Kulan-diineedkii 6aad ee
Muslimiinta Woqooyiga Ameerika
Warbixintii: SomaliTalk.com |
Minneapolis | Sept 1, 2, 3, 2006
Dadweynihii kasoo qayb galay Mu'tamarka 6aad ee W/Ameerika
Kulankii Muslimiinta Woqooyiga Ameerika ee lagu
qabtay magaalada Minneapolis ayaa habeenimadii Axadii (Sept 3, 2006) si habsami
ah usoo gabagaboobey, kulankaas oo ay ka soo qayb galeen Muslimiin aad u tiro
badan ayaa noqday mid si weyn ay Muslimiintu ugu riyaaqeen sida habsamida ah ee
uu u dhacay saddexdii maalmood ee uu socdey.
Kulankaasi intii uu socdey waxaa ka hadlay
culimaa'udiin farabadan oo qaar lagu soo xiriiriey khadka Video (conference) ee
tooska ah ayagoo joogey magaalada Nairobi iyo culimo Minneapolis jooga. Waxana
indhaha dadweynaha ka soo qayb galay ay aad u jeclaysteen sida ay Muslimiinta W/Ameerika,
gaar ahaan kuwa deggan Minnesota (Minneapolis/St.Paul) ay ugu midoobeen kulan
diineedka sannadkiiba mar la qabto (horraanta bisha September), laguna beego
xilli fasax ah si ay dadweyne aad u tiro badani uga soo qayb galaan. Waxana uu
kulankaasi noqday mid ay Muslimiinta Maraykanka iyo Kanada ku xisaabtaman si ay
uga soo qayb galaan sannad kasta Allah idankiis, carruurtoodana u tusaan hiddaha
iyo dhaqanka Suuban ee Soomaalida ee kusalaysan Islaamka sida ay isugu duuban
yihiin, si jiilasha ama faca dambe loogu reebo dhaxal aan maskaxdooda ka suulin
ee ku salaysan Islaamka.
Qayb aad u ballaaran oo kulanka ah waxaa loogu
talo galay dhallinyarada da'da yar ee Muslimiinta ah, waxaana la qabtaa tartano
Islaami ah oo lagu dhisayo hab fikirka iyo cilmiga dhallinyarada Musliminta.
Isku soo duub oo, kulankan oo aad u ballaarnaa
ayaa ahaa mid si weyn ay u jeclaysteen dhammaan dadkii Muslimiinta ahaa ee ka
soo qayb galay.
Haddaba aan idiin kala dhex baxno erayadii ay
ka soo jeediyeen qaar ka mid ah culimadii ka soo qayb galay ama ka hadlay
kulanka.
Maalintii 3aad ee Kulanka (Axad Sept 3, 2006)
Mowduucyadii ay ka hadleen culimadu waxaa ka
mid ahaa:
Habka lagu heli karo Guri Wanaagsan
Sh. C/Razaaq Xaashi ayaa ka hadlay mowduuc
cinwaankiisu ahaa "Habka lagu heli karo guri wanaagsan". Ugu horayn waxa uu arar mowduuca uga dhigay
sida dadku u raadiyeen in ay ku noolaadaan nolol wanaagsan oo ay ku baraaraan
iyo meelaha ay ka raadiyeen noloshaas. Haddaba meel kasta oo laga raadiyo nolol wanaagsan
lagu faa'iidi maayo aan ka ahayn ballanta Allah u fidiyey Muslimiinta ee aan ka
qaadanayno quraanka "Qokii camal wanaagsan sameeya oo mu'min ah waxaa Allah u
ballan qaaday in uu ku noolaanayo nolol wanaagsan". Halkaas waxaan ka
qaadaneynaa in nolosha wanaagsan laga qaadanayo diinta Islaamku waxa ay fareyso.
Guurku waa mas'uuliyad iyo xuquuq ay tahay in
la dhawro ayadoo loo noqonayo kitaabka Qur'aanka ah iyo sunnada
rasuulka (scw). Waxaana hab nolol wanaag ama xumaan ka dhigi kara
sowjka iyo sowjadda ayagaana mas'uuliyadda gurigu saarantahay, ayuu yiri.
Sh. C/Rasaaq waxa uu ku xeel dheeraaday sida ay
muhiimka u tahay in la isku xusho diinta Islaamka marka guurka la holliyo, taas
oo ah meesha ay ka bilaabaneyso nolosha wanaagsan - ku xusha diinta uu qofku
leeyahay, ayuu yiri, qoyskuna ha ku wada dhaqmeen dariiqa sacaadada iyo wanaaga.
Marka guurku dhaco waxaa muhiim ah in labada qof
ay ku wada noolaadaan nolo wanaagsan si taas u dhacdo waa in mid kasta uu kan
kale tixgeliyo oo ugu yeero magac wanaagsan oo ula dhaqmo si wanaagsan.
Waxa uu soo qaatay xigmad ka dhexaysa Carabta
iyo Soomaalida oo ah: Haddii gabdhuhu ama dumarku rabaan in ay ragga gacanta ku
dhigaan oo uu hayin u noqdo ha sameeyeen saddex arrimood: (1) Haddii uu wax ku
yiraahdo Ha dhehin maya, ragu ma jecla in hadalka lagu celiyo, (2) Dhergi oo
calooshana u buuxi, (3) Faani oo dheh nin kula mid ah ma jiro, nin kaa caqli
badan ma jiro, nin kaa fiican ma jiro. Raggu arrimahaas ayey jecel yihiin,
waxana uu taas ku daray in raggana laga rabo in ay dumarka u jilicsanaadaan,
waayo dumarku taas ayey jecel yihiin. Haddii mid xanaaqo kan kale ha dejiyo,
yaaney labada qof ee isqaba isku mar xanaaqin.
Waxa dulucdu tahay in hadal macaan oo wanaagsan ay iskula hadlaan ninka iyo
xaaskiisu, si qoyska Islaamku u noqdo mid wanaagsan. Waxaa muhiim ah in ay is xushmeeyaan oo is tix geliyaan, si ay ugu
noolaadaan nolol wanaagsan.
Waxana uu Muslimiinta xusuusiyey dhaqankii
Rasuulka Muxamed (scw) iyo Caa'isha iyo hab nololeedkoodii suubanaa ee ku dayashada mudan,
si qoyska Islaamku u noqdo mid waara oo ku wada noolaada nolol qiimo badan, oo qoyska
oo dhan uu noqdo mid baraara.
Mar uu ka waramayey nolosha wanaagsan ee
qoyska waxa uu xusay muhiimada ay leedahay in sowjka iyo sowjadda uu midba uu
midka
kale isu qurxiyo, halkaas markii uu marayey waxa uu xusay in adduunka oo dhammi
uu tilmaamo sida ay dumarka Soomaaliyeed isu qurxiyaan oo isku carfiyaan,
laakiin ayuu yiri, ragga Soomaaliyeed xaalkooda waa ognahay...... aad ayaa halkaas
loogu qoslay, rag badan ayaana dhoola caddeeyey...... Waxa kale oo uu xusay muhiimada ay leedahay in raggu ay xaaskooda
la sheekaystaan oo waqti siiyaan.
Sh. Maxamed Daahir |
"Raadka xun ee denbiyada iyo macaasida".
Sh. Maxamed Khadar mowduuca uu ka hadlay waxa
uu ahaa "Raadka xun ee denbiyada iyo macaasida". Waxana uu xeel dheeraaday ciqaabaha ka dhasha
haddii lagu dhaco macsi kuwaas oo lagu mutaysto Ciqaabta Allah, ciqaabtaas oo
noqon karta mid adduunka iyo mid aakhiro, waxana uu muslimiinta ku booriyey in
ay ka dheeraadaan dembiyada iyo macsida uu Allah muslimiinta ka reebay.
Waxa uu xusay in markii ay caasinimo iyo macsi
ku dheceen uu Allah ciqaabay Qowmu Huud, Qowmu Saalix, iyo Qowmu Fircoon, taas
oo mudan in lagu cibro qaato. Waxana uu muslimiinta xusuusiyey in ciddii Allah
caasida uu Allah dhadhan-siiyo cabsi iyo gaajo (Khowf iyo juuc).
Sh. Maxamed Khadar oo sii faahfahinaya
dhibaatooyinka ka dhasha macsida waxa uu yiri: Qofka Allah caasiya, ku dhaca
macsida, oo Allah hilmaama, waxaa ka luma xayaatada iyo wanaagga nolosha, mana
garanayo meel uu socdo iyo meel uu ka socdo, hammi gaaban oo aan barako lahayn,
welwel iyo dhibaato, waxana uu qofku galaa nolol ciriiri badan, cilmigiisuna
barako ma yeesho, waxaana ku adkaaneysa nolosha, waxa uu dareemaa keli-nimo,
waxana uu noqdaa qof haddii laba qof sheekaysanayso tuhmaya in asaga wax laga
sheegayo, waxaana ciriiri gala maciishada qofka macsida fala, sida aan
ka qaadaneyno diinteena Islaamka.
Waxa uu dhallinyarada u dardaarmay in ay
waxbartaan oo galaan jaamacado ayagoo dhaqankooda iyo diintooda ku faanaya,
ku dheggan oo haysta diintooda Islaamka, oo aan laga leexin dhaqankooda suuban ,
oo aysan noqon hiyi raac meshii ay doonaan iska raacaya oo loo kaxaysto dhankii
la doono. Waxana
uu muhiimada weyn siiyey in marka hore la barto Islaamka, kaddibna la barto
culuunta kale ee maadiga ah.
Asagoo muslimiinta la dardaarmaya, gaar ahaan
dhallinyarada waxa uu xusay qiso ahayd: in nin oday ah uu ka booday meel ay
dhallinyaradii ka boodi weydey, markaas ayaa dhallinyaradii waxa ay yiraahdeen:
Oday sidee xaalku yahay annagu meesha waa ka boodi weyney adiga oo da'daan ah
ayaa ka boodey, waxa uu odaygii ku jawaabey "Xubnahanaga waan ilaalinay oo
waxaan ku
ilaalinay daacada Allah markii aan da'yarayn, markii aan weynaaney ayaa Allah noo ilaaliyey ama noo
xafiday xubnahanagii" - arrintaas oo ay ku jirto xigmad weyn.
Dadweynaha soo camiray mu'tamarka maalintii saddexaad
Mas'uuliyadda Jaaliyadda
Sh. Khaalid |
Sh. Khaalid Yaasiin oo aad looya yaqaan dunida
Islaamka ayaa waxa mowduuca uu ka hadlay uu ahaa 'mas'uuliyadda saaran Jaaliyadda
Islaamka ah'. Ugu horayn waxa uu xusay cidda ay
waajibka ka saaran tahay dhawridda Masaajidka ama Masaajidda, waana muslimiinta, ayuu
hadalka ku adkeeyey.
Waxa uu si weyn uga hadlay sida dadka
Maraykanka ay lacagta soo gasha u tuuraan ama khasaariyan ugu yaraan qiyaastii 20%
ilaa 30% , taas oo ay ku bixiyaan waxyaabo aysan daruuri ahaan u baahnayn - waxana
uu tusaale u soo qaatay sida cable/dish/satellite ka kooban kanaallo ciidaas ka
badan oo aysan u baahnayn iwm, sida laga yaabo in qof kasta u leeyahay in ka
badan dersino kabo ah oo laga yaabo in uusan gashan, iwm, ayuu yiri..
Waxana uu markaas dib ugu laabtay dulucda
hadalkiisa oo ahayd mas'uuliyadada Muslimiinta, waxana uu xusay Mashruuca
Abuubakar Assadiiq iyo heerarka uu soo maray iyo sida loogu baahan yahay in la
dhamaystiro. Hadda waxaa dhamaaday qaybtii koowaad, ayuu yiri.
Waxaana isla markaas shaashadda laga muujinayey
heerarka uu soo maray Masjid Abuubakar iyo guud ahaan ahaan mashruuca Abuubakar
oo ah kan soo qaban qaabiyey mu'tamarka Muslimiinto W/Ameerika. Waxana uu sheegay in Mashruucu ku kici
doono $8.5 million doolar ($8,500,000). Lacagtaas oo ku bixi doonta iibsigii iyo
dib u habaynta Mashruuca.
Waxa uu markaas xusay lacaagtaas sida ay u
bexeyso ama u baxday, taas oo ah in heerkii koowaad ee iibsiga iyo dib u
habayntii hore ay ku baxday $2.5 million, waxaana heerka labaad iyo saddexaad
ee dib u habaynta iyo dhismaha looga baahan yahay $6.0 million doolar, lacagtaas
lixda Million ahna laga sugayo Muslimiinta si mashruuca loo dhamaystiro.
Waxana uu markaas muslimiinta ku guubaabiyey
sidii ay mashruucaas uga qayb qaadan lahaayeen si loo dhamaystiro. Mashruucaas
oo ay ka fa'iidaysan doonaan Muslimiinta Minnesota. "Wixii Allah idin siiyey wax ka
bixiya" ayuu hadalka ku adkeeyey. Qofkii raba Janno Adduunka Masjid haka dhiso,
ayuu Muslimiinta xusuusiyey. Wixii aad u bixisid Allah hortiis oo lagu dhiso Masjid ma ahan wax kaa lumaya,
waa kayd-kaaga ah, ayuu hadalka ku xoojiyey.
Sh. Khaalid markii uu halkaas marayey waxa uu
yiri "yaa mashruucaas wax ku darsanaya", jawaabtii laga bixiyey waxaad ka heli
doontaa qaybaha ugu dambeeya ee qormadan dhanakeeda hoose.
Qabaliyadda, noocyadeeda iyo sida Islaamku u daaweeyey
Saladii duhur ka bacdi waxaa mowduuc
cinwaankiisu ahaa "Qabaliyadda, noocyadeeda iyo sida Islaamku u daaweeyey" ka hadlay Sh. Mamduh.
Sh. Mamduh oo ka hadlaya Mu'tamarka
Sheekha Tarjumayey |
Waxa uu muhiimadda ugu weyn siiyey sida uu
Rasuulka (scw) uu muslimiinta uga digey in aysan isugu habar-wacan sidii
xilligii jaahiliyadda ee qabiilka la isugu habar wacan jirey, waana in laga
dheraado casabniyadda jaahiliga. Waaana in aan
Muslimiintu isku guul-guulin ayagoo midba uu kan kale iska fadilayo.
Sh. Mamduh oo ku hadlaya Luqadda Carabiga,
lagana tarjumayey, waxa uu muslimiinta ku guubaabiyey in ay midoobaan kana
dheeraadaan casabiyadda qabaliyada. Waxana uu ku xeel dheeraadaay dhibaatooyinka ay reebto
casabiyada ama qabaliyadda, kuna reebto Mujtamaca Islaamka, taas oo ay tahay in
laga dheeraado. Waxana uu xusay sida ay diinta Islaamku ina bartay in qofka ugu
sharafta badan uu yahay kan ugu dhow Allah. Muslimiinta oo dhammina waa walaalo,
ayuu hadalka ku adkeeyey.
Maalintii 1aad:
Kulan-diineedkii 6aad ee Muslimiinta Woqooyiga
Ameerika (Canada & USA) oo Jimcadii ka bilowday
magaalada Minneapolis (Convention Center) ayaa Sabtidii September 2, 2006 kasii socdey
Minneapolis, kulankan oo soconaya ilaa Axada Sept 3, ayaa ah mid aad uga ballaaran kii sannadkii hore, ayadoo
lagu soo siyaadiyey luqadaha Carabiga, Ingiriisiga iyo Oromada, waxaana culimadii
maalintii Jimcada ka hadlay mu'tamarka waxaa ka mid ahaa:
- Sh. Khaalid Yaasiin, Dr. Hatim Al-Haj, Sh.
Daakir, Sh. Waliid Idris, Dr.Sh. Salaax As-Saawi, Sh. Mamduux Mustafa, Sh.
Maxamed Khadar, Br. Yusuf Yee (Kabtankii hore ee xabsiga Guantannamo), Sh.
Aaden Cabdullahi, Dr. Hamdy El-Sawaf, Sh. C/Risaaq Xaashi, iyo culim'uudin
kale.
Maalintii 2aad ee Kulanka::::
Raadka ay reebto ku noolaanshaha Galbeedka
SH. Maxamud Shibille |
Sh. Maxamuud Shibille oo la gusoo xiriiriyey
khadka Video
Conference tooska ah ee Nairobi ayaa ka Mowduuca uu ka hadlayna waxa uu ahaa: Raadka ay reebto ku
noolaanshaha Galbeedka.
 Sh.
Shibille waxa uu xoogga saaray carruurta Muslimiinta ee ku koraya wadamada
galbeedka iyo in ay thay in muhiimad la siiyo, waxana uu xusay cilmi baarin lagu sameeyey qoysaska deggan Galbeedka
oo la weydiiyey in ay carruurtooda geeyaan dalal muslimiin ah ugu yaraan xilliga fasaxa, waxana uu xusay in tiro ka badan celcelis ahaan boqolkiiba 70% ay
diideen in carruurtooda ay geeyaan dal Islaam ah xilliga fasaxa oo keliya.
Waxana uu carrabka ku adkeeyey in su'aashu ay ahayd geeya ugu yaraan dal Islaam ah xilliga
fasaxa (si ay u arkaan dhaqanka suuban ee Islaamka).
Su'aal carruurta la weydiiyey oo ku saabsanayd
'haddii waalidkaa weynaado ama gaboobo maxaad ku samayn", waxa ay ku jawaabeen "waxaan
geyneynaa meelaha dadka waaweyn la geeyo ee loo yaqaan 'senior homes'" ayuu yiri,
halkaas oo uu ku muujinayey raadka ay reebeyso ku noolaanshaha galbeedka.
Waxana uu xusay dadka waaweyn haddii ay fasax
ku tagaan Soomaaliya, oo ka soo laabtaan, marka la weydiiyo meesha ay ka
yimaadeen haddii ay yiraahdaan Soomaaliya, waxa lagu oranayaa Allah ma kusoo
nabad celiyey, markaas kaddib waxaa la oranayaa "ma ku laabanaysaa, ma joogeysaa
halkan, iyo su'aalo kale oo muujinaya in laga dal fiican yahay."
Halkaas oo uu ku muujinayey sida fikir ahaan raadka ay reebeyso dalkaaga oo
laga fogaado.
Waxa kale oo uu Sh. Shibille ku nuuxnuuxsaday
sida ay u burbureen Qoysaska Islaamka ah ee Jooga dalalka Qurbaha. Waxaad
arkeysaa ayuu yiri nin iyo xaaskiisii oo isku hasta arrimo si fudud uu
Islaamku u xallin karo. Halkaas oo dulucdiisu ahayd in Muslimiinta ku dhaqan
galbeedku aysan ka tegin dhaqan kooda suuban ee Islaamka.
Sh. Umal |
"Muslimiinta iyo Ciidaha Gaalada".
Kaddib waxaa khadka video Conference lagu
wareejiyey Sh. Umal oo jooga Nairobi, waxana uu ka hadlay mowduuca ah "Muslimiinta
iyo Ciidaha Gaalada". Sheekha markaas hadlaya marka lagu xiriiriyo Video-ga
tooska ah ee Nairobi waxa uu u muuqanayaa asagoo hor fadhiya mu'tamarka
Minneapolis, maadaama codku aad fasiix u ahaa, shaashad TV-ga oo aad u weyna
ay hor suran tahay dadweynaha aadka u tiraa badan ee ka soo qayb galay
mu'tamarka.
Sh. Umal ugu horayn waxa uu sharraxaad ka bixiyey
macnaha guud ee kelmedda "Ciidda", waxana uu kusoo koobay in ciida
Muslimiinta
laga qaadanayo Diinta Islaamka ee aan laga qaadanayn meel kale iyo dhaqan kale,
asagoo arrimahaas sii faahfaahinaya waxa uu yiri:
Ummada Islaamku uma baahna in ay ummado kale
ka soo qaataan ciido, waayo diinta Islaamka ayaa kaamil yeeshay ciidaha
Islaamka, loomana baahna in la soo amaahdo ciido kale. Ruuxa Muslmika ah uma
baahna in uu dhaqan ka qaado ummad aan Islaam ahayn.
Sh. Umal waxa uu xusay in aysan Muslimiinta u
bannaanayn in ay ka qayb galaan ama ka qayb qaataan ciidaha gaalada.
Muslimiintu waxa ay leyihiin ciido Islaamku ogol yahay.
 Ciidamaha Islaamku waa ciida Al-Fidri ee marka
Ramadaanku dhamaado iyo Ciidul-Adxaa ee Xajka, ayuu yiri.
Waxa kale oo uu xusay in xitaa ciida asbuucu
aysan ka dhexayn Islaamka iyo gaalada, maalinta Jimcada ayaa Muslimiinta u
ah ciida Asbuuca, halka Yuhuuda ay u tahay Sabtida, Nasaaradana Axada.
Halkaasna waxaa laga qaadanayaa, ayuu yiri, in ciidaha Muslimiintu ay ka
soocan yihiin ciidaha kale.
Asagoo si gaar ah uga hadlaya maalinta
Christmaska waxa uu yiri dad ayaa yiraahda waa ciid ka dhexaysa caalamka oo
dhan, taas xaalku ma ahan waayo waa ciid ku salaysan diin, oo aan Islaamku
shaqo ku lahayn. Waxana uu halkaas ku adkeeyey in ciidaha kale oo dhan ay
dad dejiyeen laakiin ciida Islaamka uu Allah dejiyey. Sidaas daraadeedna waa
in aan la isku khaldin ciidaha.
Sh. Umal oo ka hadlayey xadaaradaha waxa
uu yiri, Islaamka ayaa ahaa kii asaaska u dhigay horumarka caalamku hadda
higsanayo, waayadan dambe ayaa dadka aan Islaamka ahayn horumarka kasii
faa'iideyseen oo ku horumareen, hadaba, ayuu yiri, ma ahan in la yiraahdo
waxaa la inakaga horeeya xagga farsamada casriga ah ee Technology, sidaas
daraadeedna hala qaato wax kasta, ma ahan arrintu sidaas, xadaaradaha inta
wanaaga ah waa lakala qaataa, laakiin ma ahan in la qaato dhaqanka aan
Islaamka waafaqsanayn ee ay ka mid yihiin ciidaha aan Islaamku ogolayn.
"Ceeb ma ahan in la yiraahdo lana gumasan
maayo, oo dhaqan nalaku gumeysan maayo, waxaan nahay dad dhaqan leh oo hiddo
gaar ah, hidahaas oo ku salaysan diinta Islaamka" ayuu yiri Sh. Umal.
Sh. Cabdishakur oo isaguna jooga Nairobi
(video conference) ayaa Dardaaran yar u soo jeediyey Muslimmintu sidii
ay carruurtooda u badbaadsan lahaayeen.
Waxaa uu si gaar ah u xusay dadka ka soo guura
qurbaha oo ayagoo aan sii tabaabulshaysan yimaada (Afrika), marka ay cabbaar
joogaana noqda waayo waxa ay soo guureen ayagoo aan si rasmi ah u soo
tabaabulshaystay, waxaa markaas loo baahan yahay, ayuu yiri, qorshe iyo tabaabulshe
rasmi ah, oo si rasmi ah loogu soo talo galo int aaan la soo guurin. Hana is dhiganina ayuu yiri, waxana uu Muslimiinta kula dardaarmay
wada jir.
Sh. Axmed Nuur |
Tarbiyadda Carruurta
Salaadii duhur iyo qadadii markii laga soo
laabtay waxaa magarafoonka lagu soo dhoweeyey Sh. Axmed Nuur oo ka hadlay
mowduuca "Tarbiyadda Carruurta". Waxana uu ku dheeraaday waxyaabaha looga
baahan yahay waalidka si loo barbaariyo carruurta, barbaarin wanaagsan oo
waafaqsan diinta Islaamka.
Ugu horayn waxa uu waalidka ku booriyey in ay
carruurtooda u horseedaan astaan wanaagsan oo ay carruurtu ku daydaan.
Waxana uu yiri: Carruurta bar akhlaaqda wanaagsan, carruurta hala soo tuso meelaha wanaagsan oo
uu ka qaadan karaan astaan iyo asluub wanaagsan, saaxiib wanaagsan u samee
ama ha yeeshaan, bar carruurtu in ay isku kalsoonaadaan oo naftooda ku
kalsoonaanadaan, ha looga digo in ay wax kasta iska raacaan. Waana in la
baro in ay xurmeeyaan waalidka, deriska iwm. Carruurta waa in la baro in
lala tashado si ay ugu siyaadaan maskax iyo wanaag iyo kalsooni.
Carruurta hala baro dhaqan suuban" Sh.
Axmed Nuur
Xagga carruurta yaryar iyo guriga asagoo ka
hadlaya waxa uu yiri: waxaa muhiim ah in wiilasha iyo gabdhaha loo kala
sooco qolalka hurdada, waa in wiilasha iyo gabdha qolalka loo kala sooco
ayuu hadalka ku adkeeyey, haddii xaaladu saamaxi weydo oo aan la heli karin
qolal kala duwan oo ay dantu kallifto in isku qol la seexiyo waa in lagu
seexiyo sariiro kala duwan. Sidoo kale waa in aan loo ogolaan in
carruurtu ay isku mar musqusha wada galaan oo ku wada qubaystaan. Waa in
carruurta la baro in ay idan weydiistaan marka ay gelayaan qolka Aabbaha iyo
hooyada, gaar ahaan xilliyada ay ka mid yihiin cishaha ka dib, salaada subax
ka hor iyo duhurka ka dib. Waa in hooyada iyo aabuhu ay muujiyaan asluub
wanaagsan oo carruurtu kaga daydaan.
 Carruurta haddii aad ballan u qaadid waa in
aad ballantii u fulisaa, ayuu yiri Sh. Axmed Nuur, waxana uu yiri: tusaale
ahaan haddii aad tiraahdo Aabbe ama hooyo haddii aad iskuulka ku
wanaagsanaatid waxaas ayaa kuu gadi doonaa ama meel heblaayo ayaan ku geyn
doonaa, waa in sidii ballanta ahayd loo fuliyo, si xiriirka ilmahaaga
iyo adiga uu u wanaagsanaado. Waa in carruurtaadu kuu iman karaan oo waxa ay
rabaan kuugu sheegan karaan, ku weydiisan karaan, waa in aan carruurtaadu
kaala biqin in ay kuu sheegtaan waxa ay rabaan.
Waa in carruurta laga ilaaliyo waxyaabaha
xumaanta u hor seedaya, sida joornaalada ay ku sawiran yihiin sawirada
xumaanta iyo qaawanaantu ka muuqato, sidoo kale waa in si weyn looga
taxadaro adeegsigooda Internetka (meelaha ay booqanayaan sida goobaha
xumaanta - qaawanaanta). Waa in carruurta loo sheego wanaaga, lagana reebo
xumaanta, la baro sida ay u dhaqmi lahaayeen.
Asagoo ka warama ku dayashada, waxa uu yiri:
Waa in carruurta la tuso wax wanaagsan in ay ku daydaan, tusaale ahaan ka
warama haddii la yiraahdo "Aabbe sigaarka ha cabbin" oo markaas canugii loo
dirsado in uu kuu soo gado ama kuu soo shido sigaarka - halkaas waxaad ku bartay in uu cabi
karo sigaar. Ka soo qaad in telefoon kuu soo dhacay oo aad canuga tiraahdid,
Aabbe ama hooyo qofka telefoonka ka qabo oo u sheeg in aanaan joogin -
halkaas waxaad ku bartay been sheegidda.
Waa in aan carruurta had iyo jeer la oran "aamus",
"ha hadlin" iyo erayo liidaya, sidoo kale waa in aan aabayaashu xaqirin
hooyooyinka, waayo carruurtu waxa ay qaadayaan cuqdad ka dhalata xaqiraadaas
oo uu aabaha la coloobayo.
Waa in aan carruurta la kala fadilin, oo la dhehin kan ayaa ugu caqli badan,
kan ayaa ugu caqli xun, si aysan ugu beermin cuqdad iyo nacayb uu waalidka u
qabo.
Waxyaabaha carruurta dhumiya ama ay la
xumaadaan waxaa ka mid ah: furriinka oo ay aabaha iyo hooyadu kala tagaan oo
qoysku burburo, saaxiibada xunxun, macallin xun, iwm ayuu yiri SH. Axmed Nuur.
Xuquuqda ay isku leeyihiin Muslimiintu
Sh. Aden Sh. C/lahi |
Sh. Aaden Sh. Cabdullahi oo ah Iimaamka
Masjidka Columbus Ohio, ayaa ka hadlay mowduuc ahaa 'xuquuqda ay isku
leeyihiin dadka Muslimiinta ah".
Sh. Aaden waxa uu ku xeeldheeraaday muhiimada
ay leedahay in lagu walaaloobo Diinta Islaamka. Diinta Islaamku waa diin
naxariis oo u naxariista insaanka, sidaas daraadeed waxaa loo baahan yahay
in muslimiinta loo naxariisto, ayuu yiri.
Asagoo ka hadlayaao xuquuqda ay muslimiintu
isku leeyihiin waxa uu sh. Aadan Muslimiinta xusuusiyey in
rasuulkeena Muaxamed (Nabadgelyo iyo Naxariis Allah korkiisa ha yeelee) in
uu muslimiinta amray toddoba, kuwaas oo ah:
- In aan booqano qofka xanuunsan (oo niyada
loo dhiso qofka jirran)
- Janaasada la raaco (qofka Muslimka ah ee
dhintay meydkiisa la raaco oo lagu tukato salatul janaazada),
- Kan hindhisay ee yiraahda Alxamdu lillah
in loo ducooyo oo la yiraahdo Arxamaka Allah,
- Kan dhaartay in aan u baarinimo samayno (tusaale
haddii qof yiraahdo wallaahi waad i raaci maanta, waa in loo baarimo sameeyo oo loo yeelo
waxa uu ku dhaartay si aan kafaare ugu waajib noqon - waxaa qofka
loogu baarimo samaynayaa waa wixii wanaag ah),
- Kan laga gar daran yahay in aad u
gargaartid,
- In la faafiyo salaanta Islaamka (As-salaamu
caleykun warraxmatu Laah wa-barakaatuhu),
- Kan daaciga ah ee meel wanaagsan kuugu
yeeray in aad aqbashid (xumaan lagu adeeci maayo qofna),
Waxaa lagu qiyaasay sabtidii in ay
mu'tamarka kasoo qayb galeen 5000 oo qof
Sh. Aaden waxa uu aad ugu adkeeyey muhiimada ay
leedahay in qofka Loo Jeclaado Allah dartiid. Waxana uu aad ugu xeel dheeraad
muhiimada uu Islaamku siiyo in la dhawro ceebaha qofka Muslimka, asagoo
arrintaas ka hadlayana waxa uu xusay in rasuulkeena Muxamed (scw)
uu yiri qofkii qof kale kurbo ka feyda in Allah kurbo ka feydayo. Sidoo kale
qofkii ceeb qof astura Allah ayaa qofkaas ceebtiisa asturaya. Halkaas oo
laga qaadanayo isxaan falka iyo in la isu gargaaro oo loo gargaaro qof
Muslim ah oo baahan ama ay kurbo haysato.
Waxa uu xusay in Muslimiintii salafka haddii
arrin ama ummuur ku adkaato in ay raadin jireen qof Muslim ah oo ay u
gargaaraan si Allah uu ayagana kurbadas uga qaado ama u fududeeyo amuurtooda.
Xawaaladaha Soomaaliyeed.
Kaddib waxaa magarafoonka lagu soo dhoweeyey Cabdullahi Cali Shire
oo wakiil ka ah xawaaladaha Soomaalida ee Minnesota urur ay dhowaan
samaysteen oo la yiraahdo (Somali Financial
Association), waxana uu ka arrimo la xiriira xawaaladaha Soomaalida ee
Maraykanka.
Xawaalad la xirayo ma jirto" C/Laahi Cali Shire
Waxana Cabdullahi Cali Shire uu yiri: Anigoo ku hadlaya waxaawalaha Soomaaliyeed
waxaan idiin sheegayaa:
- Xawaalad xiran ma jirto, xawaalad la
xirayona ma jirto - shaqadoodii sidii hore ayey ugu socotaa, keliya waxaa
dhacay in bangi kamid ah bangiyada uu sheegay in uu akoonada xirayo, sida
aad ogtihiin bangi wax ma xiro waxna ma furo dowlada ayaa ku kantoroosha.
- Waxaa jira in dadkii jaah wareer
lagu abuuray, dadkii ayaa la gaarsiiyey in xawaalada la xiray taas oo
jaah wareer ah , arrintaas oo aan jirin, hal bangi ayaa arrinta ka hadlay
taasna waa ka daba tagnay oo waxaan la hadalay senetoorada gobolka, dadka
gobolka madaxda ka ahna aad ayey noola shaqaynayaan, xawaaladuhu sharci ma
jebin, xawaaladaihi sidoodii ayey u shaqaynayaan, waxba iskama bedelin.
Mashruuca Abuubakar Assadiiq
Salaadii Casarka iyo casariye ka bacdi waxaa warbixin kooban laga soo
jeediyey mashruuca Abuubakar Assadiiq, iyo heerarkii uu soo maray iyo waxyaabaha
uu qabtay iyo waxyaabaha horyaala Mashruca. Si weyn ayaa dadkii ugu riyaaqeen
warbixintas markii la sheegay in Masjidkii qaybta lagu tukaney dhismeheedii uu
dhammaaday oo Jimcadii la soo dhaafay ay ahayd markii ugu horeysey ee lagu
tukadey. Waxaana la xusay in qaybaha harsan oo aad u baaxad weyn laga dhigi
doono qayb dugsi sare ah iyo qaybo loogu khidmeeyo bulshada.
C/Rashiid oo ka warbixinaya Masjidka.
Waxaa shaashada TV-ga dadweynaha laga tusay
heerarka uu soo maray dhismaha Masjidka, iyo qaabka uu masjidku u dhisan
yahay. Waxaana la sheegay in maalinta Isniinta (Sept 4, 2006) masjidka
Abuubakar lagu qaban doono xaflad ballaaran oo lagu furayo masjidka
qaybta lagu tukado oo hadda soo gabagabowdey, qaybtaas oo sida aan kor kusoo
xusnay jimacdii Sept 1, 2006 lagu tukadey markii ugu horeysey.
Dhismaha Mashruuca Abuubakar As-Saddiiq ee Minneapolis
Sh. Maxamed |
Sh. C/Risaaq |
Kaddib waxaa guubaabo yar soo sheediyey Sh. C/Risaaq
uu ku guubaabinayey dhismayaasha Masaajida iyo in la taageero dhamaystirka
Mashruuca Abuubakar.
Waxaa kaddib magarafoonka lagu wareejiyey Sh.
Maxamed Khadar, ugu horayna waxa uu aad u ammaanay jamaca dadweynaha
Muslimiinta ee isugu yimid
xarruntan kulanku ka socdey ee Minneapolis Conversion Center oo ku taal
faras magaalaha (downtown Minneapolis), dadkaas oo waxa
keliya oo ay isugu yimaadeen uu ahaa Islaamka oo walaaleeya (Allah dartiis),
ayuu yiri.
Waxana uu arrintaas ku tilmaamay nimco aad u weyn oo lagu farxo oo ay tahay
in lagu shukri naqo. Waxa uu
xusay in dadka tiradaas le'eg waxa keliya oo la isugu keeni karaa ay tahay
Allah dartiis, waana arin u baahan in la ilaliyo, meelaha lagu ilaaliyona waxaa ka
mid ah masaajidda oo la dhiso ayuu yiri.
Sh. Maxamed waxa uu aad ugu booriyey in wixii
Allah mujtamacan siiyey ay ugu deeqaan Mashruuca ABuubabar Assidiiq ee
mujtamacaan u baahan sidii uu si rasmi ah ugu hir geli lahaa qaybaha dhiman.
Mashruuca Abuubakar , sida aan kor kusoo
xusnay, waxaa hadda dhamaystiran
qaybta lagu tukado, waxaase haray qayb aad u baaxad weyn oo la qorshayno in
laga dhigo dugsi sare.
Sh.Maxamed Khadar waxa uu yiri yaa tageeraya
Masjidka, isla markiiba gabar ayaa gacanta u taagtey in ay bixin doonto
$5000 oo doolar, hal mar ayaa dadkii oo dhan yiraahdeen "Allahu Akbar", si
weyn ayaana gabadhaas loogu duceeyey, duco dadkii meesha fadhiyey ka
qiiraysiisay. Maasha Allah, ayaa mujtamacii Muslimiinta ahaa ee lagu
qiyaasay 5000 oo qof ee Mu'atamarka sabtidii ka soo qayb galay ay ugu
duceeyeen.
Ducadaas kaddib gabar kale ayaa gacanta u
tagatey in ay ayaduna $5000 oo doolar ugu deeqday mashruuca Abuubakar, sidii
oo kale ayaa maashaa-Allah iyo duco la daba dhigay gabadha labaad. Waxaa
xigsadey gabar saddexaad, iyo gabadhii Afraad, shanaad, iyo tii lixaad iyo tii toddobaad oo
min $5000, wixii halkaas ka dambeeyey dad badan ayaa ballan qaaday in ay
mashruucaad Abuubakar taageerayaan, waxana yididiilo weyn gashay mujtamaca
Muslimiinta ee ku dhaqan Minneapolis in ay meel ka muuqan karaan, waxna
qabsan karaan, wixii ay wadajir ugu dhaqaaqaana ay miro dhal noqon doonaan.
Taasi waxay ahayd Sabtidii, laakin markii
mu'tamarkii la isugu soo laabtay maalintii saddexaad ee Axada (Sept 3,
2006), ee uu Sh. Khaalid Yaasiin sida aan kor kusoo xusnay uu Muslimiinta
weydiiyey "yaa mashruuca Abuubakar wax ku darsanaya, oo Allah dartiis ula
baxaya", ayaa qof mu'tamarka fadhiyey waxa uu
sheegay in uu mashruuca ugu deeqay $10,000 (toban kun oo doolar) - takbiir ayaa
hal mar dadkii la soo boodeen. Waxaa markaas qof kale ku deeqay $5000 (shan kun
oo doolar), 7 qof ayaa ku deeqay min $3,000, sidoo kale 9 ayaa ku deeqay min
$2,000. Waxaa kale oo min $1,000 doolar bixiyey 26 qof. Waxaa min $500 bixiyey
75 qof. Waxaa min $300 bixiyey 44 qof. Waxaa min $100 bixiyey 127 qof. Isku
darkuna waxa uu noqday $149,400.
Shaashadda oo laga muujiyey inta lacag ay Muslimiintu ugu deeqeen Abuubakar,
Axada, Sept 3, 2006
Waxaana muuqaya in mashruuca Abuubakar oo u
baahan lacag dhan lix Malyuun oo doolar in uu weli sugayo Muslimiinta si loo
dhamaystiro oo uu u noqdo dhaxal u yaal Muslimiinta. Waxaana arrin xusid
mudan ah in dhismaha masjidka inta dhamaystiran iyo iibinta booska ay gacan
weyn ka geysteen Muslimiinta deggan Woqooyiga Ameerika, gaar ahaana
Muslimiinta Soomaalida u badan ee daggan magaalooyinka mataanaha ee
Minneapolis iyo St. Paul ee gobolka Minnesota, arrintaas oo ku dayasho mudan.
Si aad wax badan uga ogaatid mashruuca Abuubakar, booqo
Halkan.
Muslimiinta kale ee ku dhaqan Minnesota oo
sannadkan ka soo qayb galay Mu'tamarka, maadaama lagu soo kordhiyey luqadaha
Ingiriisiga, Carabiga iyo Oromada, ayaa aad ugu farxay ka soo qayb galka
kulan diineedkan Muslimiinta W/Ameerika. Waxaa la oran karaa Muslimiinta
deggan Canada iyo Maraykan uma kala harin kulanka sannadka 2006.
 Kulankii
Sabtida waxaa yimid musharaxa aqalka odayaasha ee Maraykanka (US Congress),
waa nin Muslim ah oo magaciisa la yiraahdo Keith Ellison, waxa uu
muslimiinta xusuusinayaa in ay codkooda asaga siiyaan maalinta ay taariikhdu
tahay September 12, 2006 doorasha hore ee tartanka aqalka odayaasha
maraykanka.
SomaliTalk.com oo fursad u heshay in ay su'aal
gaar ah weydiiso Keith Ellison ayaa su'aashu ahayd "Haddii lagu doorto
maxaad u qaban doontaa ama u ballan qaadeysaa in aad u qabaneysid Soomaalida".
Waxana uu ku jawaabey: Waxaa ka shaqaynaya nabadda, waxaan ku dadaalayaa
dhawrida xuquuqda shacabka (civil rights), waxaan Soomaalida kala
shaqaynayaa xagga Immigration-ka iyo qaadashada dhalashada (citizenship),
iyo yaranta waqtiga dheer ee la sugayo immigration-ka iyo caddaalad samayn
xagga dhaqaalaha - halkaas asagoo sharaxayana waxa uu yiri waagii hore hal
qof ayaa biili kari jirey qoys ka kooban shan qof, laakiin taasi hadda
suurta gal ma ahan, waxaana kala tegey daqabqadihii, dadkii fiqiirka ahaa ee
Maraykanka waa sii fiqiirayaan dadka qaniga ah waa sii taajirayaan, waxaan
ku dadaalayaa in aan taas wax ka qabto ayuu yiri, isagoo aad ugu niyad san
in Soomaalida haysta dhalashada Maraykanka ay Sept 12 asaga u codayn doonaan.
Kulanka lixaad ee Muslimiinta Woqooyiga
Ameerika waxaa goob joog ka ahaa telefishanada Soomaalida Minnesota ee kala
ah: (Eeg sawirada weriyayashooda hoose).
Siyaad Saciiid Saalax (Som-TV) Minnesota oo duubaya Mu'tamarka
Xaayow (Somalimedia oo mu'tamarka TV ka duubaya)
Barxadda xarunta uu ka socdey mu'atamarku
waxaa lagu soo bandhigay kutub, buugaag, cajalad, CD, DVD iyo macluumaad
badan oo xambaarsan cilmi. Maktabadaha macluumaadkaas soo bandhigay waxaa ka
mid ahayd maktabada An-Nuur oo ku taal xafada Cedar ee Soomaalidu u badan
yihiin ee Minneapolis. Sawirka hoosena waa kutubtii , Cajaladihii ay soo
bandhigtay Maktabada An-Nuur.
CD/DVD-yada ay soo bandhigtay Maktabada An-Nuur
Faafin: SomaliTalk.com | Minneapolis, MN,
September 2, 2006
| 
Daabaco
Boggan | Print