Wajigii
labaad ee dhismaha Runway-ga Garoonka Diyaaradaha Muqdisho oo furmay.
W/D; Amiin Yuusuf Khasaaro
E-Mail:
amiinkhasaaro@hotmail.com
Maalintii shalaya ahayd ayaa waxa dib u furmay
wajigii labaad ee Dayactirka Garoonka Diyaaradaha Muqdisho gaar ahaan Wadada ay
ku cararaan Diyaaradaha ee Runway-ga, kaas oo ay dhibaato ka soo gaartay
Dagaaladii sokeeye ee mudada 16-ka sano ah ka jiray Dalka.
Shirkadda gacan ka gaysaneysa dhismahaasi oo
lagu magacaabo Midowga Shirkadaha Qalabka Culus ayaa mar uu warbixin siinayey
Guddoomiyaha Shirkaddaasi Muxiyadiin Max’ed Cali ayaa waxa uu sheegay in Wajigii
koowaad ee dayactirka Wadada Garoonka la soo gebagabeeyay, maanta uu dib u
furmay wajigii labaad, isagoo sheegay in waqti dhow la soo gebagabeyn doono
wajigaasi.
Muxiyadiin Waxa uu sheegay in Runway-ga ay
dhibaato ka soo gaartay Mowjadaha Badda iyo waliba iyadoo laga bixiyey Caro
Kaabo oo boholo waaweyn ay halkaasi ka qodmeen, waxa uuna sheegay in ay duugista
godadkaasi caro iyo shamiito xoogan iyo waliba dhagxaan si ay uga difaacaan
Mowjadaha Badda, waxaa kalloo uu sheegay labada dhinac ee Runway-ga ay iyana
dayactir ku sameynayaan.
Waxaa arkeysaa Gawaari fara badan iyo
Baldoosaro ka shaqaynaya Garoonka, kuwaas oo is dib-dhaafayey, sidoo kale waxa
ka hawlgalayey shaqaale fara badan oo isugu jiray Rag iyo Dumar, waxa kalle oo
Garoonka dib loo dayactirayaa xafiisyadii uu garoonku lahaan jiray, kuwaas oo ku
burburay dagaaladii sokeeye, waxaana ka qayb-qaadanaya Shirkadaha Diyaaradaha ee
ka soo dega Garoonkaasi.
Garoonka oo aad u mashquulsanaa ayaa waxaa
maalintii ka soo dega 7-8 diyaaradood, waxaana markaad u socotid garoonka aad
mareysaa labo Koontarool oo labadaba si aad ah laguugu baarayo, waxaana haatan
agagaarkiisa ka socda dhaqdhaqaaqyo iyo ganacsi aad u baaxad weyn, waxaana la
filayaa in waqtiyada dhow ay dib u soo laabato bilicsamidii garoonka Diyaaradaha
ee Magaalada Muqdisho.
Daabaco
Boggan | Print
Cali
Maxamuud Xiirane 