Yirma waa saddex alifle ka tirsan ciidamada Itoobiya, wuxuu weligii ku haminayey sidii uu Soomaaliya ku tegi lahaa, wuxuu aruursadaa mushaar aad u yar oo uu ku qaato ciidannimada, dhawr jeer ayuu farta qaniinay markii la yiri, “Waxaad galeysaa Soomaaliya” hase ahaatee, taasi ma noqon oo waxaa la keenay xuduudda Soomaaliya iyo Itoobiya, haddana, dib ayaa loo celiyey, wuxuu habeen walba ku duceystaa sidii uu Soomaaliya ku tegi lahaa.

“Dhawr jeer kama qaadan ciidamada wax mushaar ah, oo saddexdii biloodba mar ayaa na loo soo tuuraa, naguma filna aniga iyo xaaskeyga mushaarkaasi” ayuu yiri Yirma, oo mar kasta Illaah ka barya sidii uu ku tegi lahaa Soomaaliya.

Maalin isagoo feyl ku jira oo wata Gaaweeto, ayaa waxaa loo sheegay in Beri loo qaadayo Soomaaliya, Yirma inta farxay ayuu Gaaweetadii faaruqa aheyd, iska tuuray oo labis isku taagey, isagoo isu diyaariyey tegista Soomaaliya, wuxuu yiraahdaa Illaahayow run ka dhig markan, markiiba waxaa lagu soo wargeliyey in la baaqday, inta buste isku duuduubay ayuu galay fikir dheer, markaasuu yiri, “War Saraakiisheenu miyaaney Qawl laheyn?”.

Yirma wuxuu ka dhashay qoys sabool ah, mar baa loo qaaday dhinaca xuduudda Erateriya iyo Itoobiya, wuxuu yiri, “Waa markii iigu murugada badneyd ee i soo marta, markii aan lix bilood soo joogay ayaa dib la igu soo celiyey xuduudda Soomaaliya iyo Itoobiya.

Yirma, ayaa isaga oo maalin tababar qaadanaya, ayaa markii uu tababarka dhameystay waxaa uu la sheekeystay nin saaxiibkii ah, oo lagu magacaabo Girma, wuxuu ku yiri, “Yirma, War ninyahow maalmahan waad fikireysay ee maxaa kugu dhacay, dhawr jeer ayaan ku arkay adigoo Gaaweeto wata oo isku mashquulsan sidey wax u jiraan?” “War ninyahow waxaan nacay shaqada ciidannimada” ayuu ku jawaabay Yirma, isagoo ka shakisan oo is yiri, armuu ku sheegaa, ayaa si hoose wuxuu ugu yiri, “Beeshee ayaad tahay?” Markaas ayuu ku jawaabay Girma Waxaan ahay Amxaaro , “Aad ayaan u farxay oo anigaba waxaan ahay Amxaaro”.

Isagoo sheekadiisii sii wata ayuu ka dhex galay Girma wuxuuna weydiiyey, “Oo hadda maxaad dooneysaa?” wuxuu ku jawaabay Yirma, “Waxaan raadinayaa fursad aan ku tegi lahaa Soomaaliya” Markaasuu yiri, “War ninyahow anigaba fursaddaasi waan raadiyey balse waxaa iigu dhaweyd mar guuto aan la socday la geeyey deegaanka Beledxaawo, markaan laba maalmood ku sugneyn ayaa dib na loo soo celiyey, ee ninyahow sidee ayaan fursaddan ku helnaa?” markaasuu ku yiri“Ma dhageysan miyaa idaacadaha caalamka?” ayuu weydiiyey Yirma, wuxuuna Girma ku jawaabay, “Maya” “Ma ogid miyaa in Soomaaliya loo qaadayo toban kun oo askari” markaasuu yiri “Illaahayow igu dar kuwaasi” ayuu si farxad leh ula qeyliyey Girma, isagoo sii daba dhigay, “Waxaan ka baqayaa in tobanka kunba ay gooyaan, oo fursaddaas ay ka wada faa’ideystaan, wuxuuna raaciyey Illaahayow run ka dhig... Illaahayow run ka dhig.

Yirma wuxuu arkay rag saaxiibadii ah oo ay ciidamada ka wada tirsanaayeen oo iyagoo jooga dhulka Soomaali Galbeed u baxsaday dhinaca Soomaaliya, wayna ka sii tahriibeen, mar ayey la soo xiriireen saaxiibadii, waxeyna ku yiraahdeen waxaan helnay shaqo aad u wanaagsan oo ka fiican tii askarinimada, wuu is ciilkaambiyey, wuxuu ku sigtay inuu nafta iska qaado,

Ismaaciil, waa askari isna ka tirsan ciidamada Itoobiya, kana soo jeeda Soomaali mar ay wada kulmeen Girma iyo Yirma, ayaa waxey isla soo qaadeen arrimaha tegista Soomaaliya wuxuuna Ismaaciil ka yiri, “Waxaan idin sheegayaa markii aan tagno Soomaaliya, aniga ayaa idin fududeyn doona, si aad ciidamada uga baxsataan oo aad ugu sii tahriibtaan, waddamada Carbeed, walibana waxaan idinka dhoofinayaa dekedda weyn ee caalamiga ah ee Muqdisho”, inta farxeen ayeyba isku qaateen iney joogaan Soomaaliya, labadoodi ayaa waxey la soo boodeen, Haddii aan tagno Soomaaliya waxey la mid tahay, ama nooga dhigan tahay fursad Yurub ah, wuxuu Ismaaciil sii raaciyey, “Waxaad meel kasta oo ka mid ah Soomaaliya ka heleysaan deked aad ka tahriibtaan, oo weliba waxaad ka heleysaan doomo idin geeya waddamo kale, “Wallee war farxad leh ayaad noo sheegtay, haddii aan ka daba tagno saaxiibadeen oo horey uga baxsaday noloshaan liidata waan ka bixi laheyn” waxey hadalkooda ku soo gabagabeeyeen Illaahayow Soomaaliya... Ilaahayow Soomaaliya... Ilaahayow Soomaaliya!!!