SOMALITALK.COM
w w w . S o m a l i T a l k . c o m
SOMALITALK - WARAR
Wararki: Mar 9, 2007
  • Warbixin dheeraad ah oo ku saabsan weerarkii lagu qaaday Ciidamada Uganda.
  • 8-da Maarso oo si weyn looga xusay Dalka Soomaaliya.
  • C/llaahi Yuusuf oo soo gaaray Magaalada Baydhabo.
  • Qaylo-Dhaanta Ku Wajahan Maamulka Dowladu Ka Samaysay Gobolada Juba-land Oo Sii Kordhaysa ..
  • Khasaarihii Ka Dhashay Weerarkii Xalay Lagu Qaaday Ciidamada Ugaandha Ee Muqdisho Jooga .
  • DUBAI - Missing in Somalia

Warbixin dheeraad ah oo ku saabsan weerarkii lagu qaaday Ciidamada Uganda.

Habeen hore ayey ahayd markii Ciidamo ka tirsan Dalka Uganda weerar lagu qaaday mar ay marayeen agagaarka Km4. ciidamada ayaa kooxaha kacdoonka wada waxay ku tureen qorey Baasuuke ah, hase yeeshee qorigaasi lama aysan helin ee waxa uu ku dhacay meel Maqaayad ah, balse rasaas ay fureen ciidamada Uganda ayaa waxay keentay in ay dhintaan dad rayid ah oo aan iyagu waxba galabsan oo ay tiradoodu gaareyso ilaa iyo 10 ruux, waxaana ku dhaawacmay ilaa iyo 20 qofood oo la dhigay Isbitaalka Madiina.

Warar ayaa waxay sheegayaan in Ciidamada Uganda loo dhigay Miino, hase yeeshee markii ay gudbeen ay qaraxday, markaas oo iyana rasaas ku jawaabeen, taas oo keentay waxyeelo fara badan. Goobtii ay ka dhacday mashaqadaasi ayaa waxaa yimid ciidamo fara badan, waxayna wararka qaar sheegayaan in Gawaaridii ay wateen Ciidamada Uganda waxyeelo soo gaartay, iyadoo sidoo kale Labo Askari oo Ciidamada Uganda ah ayaa ku dhaawacmay iska hor imaadkaasi.

Shalay subax ayaa ciidamo aad u xoogan waxaa la soo dhigay goobtii uu iska hor imaadku ka dhacay ciidamo xoogan oo kuwaas oo baarayey Gawaarida iyo Guryaha, basle waxba halkaasi kama helin. Wasiirka ku xigeenka Gaashaandhiga Salaad Cali Jeele ayaa waxa uu sheegay in aysan wax dhibaato ah soo gaarin Ciidamada Uganda, marka laga reebo labo Askari oo ku dhaawacantay.

8-da Maarso oo si weyn looga xusay Dalka Soomaaliya.

Shalay oo ay ku beegneed 8-da Maarso oo ah Maalinta Haweenka Adduunka ayaa waxay munaasabado lagu xusayey ka dhaceen qaybaha kala duwan ee  Dalka Soomaaliya.

Munaasabad si heer sare ah loo soo agaasimay ayaa waxay ka dhacday Hotl Global, waxaana isku soo dubariday Hay’adaha INXA, Xarunta Ismaaciil Jimcaale iyo Guddiga Olombikadda Soomaaliyeed, waxaana ka qaybgalay Guddoomiye ku xigeenka Baarlamaanka Prof. Dhalxa iyo mas’uuliyiin ka tirsan Dowladda, waxaana ugu hroeyntii halkaasi warbixin ka soo jeediyey C/llaahi Calas Jimcaale oo ka socday Hay’adda Xaquuqda Aadanaha ee Ismaaciil Jimcaale waxa uuna sheegay in Haweenka Soomaaliyeed lagula kacay xadgudubyo fara badan, isagoo sheegay in xadgudubyadaasi sii xoogeysteen markii ay dhaceen dagaalada Sokeeye, C/llaahi Calas waxa uu sheegay in halkudhiga sanadkaan uu yahay (Hala joojiyo Xadgudubyada lagu hayo Haweenka).

Duqa Magaalada Muqdisho Maxamuud Xasan Cali Cadde Gaabow oo ka hadlay munaasabaddaasi ayaa waxa uu sheegay in ay aad uga soo horjeedaan in dhibaatooyin la gaarsiiyo Haweenka Soomaaliyeed, isagoo ugu baaqay in ay u halgamaan xaquuqdooda, dhanka kalan mar uu ka hadlay Xalaadda Magaalada Muqdisho waxa uu sheegay in aysan u dulqaadan doonin qalalaasaha ka jira Magaalada Muqdisho, isagoo sheegay in Magaalada Muqdisho ay tahay magaalo keliya, ciiddii dooneysa in ay kala qaybisana la dagaalami doonaan.

Waxaa kaloo ka hadlay Prof. Max’ed Cumar Dhalxa oo isna sheegay in Haweenka Soomaliyeed ay yihiin kuwo lafdhabar u ah Bulshada Soomaaliyeed, loona baahan yahay inay iskaashadaan, mar uu isna ka hadlay Xaaladda Muqdisho, waxa uu sheegay in Magaalada Muqdisho ay laheyd magacyo kala duwan oo wanaagsan, sida Xamarbila, Xamarjadiid, Xamarweyne, basle maanta ay jiraan dad doona in ay ka dhigaan Xamar-Bi’iye, Xamar-Dumiye, waxa uuna u soo jeediyey Bulshada inay ka hor tagaan kooxahaasi.

Xafladdaas intii ay socotay ayaa waxaa halkaasi cayaaraha Hiddaha iyo Dhaqanka ku soo bandhigay koox ka socotay Degmada Boondheere, cayaartaas oo ay si aad ah ugu qushuuceen dadkii daawanayey.

Sidoo kale xaflad tan la mid ayaa ka dhacday xarunta COGWO, waxaana ka qaybgalay Haween ka kala socday Gobalka Banaadir, waxaana halkaasi ka hadlay Cayni  Abuukar Gacal, waxayna sheegtay in Haweenka Soomaaliyeed ay yihiin kuwo la soo kulmay xadgudubyo fara badan, ha noqoto dhinacyada Siyaasadda iyo Dhaqaalaha, sidoo kale xaflad tan la mid ayaa waxay ka dhacday Xarunta IIDA, waxaana ka qaybgalay Haween iyana kala socday qaybaha Bulshada, waxayna dhamaantood sheegeen in Haweenka Soomaaliyeed ay yihiin kuwo dulman, xaflad iyana si heer sare ah loo soo agaasimay ayaa waxay ka dhacday Xarunta SSWC, waxaana halkaasi lagu soo bandhigay baraanburo iyo Gabayo ka hadlaya waxtarka Haweenka iyo doorka ay ku leeyihiin Bulshada, waxayna ka codsadeen Shacabka Soomaliyeed in la dhowro halkudhiga sanadkaan ee ah (Hala joojiyo xadgudubyada Haweeenka lagula kaco).

C/llaahi Yuusuf oo soo gaaray Magaalada Baydhabo.

Madaxweyne C/llaahi Yuusuf oo labadii maalmood ee ugu dambeysay ku sugnaa Magaalada Gaalkacyo ee Gobalka Mudug ayaa shalay dib ugu soo laabtay Magaalada Baydhabo, waxaana halkaasi ku soo dhaweeyey mas’uuliyiin ka tirsan Dowladda Federaalka.

C/llaahi Yuusuf intii uu ku sugnaa Magaalada Gaalkacyo waxa uu kulamo la yeeshay Madax ka tirsan maamul gobaleedka Puntland oo uu ku jiro Madaxweyne Cadde Muuse waxayna isla soo qaadeen sidii maamul gobaleedkaasi uga qayb-qaadan lahaa shirka dib u heshiisiinta Soomaaliyeed, iyadoo maamul Gobaleedka Puntland ballanqaaday inay bixinayaan lacag gaareysa 2-Milyan oo Doolar, arintaas oo uu si weyn u soo dhaweeyey Madaxweyne C/llalahi Yuusuf Axmed.

C/llaahi Yuusuf waxaa kaloo uu soo maray wadamada Kuwait iyo Emirate-ka Carabta, waxayna labadaasi dowladood ballanqaadeen inay ka qayb-qaadan doonaan shirka dib u heshiisiinta ee Madaxweynuhu horey ugu dhawaaqay. 

TAAGEERO  BAAQA  BEELWEYNTA  HAWIYE

 Anaga oo ah jaaliyadaha beelweynta hawiye ee ku nool qaaradaha  YURUB iyo waqooyiga  AMERICA waxaan cadeeynaynaa inaan ku faraxsanahay baaqii cuqaasha beelweynta hawiye ka soo saareen caasimada somalia ee muqdishu taariikhdu markii eheed 06/03/2007

Hadii aan nahay jaaliyadahaas kor ku xusan waxan cadeeneynaa inu noo dhahanyahay dhahmada odayaashayada

Waxaan hiil iyo hooba la garabtaaganahay shirarka ceeynkan oo kale ah oo loogu adeegayo danaha bulshaweynta soomaliyeed gaar ahaan beelweynta hawiye .

Waxaan ka codsanaynaa in cuqaasha beeshu anay ka daalin howlaha ceynkan oo kale ah waxaanan ka codsanaynaa oo kale inaanay dhag jalaq u siin waxma garatada ilaah naga dhaliyay  waxay jirta oraah oranaysa (NINKII WAALAN WALAALKIIS BAA U FIYOOW),

      Xariiriyaha jaaliyadaha ee beelweynta hawiye

Ali abdi Wardhere   Ali Yare
Cali_yare@hotmail.com
Stockholm  Sweden 

W/D Amiin Yuusuf Khasaaro
E-Mail amiinkhasaaro@hotmail.com

Qaylo-Dhaanta Ku Wajahan Maamulka Dowladu Ka Samaysay Gobolada Juba-land Oo Sii Kordhaysa ..

Waxaa isa soo taraya qaylo-dhaanta iyo cabshooyinka ku aadan maamulka ay ka samaysay dowlada kmg ahi gobolada jubooyinka iyadoo kulamo isdaba jooga oo ay yeesheen beelaha degaanka waamo ay isku afgaran wayeen islamrkaana kala qaybsan siyaasadeed oo xoogan uu halkaas kasoo ifbaxay ...

taasoo ay kasoo saareen baaq ay kaga hadlayaan xaalada dhabta ah ee ka jirata halkaas aqoon-yahano iyo isimo kasoo jeeda beesha siciid harti(dhulba-hante) waxaana baaqan ku saxiixnaa nabadoon xaaji cabdi yare iyo ing,caydiid saleebaan xaashi,waxuuna u qornaa sidan:

Markaanu araganay xaalada dalku marayo isalamrkaana isla gofayanay sida ay dowlada Embaghati wax u maamulayso ,ugana fog-tahay xaqiiqda iyo xeerarka waafaqsan shuruucda u degsan dalka islamarkaana ugu qotonto hab beeleedka lagu doonayo in dalka oo dhan lagu dhaxal siiyo beesha ina yuusf yey ayaanu waxaanu isla garanay inaanu kala noqono kalsoonida anagoo eegayna soomaali-nimada iyo umad ahaan masiirka danaha dadka reer juba-land .

waxaanu u sheegaynaa shacabka reer juba-land ee ku abtirsada beeshan siciid harti inay kafogaadaan wax kasta oo lagu doonayo in lagu lumiyo masiirka umada ay kasoo jeedaan islamrkaana waxaanu ugu baaqaynaa dadka reer juba -land ee beeshan ah inay gartaan danaha dadka ay wada nool yihiin islamarkaana taageeraan nabada.

waxaanu kasoo hor jeednaa musuq-maasuq ,diin,;la,aan ,siyaasad aan meelna gaarsiisnayn ,keligii taliye iyo weliba waxii aan dan u ahayn umada reer juba-land oo dhan ,waxaanu kasoo hor jeednaa wax kasta oo keeni kara colaad iyadoo ay soo baxayaan mad-madow durba soo galay gobaloda juba-land oo ay isa siinayaan hal beel oo ah beesha majeerteen.

Ugu dambayntiina waxaanu ugu baaqaynaa umada soomaaliyeed inaanu kasoo horjeedno si cadna aanu u qeexayno musuq-maasuqa ay wadodowlada Embaghati islamrkaana umada soomaaliyeed u sheegayno anagoo ku hadalayna magaca beesha siciid harti (dhul-bahante) inay kahor tagaan caburinta siyaasadeed iyo ku tag-rifalka masiirka umada soomaaliyeed ee ay wadaan maamulka c/laahi yuusuf ...

wa billaahi towfiiq
beelaha juba-land

yaasiin maxamed cali (faytin)
yaasiinfaytin@hotmail.com

Khasaarihii Ka Dhashay Weerarkii Xalay Lagu Qaaday Ciidamada Ugaandha Ee Muqdisho Jooga .

Waxaa isa soo taraya khasaarahii ka dhashay weerarkii gaadmada ahaa ee xalay lagu qaaday kolonyo baabuur ah oo ay wateen ciidamada dalka ugaandha ee ku sugan caasimada muqdisho iyadoo la xaqiijiyey ilaa iminka 15 qofood inay ku dhimatay 22 -kalena ku dhaawacantay .

Weerarkan Qaraxyadii iyo rasaasta ka dhalatay dirayankeeda ayaa saamayn weyn ku yeeshay degmooyinka iyo xaafadaha jaarka la ah deegaanka km-4 iyadoo fiid horaadkii xalay ay kooxo hubeysan oo aan la garaneyn ay weerar ku qaadeen Kolonyo gaadiidka dagaalka ciidamada Uganda oo marayay wadada NO,4

Sidoo kale Ciidamada Uganda ayaa la sheegay in lala beegsaday qaraxyo iyo rasaas, iyadoo ciidamada Uganda ay is-difaaceen oo ay fureen rasaas xoogan oo aan kala joogsi lahayn oo ay u ridayeen afarta dhinac .

Xaaladda deegaankaas ayaa halmar isu bedeshay qiiq iyo uuro ka dhalatay rasaasta iyo qaraxyada lays- dhaafsanayey oo ahaa mid ka duwan dagaaladii hore ee ka dhici jiray caasimada , iyadoo ay sii bada nayso wel-welka iyo walaaca laga qabo kusii noolaashaha magaalada caasimada ee muqdisho .

ma jiraan wax waan waan ah ama wada hadal ah oo lagu dhimayo weerarada isdaba jooga ah ee ay is dhaafsanayaan ciidamada Ethiopia ,ugaandha iyo weliba kooxaha kacdoonka wada ee kajira caasimada ,iyadoo Meydadka dadka ku geeriyooday qaraxyadii iyo israsaaseyntii xalay ,saaka lagu arkayey wadooyinka soo gala Km4, islamarkaana xaalad amaan xumo darteed loo gali-waayay xalay, ka dib markii ciidamada dowladda kmg ah iyo kuwa Ethiopia ay isku gadaameen goobta dagaalku kadhacay .

ma cada qasaaraha dhabta ah inuu intaas ku ekaan doono iyo in kale waloow ay jiraan warar dheeraad ah oo sheegaya inay jiraan madaafiic iyo rasaas wax ku laysay meelo ka durugsan meesha dagaalku kadhacay .

si kastaba ha ahaatee iska hor imaadkii xalay ayaa ka duwanaa kuwii hore uga dhici jiray caasimada iyadoo ciidamada dalka ugaandha ay rasaasta faraha ka bixiyeen ilaa iyo dadkii shacabka ahaa ee ka aga dhowaa deeganadaas ay dhamaan wax dhaawaca ,wax dhintay iyo kuwo cagahooda ku cararay noqdeen.

yaasiin maxamed cali (faytin)
yaasiinfaytin@hotmail.com

 

Kulaabo bogga  www.SomaliTalk.com 
© www.SomaliTalk.com