Daabaco Boggan | Print

Baydhabo: Dagaal ma Fadaannaw

"Nabad baa macaan lehe haddaan odayo muuneynin …
Waa murugee wahe yaa u maqan magaci Soomaali ?"
(Inj. Cibaar. Murugo)

A. M. Yusuf | wayeel@operamail.com

CAANO IYO NABAD

Waa arrin la wada og yahay in dhibaato kasta aan ay u dhicin uun si ay waxyeellooyin u geysato. Dhacdadii gegida Baydhabo ma ahayn wax loo riyaaqi karay. Intii naga dhimatay, sidii qaarkii hore ba, Eebbe ha u wada naxariisto. Aamiin. Haddii se maanta nin xildhibaan ah uu ku gooddiyay in dowladii kumeelgaarka ahayd ay iskaga guurto caasimaddii kumeelgaarka ahayd, waxay iila tahay: "Mudane Madaxweyne: Qaado sharafta oo ka deg garoonka caalamiga ee Muqdhisho u tag madaxda maxkamadaha tus adduunka in aan heshiin karno …" (Maxamud N. Wardere. Wadahadalka dawladda iyo maxkamadaha ee Khartuum: Qadirkow ka dhig mid najaxa (nabad iyo caano). Dhaaxa la sugayay in ay soo dagato abdadan oo kale.

Shacabka reer Baydhabo waxa ka codsan lahaa in ay ka hortagaan wixii dhasheenna dili lahaa; dhulkeenna na dumin lahaa. Looma baahna colaad dambe ee gadaal inoogu celisa dhibaatooyinkii aan ka soo kabannay. Ma rajeynayo in dhiig dambe ee Soomaaliyeed lagu qubo, Baydhabo, caasimadda rajadii Soomaaliya.

Waayihii dagaaloogenimadu way dhamaadeen! Miyaan moog nahay Midowga Maxaakiimtu in uu cafis u fidiyay raggii nabadda Soomaaliya hortaggnaa 16kii sano ee la soo dhaafay! Sidaas oo kale, miyaan moog nahay dowladda FKMG ah na in ay soo dhoweysay dagaaloogeyaashii weydiistay cafiska ummaddooda, tusaale ahaan Md Maxamed Qanyare! Waqtigii caloolkuhaynta, ha naga haro! Wisinkii walaalnimada iyo heshiisyada ayaa bilowday—in aan uu hakad gelin ayaan Ilaahay ka tuugyaa.

Guudka xildhibaannada Soomaaliyeed waxa aan ka codsan lahaa in ay dadaalkooda labajibbaaraan, nabadda la helnay na aan la baylihin. Adinka qudhiinna maad tagtaan Xamar! Wararka buktada abuuri kara, ama dagaal aloosi kara na, ha laga waantoobo. Dal shisheeye intii aan ku heshiin lahayn, u hawgala sidii aan kayaga ugu heshiin lahayn: iskeenna u heshiin lahayn, aayaha iyo dhaxalka ilmaheenna awgood ugu heshiin lahayn—in aan nahay dad qab leh oo qaran ah, in aan nahay shacab iyo madax isjecel dunida u muujiya!

Si gaar ah ayaan Md Xaabsade uga codsan lahaa in uu ka noqdo handadaaddii uu adduunka mariyay. Qardoofooyin way dhici karaan. Aadkeeda se, miyay habboon tahay in qofkii doono uu xeerka gacantiisa ku fuliyo? Waa mayaa! Mee xeerkii adiga kaa dhigay xildhibaanka qaranka? Ma maleeshiyada joogtay gegiga Baydhabo uun ayaad u ahayd xildhibaaan mise shacabka Soomaaliyeed oo idil? Naga raalligeli qadafkii aad ku hadashay! Dabadeed, wixii gef ah oo aad tirsanayso horgee Maxkamadda Qaranka. Wax sidaas u fudud, ha ka dhigin culeys aad u weyn. Ka fiirso, Md Maxamed Ibraahim: wixii taariikh wanaagsan buugga kuu gelin karayo, iyo wixii taariikh ba'day buugga kuu gelin doono. Hore ayaan u socnaaye, gadaal ha inoo celin!

Ugu dambeyntii, Soomaalida meel kasta oo ay joogaan waxa aan ka codsan lahaa in ay gacan ka geystaan nabad ka dhalatay koofurta Soomaaliya. Raggii iyo haweenkii u soo halgamay na, ha ka sii wadeen halkeedii. Inshaa'Allaah waynu guulaysan.

Soomaaliya ha noolaato!

A. M. Yusuf | wayeel@operamail.com

Afeef: Aragtida qoraalkan waxaa leh qoraaga ku saxiixan

Faafin: SomaliTalk.com | Sept 10, 2006

Qaar ka mid ah ardayda dugsiyada Gobolka Banaadir oo ka qeyb qaatay nadaafadda gobolka..

Waxaa maalintii shalay aheyd, qaar ka mid ah ardayda dugsiyada gobolka Banaadir ay ka qeyb qaateen ololihii nadaafadda ee ka socday magaalada Muqdisho, waxaana shalay isugu soo baxay arday tira badan oo isugu jira wiilal iyo gabdho, oo ka kala socday dugsiyada Al-Fajri iyo Kulmiye, wuxuuna bartilmaalmeedkooda dhinac nadaafada uu ahaa inta u dhaxeysa Golihii Murtida iyo Madaadalada ee Tiyaatarkii Qaranka iyo deegaanka Eeneeya oo ka tirsan degmada Xamarweyne, sidoo kale, waxey ardaydaasi nadaafadda ka fuliyeen gurigii hooyooyinka, Carwadii hore ee Ex-Fiyoore iyo jidadka gala Ceelgaab.

Aradayda oo ay ka muuqatay xamaasad iyo waddaninimo ayaa si aad ah uga qeyb qaatay nadaafaddaasi, waxaana soo abaabulay Midowga Ardayda Gobolka Banaadir, oo uu horkacayey C/naasir Max’ed Sheekh Nuur, wuxuuna sheegay mar aan wareysaney in todobaad kasta maalinta Khamiista ay joogto noqon doonto, isagoo sheegay iney soo bilaabeen 24-kii bishii August isagoo sheegay in meelo badan oo ka tirsan gobolka Banaadir ay ka fuliyeen hawlaha nadaafadda.

Sidoo kale, waxaan la kulanay Macalin Xasan Sheekh C/llaahi, wuxuuna sheegay in ardaydu ay yihiin kuwo iskood isku soo abaabulay isla markaana aad ugu xiisa qaba iney wax u qabtaan waddankooda.

Xalwo, Max’ed Faarax oo ka mid ah ardayda dugsiyada ee ka qeybqaatay ololaha nadaafadda ayaa waxey tiri, “Waalidiinteena ayaa nooga sheekeyn jiray wax la yiraahdo Iskaa wax u qabso, anagana ubadkeena ayaan uga sheekeyn doonaa hawshan nadaafadeed”.

Gobolka Banaadir ayaa haatan waxaa dib u soo laabatay bilicsamidiisii dhinaca nadaafadda, hase ahaatee, su’aasha isweydiinta mudani waxey tahay magaalo ay dagan yihiin ilaa iyo laba malyan oo qof, waxa ay maalin waliba soo ka yimaada qashin fara badan, waxaa loo baahan yahay in qashinkaasi la maareeyo, oo meel loo yeelo.