SomaliTalk

Daabaco Boggan | Print

SomaliTalk: Hadalkii Wasiirka Waxbarashada DGPL waa Baroortu Orgiga ka Weyn
Hay'ada UNESCO ayaa waxbarashada Puntland ugu deeqday gaari iyo buugaag, laakiin.. Akhri...

Dowlada FKMG Ah Ee Soomaaliya oo Indhaha Ka Laabatay Ceelasha Shidaalka Ee Ay Kenya Ka Baarayso Xadka Soomaaliya... Akhri

Kenya ma Badda Soomaaliyeed ayey Shidaal Ka Qodaneysaa?
Dawladda Kenya ayaa dardar gelisey baaritanka batroolka ay ka wado xeebta, waxaana soo baxay warar tibaaxaya Akhri

Shirkadda Range oo Sheegtay in Saddexdii bilood ee lasoo dhaafay ay Garoonka Diyaaradaha ee Garoowe siisay US$313,000
lacagtas oo aad uga badan tii ay DGPL sheegtay in shirkadu bixisay.. Akhri...

Itoobiyaan baaraya laba nin oo Soomaali. Muqdisho. AFP - Jan 13, 2006

Taangi Itoobiyaan ah oo taagan garoonka muqdisho - AFP - Dec 2006
ARAGTIDA/MAQAALLADA DADWEYNAHA EE MAANTA

Mar 11, 07: Inta beri oo laga joogo markii xabashidu gashay: Kismaayo (70), Muqdisho (74), Beledweyne (77), Baydhabo (85), Galkacyo (106),
Sarbeebtii Diinaari

Cabdulaahi Yuusuf oo ka codsadey Sayum Masvin in Ciidamada Itoobiya ay sii joogaan…

Wasiirka Arrimaha Dibadda ee Wadanka itoobiya ayaa si qarsoodi ah ku soo gaaray Magaalada Muqdisho waxa uuna ku sugnaa Magaalada Muqdisho muddo 24-Saacadood ah, wax yar intuusan ka ambabixin Magaalada Muqdsho ayaa waxa uu la hadlay Saxaafada waxa uuna sheegay in Sadax qaybood marka loo qaybiyo Ciidamada Itoobiya ee soo galey Soomaaliya labo qaybood ay dib ugu laabateen Dalka itoobiya isagoo sheegay in qaybta hartay sida uga dhaqsiyaha badan uga bixi doonaan Dalka, balse warar ayaa waxa ay sheegayaan in Ciidamada itoobiya ay ka qaybgali doonaan sugida Amaanka Dalka gaar ahaan Magaalada Muqdisho.

Wasiirka arimaha dibada itoobiya waxa uu kulamo la yeeshay Madaxweynaha Dowladda Fedaraalka Cabdulaahi Yuusuf waxa ay isla soo qaadeen sidii ciidamada itoobiya uga qaybqaadan lahaayeen nabad ku soo dabaalida Dalka Soomaaliya siiba Magaalada Muqdisho, C/llaahi Yuusuf ayaa waxaa la sheegey in uu ka codsaday Wasiirka arimaha dibadda Musfin in Ciidamada itoobiya ay sii joogaan gudaha Wadanka Soomaaliya tan iyo inta ay iska bedaleyso Xaalada Soomaaliya hase yeeshee warar aan ka helnay Madaxtooyada ayaa waxa sheegayaan in C/llaahi Yuusuf laga aqbalay in Ciidamada itoobiya ay gacan siiyaan kuwa Midowga Afrika.

Wasiirka arimaha dibadda ee Itoobiya ayaa waxa kaloo kulan la yeeshay Wafti ka socda Midowga Afrika oo isna soo gaaray Magaalada Muqdisho waxayna isla soo qaadeen sidii Ciidamada itoobiya ay gacan u siin la haayeen Ciidamada Midowga Afrika oo Qaar ka mid ah Ciidamadaasi ay soo gaareen Dalaka kuwaas oo ka socday Wadanka Uganda.

Ciidamada Uganda ee ku sugan Garoonka Diyaaradaha oo sii daayey Maxaabiis u xirnaa..

Ciidamada Uganda oo ku sugan Garoonka Diyaaradaha ee magaalada Muqdisho dhawaan la wareegay Amaanka Garoonkaasi ayaa sii daayey ilaa iyo 20 Maxbuus oo u xirnaa Ciidamada itoobiya laguna hayey Xabsi ku yaala Garoonka Diyaaradaha ee Magaalada Muqisho.

Ilaa haatan lama garanayo sababaha Ciidamada Uganda ay u siidaayeen Maxaabiistaas balse warar ayaa waxa ay sheegayaan in Ciidamada Uganda ay maalmahaan wadeen Qorshayaal ay doonayaan in ay xiriir la sameystaan Shacabka Soomaaliyeed si Ciidamadooda loogu arko kuwa u yimid Nabad ilaalin iyo dib u hashiisiin.

Maxaabiista la sii daayey ayaa la sheegay in ahaayeen kuwa Ciidamada itoobiya ay ka soo qabteen gudaha Magaalada Muqdisho waxaa kaloo la sheegay in ku jireen kuwa ay soo qabteen Dowladda fedaraalka ah , waxaana Dad arkay Maxaabiistaasi ay noo sheegeen in Maxaabiistaasi ay ka muuqatay Diif iyo Darxumo qaarkoodna waxaa la sheegay in lagu sameeyey Jir Dil.

Ciidamada Uganda ee ka howl gala Garoonka Diyaaradaha ayaa gabi-ahaanba joojiyey Canshuurtii laga qaadi jiray Dadka iyo Rakaabka ay keenaan Diyaaradaha waxaana la sheegay sababaha ay u joojiyeen Canshuurtaasi ay tahay iyagoo doonayaan in ay Dakhliga ka soo xarooda Garoonka Diyaaradaha ay si siman loogu qaybiyo Bulshada Soomaaliyeed.

Muddo loo qabtey Xildhibaanada ka maqan Kalfadhiyada Baarlamaanka

Warar naga soo gaaraya Magaalada Baydhabo ayaa waxa ay sheegayaan in Kalfadhi ay isugu yimaadeen Golaha Baarlamaanka ayaa waxa looga hadalay waxa laga yeelayo 40-iyo labo Xildhibaan oo mudooyinkaan aan soo xaadirin Golaha Baarlamaanka oo uu ku jiro Gudoomyihii hore Golaha Baarlamaanka Shariif Xasan Shiikh Aadan.

Dood dheer iyo falaqayn ka dib ayaa la isku raacay in mudo Bil ah oo loo qabto Xildhibaadaasi hadii mudadaasi ku soo xaroon waayaan laga qaado Xilka Xildhibaanimada ay u hayaan Bulshada Soomaaliyeed.

Xildhibaadan ayaa xoogooda ay ku sugan yihiin Wadanka Eretariya waxaana ku jira Gudoomiyihii hore Baarlamaanka Shariif Xasan Shiikh Aadan waxayna horay wareysiyo u bixiyeen ay ku sheegeen in Baarlamaanka Soomaaliya uu la heysto u yahay Dowladda itoobiya wax go’aanka ah ay gaari karaana aysan jirin.

Xildhibaanadan waxa ay sheegeen in dadaal ugu jiraan sidii Dalka looga xoreen lahaa Ciidamada itoobiya oo ay sheegeen inay si Sharci dara ah ay ku soo galeen Dalka Soomaaliya, Qaar ka mid ah Beelaha ay ka soo jeedaan xildhibaanada Digniinta loo jeediyey ayaa waxa la sheegay in Magaalada Baydhabo ay ka wadaan Olole ay ku doonayaan in ay ku buuxiyaan Boosaskaas waa hadii aysan si dhaqsi leh ku soo galin xildhabaanadaasi oo aysan u hogaansimin Mudadaasi loo qabtay

W/D Amiin Yuusuf Khasaaro
E-Mail amiinkhasaaro@hotmail.com

Ciidamada Uganda oo gebi ahaanba joojiyey Canshuurtii Ciidamada Itoobiya iyo kuwa DFKMG ka qaadijireen Garoonka Diyaaradaha ..

Tan iyo markii Ciidamada Itoobiya oo gacansiinaya Dowladda Federaalka ay soo galeen Magaalada Muqdisho ayaa waxa ay canshuur ku soo rogeen garoonka Diyaaradaha ee Magaalada Muqdisho, gaar ahaan dadka ka baxay iyo dadka soo degay iyo alaabaha kale ee garoonkaasi laga dhoofiyo ama laga soo dejiyo. Canshuurtaan oo ah mid aad u xad-dhaaf ah ayaa waxaa dhibaato ku qabay Bulshada soomaaliyeed ee isticmaali jirtay garoonka Diyaaradaha ee Muqdisho.

Dhowr jeer ayay shirakadaha Diyaaradaha damceen in ay gebi ahaanba joojiyaan duulimaadyada ay ku tagayaan Garoonka Diyaaradaha ee Muqdisho sababo la xiriira xagga canshuurta, hase yeeshee Dowladda Itoobiya iyo Dowladda Federaalka ayaa diyaaradahaasi ku amray in aysan joojin Karin duulimaadyadooda haddii ay joojiyaana gebi ahaanba laga mamnuuci doono in ay yimaadaan gudaha dalka Soomaaliya.

Dhawaan ayaa markii ciidamada Uganda oo ka tirsan Ciidamada Nabad ilaalinta ee Midowga Afrika ay la wareegeen Garoonka ayaa dad goob-joogayaal ah waxay noo sheegay in Ciidamada Uganda ay joojiyeen canshuurtii laga qaadi jiray garoonkaasi. Nin qariyey Magaciisa ayaa waxa uu noo sheegay in sababaha ciidamada Uganda u joojiyeen canshuurtaasi ay tahay iyagoo doonaya in wixii ka soo baxay garoonkaasi si siman loogu qaybiyo Bulshada Soomaaliyeed, gaar ahaan inta laga heshiisiinayo dhamaan Ummadda soomaaliyeed. Ciidamada Uganda oo si aad ah u ilaaliya garoonkaasi ayaa joojintii ay joojiyeen canshuurta waxaa si aad ah u soo dhaweeyay ummadda Soomaaliya, iyadoo dhawaan mas’uul u hadlay ciidamada Uganda uu sheegay in ciidamada Uganda ay dhex dhexaad ka noqon doonaan arimaha Soomaaliya, islamarkaana ka shaqeyn doonaan sidii la isugu keeni lahaa Ummadda Soomaaliyeed. Afhayeen u hadlay Midowga Afrika ayaa waxa uu sheegay in Mas’uuliyiinta Maxaakiimta Islaamiga ah ay dib ugu soo laaban karaan gudaha dalka Soomaaliya, waxaana soo dhaweeyey shacabka Soomaaliyeed, oo sheegay inay wax ka tareyso dib u heshiisiinta la qaban doono.

C/llaahi Yuusuf oo kulamo xasaasi ah la leh Saraakiishiisa ..

Madaxweyne C/llaahi Yuusuf Axmed oo maalintii doraad ahayd dib ugu soo laabtay Magaalada Muqdisho ayaa warar aan ka heleyno Madaxtoonyada waxay sheegayaan in Madaxweyne C/llaahi Yuusuf uu kulamo xasaasi ah la leeyahay saraakiishiisa Ciidamada, waxaana kulamadaasi la sheegay in loo arinasayo waxa laga yeelayo Muqdisho.

Kulamada qaarkood oo saacado qaatay waxaa lagu waramay in Magaalada Muqdisho ay ka hawlgalaan Ciidamada Dowladda Federaalka ah si loo sugo Ammaanka Magaalada oo waayadan faraha ka sii baxayey, warar ayaa waxay sheegayaan in ciidamada Booliiska ee ku sugnaa saldhigyad Booliiska ee Gobalka Banaadir, gebi ahaanba lagu wareejiyeo ciidamo ka socda Dowladda gaar ahaan kuwii dhawaan uu tababarku ugu soo dhamaaday Garoonka Diyaaradaha ee Balidoogle.

C/llaahi Yuusuf ayaa lagu waramay in uu gebi ahaanba u yeertay ciidamadiisii ku sugnaa Magaalada Baydhabo, waxaana shalay Magaalada Muqdisho soo gaaray qaar ka mid ah ciidamadaasi kuwaas oo la sheegay inay ka qayb-qaadan doonaan sidii loo sugi lahaa ammaanka Gobalka Banaadir.

Jaaliyadda Beesha Garre ee ku nool Dibadaha oo laga codsadey..

Duqa Magaalada Tooratoo-row ee Gobalka Sh/hoose Xaaji Cadde Xaaji Xasan ayaa baaq u jeediyey Hay’adaha samafalka, Hay’adaha ka shaqeeya gudaha dalka, dowladda Federaalka iyo Jaaliyadda Beesha Garre ee ku nool dibadaha, waxa uuna ka dalbaday inay gargaar la soo gaaraan ilaa iyo 500 oo qoys oo dhawaan ku gurya beelay dab ka kacay degmada Tooratoorow, waxa uuna dabkaasi baabi’iyey 50 guri oo ku yiil degmadaasi. Duqa Magaalada waxa uu sheegay in qoysaskaasi ay haatan ku hoydaan meel banaan ah oo ay ku hayso qorax, cuduro iyo hoy la’aan, waxa uuna u soo jeediyey in sida ugu dhaqsiyaha badan gargaar loola soo gaaro dadkaasi. Waxa uu sheegay duqu in deegaankaas aan weligiis la soo gaarsiin wax mucaawino ah, isagoo sheegay inay ku nool yihiin qoysas sabool ah oo aan waxba haysan

Xarunta Ismaaciil Jimcaale oo cambaareysey Falalka lagu waxyeeleynayo..

Xarunta Ismaaciil Jimcaale ee xaquuqda Aadanaha ayaa walwal iyo walaac ka muujisay xaaladda ammaandaro iyo qaraxyada madaafiicda joogta ah ee ku dhacaya deegaanada ay degan yihiin dadka rayidka ah kuwaas oo sababay dhimasho iyo dhaawac iyo waliba burbur hantiyadeed.

Xarunta waxay sidoo kale walwal ka muujisay dilalka lala beegsanayo dadka rayidka ah, waxayna xaruntu sheegtay in falalkaan aragagaxa leh ay xadgudub ku yihin shareecada Islaamka, xeerarka soo jireenka ah ee dhaqanka Soomaalida, axdiga federaalka Dowladda iyo baaqa caalamiga ah ee xaquuqda aadamiga qodobkiisa saddexaad oo leh (qof waliba waxa uu xaq u leeyahay in uu ku noolaado nabad iyo xoriyo).

Xarunta waxay ka codsaneysaa kooxaha ka soo horjeeda Dowladda, Itoobiya iyo kooxaha ka soo horjeeda in ay joojiyaan dagaalada ay wadaan, sidoo kalana waxay cambaareysay xadgudubkii lagula kacay weriyayaashii Idaacadda ka hawl gasha Muqdisho, Max’ed Ibraahim Raage, Ismaaciil Cali Cabdi, C/raxmaan Yuusuf Al-Cadaala iyo Max’ed Ibraahim Ruush, sidoo kale waxay dowladda ka codsaday in si shuruud la’aan loo sii daayo weriye Xasan Sade Dhaqane.

W/D Amiin Yuusuf Khasaaro
E-Mail amiinkhasaaro@hotmail.com

C/llaahi Yuusuf oo isagoo ku sugan Madaxtoonyada lagu soo weeraray..

Madaxweynaha DFKMG C/llaahi Yuusuf Axmed oo shalay soo gaaray Magaalada Muqdisho ayaa isagoo ku sugan xarunta Madaxtoonyada waxaa weerar ku soo qaaday kooxo aan la garaneyn, waxa uuna socday weerarkaasi mudo daqiiqado ah, ayaan la garaneyn khasaarihii ka dhacay xarunta madaxtoonyada, hase yeeshee madaafiicdii ay rideen Ciidamada Dowladda iyo kuwa Itoobiya ayaa waxaa khasaaro ka soo gaartay dad rayid ah, waxaana la xaqiijiyey in ay ku dhinteen ilaa iyo 7 qofood oo ay madaafiicdu guryahooda ugu tagtay.

Warar ayaa waxay sheegayaan in markii madaxtoonyada la weeraray uu Madaxweyne C/llaahi Yuusuf Axmed kulan la lahaa saraakiisha ciidamada oo uu kala hadlayey arimaha nabadgelyada ee Magaalada Muqdisho.

Madaafiicdii la ridiyey ayaa waxay ku dhaceen agagaarka Cali Kamiin, xaruntii hore ee Xisbiga, Baar Ayaan iyo Foloransa iyo waliba Towfiiq. Sidoo kale madaafiicdaasi waxay dhaawaceen dad gaaraya ilaa iyo 15 qofood.

Bishii janaayo ee sanadkaan ayay ahayd markii goor habeen ah kooxo aan la garaneyn ay madaafiic ku gaareen Madaxtoonyada xiligaas oo uu ku sugnaa Madaxweyne C/llahi Yuusuf.

Maalintii doraad ayay ahayd markii Golaha Baarlamaanka isku raacay in Golaha Baarlamaanka iyo xukuumaddaba ay si dhaqsi leh ugu guuraan Magaalada Muqdisho si ay halkaasi uga hawlgalaan, hase yeeshee qaar ka mid ah mas’uuliyiinta Dowladda ayaa sheegay in waqtigaan aysan xasilooni qabin Muqdisho.

Madaxweyne C/llaahi Yuusuf Axmed ayaa dhawaan ku dhawaaqayin 16-ka bisha April lagu qaban doono Muqdisho kulan dib u heshiisiin ah oo lagu soo afjarayo khilaafaadka u dhexeeya Beelaha Soomaliya, hase yeeshee kulan ay dhawaan iyana isugu yimaadeen Odoyaasha iyo Waxgaradka Beelaha Hawiye ayaaa iyana sheegay in aysan ka qaybgali doonin kulankaasi, iyagoo Madaxweynaha ku eedeeyey in uu ku xadgudbay axdiga ku meel gaarka ah.

Ciidamada Itoobiya oo kufsaday Hooyo Soomaaliyeed oo 8 Carruur ah dhashay..

Ciidamada Itoobiya ee ku sugan deegaanka Darmooley ee Ceel-Cirfiid ayaa kufsaday Hooyo-Soomaaliyeed oo da’deedu tahay 37 jir oo dhashay sideed carruur ah mar ay ku soo socotay Magaalada Muqdisho, wadatayna Gaari Dameer u saarnaa xoogaa Caws ah oo ay dooneysay inay ka iibsato Magaalada Muqdisho.

Hooyadaas Soomaaliyeed oo lagu magacaabo Suuban Maalin Cali Geedi ayaa shalay shir jaraa’id ku qabatay magaalada Muqdisho, waxayna ku faahfaahisay qaabkii ay Ciidamada Itoobiya u kufsadeen, waxayna sheegtay in ay goor barqo ah ay ku soo baxeen labo nin oo Itoobiyaan ah kadibna inta ay gaarigii ka dejiyeen ay u geysteen garaacis, kadibna ay u jiideen meel hawd ah halkaas oo ay ku fara xumeeyeen.

Suuban waxay sheegtay in waqti dambe halkaasi laga soo qaaday iyadoo aad u xanuusaneysa, waxaana la keenay Isbitaalka Kaydsaney, waxayna Taakhaatiirtu sheegeen in Hoyadaas Soomaaliyeed si xun loo kufsaday, waxayna ku wargeliyeen ninkeeda in uusan u tagi mudo lix bilood ah, dhanka kalana aysan nuujin Karin canugeeda, mudadadaas kadibna dib loogu soo celiyo Isbitaalka si looga baaro cudurkaq Aidska.

Ninkeeda oo lagu magacaabo Axmed Cali Xasan ayaa waxa uu sheegay in Xaaskiisa lagula kacay wax ka baxsan Bini’aadannimada, waxaa uuna u soo jeediyey Dowladda Federaalka in ay gacan ka gaysato sidii gacanta loogu soo dhigi lahaa labadii nin ee Itoobiyaanka ah ee kufsaday Xaaskiisa.

Dowladda Federaalka ayaa ilaa iyo haatan ka hadlin kufsiga loo gaystay hooyadaasi Soomaaliyeed, dhanka kale shacabka Soomaaliyeed ee ku nool Magaalada Muqdisho ayaa iyana aad uga carooday falkaas lagula kacay hooyadaas Soomaaliyeed ee dhashay 8-deeda carruurta ah.

Ciidamo Itoobiyaan ah oo lagu weeraray inta u dhaxeysa Zobe iyo..

Kolonyo ciidamo Itoobiyaan ah oo marayey inta u dhexeysa Isgooysyada Soobe ilaa iyo kan Banaadir ayaa halkaas lagu weeraray, waxaana lagu waramay in ciidamada Itoobiya laga gubay gaari, sidoo kalana kooxdii gaystay weerarkaasi ayaa iyana waxay sidoo kale rasaas la dhaceen Ciidanka Itoobiya ee Gawaaridaas saarnaa, markaas kadib oo ay Ciidamada Itoobiya rasaas aan loo meel dayin ku fureen dadweynihii halkaasi ka dhawaa, waxaana halkaasi ku dhintay afar qofood oo ka ag dhawaa goobtii uu ka dhacay weerarkaasi.

Ciidamada Itoobiya ayaa waxaa la sheegay in markii la weerarayey ay ahaayeen kuwo ka baxayey Magaalada Muqdisho kuna sii jeeday dalkooda, waxaana goobta uu ka dhacay qaraxa yimid markii dambe Ciidamo ka socday Dowladda Federaalka oo baaritaan kula dhaqaaqay dadweynihii halkaasi ka dhawaan iyadoo qaarkood loo gaystay jirdil, sidoo kale dad goob-joog ahaa ayaa sheegay in ciidamadii Dowladda ay galeen masaajid halkaasi ku yiilay, iyagoo wata kabahoodii, waxaana si aad ah arintaasi uga carooday dadkii ku dukanayey masaajidkaasi.

Qaar ka mid ah Xubnaha Dowladda oo diiday in ay Muqdisho yimaadaan…

Wararka naga soo gaaraya Baydhabo waxay sheegayaan in xubno ka tirsan Dowladda iyo Baarlamaanka ay diideen inay yimaan Magaalada Muqdisho, kadib markii ay sheegeen in Magaalada Muqdisho aysan ahayen magaalo nabdoon oo aysan xiligaan ka shaqeyn Karin xubnaha labada gole.

Xubnahaan waxay sheegeen in ay iska joogi doonaan Magaalada Baydhabo, hase yeeshee madaxweyne C/llaahi Yuusuf Axmed ayaa sheegay in Xildhibaankii iyo Wasiirkii aan tagin Magaalada Muqdisho uu la mid yahay nin ka soo horjeeda go’aanka Baarlamaanka.

Maalintii shalay ahayd ayaa Magaalada Muqdisho waxaa soo gaaray Madaxweyne C/llaahi Yuusuf Axmed, waxaana la filayaa in maalmaha soo socda Muqdisho ay soo gaaraan xubnaha labada gole, iyadoo Ra’isul Wasaare Cali Max’ed Geeddi lagu waramay in uu maalintii shalay ahayd u ambabaxay Magaalada Nayroobi halkaasi oo uu kulamo kula soo yeelan doono mas’uuliyiin ka tirsan Beesha Caalamka iyo waliba Dowladda Kenya.

Weerar lagu qaaday gaari uu saarnaa Guddoomiye ku xigeenka Duqa Magaalada Muqdisho..

Burburkii Gaarigii Ibrahim Omar Sabiye oo yaal wadada dhinaceeda,
Sawirka: Talaada March 13, 2007. [AP]

Gaari uu saarnaa Guddoomiye ku xigeenka Duqa Magaalada Muqdisho ee Arimaha Nabadgelyada iyo Siyaasadda Ibraahim Cumar Sabriye (Shaaweeye) ayaa mar uu marayey agagaarka Isgooyska Xararyaale waxa uu la kulmay qarax aad u weyn oo gebi ahaanba burburiyey gaarigii uu Saarnaa Guddoomiye ku xigeenka.

Gaarigaas ayaa waxaa la sheegay in ay ku dhinteen labo qofood oo uu ku jiray ku xigeenkii Ibraahim Shaaweeye oo la oran jiray Mudane Duubane, dhanka kalana Ibraahim Shaaweeye ayaa isna la sheegay in uu soo gaaray dhaawac.

Gaari DFKMG oo gubanaya, Muqdisho, Talaada march 13, 2007. AFP

Gaarigaan oo gebi ahaanba burburay ayaa la garaneyn in qaraxaasi uu ahaa mid uu loo dhigay Gaariga ama uu ahaa mid horey loogu soo rakibay, waxaana haatan baaritaan ku haya Ciidamada Dowladda Federaalka.

Waxaa maalmahan weeraro lagu hayey mas’uuliyiinta iyo Ciidamada Dowladda Federaalka, iyadoo dhawaan Isgooyska Lambar Afar lagu dilay labo ka tirsan Ciidanka Booliiska kadib ay si gaadmo ah ku soo weerareen kooxo dabley ah, sidoo kale waxaa iyana weerar lagu qaaday ciidamo ka tirsan Dowladda Federaalka kuwaas oo la sheegay inay waxyeelo ka soo gaartay weeraradaasi.

Afhayeenka Ciidamada Midowga Afrika oo sheegey .

Afhayeenka Midowga Afrika ee Nabad ilaalinta ayaa shalay waxa uu daboolka ka qaaday in ciidamada Midowga Afrika ay dhex dhexaad ka noqon doonaan Xaaladda Soomaaliya.

Afhayeenku waxa uu sheegay in ay kulamo la yeelan doonaan Odoyaasha iyo Waxgaradka ku nool Magaalada Muqdisho si looga wada hadlo xaaladda nabadgelyo ee Magaalada Muqdisho oo maalmahan faraha ka sii baxeysay.

Ciidamo Uganda ah oo ilaalinaya Garoonka Muqdisho. March 12, 2007. Reuteres

Afhayeenka waxaa kale oo uu sheegay in Midowga Afrika uu qorsheynayo in qaybaha Siyaasadda isku haya ee Soomaalida la isugu keeno shir dib u heshiisiin ah, waxa uuna carabak ku adkeeyey in shirkaasi laga qaybgeli doono Mas’uuliyiinta Maxaakiimta Islaamiga ah.

Xil ka qaadistii Muxiyadiin Darbaweyne oo ay soo dhaweeyeen Bahda Sporti-ga …

Iyadoo maalintii doraad ahayd Shirweyne ay isugu yimaadeen Naadiyadda kala duwan ee K/cagta ayaa waxay ogolaadeen go’aankii Guddiga Fulinta ee Xiriirka Soomaaliyeed ee K/cagta ee ahaa in xilka laga qaado Muxiyadiin Xasan Cali Darbaweyne kadib markii lagu eedeeyey in uu lunsaday dhaqaalihii xiriirka iyo waliba in uu ku xadgudbay xeerka Xiriirka Soomaaliyeed ee K/cagta.

Bahda Isboortiga ayaa si weyn u soo dhaweysay xil ka qaadistaasi waxayna ku tilmaameen mid toosineysa Xiriirka Soomaaliyeed ee K/cagta oo ay sheegeen in uu wax weyn ka tari karo horumarinta k/cagta ee Soomaaliya.

Bahda Isboortiga Soomaaliyeed waxay u rajeeyeen waxay u rajeeyeen Guddoomiyaha cusub ee Xiriirka Soomaaliyeed ee K/cagta Siciid Mugaanbe in uu xilkaasi u guto si cadaalad ah iyagoo uga digay in uu qaado wadadii Muxiyadiin Darbaweyne.

Guddiga xiriirka Soomaaliyeed ee K/cagta ayaa mudooyinkaan kulamo ka lahaa waxa laga yeelayo Muxiyadiin Darbaweyne, waxayna aakhiri-taankii isku raaceen in xilka laga qaado Muxiyadiin Darbaweyne, iyadoo ugu dambeyntii soo hor dhigay go’aankaasi Shir aan caadi aheyn ee isugu yimaadeen madaxda Naadiyada kuwaas oo markii dambe cod aqlabiyad ah ku aqbalay go’aankaasi.

Beelaha Isaaqa ee Koonfurta oo dhaleeceeyey Guddi ay hore u sameysteen..

Warqad qoraal ah oo ay na soo gaarsiiyeen Odoyaal iyo Waxgarad ka tirsan Beelaha Isaaqa ee Koonfurta Soomaaliya ayaa waxay dhaleeceeyeen guddiga Beelaha Isaaq ee Koonfurta Soomaaliya waxayna ku eedeeyeen in ay ku takrifaleen hanti ay lahaayeen beelaha Isaaq ee Koonfurta, sidoo kale waxay ku eedeeyeen inay bedeleen magicii Guddiga Beelaha Isaaq.

Max’ed Xirsi Axmed oo ka mid ahaan jiray Guddigaasi ayaa waxa uu sheegay in uu ka baxay guddigaasi sababa la xiriira eedeymahaasi.

Guddigaan oo u qaybsanaa uruurinta Beelaha Isaaq ee Koonfurta, iyo waliba ka hortagida wixii dhibaato ah ee ku imaan kara beelahaasi, ayaa waxgaradkaani waxay sheegeen in dhamaan waxyaabahaasi aysan guddigii loo xilsaaray waxba ka qaban, waxayna u soo jeediyeen in guddigaasi si deg deg ah xilka u wareejiyo.

Qoraalkaan ayaa waxaa kaloo guddiga Isaaq lagaga dalbaday inay dib u soo celiyaan wixii hanti laheyd beeshu oo ay horey u lunsadeen.

Dr. Axmed Taajir oo ku guuleystey in in Buro 5 kiilo ah ka soo saaro Gabar yar oo jirta Sagaal bilood

Waxaa taariikhdu Markey ahayd 7/3/2007, Isbitaalka Kaysaneey Loogu sameeyay Qalliin Gabar yar ee jirta 9 Bilood, Gabadha waxaa lagu magacaabaa Caasha Cismaan Isaaq, Hooyadeedna waxaa lagu Magacaabaa Soonto Cali Aadan, Gabadha ayada oo jirta 2 Billood waxay eheledeeda caloosha Uga arkeen Buro aad u soo korayso bilba bisha ka dambeeysa, Ilaa ay kala ekaato waynigeeda sida sawirka ka muuqda, Laguna qiyaasay ilaa iyo 5 Kiilo.Gabadha oo ka dhalatay qooys aad sabool u ah, ayeey la Xariireen Isbitaalka SOS ee magaalada muqdisho, kadbna sidaa ayaa Loogu soo wareejiyay Isbitaalka Keysaneey oo Qalliinka ,Loogu sammeeyay si tabarrucaad ah, ayadoon wax lacag ah Laga qaadin, Qalliinka waxaa looga soo saaray Buro culyskeeda lagu Qiyaasay 5 Kiilo oo Caloosh ilaa iyo Kalyaha ku fidday. Ilaahay mahaddiis waa lagu guuleeystay qalliinka oo socday qiyaastii 2 Saac, Haddana xaaladda bukaanku waa ay wanaagsantahay, Qalliinka waxaa sammeeyay Dr.Ahmed Mohamed Ahmed [Ahmed Taajir] Madaxa Qalliinka Isbitaalka Keysaneey.

Hadaba Gabdhaa yar ciddii dooneysa in ay u kaalmeyso ha la soo xiriiraan

Dr ahmed mohamed ahmed
dr_taajir@hotmail.com

ama Amiin Yuusuf Khasaaro
E-Mail amiinkhasaaro@hotmail.com
Tel 2521-5532494