Xisbi Cusub oo lagu
Dhawaaqay.
Khudbadii furitaanka Xafiiska 1aad ee Xisbiga UNNUG,
Galkacyo
Ururka Nabadda iyo Nolosha Umadda Gayigeenna (UNNUG).
Bismillaahi Raxmaani Raxiim
Taariikh:- 13/10/2006.
KU: Dhammaan Isimada iyo Cuqaasha
Puntland. Fadhiyadooda.
KU: Dhammaan Culimaa’u diinka iyo aqoon yahanka
Puntland. Fadhiyadooda.
KU: Dhammaan saxaafadda iyo warbaahinta madaxa
banaan ee
dalka iyo dibaddiisaba.
Fadhiyadooda.
OG: Maamulka Dawlad Goboleedka Puntland.
Fadhiyadiisa.
UJEEDDO:-
Furitaanka Xafiiska 1aad ee Xisbiga UNNUG.
Walaalayaal,
Anigoo ku hadlaya magacayga, magaca dhamaan
aasaaseyaasha, xubnaha iyo taageereyaasha Xisbiga UNNUG waxaan
mas’uuliyiinta iyo Bulshada sharafta leh ee caawa isugu timid munaasabaddaan ku
salaamayaa salaanta qiimaha badan ee Ilaah inoo asteeyey waxaanna idin leeyahay
Asalaamu calaykum waraxmatullahi wabarakaatuhu.
Salaan kadib, waxaa mahad iska leh Ilaaha
ina abuurtay inakuna mannaystay nimcooyinka aynu ku sugan nahay ee aan la soo
koobi karin, waxaanna Ilaah ka rajaynaynaa inuu isu imaadkeenaan mid
khayr ka dhigo, wixii khayrku inoo ku jirona ina waafajiyo, naxariis iyo
nabadgalyona Rasuulkeenii suubbanaa dushiisa ha ahaato.
Walaalayaal,
Intaas kadib, jiritaanka Xisbiga UNNUG
waxaa magaalada Gaalkacyo lagaga dhawaaqay 26/8/2006, caawana waxaa inoo
suurtagashay inaynu furno Xafiiskii ugu horeeyey ee Xisbiga, ku
dhawaaqista Xisbiga iyo furitaanka Xafiiskiisa 1aad oo labaduba ka dhacay
magaalada Gaalkacyo waa guul u soo hoyatay Puntland, Gobolka Mudug
iyo magaalo madaxdiisa gaalkacyo, waayo arintaani waa arin sharci ah oo Puntland
qiimo badan kusoo siyaadin doonta hadduu alle idmo, Gobol walbaana horumar iyo
dib u dhac wuxuu dalka intiisa kale la wadaago isagaa diiwaanka loogu qoraa.
Sida la wada og yahay Gobolka Mudug wuxuu Somaliya
inteeda kale caan kaga yahay inuu ka hor baraarugo dalka intiisa kale,
islamarkaasna Bulshowaynta reer Mudug iyagoo aan degmo degmo iyo qays qays kala
lahayn waxay sharaf iyo taariikho badan oo heer qaran ah ku heleen inay farta
ku fiiqaan hadba meesha goldaloolada ah ee ummadda Soomaaliyeed cadawgoodu ka
dagayo, sidaas darteed, inkastoo aasaaseyaasha Xisbiga UNNUG aysan reer
Mudug kaliya ahayn lana doonayo in Puntland oo dhan lagu baahiyo, haddana waxaa
Gobolkaan nasiibkiisu siiyey in la isla qaatay in Xisbiga Gaalkacyo lagaga
dhawaaqo Xafiiska ugu horeeyana laga furo.
Walaalayaal,
Munaasabaddaan caawa waxaa loo sameeyey furitaanka
Xafiiska 1aad ee Xisbiga UNNUG sidaasuuna Xafiisku caawa wixii ka
dambeeya inooku furan yahay, Ilaahna waxaan ka rajaynaynaa inuu ka dhigo
mid wax san ku soo kordhiya Guud ahaan umadda Soomaaliyeed gaar ahaanna
Puntland, ujeedooyinkii loo aasaasayna ay noqdaan kuwo lagu guulaysto, waxaan
kaloo jeclahay anoo ka faa’iidaysanaya fursadaan qaaliga ah ee aynu caawa isugu
nimin inaan ka hadlo laba qodob oo muhiim ah, kuwaasoo kala ah:
-
Nidaamka Xisbiyada badan waxtarka ay leeyahiin
iyo badalkooda hadduu wadanka hal Xisbi iska haysto waxa dib u dhac ku jira.
-
Inaan Bulshada reer Puntalnd iyo ciddii kaloo
ay khusaysaba halkaan u mariyo baaqyo ku saabsan marxaladda guud ee aynu ku
sugan nahay, waana sidan iyagoo aan midba gaarkiisa uga hadlayno.
Haddaynu ku hormarno qodobka 1aad walaalayaal
Xisbi walbaa wuxuu leeyahay qorshe iyo siyaasad uu ku shaqeeyo iyo xubno
dhexdiisa ku firfircoon, xukunkana mar haddaan Kitaabka alle wax laga fiirinayn
ee dad caqligi iyo wax la qorqortay ay yahiin waxa wax lagu hagayaa waa khasab
in Xisbi kasta oo dal u taliya Bulshada qaar ka mid ahi ay ka biyo diidaan sida
Xisbigaasi hawlaha dalka u maaraynayo, oo ay iyaga ula muuqato in si sidaas ka
duwan hawlaha loo maareeyo.
Sidaas darteed, haddaan Xisbigaas mooyee Xisbi
kale jirin, dadkaas aan kor kusoo sheegnay fikirkoodu wuxuu noqonayaa mid
cabursan, taasina waxay keentaa arimahaan hoos ku qoran oo dhamaantood Bulshada
dib u dhac iyo khasaare u keeni kara kuwaasoo kala ah:
In
xubno badan oo dalka wax ku soo kordhin lahaa marka Xisbiga talada haya
qorshihiisu u cuntami waayo meel kaloo ay taladooda ku soo gudbiyaana loo
diido ay fikirkoodii iyo wax qabadkoodiiba la aamusaan, halkaasna Bulshadu
waxyaalo ay qabsan kartay kaga habsaanto, ama arimo la maarayn karay haddii
loo dhan yahay habsaanka kooxahaas dartiis loogu khasaaro.
2.
In
xubno iyo qayb Bulshada ka mid ahi marka fikirkooda la caburiyo oo kooxi
talada iska marooqsato ay cadaawad qaadaan taasina ay u gayso inay dalka
mucaarad hubaysan ku noqdaan, ayna keento inay soo kaashaadaan qaaruumo iyo
Dawlado dalkaas iyo dadkaas cadaw u ah, halkaasna laga dhaxlo fashil iyo
burbur guud oo dalkaas ku dhaca sidii Somaaliya ku dhacday oo kale.
3.
In
kooxdaas cabursani aysan dagaal hubaysan qaadin balse nacaybka ka dhashay
caburka ay qabaani uu ku xambaaro inay dalka sirtiisa u gudbiyaan umado
cadaw ku ah Dalkaas, halkaasna ay ka dhalato khasaare guud oo qarankaasoo
dhan ku habsada, sidii Ciraaq ku dhacday.
4.
dhanka kale, in kooxda talada haysaa markay waayaan wax ka gees hadla ay ka
baaqsadaan horumarinta dalka, islamarkaasna ay jeebka isaga shubtaan
hantidii qarankaas wax loogu qaban lahaa, halkaasna ay Bulshadu kala kulanto
dayac dhan kasta leh, sidii Mambuto seseseco waa Madaxwaynihii geeriyooday
ee dalka hadda la yiraahdo Congo Dimoqaraadi iyo dadkiisii ku dhacday, ee
dalkiisu ka mid noqday dalalka Aduunka ugu hodonsan dadkiisuna ka mid
noqdeen dadka Aduunka ugu saboolsan, isna ka mid noqday xubnaha tirsan ee
Aduunka ugu hantida badan, kadib markuu iska rartay khayraadkii dalka kaligi.
5.
In
kooxda talada haysaa iyagoo xeerinaya inay awood u heleen sii joogista
Xafiiska ay dadka kala diriraan horumarka gaar ahaan dhaqaalaha, halkaasna
uu dalku ku noqdo dal aan horumar lahayn sidaasna shacabkaasi ku noqdo
shacab ku dul bakhtiya dusha khayraadkii dalkooda oo laga garbaduubay, sida
dalka Itoobiya ee wabiyada, macdanta kala duwan iyo beeraha Ilaah ku
mannaysta haddana beeraleeydiisu arradka iyo cagacaddaanta la liitaan
sanadwalbana gaajada loogu le’do, isla markaasna maanta dhalinyaradii
Itoobiya ay Badda cas ee Soomaaliya iyo Yaman u dhexaysa boqol boqolka ugu
dhintaan maalin walba iyagoo ka cararaya gaajo iyo caburin wada jira.
Walaalayaal,
Habsaanka iyo dib u dhaca ay leedahay kali
talisnimadu hal mar lamasoo koobi karo, balse intaasaynu kaga gaabsanaynaa,
haddana aynu fiirino waxa horumar lagu gaaro ama ay sababi karto hadduu dalku
leeyahay Xisbiyo badan iyo siyaasad furfuran, iyadana waxaynu kasoo qaadanaynaa
dhawr qodob waana kuwaan:
-
Walaalayaal, markay dal ka jiraan Xisbiyo
badan waxay keentaa in dadka ay ku jirto hanka siyaasaddu ku wada qancaan ka
shaqaynta siyaasadda dalka oo qofkii Xisbi qorshihi ka biyo diidaa uu galo
mid kaloo uu ka door bido, taasina waxay keentaa in Bulshadu aysan la
habsaamin wax fikir, cilmi ama xoog ah oo ay dalkeeda ku siyaadin karto.
-
Hadday jiraan Xisbiyo badan waxaa khasab ah
inay jiraan doorashoyin taasina waxay sababtaa inay Xisbiyadu u tartamaan
horumarinta dalka iyo kor u qaadista adeegyada Bulshada iyadoo Xisbi walbaa
uga golleeyahay in dadku doorto marka tartanku yimaado.
-
Xisbiyada badani waxay ilaaliyaan dhaqaalaha
dalka oo hadduu Xisbiga talada hayaa ku jawr falo maamulka dhaqaalaha dalka
waxaa fiirsanaya islamarkaana ku ceebaynaya Xisbiyada mucaaradka ah, oo
dantoodu tahay inay dadka nacsiiyaan Xisbigaas oo doorashada dhaw iyaga la
doorto.
-
Xisbiyada badani waxay kaloo fududeeyaan in
Bulshadu si xor ah wax u tabcato oo aan dhaqaalahooda Dawladdu sharaysan,
halkii Xisbiga kali taliska ahi dadka dhaqaalaha kala dirirayey.
-
Markay jiraan Xisbiyo badan waxaa meesha ka
baxaysa in mucaarad hubaysani dalka ka dilaaco, ama sirta qarankaas cadawga
loo gudbiyo, waayo cid cabursani ma jirto.
-
Nidaamka Xisbiyada badani waxay keenaan in
dalku yeesho sir xafidan, isla markaasna loo tartamo horumarinta dalka
dhankay doonta ha noqotee, waxaana tusaale arintaas u ah wadamada maanta
horumarka gaaray ama dhaqaale ha ahaato ama cilmi ha ahaatee waa kuwa
xaliyey khilaafkii gudahooda ahaa kana tanaasulay nidaamka kali talisnimada
ah, kadib markay arkeen inaan wax dan ah lagu gaarayn kursi jeclaysiga iyo
kali talisnimada.
-
Xisbiyada badan oo marba mid talada qabto
kuwana mucaaradka yahiin hadba kan mucaaradka ah waxaa u muuqata meesha
Xisbiga talada hayaa arinta ka asiibay iyo meesha uu ka il duufay intaba,
taasina waxay keentaa inuu isna markuu talada qabto intii kii hore ka il
duufay toosiyo oo halkaas shaqadii ku noqoto mid ebyan oo qoloba qayb
qabatay.
Haddaan intaas ku soo koobno is barbar dhigga
kalitalisnimada iyo talowadaagga, sidaad la socotaanba dalkeenu wuxuu ku jiraa
xaalad qalafsan dhankii laga eegaba, waxaana cad in maamulkeenu uu gabay xilkii
ka saarnaa mishkiladaha horyaal, waxayna u shaqaynayaan qaab aroor ma aragtonimo
ah iyagoo isku maaweelinaya waxyaalo dhalanteed ah.
Walaalayaal,
Shacabkeenuna wuxuu ku sifoobay shacab iska hurda
oo aan meel lamarayoba ka warqabin, waayo waxaa lagu jiraa xaalad qalafsan mana
muuqdo dareen shacab oo arintaas la jaanqaadi karaa, qalayfkaasi wuxuu isugu
jiraa saddex qaybood oo kala ah, marxaladda ku saabsan khilaafka iyo jahwareerka
siyaasadeed ee Soomaaliya ka jira oo hadda ay ka soo cusboonaadeen colaado hor
leh kuwaasoo la yimid tabo cusub oo aan horay u jirin, marxadda labaad waxaa
weeye maamulkeena oo noqday mid fadhiid ah oo aan bulshada waxba ugu oolin
islamarkaasna aysan muuqan wax ifafaale is badal ah oo uu soo wadaa.
waxaana khatar loogu jiraa inay keento fashil guud
oo inaku dhaca magac ahaan iyo maamul ahaanba, cabsida sadexaadna waxay tahay
gumaysiga casriga ah oo dib loosoo abaabulay oo fara kulul inaku haya khatarna
ku ah jiritaankeena oo dhan, kasoo ka imaanaya dalalka reer Yurub, Ameerika iyo
wadamada dariskeena ah ee afrikaanka ah intaba.
Walaalayaal,
Sidaad la socotaan umadda Soomaaliyeed oo mudda 16
sano ah ku jirtay dagaalo iyo dayac dhan walba leh oo Dawlad la’aantu keentay
ayaa sanadkaan waxaa lagu soo kordhiyey Ciidamo shesheeye oo dalkeena waxna
joogaan waxna suxul duub loogu jiro siday ku imaan lahaayeen, Ciidamadaas oo la
hubo in haddaan laga hor tagin ay raad xun ku reebi doonaan dalka Soomaaliya,
kuwaasoo isugu jira wax dalka lagu sheegay aanse la hubin cidda lagu
eedaynayaana aysan qirsanayn waa kuwa lagu eedeeyey qolyaha Maxkamadaha ee
koonfurta Soomaaliya badankeeda gacanta ku dhigaye, kuwa labaadna waa kuwa dalka
Itaabiya ee Puntland iyo meelo kaleba jooga oo la qirsan yahay gaar ahaan kuwa
Puntland jooga, kuligoodna waxaa la hubaa inay yahiin tabcooyin iyo hagardaamo
xun oo Dadkeenna iyo dalkeenna lala doonayo.
Walaalayaal,
Shacabka Puntland ee sharafta leh waxaan la
socodsiinaynaa in xaalku meel adag marayo, loona baahan yahay in indhaha si
fiican loo furo, waxaanna soo jeedinaynaa in saddexda qodob oo aan kor ku soo
sheegnay, midba gaarkiisa loola tacaalo, iyadoo loo kala qaadayo sidaan hoos ku
qoran:
1.
In
maamulka Puntland lala xisaabtamo iyadoon cidna loogu darnaanayn cidna loogu
roonaanayn ee ay arintu tahay kaliya cid wax loo dhiibtay oo lala xisaabtamayo,
xooggana la saarayo arimaha nabadgalyada ee gudaha Maamulka iyo tan xuduudaha
ee hadda ay xiisaduhu ka taagan yahiin, laguna xijinayo arimaha Bulshada iyo
wixii laga qabtay, xisaabtaas wixii kasoo baxana lagu camal falo.
2.
Dalkeenu wuxuu ku jiraa 16 sano oo Dawlad la’aan iyo bur bur ah, maantana
caqliga nadiifka ahi wuxuu inoo sheegayaa in la joogo wakhtigii ay Soomaalidu
danteeda garan lahayd, iskana ilaawi lahayd waxyaalaha ay ku habsaantay,
islamarkaasna caqli kuma salaysna dagaalo hor leh oo dalkeenna kasoo
cusboonaadaa, balse haddii ay jirto cid wali hamuun u qabta dhiig Soomaaliyeed
oo macne darro u daata oo sidaas weerar la’inooku soo qaado waa inaynu iska
difaacnaa inagoon u kala harin, sidoo kale, waa inaynu ka fogaanaa wax dhib
abuur ama colaad ahi inay xageenna ka tagaan, waana inaynu ka shaqayno sidii
Soomaaliya dhibkeeda loo xalinlahaa loona heli lahaa Dawlad hanata dalkeena oo
dhan oo raali laga wada yahay.
3.
Shacabka Puntland waa inay isha ku hayaan khiyaamada iyo dabinka shisheeyuhu u
dhigayo Soomaaliya oo dhan, Soomaalina waa inaan dhankeena laga soo galin, waayo
waxa Soomali ka dhexeeyaa waa wax aduunka oo dhan ka dhaca oo umad wax ka
dhexeeyaan inay is qabato waa dhacdaa, balse ciddii rabta inay kuligeen ina mijo
xaabiso waa in laga hor tagaa il dheerna loo yeeshaa.
Walaalayaal,
Sidaas darteed, anigoo ku hadlaya afkayga, afka
aasaaseyaasha Xisbiga iyo afka shacabka Puntland waxaan ugu baaqaynaa Ciidamada
ajnabiga ah ee jooga guud ahaan dalka Soomaaliya cidday doonaan ha ahaadeene
inay nooga baxaan dalkayaga, waayo Soomaaliya dhib iyo dheefba iyadaa isugu
filan, Ciidamadaas shisheeye hadday ku sii adkaystaan joogidda dalkayaga waxaan
u sheegaynaa in shacabka Soomaaliyeed uu xaqiijindoono difaaca dalkiisa iyo
diintiisaba qiimo kasta haku qaadatee, cid kasta oo Soomaaliya ku soo duushaana
waxaa la hubaa inay khasaare kala laaban doonto.
Ilaah waxaan ka baryeynaa inuu umadda
Soomaaliyeed dhibka haysta ka dul qaado, taladana uu ugu dhiibo ciddii khayrku
ugu jiro, islamarkaasna uu ka badbaadiyo khiyaamooyinka shisheeyuhu u dhigayo ee
ay iyagu isaga hurdaan.
Wabillaahi tawfiiq.
Maxamuud Xasan Aw- Aadan.
Guddoomiyaha Ururka Nabadda iyo Nolosha Umadda Gayigeena (UNNUG).
Email:
awaaden@hotmail.com
Faafin: SomaliTalk.com | Oct 14, 2006
|