Waxa maalmahan muuqda in dad badan oo Soomaaliyeed ay ka murugaysanyihiin waxa ka socda dhulkeenii iyo duulaanka qaawan oo laynagu soo qaaday. Qof fikirkiisa qoraal ku muujiya iyo mid gabay ku muujiyaba waxa badankooda ka dhadhamaysa in Soomaali oo dhami waxan ka masuul tahay. Waa idinku raacsanahay in cadurka Soomaalidu qabto oo la yiraahdo qabyaalad uu jabkeenna aabe u yahay. Tix yar oo aan beri tiriyey bay ka mid ahaayeen ereyadani, waxaana u arkaa in ay qabyaaladu ka mid tahay cudurada lakala dhaxlo ama la kala firsado: 

• Nin qabyaalad falankeed hayow, waa fantiyo booge
• Ina fagatay cadowgeenna waa, faas u hawl galaye
• Ka fogaada waa cudur waqii, noo fidhsada gaare 

Waxaan jeclaan lahaa, in aynu xasuusnaano in waxa maanta ina haysta ay ka masuul yihiin, dad tirsan oo isugu jira: tuug, munaafiqiin, calooshooda u shaqaystayaal, jiri, mooryaan, dabadhilif iyo khaaimiin oo ah kuwa u daran iwm. Waxaana ii muuqata markii qabyaaladu ina dishey oo aynu dhimanay in dugaagaasi maydkii Soomaalida sida geeltoosiyaha kala jiidanayaan. Habardugaag marka uu raq isugu yimaado waxa inta kale didiya libaaxa, bakhtiyahiigyadan aan soo tiriyeyna libaaxoodu waa dhabadhilif iyo khaain. 

Laakiin, yaana la ilaawin in dadka Soomaaliyeed inta fayow iyo inta bugta inta fayoobi badantahay, bohol hadimo nin qodayna isagu ku dhici doono insha allaah. Waxaan ku darsanayaa maanta dagaalka qalinka gabaygan gaaban:

1. Duq gaboobey goor ay hurdado, soo degdegiweydey
2. Dirirkiyo haddii uu xidkaha, daawasho u aado
3. Ama diillin-caanood saqdhexe, dawga socoteeyo 
    
4. Inkastuu yaraan door ahaa, diiq bidhaansiguye 
5. Hadba meesha uu dayo haddii, ciiro yare daahdo
6. Doobnimo la dhaafuu hammiga, dib u xasuustaaye 
    
7. Aniguna sidii daran horweyn, waayo laga daahshey
8. Ay dalawadii jeel murkaha, daafta marinweydey
9. Oo dibir jidhaanliyo xareed, dooni aragooda 
    
10. Axmed gurey raguu duuliyiyo, duubcad baan jamane
11. Dabkii gurey xuseen iyo mataan, baygu soo duxiye
12. Sayid iyo darwiish iyo sengaa, dookhu tebayaaye 
     
13. Danabtii lahayd calangubiyo, faarax baan deyiye
14. Digrigii bashiir iyo xarbaa, daahir ii noqone
15. Xornimada kuwii loo deldeley, yaygu soo degiye  
     
16. Sida hooyo door ay dhashiyo, saygi laga dooxay
17. Oo digasho waartiyo xumaan, lagu dambaysiiyey
18. Aan duudsigaa helay arkayn, cid u dadaalaysa 
     
19. Dalkayagu ka oy labada gelin, diifta uu qabo e
20. Waa kaa ilmada duugayoo, diilalyuu dhimane
21. Darar iyo hadduu xoodh lahaa, waa dacgudhayaaye 
     
22. Maatadan sidii kayn dab galay, ololku diiraayo
23. Oo dawladay dhawrayeen, maanta dabar goysey
24. Oo kii jidhkiisu u danqado, daalin lagu sheegi 
     
25. Waa waxan damiirkiyo caqliga, nooga daadegine
26. Ninka shalay adoogaa dilee, adi ku soo doontay
27. U dulqaado waa ceeb hadaad, daawo leedahaye  
     
28. Waa iga digniin ereyadaan, soo dawinayaaye
29. Dakhar iyo intii uumiyaha, doog la kiciweydey   
30. Ama qolo dufowdoo xiskii, laga dabayl-raacshey 
     
31. Ama calan la duuboo sidii, derinta loo laabay
32. Ama dunida reer door ahaa, dabin ku aynfaadey
33. Nin shisheeye soo daadahshaa, loogu dawgalay e 
     
34. Qofka khaain daaniyo dhibkii, laga dahsooneeyey
35. Oo waa danaystee u fili, diric walaalkiis ah 
36. Daabgudin ha fiirsado siduu, damal u naafeeyey 
     
37. Onkod wuxu daryaamana afeef, diillin baw xigiye
38. Dabka dhibicda soo raacayaa, daray la qiiqaaye
39. Anna ararta waxan daaliyoba, dulucdu waa meele 
     
40. Soomaali duugeed intuu, meel dayacan yaalo
41. Ama dalow afkii lagu wadiyo, daaman gudohooda
42. Uu doqon cadaawe u tashaa, dabarka qoolaayo 
     
43. Marna toosa kama deynayiyo, weerka haw dagane
44. Kol hadday daruurtii cusbayd, darab biyaynweydey  
45. Oo kaan cadaawe u dabnayn, duurka lagu toogtey 
     
46. Oo diricyadeenii hawada, laga duqaynaayo
47. Oo duunyadii laga meteley, ururo duulaan ah
48. Aan degel fayow lagu ogayn, wabiyo daantooda 
     
49. Inkastoo allaa daaimee, diifi nagu raagtey
50. Aan xeer na deeqiyo samaan, cidina diidaynin
51. Oo nabad duqodiyo wanaag, uunku wada dooni 
     
52. Mar hadday  dugaag keensadeen, duban carruurteena
53. Oo diinta eebbiyo salliga, la isu diidaayo
54. Oo talo intii door ahayd, xabashi loo daayey  
     
55. Xaq la duugey feedhaa dambaa, laga dilaacshaaye
56. Haadkii abraha loo dalbaday, yaa ku soo degiye
57. Doofaarta raacdiyo amxaar, sow ka durug maaha?