Wararkii Sept 22, 2006

Maalinta Nabada oo laga xusey Magaaladda Muqdisho
Subaxnimada Jimcada oo Dugsiga Sare ee Booliska lagu Toogan doonaa Gacan ku dhiigle..
Sahro Ugaas Faarax "Waxaan u bixin lahaa maalinta Nabadda maxkamadaha Soomaaliya"
JWXO oo canbaaraysay afduub Ogaadeenya ka dhacay.

Maalinta Nabada oo laga xusey Magaaladda Muqdisho

Waxaa maalintii shaley ahayd dalka laga xusey Maalinta Nabada Adduunka waxaana xaflad arrintaa ku saabsan lagu qabtey Xarunta SSWC waxaa ka qayb galey masuuliyiin ka socotey Bulshada Rayidka ardeyda wax ka barata Xarunta SSWC . waxaa ugu horeyntii halkaas ka Hadley Aamina Xaaji Cilmi oo ah xiriiriyaha Xarunta SSWC waxay sheegtey in Nabada ay tahay midda furaha u ah Horumarinta Bulshada waxay u soo jeedisey Bulashada Soomaaliyeed in la adkeeyo Nabadda la heysto isla markaana laga faa’iidaysto, waxaa kaloo ka hadlay C/qaadir Ibraahim Gacal Abkoow oo isagu ka hadlayey Magaca Bulshadda Rayidka ah wuxuuna sheegay in Nabadda ay tahay mid ay u baahan yihiin Ummadda Soomaaliyeed la ‘aanteedana aan la gaari Karin wax horukac ah “u mmadda Soomaaliyeed waxay soo martay lix toban sano oo Nabad la ‘aan ah maanta waa inaan ka faa’iideysannaa Nabadda aanu helnay.

Xafladaasi waxaa kaloo erayo ka soo jeediyey, C/Nuur Xaaji Maxamed wuxuuna halkaas ka tirayey erayo ka hadlaya dhinaca Nabdda waxayna erayadaasi ku qornaayeen Afka Ingiriiska waxaana laga dhandhansanayey in ay isku xiran yihiin Nabadda, Caddaaladda, Jecaylka, CNuur ayaa ka qaybgalyaasha Xafladda waxa uu weydiiyey Cidda fasirta Nabadda Qof baa istaagay wuxuuna yiri” waa markaad hesho Xorriyo, iyo Nolol, mid kale ayaa isna istaagay oo wuxuu yiri” Nabaddu macnaheedu waa markaan Gurigayga si Nabad ah ku tago, mid kale sii raaciyey” waa markaan helo wax barasho walwal la ‘aan ah” Gabar baa istaagtay oo waxay tiri” Nabaddu waa markaan cajiinka reerka si Nabad ah ku geeyo guriga”.

Xaflad la mid ah midaan ayaa waxa lagu qabtay Magaalada Baydhabo waxaa lagu muujiyey Banaanbax oo mid lagu taageerayey in Dalka la keeno Ciidamo shisheeye midna waxa uu ahaa mid lagu xusayey maalinta Nabadda ööAdduunka waxaana lagu cambaareeyey Qaraxii la damacsanaa in lagu dilo Madaxwayne C/llaahi Yuusuf waxaana ka hadlayey Wasiirka Gaadiidka Cirka iyo Dhulka Max’ed Ibraahim Xaabsade.

Subaxnimada Jimcada oo Dugsiga Sare ee Booliska lagu Toogan doonaa Gacan ku dhiigle..

Waxa maalinta berri ah Dugsiga sare ee Booliska ee Magaalada Muqdisho gaar ahaan halka xigta Badda lagu Toogan doonaa Gacan ku dhiigle C/qaadir Max’ed Diiriye (Mallaay) oo dhawaan dilay nin ganacsada ah oo lagu magacaabi jiray Max’ed Xasan Barre waxaana xukunka dil ah kudhawaaqay Guddi loo xilsaaray Gacan ku dhiiglayaal dhowr qof ku dilay Magaalada Muqdisho tan iyo markii ay qabsadeen Muqdisho Maxkamdaha Islaamiga ah waxaana horkacayey Shiikh Cumar Iimaan oo sheegay in qofkasta oo dambe noocan ah gala in la toogan doono, Maxkamadda lagu fuliyey xukunkan oo ah Maxkamadda islaamiga ee Warshadda Caanaha ayaa waxaa kaloo xukun ku ridey Mahad Cusmaan Ugaas oo asaguna horay u dilay Ganacsade Max’ed Aadan Siyaad (ukurow), Maxkamadda ayaa xabsi daa’in ku xukuntey Cabdi Salaan Cali Khayre ka dib markii uusan noqon qofkii xabadda ku dhuftay Max’ed Aadan Siyaad balse u gacan qabtay.

Dhamaan Raggaan ayaa u dilay Marxuumiintaasi arrimo la xiriira ka dhicidda Mobailada ayadoo Mahad CIsmaan Ugaas waqtiga la dilayo ay dib u soo sheegi doonaan Maxkamadaha,

W/D; Amiin Yuusuf Khasaaro
E-Mail: amiinkhasaaro@hotmail.com

Sahro Ugaas Faarax "Waxaan u bixin lahaa maalinta Nabadda maxkamadaha Soomaaliya"

Guddoomiyaha ururka FERRO (Family Endowment & Relief Organization) Sahro Ugaas oo ka hadlaysay 21ka September maalinta nabadda caalamka iyadoo ku sugan magaalada Muqdisho ayaa waxay sheegtay in xilligan ay tahay waqtigii ugu habbooneyd ee magaalada Muqdisho dhinaca nabadda ay soo marto sanooyinkii ka dambeeyay dowladii Max'ed Siyaad Barre.

Sahro Ugaas ayaa tiri 'Runtii maanta oo kale waa mid aad muhiim u ah nabadda la xusayana magaalada Muqdisho waxaa gacan weyn ka geystay maxkamadaha Islaamiga iyo dadweynaha iyo ururrada bulshada dhammaantood oo is kaashanaya, waana in la xoojiyaa lagana faa'iideystaa" iyadoo intaasi ku sii dartay in ay jiri jirtay inaan sidan oo kale magaalada Muqdisho soo marin.

Sahro ugaas faarax guddoomiyaha

Nabaddu waa furaha nolosha, nabaddu waa furaha wax walba, la'aanteedna wax suurto geli kara lama arko, waxaana sidaa daraadeed maanta ku taageeraynaa in nabaddaas lagu wada noolaado horayna loo sii wado.

Sida aad la socotaan maanta magaalada Muqdisho ma lahan nimankii qab-qablaha ahaa, ma lahan isbaarooyin, ma lahan dad la qafaalayo, ma lahan gabar la kufsanayo, ma lahan wax la kala dhacayo, intaasoo dhan waa ilaahay mahaddiis, waa nabad, waxayna fure u tahay nolosha sidaan horay u soo sheegay, waxaan ka soo degay sitimaan ka hor garoonka diyaaradaha magaalada Muqdisho, runtii taasi waxay tahay mid indhaheyga illin ku soo istaajisay galgacal awgiis, waxaan tagay furdada, sidoo kale waa ay shaqeyneysaa, ummaddii way is dhex mareysaa, meel alaale meeshaad rabtid ayaad mari kartaa, waa Ilaahay mahaddiis, ummadda Soomaaliyeed munaasabaddan awgeed waxaan kula dar-daarmayaa in nabaddaasi ay horay u sii qaadaan, inay ka wada shaqeeyaan iyadoo aan qofna laga tagin, iyadoo aan cidna loo eexan, sida ay tahayna horay loogu wado, waayo qof kasta oo Muqdisho jooga waxa uu ka qeyb qaatay sidii nabaddaasi ay u soo baxday, haddaan sida ururada bulshada oo kale, kacdoonka dadweynaha, maxkamadaha Islaamiga ah, haweenka, dhallinyarada, dhammaan waa laga wada qeyb qaatay, xitaa caruurta way ka qeyb qaadatay, marka waa Ilaahay mahaddiis waxaan Soomaali u sheegayaa inay horay u sii wadaan oo aysan gadaal u noqon oo ay ka faa'iideystaan waayo ilmihiina ayaa wax baranaya"

"Maanta magaalada Muqdisho dhinacyada haddaad fiirisid ma arkaysid wax wax waardiyeynaya lama arko, waxaana la arkayaa isteeshimadii Booliiska oo ay maxaakiimtu joogaan, dhaq-dhaqaaquna wax walba waa iska caadi, sidii aan u imidna xabbad hal maalin ah ayaan ka maqlay taasi oo la iigu sheegay inay shaqo aheyd" ayay tiri Sahro Ugaas Faarax oo hadalkeeda sii wadata.

"Qofkii qof dilay waad arkaysaan in maxkamaddii la saarayo, wixii wanaag sameeyay wanaaggii ha sii wadaan"

Hambalyo Aroos:

Dadka kala ah

Yuusuf Cabdilaahi Maxamed
Kaysar Cabdilaahi Maxamed
Abiib Cabdilaahi Maxamed
Siciid Cabdilaahi Maxamed
Axmed Cabdilaahi Maxamed
Faadumo Cabdilaahi Maxamed
Maryan Cabdilaahi Maxamed
Caasha Cabdilaahi Maxamed
Istaahil Cabdilaahi Maxamed
iyo Hooyo Canab Faarax Madar

oo kala Jooga dalalka Britain, Holland iyo Somaliland waxay Tahniyad kal iyo laab ah u dirayaan Cabdikariim Maxamed Faarax iyo Salma Cabdilaahi Maxamed oo uu Maanta (21-09-2006) uu Meherkoodu ka dhacay Magaalada Hargeysa.

Waxaanu Ilaahay uga baryaynaa inuu ka dhigo kuwii isku waara ee Ubad khayr qabana kala hela. Aamiin.

Kaysar Cabdilaahi. Bristol.UK
kaysar@europe.com

Sahro Ugaas Faarax oo ah guddoomiyaha ururka FERRO oo sida ay sheegtay ah urur u khidmeeya haweenka una qabto waxyaabo badan oo ay ka mid tahay nabadda, sidoo kale waxa ay sheegtay inay fureen xarun nabadda lagu dhiirageliyo isla markaana lagu tababaro haweenka, haddana waxaan furnay xarunta la dagaallanka Gudniinka Fircooniga iyo HIV-ga sidii wacyi gelin loogu sameyn lahaa, waxaana u sheegaynaa dadweynaha Somaaliyeed maadaama nabadda furan tahay inay la soo xiriiraan Xafiiska ururka oo ku yaalla Degmada Hodan xaafadda Taleex si ay macluumaad uga helaan haweenka, waxaana laga helayaa halkaasi sida ay sheegtay dukumentiyaal muhiim ah oo lacag la'aan ah.

Sahra Ugaas Faarax ayaa waxay sheegtay in ay wax weyn u dhexeeyaan magaalada Muqdisho maalintii ay ka tagaysay iyo hadda, iyadoo ku sifeysay maalintii tagaysay inay tahay maalintii Hotel Saxafi ay maxkamaduhu gacanta ku dhigeen, xaafadda ay deggan tahayna uu dagaalku ka dhacay, balse hadda ay ku nabad ku joogaan maanta oo ay 21-ka September oo ah maalinta nabadda adduunka, waxaana jiray maalmahaasi cabsi aad u ballaaran iyo kala shaki dadweynaha magaalada Muqdisho ay qabeen iyo dagaallo joogto ah taasoo meesha ka baxday hadda, iyadoo aad loo kala shakinayo ayaan anigu ka tagay.

"FERRO waxaa la aas-aasay sanadkii 1992dii, waxaana aas-aasay haween Soomaaliyeed oo waxgarad ah kaddib markii ay arkeen dhibaatada waddada ka jirtay loona baahday in la aas-aaso ururkan, waxaana ka mid ah waxyaabaha aan qabano dhinaca nabadda, haweenka oo aqoontooda kor loo qaado, waxaa ka mid ah caafimaadka haweenka iyo gudniinka fircooniga oo lagala dagaallamo" ayay tiri Sahro ugaas, iyadoo intaasi sii daba dhigtay in munaasabaddan ay tahay middii ugu horreysay oo ay ka qeyb qaataan.

Mar wax laga weydiiyay eraybixinta ay u isticmaali laheyd maanta maadaama magaalada Muqdisho ay tahay mid nabad oo ah dekeddeedii iyo airporkeedii ay shaqeynayaan waxa ay ugu yeeri laheyd ayay tiri "Wallaahi waa su'aal aad u fiican, hoosta ayayna uga soo gashay, aniga fikraddeyga gaarka haddaan ka hadlo waxaan u bixin lahaa maalinta Nabadda ee Maxkamadaha Islaamiga Soomaaliyeed.

Munaasabaddan ayaa waxaa isla soo qaban qaabiyay ururka FERRO oo xaruntiisa lagu qabtay iyo ururka SACWE oo xaruntisu ay ku taallo magaalada Muqdisho gaar ahaan Suuqa Bakaaraha, wuxuuna xiriir la leeyahay ururro badan oo ka jira caalamka, isagoo haweenka bara sida ay sheegtay Sahro qaabka secretarialka ee looga shaqeeyo xafiisyada.

Muuse Maxamuud Jiisow
musejisow@hotmail.com
Muqdisho Somalia
002521576666/002521653623

Barnaamijkii Radio Xoriyo

22 September 2006

JWXO oo canbaaraysay afduub Ogaadeenya ka dhacay.

Hay’adihii Qaramada Midoobey oo Puntand ka guuraya

Wadaxaajood u socda Maxkamadaha Soomaaliya iyo Maraykanka

Wargayska La Nation(Sayyid M.C.Xasan “Shakhsi Naadir ah”)Q2aad.

======================

JWXO oo canbaaraysay afduub Ogaadeenya ka dhacay.

Jabhadda Waddaniga Xoreynta Ogadeenya JWXO ayaa si xooggan u canbaaraysay afduub horraantii toddobaadkan loo gaystay labo ka mid ah shaqaalaha Laanqayrta Cas, kuwaasoo laga afduubay meel 50 km u jirta magaalada Godey.

“Afduub ama waxyello loo gaysto shaqaalaha ururrada samafalka ah ee Ogaadeenya ka hawlgala waa wax aan sinaba loo aqbali Karin, isla markaana ka turjumaya isku day cad oo lagu donayo in lagu majara-habaabiyo ama lagu cilleyo halganka xaqa ah ee dadwaynaha Ogaadeenya ugu jiro aaya-ka-talintiisa, sidaas waxaa lagu sheegay bayaan ay JWXO soo saartay maalintii arbacada ahayd ee Sebember 20ka ahayd.

JWXO waxay afduubayaasha labadan nin gacanta ku haya ka dalabtay inay si ugu dhakhsaha badan oo shuruud la’aan ah u sii dayaan. Waxayna sheegtay in si hayshada shaqaalaha Laanqayrta Cas ayna ku jirin dan aan ka ahayn in hay’adaha caalamigi ah ee samafalka ahi ay kaalmadoodii kala noqdaan dadwaynaha Ogaadeenya.

JWXO waxay sidoo Hay’adda Laanqayrta Cas ugu baaqday inayna joojinin hawlihii samafalka ahaa ee ay ka waday dalka Ogadeenya, balse ay sii kordhiso hawlaha ay ka wado Ogadeenya, oo ay hadda boqollaal qof oo rayad ahi ku xidhxidhan yihiin magaalooyinka kala duwan. Dadkan rayadka ah ee ka buxa xabsiyada xukuumadda Itoobiya waxay aad ugu baahan yihiin kaalmada Hay’adda Laanqayrta Cas.

JWXO waxay ugu denbayntii u xaqiijisay qoysaska labadan nine e la afduubay in falkan waxshinimada ah ay ku kaceen koox yar oon sinaba uga turjumi Karin donista dadwaynaha Ogaadeenya.

Maalintii isniinta ahayd ee bisha Sebtember 18ka ahayd ayaa afduubayaal aan la garanaynin ay ka afduubteen meel 50 km dhinaca waqooyiga ka xigta magaalada Godey Donal O`Suilleabhain, oo 41 jir ah oo u dhshay dalka Irland iyo nin Itoobiyaan ah oo u shaqaynayay Hay’adda Laanqayrta Cas.

Shaqaalahan ayaa Godey iyo nawaaxigeeda ka waday hawlo samafal ah oo la xidhiidha dayactirka iyo nadiifinta Ceelasha laga cabbo ee deegaanno ka mid ah dalka Ogadeenya.

Hadaba iyada oo aanan la garaneyn cida qafaalatey shaqaalahan iyo ujeedada ay ka leeyihin, ayaa waxay hadda wararku sheegayaan in la haystayaashii xidhiidh la soo sameeyeen Hay'adda Laanqayrta Cas, isla markaana ay u sheegeen inay bad-qabaan, si fiicana loola dhaqmay, hase yeeshee ayna wax faahfaahin ah ka bixinin cidda haysata iyo waxay ka amacsan yihiin.

Falkan afduubka ah ayaa keenay in hay'adda Laanqayrta Cas ay gebi ahaanba joojiso hawlihii samafalka ahaa eey ka wadday dalka Ogaadeenya 11-kii sano ee la soo dhaafay. Laanqayrta Cas ayaa ahayd hay'adda kaliya ee samafalka ah ee hadda xilligan ka hawlgalaysay dalka Ogaadeenya, iyadoo la ogoosn yahay in xukuumadda Itoobiya horjoogsato hay'adaha aan dawliga ahayn ee isku daya inay wax u qabtaan shacabka dulman ee Ogaadeenya.

Hay’adihii Qaramada Mdoobey oo Puntand ka guuraya

Hay’adaha Qaramada Midoobey ee ka hawlgala dhulka hoos yimaada maamulka Puntland ayaa shaqaalohoodii shisheeyaha ahaa kala baxaya nawaaxiga Puntland, ka dib markii ay hay’adaha Qaramada idoobey heleen qraallo loogu digayo.

Hawl-wadeenada Hay'adahan ayaa sheegey in E-meil loogu soo diray digniino tilmaamaya in weeraro la mid ah kuwii Muqdisho iyo Baydhabo ka dhacay iyagana lala beegsan doono.

Weerarradan oo dhawaan ka kala dhacay magaaloyinka Muqdisho iyo Baydhabo waxaa midka Muqdisho lagu dilay haweenay Talyaani ah oo ka shaqayn jirtay xarunta SOS ee magaalada Muqdisho, iyo midka kale oo isaguna u muuqday in loola jeeday madaxwaynaha dawlada ku meelgaadhka ah ee Soomaaliya.

Xukuumada maamul gobolaeedka Puntland ayaa ka codsatay hay'adaha samafalka ah ee Qaramada Midoobey inay ka noqdaan go'aankooda ah inay shaqaalaha shisheeyaha ah la baxayaan, wuxuuna maamulku hay’adahan u ballanqaaday inuu ammaankooda sugayo.

Wadaxaajood u socda Maxkamadaha Soomaaliya iyo Maraykanka

Guddoomiyaha Golaha Fulinta Maxaakiimta Islaamiga ah ee Soomaaliya Sh Shariif Sh Axmed ayaa shaaca ka qaaday in dhexdhexaadin laga dhex wado Golaha Maxaakimta Islaamiga iyo dowladda Maraykanka,si loo yareeyo buu yidhi tuhunada ay dowladda Mareykanka ka qabto Golaha Maxaakiimta Islaamiga Soomaaliya.

Sh Shariif wuxuu daaha ka qaaday inuu jiro xidhiidh dedban oo iyaga iyo Maraykanka dhex maray, kaasoo ay ka dab-qaadayaan dhinacyo kale oo uu ka gaabsaday inuu shaaca ka qaado.

Sh Shariif wuxuu xusay in ulajeedada xidhiidhadan dhex maraya iyaga iyo dowladda Mareykanku ay tahay sidii dalka Soomaaliya looga horatgi lahaa faragalin ay dadyow shisheeye ahi ku sameeyaan.

Wuxuuna mar kale ku celiyay eed uu u soo jeediyay xukuumadda Itoobiya oo uu sheegay iany ku lug-ledahay qaraxyadii Isniintii ka dhacay magaalada Baydabo ee la rabay in lagu dilo madaxwaynaha dawlada ku meelgaadhka ah ee Soomaaliya C/llaahi Yuusuf Axmed.

Sh Shariif wuxuu hoosta ka xarriiqay in xukuumadda Itoobiya ay maleegayso shirqoollo ka dhan ah dadka Soomaaliya, kuwaasoo ay kaga hortagayso nabad iyo xasillooni ka dhalata dalka Soomaaliya.

22 September 2006.

Axmed Gaal-Eri

Info@radioxoriyo.com
raadioxoriyo@yahoo.com

Radio Xoriyo waxaad ka dhegaysan kartaa Mawjadda 25 MB ee dhererkeedu yahay 11865 KHZ,iyo internetka Radioxoriyo.com,Ogaden.com Maalmaha Talaadada iyo Jimcaha 7: 30PM waqtiga Afrikada Bari

Ururka SOYWA oo qabtay siminaar ku saabsan Xaquuqda

Maalintii shalay ahayd ayaa xarunta Ururka SOYWa waxaa lagu qabtay siminaar ay soo qabanqaabisay Ururka SOYWA iyadoo gacan ka heleysa Hay’adda NOVIB, waxaana ka qaybgalay ilaa iyo 20 qofood oo ka socday ururada dhallinyarada.

Siminaarkaan oo lagu baranayey cashiro la xiriira xaquuqda Haweenka ayaa waxaa cashiro ka bixinayey AVV. Sakeriye, C/llaahi Shaashaale iyo C/Naasir Yuusuf Macallin (Ganey), waxayan dhamaantood si aad ah ugu dheeraadeen tacadiyada loo gaysto Haweenka Soomaaliyeed.

Xabiibo Max’ed Guutaale oo ah madaxa tababarada Hay’adda SOYWA ayaa soo xirtay siminaarkaasi, waxayna u soo jeedisay in xubnihii ka qaybgalay siminaarkaasi ay casharadii ay halkaasi kabarteen uga faa’iideeyaan gabadha kale ee Soomaaliyeed, siminaarkaan oo socday mudo labo maalmood ayaa aheyn midkii ugu horeeyay oo uu qabto Ururkaasi

W/D; Amiin Yuusuf Khasaaro
E-Mail: amiinkhasaaro@hotmail.com

DAGMADA BALCAD OO NASIIB U YEELATEY IN LAGA FURO DUGSI SARE

Saminaar Socon Doono Mudo Sadax Cisho Ah Ayna Ka Qeyb Galeen Macalimiintii Ugu Horeysay Oo Wax Ka Dhigaya Dugsiga H/Dhexe Iyo Sare Ayaa Si Rasmi Ah Uga Furmay Xarunta Cayaaraha Kubada Teeniska Ee Dagmada Balcad ,

Saminaarkaan Oo Furitaankisii Ay Ka Qeyb Galeen Mas.Uuliyiinta Dagmada Balcad .Qaarka Mid Ah Ganacsatada .Waxgaradka .Iyo Culumaa.Udiinka Ayaa Waxaa Ugu Horeyntii Ka Hadlay Gudoomiyahay Siyaasada Xamar Iyo Xamar Daye Ahna Gudoomiyaha Dagmada Balcad Macalin Xaashi Macalin Farax , Iyo Gudoomiyaha Maxkamada Islaamiga Ah Ee Dagmada Balcad Sh : Cali Sh: Maxamuud Shuuriye .Gudoomiye Ku Xigenka Dagmada Balcad Abuukar Adan Celi .Ugaaska Dagmada Balcad Ugaas Maxmuud Weli Ugaas Xuseen .Nabadoon Tahliil Axmed Ceynte .Iyo Ganacsade Maxaaday Cali Waranle Iyo Mas.Uuliyiin Kale Iyaga Oo Si Faahfaahsan Uga Hadlay Baahida Loo Qabo In Dib Loo Yagleelo Hanaankii Waxbarasho Ee Dagmada Balcad Oo Xaalada Murugaleh Ku Jiray Mudo Lix Iyo Toban Sano Ah Iyo Baahida Ay U Qabaan Dadka Ku Dhaqan Dadka Degan Balcad Dhinaca Waxbarasgada Iyaga O Xusay In Dagmada Balcad Ay Haatan Fursad Qaali Ah U Heshey In Ay Ka Bilowdaan Howlihii Waxbarasha Aasaasiga Ahaa Ka Dib Markii Maamulka Dagmada Balcad Iyo Dadweynaha Oo Kaashanaya Jaaliyadaha Somaliyeed Ee Ku Abtisada Dagmada Balcad Ay Iska Kashadeen In Ay Dib U Distaan Una Dayactirteen Goobihii Waxbarashada ,Maantana Ay Tahay In Macalimiintii Ugu Horeysay Ee Wax Ka Dhigi Laehyd Dugsiga H/Dhexe Iyo Sare Ee Dagmada Balcad Loo Furo Saminaarkii Ugu Horeeyey Oo Ay Ka Qeyb Galaan 12 Macalin Waxyna Ka Codsadeen In Ay Ka Faaiidaystaan Mudada Uu Saminaarkaan Socdo Iyaga Oo Si Gaara Ugu Mahadceliyey Qaarka Mid Ah Jaaliyadahaas Oo Ay Ka Mid Yihiin Yasiin Maxi Iyo Abuukar Cali Geedi Oo Iyagu Si Gaara Isaga Xil Saaray In Uu Najaxo Dugsiga H/Dhexe Iyo Sare Ee Dagmada Balcad ,

Mas.Uuliyintaas Oo Ka Hadashay Furitaanka Saminaarkaas Oo Uu Ka Mid Ahaa Macalin Xaashi Maxamed Faarax Ayaa Ugu Baaqay Jaaliyadaha Ku Dhaqan Dalka Dibadiisa Ee Ka Soo Jeeda Deegaanka Balcad Iyo Nawaaxigiisa Iyaga Oo Ka Faaiidaysanaayo Nabada Haatan Ka Jirta Dalka Gar Ahaan Tan Balcad In Ay Dalkooda Iyo Deegaanadooda Ay Maalgashadaan Una Abuuraan Fursado Shaqo Iyo Kuwo Waxbarasho Sida Haatanba Ay Talaabad Koowaad Ay U Qaadeen Ayna Ku Ekaan Oo Keliye Waxbarashada Ee Ay Xooga Saaraan Dhinacyada Kale Ee Cafimaadka .Ganacsiga Wax Oosaarka Warshadaha .Xoolaha Yo Beeraha ,

Gudoomiyahay Maxkamada Islamka Ah Ee Dagmada Balcad Sh: Cali Sh: Maxamuud Shuuriye Ayaa Isne Ku Dheeraaday Faaiidada Waxbarasgada Iyo In Aysan Iku Mid Aheyn Ruuxa Waxyaqaan Iyo Ruxa Aan Waxba Aqoon Uuna Ku Guubaabiyey Macalimiinta Uu Siminaarku U Furmay Xiliga Duruustu Ay Socoto ,

Munaasibadaas Oo Aheyd Mid Si Wanaagsan Loo Soo Agasimay Ayaa Waxaa Lagu Wadaa In Maalinta Bei Ah Loo Soo Gabagabeeyo Macalimiintaas Iyada Oo Todobaadka Soo Socdana Lagu Wado In La Furo Dugisga H/Dhexe Ee Dagmada Balcad

Muuse Maxamuud Jiisow
musejisow@hotmail.com
Muqdisho Somalia
0025215766663/002521653623

Safaaradda Liibiya ee Soomaaliya oo qabatey xuska Sanad guurada 37 aad ee kaacaanka Liibiya

Waxaa habeenkii xalay ahaa hotel shaamow ee Magaaladda Muqdisho lagu qabtay Xaflad si heer sara ah loo soo agaasimay waxaana lagu xusayey sanad-Guuradii 37aad ay ka soo wareegtay kacaankii Liibiya,waana markii uu xukun la wareegay Hogaamiyaha Liibiya Macamaral-Qadaafi waxaana ka qaybgalay Mas’uuliyiin ka socotay Maxkamadaha Islaamiga ah, Aqoonyahanno, iyo marti sharaf kale, waxaana ugu horreeyntii halkaas warbixin ka soo jeediyey safiirka Liibiya ee Soomaaliya Mudane Idiris wuxuuna sheegay in Shacabka Liibiya iyo Shacabka Soomaaliya uu ka dhaxeeyo xiriir soo jireen ah waxa uu sheegay in Dowlada Liibiya ay gargaar balaaran siisay Shacabka Soomaaliya gaar ahaan waqtigii ay socdeen dagaalada sokeeye, Mudane Idiris waxa uu sheegay in Dowlada Liibiya ay weli diyaar u tahay in ay sii wado gacansiinta Shacabka Soomaaliyeed.

Mudane Idirs wuxuu sheegay in Hogaamiyaha Liibiya uu haatan wado sidii afrika isugu keeni lahaa oo ay u yeelan lahayd, Gole Baarlamaan,Ciidamo qura, lacag kaliya , Baasaboor kaliya, wuxuuna sheegay in Hogaamiyayaasha Afriga ay si aad ula dhacsanyihiin qorshayaas uu wado Hogaamiyaha Liibiya.

Wax kaloo halkaaas ka hadlay Dr. Max’ed Cali Ibraahim oo ku hadlay magaca Maxkamadaha Islaamiga waxa uuna sheegay in Dowlada Liibiya ay waligeed garab taagneyd Shacabka Soomaaliyeed asagoo sheegay Dowlada Liibiya ay tahay Dowlada kaliya ee safaaradeedu ka furan tahay Soomaaliya xilli ay Shacabka Soomaaliyeed ay ku jireen dagaalo sokeeye, waana mid Mahadeedu uu leeyahay Hogaamiyaha Liibiya, waxaa kalo ka hadlay Shiikh Axmed dhicisow oo ku hadlayey Magaca Culuma’uddiinka Soomaaliyeed wuxuuna sheegay in Dowladaha Liibiya iyo Suudaan ay ahaayeen kuwa kaliya waligood garab taagnaa Shacabka Soomaaliyeed, xilli ay ummadda Soomaaliyeed ay ku jirtay dhibaato.

Sidoo kale waxaa ka hadlay Dr. Maxamed dheere uu ku hadalyey magaca aqoonyahannada Soomaaliyeed wuxuu sheegay in Dowlada Liibiya aysan horay u helin dad la macaamilooda balse maanta wuxuu sheegay in ay heystaan dad ay la Macaamili karaan asagoo ula jeeday Maxkamadaha Islaamiga ah. Ugu dambeyntii waxa Toortihii xuska si wada jir ah u wada jary Shiikh Yuusuf Max’ed siyaad indhacadde, Safiirka Liibiya Mudane idiris, iyo Dr. Max’ed Cali ibraahiim, waxayna xafladaasi ku dhamaatay sidii loogu talagalay.

W/D; Amiin Yuusuf Khasaaro
E-Mail: amiinkhasaaro@hotmail.com