuf
- Cadde Gaabow “Dowladdu waa in ka fiirsataa waxyaabaha ay ku kaceyso”
- Cutubyo Ciidamo Itoobiyaan ah oo Dhuusamareeb gaaray
- Siminaar loo furay Garsoorayaal iyo Tababarayaal Kubbada Cagta...
- Maxaabiistii laga soo qabtey dagaalkii shalay ee ka dhacay deegaanka
Farshabeello ee gobolka Sanaag.
- Dagaallo dhex maray gumatysiga iyo CWXO.
Prof. Ibraahim Caddow “Inta badan Madaxdii Maxaakiimta waxay
ku sugan yihiin dalka gudihiisa gaar ahaan Muqdisho”
Xoghayaha Arrimaha Dibadda ee Maxaakiimta
Islaamiga ah Prof. Ibraahim Cadde ayaa isaga oo ku sugan Magaalada Doxa ee
dalka Qadar ayaa isaga oo u waramay wakaaladda wararka ee Reuters ayaa waxa
uu sheegay in madaxdii Maxaakiimta ay intooda badan ku sugan dalka gaar
ahaan Magaalada Muqdisho, waxa uuna sheegay in xubnahaasi ay dalka ka wadaan
abaabul ku aadan sidii dalka looga saari la haa ciidamada itoobiya oo uu
sheegay inay xoog ku qabsadeen dalka Soomaaliyeed, isla markaana ay haatan
ka wadaan dhibaatooyin isugu jira dil iyo dhac, Prof Ibraahim Caddow waxa uu
sheegay in intii ay Maxaakiimtu Islaamiga joogeen dalka Soomaaliyeed ay
qabteen hawlo muhiim ah, isagoo sheegay inay dalka ku soo dabaaleen nabad,
isl markaana ay heshiisiiyeen qabaa’ilkii dagaalamay, sidoo kalana ay fureen
Dekedda iyo Garoonka Muqdisho, isla markaana sidoo kale ay baabi’iyeen
burcad badeedkii dhibaatada ku hayn jirtay ummadda iyo waliba maraakiibta.
Dhanka kale mar uu ka hadlay shirka lagu wado in
uu ka furmo Magaalada Asmara ayaa waxa uu sheegay inay ka qaybgali doonaan
Siyaasiyiin iyo waxgarad kuwaas oo ka arisan doona sidii looga saari lahaa
dalka Ciidamada Itoobiya, waxa uu sheegay ilaa iyo 45 xildhibaan oo ka
tirsan Xildhibaanada Baarlamaanka xorta ah, sidoo kale waxa uu sheegay in ay
ka qaybgali doonaan mas’uuliyiin ka tirsan Maxaakiimtii Islaamiga iyo waliba
Aqoonyahanoio waliba siyaasiyiin kale oo ka kala imaan doonta dalka
gudihiisa iyo dibaddiisa, waxaa kale oo uu sheegay in shirkaasi ay ku
casuumeen dhamaan dowladdaha daneeya arrimaha Soomaaliya, Jaamacadda,
Midowga Afrika, IGAD, Midowga Yurub iyo waliba Dowladaha Islaamka, waxaa
kale oo uu sheegay in uu shirkaasi socon doono mudo dhowr maalmood ah uuna
filayo in ay kas oo bixi doonaan go’aano waxtar u ah bulshada Soomaaliyeed.
Shirkaani waxaa si aad ah uga soo horjeestay Dowladda Federaalka oo ku
tilmaantay in uu yahay mid lagu dhabarjebinayo shirkii dhawaan lagu soo
gebagabeeyey magaalada Muqdisho.
Baarlamaanka oo ku kala qaybsamay u yeerida Max’ed Dheere, Darwiish iyo
Cabdi Qaybdiid
Guddoomiye ku xigeenka kowaad ee
Baarlamaanka Prof. Max’ed Cumar Dhalxa ayaa waxa uu sheegay in Baarlamaanku
u yeeray Gdudoomiyaha gobalka Banaadir Max’ed Dheere, Taliyaha ciidamada
Nabad sugida Max’ed Warsame Darwiish, Taliyaha Ciidanka Booliiska
Somaaliyeed Cabdi Qaybdiid, guddoomiyaha Bankiga dhexe, kuwaas oo uu sheegay
Prof. Dhalxa in wax laga weydiin doono hawlihii ay ku qabteen bulshada
Soomaaliyeed, hase yeeshee warar ka imaanaya Magaalada baydhabo ayaa waxay
sheegayaan in Baarlamaanku uu ku kala qaysamay arrintaasi, waxayna qaarkood
tilmaameen in la doonayo in xilalka looga qaado, qaar kalana waxay sheegeen
in sababaha loogu yeeray ay tahay in su’aalo laga weydiiyo arrimaha
nabadgelyada gaar ahaan magaalada Muqdisho.
Qaar ka mid ah Xildhibaanada oo
uu ugu horeeyo Xasan Dhimbil Warsame oo ah wasiirka Garsoorka ayaa waxa uu
ku tilmaamay Max’ed Dheere nin aan u qalmin xilka uu hayo, isagoo sheegay in
Max’ed Dheere uu ku tilmaamay dadkii ka barakacay dhibatada Muqdisho ka
socoto in ay yihiin argagixiso.
Dhanka kale Muuse Suudi ayaa
sheegay in Baarlamaanku uusan shaqo ku laheyn Baarlamaanka u yeerista
raggaasi, gaar ahaan Max’ed Dheere oo uu sheegay in markii horeba aan laga
tashan magacaabista Baarlamaanka.
Max’ed Dheere ayaa isagu aqbalay in uu hor tago baarla-maanka hase yeeshee
xubnaha kale ayaa iyagu ilaa iyo hadda laga haynin wax war ah oo ku saabsan
in ay hortagaan Baarlamaanka iyo in kale.
Ilaa iyo 500 oo ergo oo ka qaybgaleysa shirka Asmara
Wararka ka imaanaya Magaalada
Asmara ee dalka Ereteriya waxay sheegayaan in magaaladaasi ay ku soo
qulqulayaan ergooyinka ka qaybgalay shirka beri ka furmaya magaalada Asmara,
waxaana ls heegay in ergooyin gaaraya 500 ay shirkaasi ka qaybgali doonaan,
kuwaas oo isugu jira Xildhibaanada Baarlamaanka xorta ah, Mas’uuliyiinta
Maxaakiimta Islaamiga, Siyaasiin iyo Aqoonyahano ka kala yimid dalka
Gudihiisa iyo Dibaddiisa.
Shirkaan ayaa la sheegay in
looga hadli doono ama xoogga lagu saari doono sidii ciidamada Itoobiya looga
saari lahaa dalka gudihiisa shacabka soomaaliyeedna loo nabadeyn lahaa,
lamana oga ilaa iyo hadda cid bixineysa tasiilaadka shirkaasi, hase yeeshee
Dowladda Ereteriya ayaa iyadu la filayaa inay bixiso qarashaadka ku baxaya
shirkaasi.
Xarunta Ismaaciil Jimcaale oo cambaareysay xadgudubyadii ugu dambeeyey
ee Magaalada Muqdisho ka dhacay
Xarunta Dr. Ismaaciil Jimcaale ee Xaquuqda
Aadanaha ayaa aad uga xun isla markaana cambaareyneysa qaraxyada iyo dilalka
qorsheysan ee loo gaysanayo dadka rayidka ah ee aan waxba galabsan kuwii ugu
dambeeyeyna waxay xarunta sheegay in ay ahaayeen Muumin Daahir Macallin iyo
Xaaji Magan oo la dilay Taariikhdu markay ahayd 28/8/2007, kuwaas oo lagu
dilay Xaafadda Abagado ee Degmada Madiina, Axmed Max’ed Faqey oo la dilay
1/9/200 iyo Prof Max’ed Axmed Xuseen (Dhoobaale) oo la dilay 3/9/2007,
waxayna xaruntu ku tilmaantay dilalkaasi kuwo ka baxsan Shareecada Islaamka,
xeerka soo jireenka ee dhaqanka Soomaaliya, axdiga Federaalka iyo baaqa
caalamiga ah ee xaquuqda aadanaha qodobkiisa 3-aad oo leh (qof waliba waxa
uu xaq u leeyahay in uu ku noolaado nabad iyo xoriyo), waxaana ku saxiixnaa
qoraalkaani C/llaahi Calas Jimcaale madaxda Baarista iyo xadgudubyada
xarunta Ismaaciil JImcaale.
Beesha Reer Xaaji Suleymaan oo kulan shalay la qaatay Madaxweynaha DFKMG
C/llaahi Yuusuf
Maalintii shalay ahayd ayaa
waxaa xarunta madaxtoonyada ee Magaalada Muqdisho kulan ku yeeshay
Madaxweynaha Dowladda Federaalka C/llaahi Yuusuf Axmed iyo Odoyaal iyo
Waxgarad, Xildhibaano iyo Wasiiro ka tirsan Beesha Reer Xaaji Suleymaan.
Kulankaan oo qaatay mudo dhowr
saacadood ah ayaa waxaa looga hadlay xaaladda nabadgelyo ee Magaalada
Muqdisho iyo sidii beeshu uga qayb-qaadan lahayd arrimahaasi.
Suldaanka Beesha Reer Xaaji
Suleymaan Suldaan Cali Horseed ayaa mar u la hadlayey saxaafadda waxa uu
sheegay in kulankaasi la iskula soo qaaday arimo u badnaa sidii wax looga
qaban lahaa dadka degan xeryaha ciidamada kadib markii dhawaan abaanduulka
sare ee Ciidamada Dowladda uu ku dhawaaqay in dadkaasi mudo taban maalmood
ah kaga guuraan xeryahaasi.
“Dadkaani waxa ay deganaayeen
halkasi mudo 17-sano ah, waxayna markoodii hore ahaayeen dada soo barakacay
halkaasina u degay dhibaatooyin waqtigaasi jiray” ayuu yiri Suldaan Cali
Horseed oo sheegay in beeshu ay ka codsaday Madaxweyne C/llaahi Yuusuf Axmed
in dadkaasi la dejiyo meelo kale.
Madaxweynaha Dowladda Federaalka
C/llaahi Yuusuf Axmed oo isna ka hadlay kulankaasi ayaa waxa uu sheegay in
dowladdu aysan marnaba ogaan doonin in dad sii deganaadaan xeryihii
ciidamada, isagoo sheegay in dadka degan ay dowladdu u raadin doonto goobo
ay degaan.
Kulankasi waxaa goob joog ka haa
wasiirka arrimaha gudaha Dowladda Federaalka Max’ed Sheekh Maxamuud Guuleed
(Gacma Dheere).
Cadde Gaabow “Dowladdu waa in ka fiirsataa waxyaabaha ay ku kaceyso”
Duqii hore ee Magaalada Muqdisho
Maxamuud Xasan Cali Cadde Gaabow ayaa Dowladda Federaalka u soo jeediyey in
ay qaado bandowga saaran Magaalada Muqdisho saddexdii bilood ee la soo
dhaafay.
“Waxaa fooda nagu soo haysa
bishii barakeysneed ee Ramadaan, dadkuna waxay doonayaan in ay xiliga
habeenkii gutaan waajibaadkii ilaahay saaray” ayuu yiri Cadde Gaabow oo
sheegay in Dowladda mar kasta looga baahan yahay in ay u naxariisato
bulshadeeda ee aan loo baahneyn in mar kasta la dhibaateeyo.
Mar uu ka hadlayey
dhibaatooyinka taagan Muqdisho Mudane Cadde Gaabo waxa uu sheegay in
dhinacyada isku haya Muqdisho looga baahan yahay in ay miiska wada hadalka
ku wada hadlaan si loo soo afjaro dhibaatooyinka haysta bulshada
Soomaaliyeed gaar ahaan kuwa ku nool Magaalada Muqdisho.
Maalmo aan sidaasi u badneen
ayaa waxaa ka harsan dhalshadii bishii barakeysneed ee Ramadaan, waxayna
dadka Soomaaliyeed diyaar garow ugu jiraan soo dhaweynta bishaasi
barakeysan, waxaana loogu baaqay ganacsatada Soomaaliyeed in ay gacan
siiyaan dadka dhibaateysan inta lagu guda jiro bisha Ramadaan.
Cutubyo Ciidamo Itoobiyaan ah oo Dhuusamareeb gaaray
Wararka naga soo gaaraya
Magaalada Dhuusamareeb waxay sheegayaan in shalay subaxnimadii ay
magaaladaasi gaareen cutubyo ka tirsan ciidamada Itoobiya oo horey ugu
sugnaa Guraceel.
Ciidankaasi ayaa waxaa la sheegay
inay halkaasi u tageen sidii ay u qaboojin lahaayeen xasarad ka taagan
gobalkaasi, kadib markii iska hor imaad ay dad ku dhinteen ka dhacay
Magaalada Dhuusa-mareeb.
Saraakiil ka tirsan Ciidamada
Itoobiya ayaa waxay kulan la yeesheen Odoyaal iyo Waxgarad ku sugan
Magaaladaasi, waxayna isla soo qaadeen sidii degaanada ka tirsan gobalka
Galguduud loogu soo dabaali lahaa nabad, waxayna dadka ku nool magaaladaas u
soo jeediyeen in ay la shaqeeyaan ciidamada Dowladda Federaalka.
Ciidamada Itoobiya ayaa halkaasi
dhowr jeer ku soo laabtay, kadib markii Guriceel iyo Dhuusamareeba ka
dhaceen iska hor imaadyo ay dad waxa ka soo gaareen.
Wasiirka iyo Wasiir ku xigeenka Wasaaradda Dhallinyarada iyo Isboortiga
oo aragtiyo kala duwan ka bixiyey arrinta Xiriirka K/koleyga
Wasiirka ku xigeenka Wasaaradda
Dhallinyarada iyo Isboortiga ayaa ka hor yimid go’aankii Wasiirka Isboortiga
Mowliid Macaane ee ahaa in uu xilka ka qaaday guddoomiyaha xiriirka
Soomaaliyeed K/Kolleyga Aadan Xaaji Yabarow (Wiish), kadib markii uu ku
eedeeyey in xiriirkaasi uusan gudan hawlihii K/koleyga ee Soomaliya, isla
markaana lacagihii soo galay la iska lunsaday, hase yeeshee Wasiirka ku
xigeenka ayaa waxa uu sheegay in xiriiirka Soomaaliyeed K/koleyga uu qabtay
hawlo muhiim u ah ummadda Soomaaliyeed, uuna istaahilo in xiriirkaasi la
guddoonsiiyo bilad dahab ah.
“cid ay ka qarsoon tahay ma jirto waxa uu qabtay
xiriirka K/koleyga” ayuu yiri Wasiir ku xigeenka oo sheegay in guddiga
Olombikada Soomaaliyeed uu calanka Soomaaliyeed dhex geeyey Caalamka, sidoo
kale waxaa halkaasi ka hadlay Aadan Xaaji Yabaro oo sheegay in xilka uusan
uga degi doonin hadalo la iska yiri, isagoo sheegay in uu xilka hayn doono
tan iyo inta ay dib ugala laabanayaan mas’uuliyiintii markii hore u dooratay
in uu qabtao xilkaasi.
Sept 5, 2007
Siminaar loo furay Garsoorayaal iyo Tababarayaal Kubbada Cagta...
Maalintii shalay ahayd ayaa Hotel Muqdisho Ex,
Daamey waxaa Siminaar looga furay, tababarayaal iyo garsoorayaal, waxaana
siminaarkaasi soo qabanqaabiyey Qabiirka K/cagta iyo Fuutsalka Xaaji Yuusuf
Max’ed Sheekh, isagoo gacan ka helaya Xiriiirka Soomaaliyeed ee K/cagta.
Tababarayashaan iyo garsoorayaashaan ayaa waxaa
la barayaa sharciyadda cusub ee K/fuutsalka iyo Beach Soccer-ka, maadaama
cayaaryahani ay ku cusub yihiin Adduunka.
Siminaarkaan ayaa waxaa furitaankiisa ka hadlay guddoomiye ku
xigeenka Xiriirka Soomaliyeed ee K/cagta Cali Siciid Guuleed oo sheegay in
xiriirka Soomaaliyeed ee K/cagta uu aad ugu faraxsan yahay in siminaar noocaan
oo kale ah loo qabto tababarayaal iyo garsoorayaal, waxa uuna si aad ah ugu
mahadceliyey qabiirka Xaaji Yuusuf Max’ed Sheekh, waxa uuna siminaarkaani socon
doonaa mudo saddex maalmood ah, waxa uuna Xaaji Yuusuf sheegay in ujeedada loo
qabanayo siminaarkaani tahay sidii uu aqoontiisa uga faa’iideyn lahaa
garsoorayasha da’da yar ee doonaya in ay ka qayb-qaataan cayaaryahan Beach
Soccer-ka iyo Fuutsalka.
Maxaabiistii laga soo qabtey dagaalkii shalay ee ka dhacay deegaanka
Farshabeello ee gobolka Sanaag.
Dhahar: Ciidamada la dagaalanka xaalufinta
degmada Dhahar ayaa waxaa shalay dagaal kaga hor yimid koox qowlaysata ah oo
meeshaasi gubaayey keymaha deegaanka Farshabeello ee xadka Sanaag iyo Gobolka
Bari.
Dadka dhuxulaysatada ah ayaa ahaa ciidan hubeysan
markii ay xabada fureena u baxsaday deegaanka Qardho iyago watey gaari Toyota ah
oo qori ku xiranyahay. Isla goobtaas ayaa waxaa lagusoo qab qabtey 9 ka mid ah
qowlasatadii gubeysay dhirta oo halkaas hub ka dhigis lagu sameeyey. Sideed ka
mid ah ayaa waxaa la geeyey xabsiga magaalada Dhahar halka mid dhaawac ah lagu
dabiibaaya isbitaalka guud ee degmada Dhahar.
Dadka lasoo qabqabtey ayaa waxaa ka dambeeya
ganacsato waa weyn ee ka ganacsada dhuxusha kuwaasoo dadka dhuxusha gubaaya ku
daro ciidan sharciyeysan ee ah kuwa Puntland. Taas ayaa waxay dhalisay in xoog
iyo gacan ka hadal looga joojiyo baabi'inta dhirta iyo kaymaha gobolada Sanaag
iyo gobolka Bari.
Waxaa kaloo xusid mudan in taliyaha gobolka
Karkaar ee Maamulka Puntland uu todobaadkii hore u hanjabay Ciidanka
Ladagaalanka Xaalufinta laga aasaasay Dhahar, taas oo uu ku tilmaamay inay
sharci daro tahay hadii ay qof dilaan, waayo ayuu yiri qofkaanan ahayn Booliis
Puntland ah oo cid disha in ay sharci daro tahay.
Hadalkaasi ayaa waxaa aad uga carooday
Ciidamada xaalufinta Dhahar kuwaasoo ku tilmaamay hadal loogu xalaalaynaaya
dadka inay dhuxusha gubaan, sidaa darteedna aan loo joojin doonin. waa sida ay
hadalka u dhigeene.
Gudiga la dagaalanka xaalufinta degmada Dhahar
ayaa waxay la wareegeen hubkii ay wateen dambiilayaashan iyo 90 kiintaal oo
dhuxul ah, ay u diyaarsadeen inay qaataan. waxaa kaloo laga aasay 20 tog. Dadka
hoos ku qoran, qaar ayaa Oroma ah qaarka kalena waa Soomaali, waxaana idiin soo
gudbiney magacooda sadexan iyo dhalashadooda Soomaali iyo Oromo.
dhahar@dhahar.com
Faafin: SomaliTalk.com | Sept 4, 2007
Dilal Kala Duwan Oo Ka Dhacay Caasimada Muqdisho Oo Ay Ku Jirto Gabadh
18-jir Ah.
Dil Qorsheysan ayaa xalay maqribnimadii waxaa dabley hubasyani ku dileen
gabar da,yar ah oo xiligaas ka ag dhowayd agagaarka suuqa weyn ee bakaraha gaar
ahaan Ex-dugsigii hoose dhexe ee xamar jadiid .
Dableydan hubaysan oo aan haybtooda la aqoon ayaa dil u gaysatay gabadhan yar
oo lagu qiyaasay ilaa 18-sano jir islamrkaana aan la ogayn sababta ka dambaysa
dilkeeda taasoo lagu toogtay sida ay saxafada u xaqiijiyeen goobjoogayaal ka ag
dhowaa xiligii falkaasi dhacayey dugsigii hore ee xamar jadiid .
Dilalkan kala duwan oo ku ekayn gabadhan oo keliya ayaa ilaa shalay waxaa
magaalada muqdisho dil loogu gaystay ilaa afar qofood oo uu ku jiro masuulkii
ugu sareeyey machadka Simad ee magaalada muqdisho taasoo ay dhamaan dilalkani ay
wada gaysteen dabley hubaysan oo aan haybtooda la aqoon .
Si kastaba ha ahaatee dilalka kala duwan ee ka dhaca caasimada muqdisho ayaa
ah kuwo soo noq noqday islamrkaana salka ku haya amaan xumada ka taagan magalada
muqdisho oo xiliyadii ugu dambeeyey amaankeedu faraha kasii baxay .
Mid Kamida Masuuliyiinta Shirkada Isgaarsiinta Nation-Link Ee Magaalada
Kismaanyo Oo Xalay La Diley. (Aug 4, 2007)
Dabley hubaysan ayaa xalay dil u gaystay mid kamida masuuliyiinta shirkada
isgaarsiinta Nation- Link xarunteeda magaalada kismaanyo ee gobolka jubada hoose
.
Masuulkan xalay lagu diley magaalada kismaanyo oo magaciisa la yiraahdo
marxuum Cabdi -weli Cabdillaahi Xirsi ayaa kamid ahaa masuuliyiinta shirkada
isgaarsiinta Nation -Link xarunteeda jubada hoose gaar ahaan magaalada kismaanyo
dilkan oo ay gaysteen dabley hubaysan oo aan haybtooda la garanayn ayaan la
ogayn xaqiiqda dhabta ah ee ka dambaysa dilkan marxuumka .
Sidoo kale ciidamada booliska dowlada KMG ah ee ku sugan magalada kismanyo
ayaa sheegay in dableyda dilka geysatay ay ahaayeen burcad hubaysan islamrkaana
ay sida ay sheeganayaan ku raad joogaan kooxda ka dambaysay dilkan .
Qaar ka tirsan dadka shacabka ah ee ku nool Magaalada kismaanyo ayaa
saxaafada u sheegay inay magaladasi dhowaanahan kasoo if baxayaan dhibaato amaan
xumo islamrkaana aysan jirin cid si cad uga talisa magaalada kismaanyo iyadoo
dadkaasi qarkood qabaan inay gobolada jubooyinku aysan gacanta ugu jirin dowlada
KMG ah .
Degmada Dhuusa -Mareeb Oo Saaka Ku Waaberiisatay Cutubyo Ciidamada
EThiopia Ah.
Cutubyo Ka tirsan ciidamada xukuumada ethiopia oo saaran gawaarida gaashaaman
ayaa saaka waaberigii ku ruqaansaday degmada dhuusa-mareeb ee xarunta gobolka
gal-guduud iyagoo ka kicitimay degmada gurey-ceel ee isla gobolkasi .
Dadka shacabka ah ee ku dhaqan degmada dhuusa mareeb ayaa saaka waxay ku
waaberiisteen ciidamada xabashida oo wata baaburtooda dagaalka oo ay saaran
yihiin ciidamo badani iyadoo argagax ku ridey dadka rayidka ah ee ku dhaqan
deegankasi .
Lama garanayo sababta keentay inay ciidamada ethiopia ay u tagaan
deegaankaasi iyadoo aysan jirin cid ka hadashay sababta dhabta ah ee ka dambaysa
tegitankooda ,ciidamada oo xiligoodii hore ku sugnaa degmada gurey ceel ee isla
gobolkaasi .
Warar iskhilaafsan ayaa kasoo baxaya tegitaanka ciidamada ethiopia ay u
tageen degmada dhuusa mareeb oo dadka qaarkiis qabaan inay ciidamada ethiopia ay
cagta dhgigayaan meel kasta oo wadanka soomaaliya ah halka dadka qarkiisna
qabaan inay halkaasi ka jiraan asbuucyadii ugu dambeeyey dhibaatooyin amaan daro
.
yaasiin maxamed cali (faytin)
yaasiinfaytin@hotmail.com
Sept 4, 2007
Barnaamijkii Radio Xoriyo
Dagaallo dhex maray gumatysiga iyo CWXO.
Dadwayne gumaysigu meelo kala
duwan ku xidhxidhay.
Gumaysiga oo calooshood
u-shaqaystayaal u diray gobollada Ogaadeenya.
War
Murtiyeed Golaha Dhalinta Ogadenya uu kasoo saaray Xaaladda Ogaadeenya.
Barnaamijka Faaqidaada Gudiga
xaqiiqa raadinta ee QM udirtay Ogadenya aaraada iyo afkaaraha
dhagaystayaasha Radio Xoriyo ee aduunka dacaladiisa.
Dagaallo dhex maray gumatysiga iyo
CWXO
Wariyaha RX uga soo warrama
gobolka Jarar ee dalka Ogaadeenya ayaa noo soo sheegay dagaallo dhawr ah oo
dhex maray CWXO iyo kuwa gumaysiga Itoobiya, kuwaasoo ka dhacay gobollada
Qorraxey iyo Jarar. Dagaalladu waxay u dheceen sidatan;
22/08/07 dagaal ka dhacay Kaaraha,
oo Shilaabo ka tirsan, waxaa ciidammada gumaysiga lagaga dilay 8 askari, 6
kalana waa lagaga dhaawacay.
18/08/07 cutub ka tirsan CWXO ayaa
weerar gaadmo ah ugu gaystay Shabeeleeyaha, oo Dhagaxbuur ka tirsan, waxaana
weerarkaas cadowga lagaga dilay 4 askari, 3 kalana waa lagaga dhaawacay.
Sidoo kale 18/08/07 dagaal ka
dhacay Biya-guduud, oo Dhagaxbuur ka tirsan, waxaa ciidammada gumaysiga
lagaga dilay 7 askari, 5 kalana waa lagaga dhaawacay.
Dadwayne gumaysigu meelo kala
duwan ku xidhxidhay.
Sida uu noogu soo warrama wariyaha
nooga soo warrama arrimaha bulshada ee dalka Ogaadeenya, waxay ciidammada
nacabka ah ee gumaysiga Itoobiya meelo kala duwan oo Ogaadeenya ka mid ah
waxyeellooyin iyo xidhay ugu gaysteen dadwayne rayad ah.
25/08/07 Gal-da’a, oo Dhagaxbuur
ka tirsan, waxay ciidammada gumaysigu ku dileen;
1-
Ibraahib Xasan Mataan iyo
2-
Ina
Axmed Daahir oo magaciisa aanaan haynin.
30/08/07 Baabili waxay ciidammada
gumaysigu ku xidhxidheen dad rayad ah oo badan, waxaanan magacyadooda
helnay;
Isla 30/08/07 waxay ciidammada
gumaysigu guryohooda kala baxeen dadka toddoba qof oo rayad ah, oo uu ku
jiro nin lagu magacaabo Muxumed Budhle
Isla 30/08/07 ciidammada
gumaysigu gurigiisa magaalada Jigjiga kala baxeen Suldaan Fawsi Suldaan
Maxamed Cali
29/08/07 ciidammada gumaysiga ayaa
magaalada Galadiid ku xidhxidhay dadka kala ah;
1-Saxardiid Muxumed Faarax iyo
27/08/07 magaalada Waafdhuug waxay
ciidammada gumaysigu ka taxaabteen dad shacab ah, waxaana ka mid ah;
26/08/07 Jilba-gaabo, oo ka tirsan
degmada Dhagaxmadow, waxay ciidammada gumaysigu jidhdil ba’an ugu gaysteen
dadka kala ah;
1-Maxabo Maxamuud Carab iyo
Isla 26/08/07 Tantoomi waxay
ciidammada guamysigu kala tageen oo aan la ogayn meel ay geeyeen Siqiir
Axmed Taajir
25/08/07 magaalada Wardheer waxay
ciidammada gumaysigu ku xidhxidheen dadka kala ah;
5-Shukri C/llaahi Dool iyo
Sidoo kale 25/08/07 Uubataale, oo
ku yaalla duleedka magaalada Wardheer, waxay ciidammada guamysigu ku
xidhxidheen dadka kala ah;
1-Jaamac Aaden oo ay sidoo kale
labo Aqal ka gubeen
2-C/llaahi Aaden oo ay 10 Neef oo
Adhi ah ka qasheen
3-Cabdi Daahir oo ay isagana 6
Neef oo Adhi ah ka qasheen
25/08/07 Dhursan, oo ka tirsan
degmada Dhagaxmadow, waxaa lagu xidhay;
1-Axmed Cumar Lacag oo ay labo
Aqal ka gubeen, kana dhaceen hal Qori oo M14 ah
24/08/07 magaalada Walwaal waxay
ciidammada gumaysigu ku xidhxidheen dadka kala ah;
2-Labo nin oo Ilma Mukhtaar
C/casiis ah oo magacyadooda aanaan helin
Isla 24/08/07 magaalada Dhuxun
waxay ciidammada guamysigu ku xidhxidheen dadka akla ah;
3-Axmed Maxamed Xasan Kaahin
4-Ardo Sh C/llaahi Barkhadle
5-Ayaan C/llaahi Barkhadle
7-Xaliimo Siyaad Cabdi Xaashi
8-Gorda Macalin Mahad iyo
9-Fardowsa Maxamed Macalin
Sidoo kale 24/08/07 waxay
ciidammada gumaysigu magaalada Galadiid ku xidhxidheen dadka kala ah;
1-Xadiis Cabdi Daahir iyo
24/08/07 Waxay ciidammada
gumaysigu Garbo ku xidhxidheen gabadh Umul ah oo lagu magacaabo Ruqiya
Maxamuud Dhagacadde iyo gabadh kale oo Uur leh oo magaceeda aanaan haynin
23/08/07 Garasley, oo Dhuxun ka
tirsan, waxay ciidammada gumaysigu ku xidhxidheen dadwayne rayad ah oo
tiradoodu 40 qof gaadhayso, waxaanan magacyadooda helnay dadka kala ah;
14-Samsam C/llaahi Gangaale iyo
15-Sahra Maxamed Cumar Sahal
20/08/07 Hore-khaliif, oo degmada
Qabridaharre ka tirsan, waxay ciidammada gumaysigu ku xidhxidheen dadka kala
ah;
2-C/xakiin Macalin Xuseen
4-Yuusuf C/llaahi Cumar iyo
5-Abshir C/llaahi oo ay isaga Qori
ka dhaceen
Dhinaca kale markii ay taariikhdu
ahayd 29/08/07 waxay ciidammada guamysigu dab qabadsiiyeen tuulooyinka kala
ah, Warandhaab iyo Mara-maydh. Tuulooyinkaas waxay ku gubeen hanti badan oo
dadwaynuhu lahaa.
Gumaysiga oo calooshood
u-shaqaystayaal u diray gobollada Ogaadeenya.
Xukuumadda gumaysiga Itoobiya ayaa
billowday qorshayaal cusub oo ay u adeegsanayso kala qaybinta iyo isku dirka
bulshada Ogaadeenya, arrintaasoo ka mid ah ahayd khudbad uu dhawaan maamul
ku-sheegga Kililka u jeediyay kaligii taliye Meles Zenawi.
Xukuumadda gumaysiga Itoobiya ayaa
amar ku bixisay in dhammaanba xubnaha waxa loogu yeedho maamulka Kililka,
heer gobol iyo heer degmaba, ay u baxaan gobollada ay ka soo jeediyaan, si
ay u fuliyaan qorshihii uu Meles faray ee ahaa in dadwaynaha Soomaalida
Ogaadeenya la kala qaybiyo, iyadoo la adeegsanayo magaca qabiilka.
Xubnahan calooshood
u-shaqaystayaasha ah ayaa lagu maray in toddobaadkan gudihiisa ay iska
xaadiriyaan gobollada laga soo magacaabay, si ay hawshaas kala qaybinta iyo
isku dirka ah u guda-galaan.
Sidoo kale, iyadoo ka
gaashaamanaysa in loo warramo guddiga xaqiiqo raadiska ee Qaramada Midoobe
ee ka hawlgalaya dalka Ogaadeenya, waxay xukuumadda gumaysigu malleeshiyo
Dabaqoodhi ah iyo ciidammo is-ay degmooyinka uu ka kooban yahay gobolka
Doollo.
Nimanka malleeshiyooyinkan
horkacaya ayaa dadwaynaha ugu hanjabaya inay tallaabo ka qaadi doonaan oo
layn doonaan cid kasta oo guddigaas la kulanta. Waxay sidoo kale dadwaynaha
ku yidhaahdeen waxba guddigaas ha u sheegina, haddii aad wax tabanaysaana
innaga ayaa dhammaysanayna.
Haddaba waxay JWXO dadwaynaha ku
guubaabinaysaa inayna hanjabaada cadowga u nuglaanin, isla markaana ay ka
faa’iidaystaan fursadan qaaliga ah oo dhibka iyo xasuuqa lagu hayo ay si
fiican ugu sheegaan guddigan xaqiiqo raadiska ah ee u yiid inay dhibkooda
soo bandhigaan, si wax looga qabto oo maxkamad caalami ah loo soo saaro
saraakiisha iyo masuuliyiinta gumaysiga ee dhibkan ka denbeeya.
War
Murtiyeed Golaha Dhalinta Ogadenya uu kasoo saaray Xaaladda Ogaadeenya.
Xaaladda Ogaadeenya oo marba
marka ka dambaysa ay xukuumadda Gumaysta ee Itoobiya u gaysanayso dhibaato
aad ubadan taas oo saamaysay dhamaan shacabka Ogaadeenya xadkudubka lagu
samaynaya dadkooda.
Waxaan lasoconaa xaaladda
Ogaadeenya ay manta ku jirto in dadka sabab laan loo laynayo oo lagu ridayo
meelaha boholada dadka qaarna ayba waraabuhu cunayn, qaarna maalmo kadib
ehelkoodo helan, qaarna ilaahadda la layahay.
Dhibaatada naxariisdara ah ee
uu gumaysigu ku hayo shacabka waa mid marba marka ka sii dambaysa sii
kordhaysa waxaana ka bara kacay Ogaadeenya dad aad u badan oo ukala cararay
waddamada dariska la ah Ogaadeenya. Hadaba qayladii ay ONLF u gudbisay
caalamka waxay saamaysay dhamaan hayda caalaka ayaga oo ka soo jawaabay
waxaana dadka socda UN maanta Jogaan Ogaadeenya.
Hadaba Ururka Dhalinta
Ogaadeenya oo loo yaqaano Ogaden Youth Forum isaga oo ka xun dhibaatada
dadkooda lagu hayo wuxuu soo saaray Baaqan
A Ogaden Youth Forum
Wuxuu waftiga Qaramida midoobay ugu baaqayaa in ay tagaan meelaha ay
Militariga Itoobiya ka gaysteen xadgudubka meelahaas oo u badan dhulka
baadiyaha ah gaar ahaan Tuulooyinka Ogaadeenya oo lagu laayay dad aad u
badan oo shacab xooladhaqto ah.
B Ogaden Youth Forum
Wuxuu shacbiga Ogaadeenya Gudo & dibadba ugu baaqayaa inuu ku mintido
halganka xaqa ah ee aaya-ka-tashigiisa uu ugu jiro.Wuxuuna ku gubaabinyaa
inuu u dhabar adaygo cadaadiska isa soo taraya ee gumaysigu ku hayo shacabka
Ogaadeenya.
C Ogaden Youth Forum
wuxuu dadwaynaha Ogaadeenya ugu baaqayaa inay halganka u midoobaan, isla
markaana ka digtoonaadaan shirqoollada cadowga ee la xidhiidha iska
hor-keenka Beelaha walaalaha ah ee dalkeena wada-dega.
D Ogaden Youth Forum
wuxuu shucuubta, dawladaha iyo ururrada caalamiga ah ugu baaqayaa inayna
iska indha-tirin xadgudubka, dulmiga iyo cadaadiska uu gumaysiga Itoobiya ku
hayo shacbiga Ogaadeenya iyo shucuubta kale ee ku hoos jirta.
E Ogaden Youth Forum
Wuxuu si gaar ah ugu baaqayaa dhalinta Ogaadeenya meel ay joogaanba in ay
dadaal xoogan galaan sidii ay caalamka ugu soo bandhigli lahaa yeen
dhibaatada uu gumaysigu ku hayo shacabka Ogaadeenya gaar ahaan dayarta
Ogaadeenya ee ka buuxa jeelalka ay Militariga Itoobiya ka sameeyeen
Ogaadeenya.
F Ogaden Youth Forum
wuxuu Jaaliyaadka Ogaadeenya ee dibada ugu baaqayaa in ay abaabulaan banaan
baxyo ay ku muujinayaa dhibaatada ka jirta Ogaadeenya.
G Ogaden Youth Forum,
wuxuu shacabka Ogaadeenya ee gudaha ku jira ugu baaqayaa in ay muujiyaan
dhibaatada loo gaystay oo ay u muujiyaan hay’adaha ka socda Qaramada
midoobay waana in ay qarama midoobay dadkaas balan qadaan amnigooda.
H Waxaan Ogaden Youth
Forum aduunka u jeedinayaa in ay maxkamad caalami ah soo taagaan saraakiisha
Itoobiya ee gaystay falalka xadgudubka ku ah bani aadmka ee ka dhacay
Ogaadeenya.
A OYF wuxuu
canbaaraynayaa hawl galka milatari ee ciidamada gumaysiga Itoobiya ka Wadaan
dalka Ogaadeenya laguna gumaadayo shacab aad u badan kuwaas oo Militariga
Itoobiya kula keceen xasuuq bahalnimo.
B OYF wuxuu
canbaaraynayaa fikirka gaboobay ee gumaysiga talisiyada Itoobiya ee ku
dhisan cadaadinta shucuubta, dhul-ballaadhsiga gardarrada ah iyo falalka
dilka, xasuuqa, dhaca iyo xabsiga uu ku hayo shacbiga Ogaadeenya ee dulman
iyo shucuubta kale.
C OYF wuxuu
canbaaraynayaa caga juglayta ay xukuumadda Itoobiya & kuwa maqaarsaarka ah
ee Kililka ku hayaan shacabka Ogaadeenya gaar ahaan dadka dadkodii lalaayay
ee ay leeyihiin uma sheegi kartaan Qaramada Midoobay.
D OYF wuxuu
canbaaraynayaa shaqsiyaadka u dhashay Ogaadeenya ee hor ordaya gumaysiga
Itoobiya in ay ka waantobaan tacadiga ay ku hayaan dadkoodo waxaana shaki ku
jirin in maalin ay noqotaba lakeeni doono maxkamad.
Barnaamijka Faaqidaada gudiga xaqiiqa raadinta
ee QM udirtay Ogadenya aaraada iyo afkaaraha dhagaystayaasha Radio Xoriyo
ee aduunka dacaladiisa.
Radio
Xoriyo waxaad ka dhegaysan kartaa Mawjadda 19 MB ee dhererkeedu yahay 15260
KHZ,iyo internetka
Radioxoriyo.com,Ogaden.com
Maalmahaa Talaadada & Sabtida 7:00PM – 7:30 waqtiga Afrikada Bari
|