GOGOLDHIGGA GANACSIGA
(DURUUS TAXANE AH)
CUTUBKA 5AAD
MAAMULKA IYO MAAMULAHA
DULUCDA CUTUBKA
Qaybta:
1aad...
| 2aad |
3aad...
![](/maanso/nayruus.jpg)
Suldaan Nayruus X. Aadan
|
Marka aad akhriso cutubkaan waxaad fahmi doontaa mawduucyadaan
soo-socda:
- Fikrad ahaan maamulka.
- Maamulaha, tayadiisa iyo hawalaha uu qabto.
- Qaabka loo maareeyo shaqaale-qoridda.
- Astaamaha wacan iyo kuwa aan habboonayn ee shaqo-codsadeha.
MAAMULKA IYO MAAMULAHA
Dadka wax ka qora maamulka waxay ku qeexeen, qeexitaanno fara badan
oo kala duwan, waxaan-se halkaan ku sheegaynaa dhawr ka mid ah
qeexitaannadaas:
‘Samuel C. Certo,: wuxuu maamulka ku qeexay, sidan; “Maamulku
waa nidaam lagu gaaro ujeedooyin urur, iyadoo lala shaqaynayo ama la
kaashanayo dadka, khayraadka ama ilaha dhaqaale ee ururkaas”.
‘Ivancevich, Donnelly, and Gibson,: waxay iyaguna ku qeexeen
maamulka sida tan; “Maamulku waa nidaam uu qabto hal ama in ka badan oo
dad ah, si la isugu dubba-rido wax-qabadka dadka kale, si markaas loo
gaaro natiijooyin uu san hal qof gaari karin”.
‘Foyl,: wuxuu isna ku qeexay maamulka sidan; “Maamulku waa
fikrad, farsamo iyo hab, taas oo awood u siisa in la gaaro ahdaaf iyo
ujeedooyin gaara, laguna gaaro hannaan wax-qabad fiican leh oo sidii
loogu tala-galay u taabba-gala”.
Marka loo eego qoraha Qormadaan; “Maamulku waa halka habsami
looga abaabulo daryeelidda gaaritaanka danaha guud ee urur, waana hab ay
dad kuwa shaqeeyaan iyadoo la adeegsanayo ilo-dhaqaale, si loo gaaro
himilooyin lagu wada midaysan yahay, iyadoon walina aan la beer-dareyn
ilahaas dhaqeele. Taasi micneheedu waxaa weeye, in la isticmaalo;
lacagta ugu macquulsan, waqtiga ugu macquulsan, walaxaha ugu macquulsan
iyo waliba dadka ugu macquulsan”.
Haddaba, haddii uu maamulku yahay nidaam ama hab lagu tiigsado
ujeeddooyin fog-fog iyo ku dhow-dhowba, waxaa lama huraan ah in
ganacsigu uu yeesho maamul iyo waliba maamule-yaal si loo gaaro
ujeeddooyinka iyo ahdaafta ganacsiga.
MAAMULUHU WAA TIIR-DHAXAADKA GUULAHA GANACSIGA
Tayada iyo kartida maamuluhu waxay aad muhiim ugu tahay liibaanta
shirkad kasta. Shirkadaha kaliya kuma liibaanaane, xitaa wuxuu lagama
maarmaan u yahay dawladda, ururada aan ganacsiga ku shaqo lahayn iyo
Jaamacadahaba. Wuxuu Maamuluhu lama huraan u yahay meel walba iyo
ganacsi kasta. Marka uu ganacsigu koro, oo aad u ballaarto, maamuluhu
wuxuu u magacaabaa maamule-yaal kale oo heer dhexe iyo hoosaba ah,
qaybaha iyo waaxaha kala duwan ee shirkaddaas ama ururkaas.
Haddii aan ogaannay in uu maamuluhu yahay laf-dhabarka ganacsi
kasta, isla mar ahaantaasna mas’uul ka yahay horumarinta iyo
bullaalinta ganacsiga ayaa waxaa is-waydiin mudan qofka uu yahay
“Maamule”.
WAA KUMA MAAMULE?
Maamuluhu waa qofka ugu sarreeya ee ay ka soo fulaan kuna hoorsadaan
hawlaha iyo ammarada la xiriira hoggaaminta shaqo fulinta, wuxuuna
mas’uul ka yahay dhammaan arrimaha maamulkaasi ku saabsan yahay, mid
shirkadeed iyo mid haayadeed intaba.
Maamuluhu waa ruuxa dejiya qorshaye-yaasha, cayima
himilooyinka, qaata go’aannada. Waa ruuxa haga, dhiirri-galiya, wax ka
dhaadhiciya, hoggaamiya dadka kale mas’uulna ka ah shaqadooda. Maamuluhu
ma abuuro dhibaatooyin ee waa kan xalliya. Wuxuu koontoroolaa, amarrana
siiya gacan-yare-yaashiisa iyo shaqaalihiisa isagoo u abuura deegaan
wacan oo shaqada si hawl-sami ah loo socod siiyo. Maamuluhu wuxuu u
dhigmaa dad badan, maxaa wacay, waa ruux saadaaliya ama oddorosa waxa
dhici kara, caaqil ah, taariikh-yahan ah, xisaab-yahan ah, yaqaanana
cilmi-nafsiga.
Waa caaqil, sababta oo ah, go’aan walba oo uu qaadanayo wuxuu
ku saleeyaa sababo. Waa tariikh-yahan, sababta oo ah, khibraddiisii hore
ayuu wuxuu u isticmaalaa xaaladaha hadda jira. Waa xisaab-yahan, sababta
oo ah, wuxuu yaqaanaa ribixa ama faa’iidada, maaliyadda iyo
aragti-mustaqbaleedka ururkiisa. Waa cilmi-nafsi-yaqaan, sababta oo ah,
wuxuu yaqaanaa aragtiyada iyo maanka maamula-yaasha ka hooseeya iyo
dhammaan shaqaalahaba.
CASHARKA IYO SETIMAANKA DAMBE
Waxaad Setimaanka dambe la socon doontaan Qayb kale oo ka mid ah
Cutubkaan oo shaarraxaya; Tayada maamulaha.
Qoraha: S. Nayruus
Goobta: Karachi, Pakistan
E-mail-ka: snayruus@hotmail.com
iyo nayruus@gmail.com
Mobile-ka: +92-345-8118910.
ILAHA XOG-URURINTA
- A practical Introduction to Business By:
Koontz and Fulmer
- Accounting- The basis for business
decisions By: Meigs, Williams, Haka & Buttner.
- Strategic Management – Concepts and Cases By:
Fred R. David.
- Business Research Methods By: Emory.
- An Integrated Approach to Business Studies
By: Bruce R. Jewell
- Business Accounting By: Frank Wood & Alan
Sangster.
- Business Law By: Ronald A. Anderson.
- Financial Management of the Small Firms By:
Walker W. Pitty.
- Principles of Commerce and New Management By:
M. A. Khalid.
- The Business – Problems and Solutions By:
Skatler.
- Qaamuuska Af-Somaliga By: Keenadiid.