::: SomaliTalk.com :::

Daabaco Boggan | Print

Ciise Dholawaa oo Waraysi dheer la yeeshay Maxamed Yaasiin Ismaaciil:.. Qaybtii koowaad ee Waraysiga... Guji...

Baaritaankaas jariidada waxaa ka dambeeyey in European Green Party ay warbaahinta u soo bandhigeen isla mar ahaantaasna ay baarlamaanka Yurub u gudbiyeen nuqullo kamid ah heshiis ay kala saxiixdeen labadaas shirkadood iyo nin matalayey "madaxweynihii maamulkii Muqdisho markaas" Cali Mahdi Maxamed, heshiiskaas oo ahaa in Soomaaliya lagu duugo sun [toxic waste] miisaankeedu dhan yahay 10 million tonnes, taas oo looga beedeshey $80 million oo doolar.

Ilaa xilligaas wixii ka dambeeyey Cali Mahdi waxa uu diidanaa in uu arintaas ka hadlo, in kasta oo baarlamaanka Talyaanigu baaritaan dambe oo uu sameeyey uu ku cadeeyey in heshiiskaasi dhacay.
http://www.somalitalk.com/sun/

Ra’isul Wasaare Geeddi “Wadaad Xume Hore ayuu tilmaamay Siyaad Barre, maantana...

Siminaar socday mudo 14 Maalmood oo kor loogu qaadayey aqoonta Garsoorayaasha Soomaaliyeed ayna ka faa’iidaysanayeen xubno garsooreyaal oo ka kala socday Maamul Goboleedka Punt-land, Muqdisho, Shabeelaha Hoose iyo Degmooyinka hoos yimaada Gobolka Baay ayaa gebagebadiis Raysul Wasaare Geedi khudbad taabanaysay dhinacyo kala duwan ka jeediyey.

Siminaarkaan oo ahaa kii labaad ee ay soo qaban qaabiyeen Gudoonka sare Maxkamada DFKMG iyo xubno aqoon durugsan u leh casharada ay bixinayeen oo ka tirsan isla maxkamada sare ayaa ugu horeyn waxaa hadalo kooban ka jeediyey Gudoomiyaha Maxkamada sare ee DFKMG Avv; Yuusuf Cali Haaruun wuxuuna ka warbixiyey casharadii ay qaateen oo isugu jiray Dumintii Sharciga, Shareecada Islaamka, Nidaamka Garsoorka, Isbar bardhig Shareecada Islaamka iyo Qaanuunka Ciqaabta, Shuruudaha xulashada Garsoorka, Xeerka Ciqaabta iyo Xuquuqda Haweenka oo gebagebadii si rasmi ah looga dooday.

Raysul wasaare Geedi oo la hadlayey xunihii garsoorayaasha waxaa uu hadalkiisa ku bilaabay “ Gudoomiyaha ayaa ila socodsiinayey hawlaha Siminaarka, mana filayn in Garsoor Soomaaliyeed oo intaan la eg ay joogaan dalka, waxaadna ogaataan inuu Axdiga ku qoran yahay garsoor madax banaan oo aan la caburin karin , mana jiridoonto in Wareegto madaxweyne lagu kala bedeli doono, waxaanu joognaa xiligii la unkaayey Soomaaliya, cadow badan oo dibada iyo gudahana waa uu jiraa, taasina waxaan ku wajahaynaa sidii looga gudbi lahaa inagoo kaashanayna shacabka Soomaaliyeed, ayuu yiri Raysul Wasaare Geedi isagoo hadalka siiwata waxaana uu intaa ku daray“waad og-tihiin inaga iyo kooxda aan is hayno, waxaa maalmahaan badatay in caalamka laga gedo inay nabad keeneen, waxaana u sheegaynaa in badeecad shati la’aan ah la gadikarin, waxay keeneen waxaan u aragnaa Xizbi Shaati Qabiil soo gashtay, shacabka hore uma ogayn dhibaatada ay u keeneen laakiin hada ayey ogaadeen” ayuu yiri Raysul Wasaare Geedi.

Raysul Wasaare Geedi waxaa kale oo uu soo hadal qaaday inuu hore u tilmaamay Madaxweyne Maxamed Siyaad Barre markii uu xukunka hayey kaasoo ahaa Wadaad Xumo, laakiin markii uu sheegay lama fahmaynin ayuu yiri waayo “wadaad xumo waa kan deriskiis iyo qaraabadiisa ay baahan yihiin, isagana dheregsan, kaasina wadaad ma ahan”.

Mar uu ka hadlaayey arimaha garsoorka waxaa yiri “ Garsoorku waa Tiirka aan ku tashanayno, waana hadafka dowlada, walina si hagaagsan uma dhaqaajin oo waxaa inoo buuxa xabsiyada, iyadoo sababo kala duwan ay inoogu xaniban yihiin dhaqaajinta garsoorka”. Sidoo kale Raysul Wasaaruhu wuxuu ka hadlay arimaha haweenka iyo xuquuqdooda wuxuuna sheegay inuu xuquuqdooda ilaalindoono, laakiin wuxuu yiri “waxaa soo baxay gabdho aad u dheereeya”, waxaa warkaan noo soo diray Weriyaheena Max’ed Macallin (Allman).

Madaxweyne C/llaalhi Yuusuf Axmed oo si dhaqsi leh ugu ambabaxay Dalka Itoobiya ayaa xalay la kulmay Ra’isul Wasaaraha Dalka Itoobiya Miles Sanawi waxaana kulankaasi la iskula soo qaaday sidii Dowladda Itoobiya ay gacan u siin laheyd Dowladda Federaalka ah.

Madaxweyne C/llaahi Yuusuf Axmed ayaa ka codsaday Dowladda Itoobiya sidii ay ciidamo ugu soo diri lahayd Gudaha Dalka Soomaaliya, si looga hortago waxa ugu yeeray kooxo argagixiso ah oo ku sugan gudaha Dalka Soomaaliya, kuwaas oo uu sheegay inay caqabad ku yihiin nabadgelyada wadamada geeska Afrika.

Madaxweyne C/llaahi Yuusuf Axmed, wuxuu kalloo Dowladda Itoobiya ka codsaday saanad milatari oo looga hortago is balaarinta Maxaakiimta islaamiga ah.

Maanta ayaa la filayaa in Madaxweynuhu uu kulan la yeesho Madaxda Golaha Ammaanka iyo Nabadgelyada Qaaradda Afrika oo uu ka codsan doono in ay Soomaaliya u soo diraan ciidamo nabad ilaalin ah oo ka socda Wadamada Geeska Afrika, sidoo kale waxaa la filayaa in uu u soo jeediyo in ay dadaal u galaan sidii cunaqabateynta hubka looga qaadi lahaa Soomaaliya si ay u fududaato in ciidamo soo galaan Soomaaliya.

Culima’udiinka Bay iyo Bakool oo u hanjabay Dowladda Federaalka

Wararka naga soo gaaraya Magaalada Baydhabo waxay sheegayaan in Culuma’u-diin ka tirsan Gobalada Bay iyo Bakool ay soo saareen qoraal ay Dowladda uga digayaan in ay Soomaaliya soo geliyaan ciidamo Itoobiyaan ah.

“haddii mar kale aan ku aragno deegaanadeena ciidamo Itoobiyaan ah waanu la jihaadeynaa” ayaa lagu yiri Qoraalkaasi oo Dowladda Federaalka ah looga dalbaday inay si dhaqsi leh ku sii daayaan culima’udiinka u xir xiran ee ka soo jeeda Gobalada Bay iyo Bakool.

“Dadweynaha Bay iyo Bakool si wanaagsan ayey u soo dhaweeyeen Dowladda, mana ahan in loogu bedelo xarig iyo caga-jugleyn” ayaa lagu yiri qoraalkaasi oo u soo jeediyey dadweynaha gobalada Bay iyo Bakool in ay ka digtoonaadaan kala qaybinta lala doonayo in Gobalada Bay iyo Bakool lagu soo geliyo Ciidamo Itoobiyaan ah oo la doonayo in lagu dhibaateeyo dadka Soomaaliyeed ee mudada 16-ka sano ah Dowlad la’aanta ahaa.

Waaxda Warfaafinta Maxaakiimta iyo Bahda Saxaafadda oo kulan wada yeeshay..

Waaxda War-faafinta iyo Dacwada Maxkamadaha Islaamiga ah iyo xubno ka socday Qaybaha kala duwan ee Warbaahinta Soomaaliyeed ayaa shalay kulan ku wada yeeshay xarunta Golaha Maxkamadaha Islaamiga ah ee Magaalada Muqdisho, waxaana kulankaasi la iskula afgartay in mudo loo ogolaado Bahda Saxaafadda si ay uga soo baaraandegaanq 13 qodob oo dhawaan waaxda warfaafinta ee Maxaakiimta Islaamiga ah u soo badhigeen Bahda Saxaafadda.

Sheekh C/raxiim oo ay shir jaraa’id wada qabteen C/qaadir Walaayo oo wakiil ka ahaa bahda warbaahinta ayaa sheegay in ay aqbaleen codsi ay u soo gudbiyeen wakiilada bahda warbaahinta Soomaaliyeed oo la xiriirtay in ay ka soo tashadaan 13kaasi qodob ee ka soo baxay golaha maxkamadaha islaamiga oo loogu tala galay in ay talo ka dhiibtaan masuuliyiinta warbaahinta. Sheekh C/raxiim Cali Muuday ayaa isagu sheegay in ay aqbaleen in Hay’adaha Warbaahinta fursad loo siiyo ka tashiga qodobaasi, isla markaana ay soo bandhigaan wixii ay dhaliilsan yihiin, maadaama uu yiri aysan go’aan kama dambeys ah, isagoo sheegay in wixii ay Bahda Saxaafaddu la imaadaan ay horgeyn doonaan Golaha fulinta ee Maxaakiimta Islaamiga ah, kaddibna loo gudbin doono golaha Shuurada, waxa uuna Sheekh C/raxiim beeniyay eedeymo horey uga soo baxay ururka Saxafiyiinta aan Xuduuda laheyn ee fadhiguusu yahay magaalada Paris ee dalka France.

Ra’isul Wasaare Geeddi oo maanta la filayo in uu Diinsoor kula kulmo Barre Hiiraale..

Warar hoose oo aan ka helnay Baydhabo ayaa waxay sheegayaan in Ra’isul Wasaare Cali Max’ed Geeddi maanta la filayo in uu gaaro degmada Diinsoor oo ka tirsan gobalka Bay.

Sababaha uu Ra’isul Wasaruhu halkaasi u tagayo ayaa lagu sheegay labo waxyaabood oo midda hore lagu sheegay inay tahay dhameynta khilaaf sababay in uu dib u dhac ku yimaado maamul u sameyntii gobalada Bay iyo Bakool, sidoo kale warar ayaa waxay sheegayaan in Ra’isul Wasaaraha uu degmadaasi kula kulmi doono wasiirka Gaashaandhiga Barre Hiiraale oo isagu waayadan Ciidamo ku uruurinayey deegaano ka tirsan Gobalka Gedo, iyadoo qaar ka mid ah maleeshiyadiisuna ay gaareen Magaalada Saakow oo ka tirsan Gobalka J/dhexe, waxaana la sheegay in Ra’isul Wasaaraha iyo Wasiirka Gaashaandhiga halkaasi ku kala war-qaadan doonaan.

Dhawaan ayaa Dowladda Federaalka waxa ay taakuleyn ciidan siisay Barre Hiiraale si uu duulaan rogaal celis ah ugu qaado Magaalada Kismaayo ee gobalka J/hoose oo dhawaan maleeshiyadiisu ay isaga soo carareen kaddib markii ay halkaasi gaaren ciidamo ka tirsan Golaha Maxaakiimta Islaamiga Soomaaliyeed.

Sheekh C/raxiim Muudey oo ka warbixiyey la wareegida Maxaakiimtu ay la wareegeen Idaacaddii Afrikada Bari...

C/raxiim Cali Muudey oo ah madaxa Dacwada iyo Warfaafinta Maxaakiimta Islaamiga ayaa waxa uu faahfaahin ka bixiyey sababihii ay Maxaakiimtu u xiraan idaacadda Afrika Bari, oo uu lahaa Bashiir Raage Shiiraar oo isagu ka mid ahaa raggii aasaasay isbahaysigii Burburay ee argagixiso la dirirka isku magacaabay ee dagaalka la galay Midowga Maxaakiimta Islaamiga ah, waxa uuna sheegay Sheekh C/raxiim in idaacaddaasi ay baahineysay war aan wanaagsaneyn oo wax u dhimi kara nabadgelyada ka dhalatay Magaalada Muqdisho.

Sheekh C/raxiim ayaa sheegay in sababaha ay idaacaddaasi ay u xireen ay tahay in ay baahin jirtay warar been abuur ah oo iska horkeenaya ummadda Soomaaliyeed, isagoo tilmaamay in wararka ay baahin jirtay ay yihiin xaqaa’iqa ka dheer, sidoo kale waxa uu sheegay Sheekhu in maamulkii hore idaacaddaasi horey looga cirdeeyay oo loo dhiibay maamul aan waxba kala hubsan isla markaana waxay rabto sheegta.

Hay’adda Danwadaag Relief & Development Organization oo Deeq gaarsiiyey Dad soo barakacay oo ku jira Xerada Boqol-ka Buush ee Boosaaso..
Updated | Oct 16, 2006

Hay’adda Danwadaag Relief & Development Organization ayaa waxa ay deeq gaarsiisay dad soo barakacay oo ku jira xerada 100-ka Buusha ee Magaalada Boosaaso ee Maamul Gobaleedka Puntland.Hay’adda gaarsiisay deeqdaan dadkaas soo barakacay ayaa fadhigeedu waxa uu yahay dalka Ingiriiska gaar ahaan Magaalada Leicester City, waxaana deeqdaan guddoonsiiyay wakiilka Hay’addaasi ee Soomaaliya Maxamuud Max’ed Xaaji, waxaana ka Guddoomay Odoyaal ku jiray xeradaasi oo uu horkacayey Xaaji Siciid Cabdalla, sidoo kale Deeq waxbarasho oo isugu jirta Buugaag iyo Qalamaan ayaa la gudoonsiiyey arday ku jirtay Dugsiyo ku yaala Magaalooyinka Gaalkacyo iyo Bacaadweyn, sidoo kale Hay’adda Danwadaag waxay Barnaamij lagu afurinayo dadka Masaakiinta ah ka bilowday Xerooyin ay ku jiraan dadka soo barakacay ee Magaalada Muqdisho, ma ahan markii ugu horeysay oo ay deeq noocaan oo kale ah gaarsiiso dadkaas

Qof ka mid ah dadkii helay Deeqdaas ayaa yiri” Waxay noogu soo beegantay waqti aan u baahanay” Hayadaan oo ah Hayadii ugu horeysey oo Deeq intaa la eg gaarsiisey Gobolo ka tirsan dadka oo ay ku sugan yihiin dad dhibaateysan ayaa masuuliyiintooda waxay noo sheegeen in ay sii balaarin doonaan Deeqdan isla markaana ay gaarsiin doonaan Gobolada dalka

Haydan oo ah Hay’ad ay leeyihiin dad soomaali ah ayaa waxay kaloo noo sheegeen in ay ka qayb qaadan doonaan Dhinaca waxbarashada oo ah mida ugu muhiimsan maadaama caruurta aysan haysanin Tashiilaadkii ay uga baahnaayeen waxbarashada

Boqolka Buush ee Magaalada Boosaaso ayaa waxaa ku jira dad farabadan oo ka soo barakacay Gobolada Dalka waxaana dhowr jeer xeradaas dhibaato ka soo gaartey Dab qabsadey waxayna Haya’da sheegtey in ay wax ka qaban doonto dhibaatooyinka haysta Qoxootigaas

W/D Amiin Yuusuf Khasaaro
E-Mail : amiinkhasaaro@hotmail.com

Shariif Xasan Gudoomiyaha Baarlamanka Somalia oo iska casilay wada xaajoodka inuu u ahaado gudoomiya u dhexeya DFKMG Ah iyo Maxkamadaha Islaamiga

Wararka naga soo gaarayo gobolada Jubooyinka ayaa waxay sheegayan in Ciidamo uu horkayo Gudoomiyhii hore ee isbaysigii dooxada juba ahna wasiirka gaashaandhiga dawlada somalia Bare Aadan shire bare hiiraale ee ka arimin jiray magaalada Kismaayo ee dakada ah ee ku xarunta u ah gobolka jubada hoose ayaa ay sheegayan in ay gaareen deegaanka Saakoow iyagoo weerar ku ah magaalada kismaayo u ay iminka ar arimiyaan maxakinta islaamiga ah ee somaliyeed ka dib markii ay la wareegeen magaalada wareegid aan dhiig ku daadan .

Bare hiiraale ayaa ciidamadiisu ka soo jaan dhaqaajiyen magaalda Baar dheere ee gobolka Gedo isagoo doonayo in oo mar kale gacanta ku dhigo magalada kismayo oo uu ka arimin jiray ilaa 1999 --2006 mudu 7 sano ah ayaa waxaa oo doonayaa in mar kale oo magaalada ku soo laabto iyadoo dadka u dhashay gobolkasina ay ka soo horjeedaan ku soo labashadisa iyagoo tageero wayn u moojiyay maxaakinta islamiga ah e somaliyed ee gobolada koonfurta somalia inta badan ku haya gacanta .

Maxamed Cabdi Maxamed Bootaan

Somali Talk Nairobi kenya

Sheekh Cabdi Xasan Cumar: "Midowga Maxaakiimta waxaan ka codsaneynaa inay na siiyaan gaadiidkii aan ku howlgeli lahayn"

Guddoomiyaha Maxkamadda Islaamiga ee degaanka Arjantiin oo ka tirsan Degmada Kaaraan Sheekh Cabdi Xasan Cumar ayaa ka warbixiyay xaaladda nabadgelyo ee degaankaasi oo ka mid ah degaanada ay sida weyn u saameeyeen dagaaladii ka dhacay magaalada Muqdisho.

gudoomiyaha dagmada arjantiin Sheekh Cabdi Xasan Cumar

"Taariikhdu markay ahayd 5/8/06 ayaa la furay Maxkamadda Islaamiga ah ee Arjantiin, waxayna mudadii ay jirtay ku guuleysatay inay wax ka qabato caqabadooyin dhowr ah oo heystay dadka degaankaas" ayuu yiri Guddoomiyaha Maxkamadda Islaamiga Arjantiin oo intaasi raaciyay "Howlgalada aan sameynay waxaan ku guuleysanay inaan qabano 180-ruux oo degaanka ka geystay dembiyo kala duwan".

Guddoomiyaha Maxkamadda Islaamiga Arjantiin waxaa kale oo uu sheegay in falalka ugu badan oo ciidamada nabadgelyada Arjantiin degaankaasi ka suuliyeen uu ugu weyn yahay muqaadaraadka sida Xashiishka, wuxuuna sheegay Guddoomiyuhu in bishan Ramadaan gudaheeda ay qabteen kooxo burcad ah oo ku guda jiray falal kala duwan, kuwaas oo uu sheegay inay u gudbiyeen Maxkamadda Degmada Kaaraan oo ay iyagu hoos tagaan.

Mar uu ka hadlayay Guddoomiyaha Maxkamadda Islaamiga Arjantiin halka ay taakuleynta ka helaan iyo qaabka ay ugu suurtagasho howlahooda ayuu sheegay in gudashada waajibaadkood ay hortagaan yihiin dhowr caqabadood, sida: Maxkamadda oo aan lahayn xabsi ay ku xirto maxaabiista ay soo qabato, Gaadiid la’aan ka heysata sidii ay ugu suurtageli lahayd inay si dhaqsi ah ku gaaraan goobaha ay ku sugan yihiin burcadda.

"Midowga Maxaakiimta, Ganacsatada iyo dhammaan shacabka Soomaaliyeed waxaan ka codsaneynaa inay na siiyaan gaadiidkii aan ku howlgeli lahayn" ayuu yiri Guddoomiyaha oo sheegay in asaaska Maxkamadda Islaamiga Arjantiin ay ku timid rabitaanka dadka degaanka oo qaati ka istaagay xaaladaha nabadgelyo xumo ee uu degaanku hore u soo maray.

Sheekh Cabdi Xasan Cumar Guddoomiyaha Maxkamadda Islaamiga Arjantiin waxa uu si faahfaahsan uga hadlay taariikhda degaanka Arjantiin, isagoo xusay in degaankaasi u dhaxeeyay laba maamul oo mid kastaba doonayay inuu isagu canshuur ka qaato, balse dadka degaankaasi ay si weyn uga hor yimaadeen in labada dhinac midkood uu halkaasi ka taliyo, wuxuuna xusay in degaankaasi ka qeyb qaatay isbedeladii ka dhacay magaalada Muqdisho si buuxdana u taageeray Maxaakiimta Islaamiga ah.

Muuse Maxamuud Jiisow

Musejisow@Hotmail.Com

Muqdisho Somalia

002521576666

002521653623

Dugsiga Al-Nuur ee Indhoolayaasha oo lagu qabtay maalinta Arragga iyo Maalinta Usha Cas...

Waxaa Dugsiga Al Nuur ee Indhoolayaasha lagu qabtey labo xafladood oo mid ay ahayd maalinta Aragtida Aduunka oo ku beegneyd 12 Ocktobar iyo maalinta Usha Cas ayaa waxaa ka qeyb galay munaasabadaasi qeybaha kala duwan ee bulshada waxaana ugu horeyntiiba halkaasi ka hadlay Ustaad Ibraahiim Maxamed oo ka mid ah Macalimiinta Dugsiga Indhoolayaasha ee Al Nuur ee magaalada Muqdisho si aad ah ugu dheeraadey qoraalka farta Brail-ka oo wax lagu baro Indhoolayaasha taasoo laga joogo 200 oo sano “Waa nasiib daro in far soo jirtey labo boqol oo sanno in ay maanta soo gaarto dalkeena”ayuu yiri ustaad Ibraahim oo sheegay in aqoonyahano Soomaaliyeed oo wax ku soo bartey dibadaha ayagoo indhaha la’ ayaa suurta geliyey in ay dalka ka furan Dugsi lagu barto farta Brail-ka “Aniga waxaan ka mid ah dadka wax ku soo bartey dibadaha waxaana maanta go;aansadey inan wax baro dadka indhaha la’ ayuu yiri ustaat Ibraahim oo dadka ka qeyb galay Munasbadaas tusiyey sida loo qoro farta Brail-ka sidoo kale dadka waxaa uu tusay kutub Quraan ah oo ku qoran farta Brail-ka oo uu ka aqrinaayey Aayadaha Quraanka kaasoo si aad ah ula yaabeen dadkii ka soo qeyb galay munaasabada maalinta Araga iyo maalinta Usha cas.

Inta ay socotey munaasabada ayaa ardeyda wax ka barata dugsigaasi waxay dadka ku maaweelinaayey Nashiidooyin ka hadlayey faaiidada waxbarashada.

Xafladaasi waxaa kaloo ka hadlay C/laahi sheikh Maxamed Nuur asagoo qorey Buug ka hadlaaya farta Brail-ka iyo heerarka ay soo martey iyo sida wax loogu baro caruurta, C/laahi sheikh waxaa uu sheegay in sababta ku kaliftey buugaasi ay tahay si ugu kaalmeeyo dhinaca waxbarashada wiilkiisa oo wax ka barta dugsiga Al nuur “waxaa igu qasbay inaan barto fartaan si aan cunugeyga wax ugu tuso caruurta kalana wax ku baro” ayuu yiri C/laahi oo u mahadceliyey dadka isku howshay furitaankii Dugsigaas.

Waxaa kaloo ka hadlay Gudoomiye ku xigeenka Dugsiga Al Nuur C/ fitaax Maxamed Daahir oo si aad ah ugu dheeraadey heerarka uu soo marey Dugsiga Al--Nuur iyo maalinta araga waxaa uuna sheegay in sababta loo sameeyey maalinta araga ay tahay si dadka indhaha la’ ay u soo bandhigaan waxyaabihii ay barteen iyo sidii kaalmo loogu fidin lahaa waxaa uuna u mahadceliyey dhamaan Hayadihii Ganacsatadii gacanta ku siiyery furitaankii dugsiga waxaa uuna sheegay in la furay 21 dii bisha 7- 2005 waxaa uu si gaar ah farta ugu fiiqey Jaaliyada Soomaliyeed ee Magaalada Birmingham ee cariga Igiriiska, shirkada Hormuud, shirkada Al- Towba, Muasasada Imaamu shaafici, shirkada Jubba Air ways, shirkada Telecom Somaliya, Muslim/ AID UK iyo shaqsiyaad kheyr jecel ee Soomaliyeed waxaa uu sheegay C/fitaax in ujeedooyinka loo aasaasey dugsi uu yahay in la helo jiil indha la’ oo awood u leh inay wax qoraan waxna akhriyaan,waxbarashadana si siman ula wadagaan asaagooda indha leh, in la tababaro dadka indhaha la’a, inuu ku wacyigeliyo Dugsiga bulshada dadka indhaha la’a hadii la diyaariyo loona tababaro inay baahidooda daboolan karaan bulshadoodana wax u tari karaan.

XafladaAsi oo si heer sare ah loo soo agaasimay ayaa waxaa lagu soo bandhigay qalabka wax lagu baro caruurta iyo waliba Usha ay adeegsan karaan marka ay soconaayaan.

Halkudhigyada dugsiga ku dhegnaa waxaa ka mid ahaa ku shugri nimcada araga ee ilaah kugu maneystey uguna Gargaar kuwa nimcadaasi ka maqan tahay, Al Nuur aad SI asaagaaga ula jaanqaadid.

Fax:- 002521-216370

E-mail:-somliblind@hotmail.com
E-mail Amfarah231@hotmail.com
Web-site www.somaliblind.org

W/D Amiin Yuusuf Khasaaro
E-Mail : amiinkhasaaro@hotmail.com