::: SomaliTalk.com :::

Waxaa shalay jidadka waaweyn ee Magaalada Muqdisho lagu arkayey gawaari Tikniko ah oo ay saaran yihiin ciidamo ka socda Maxaakiimta Islaamiga ah.

Ciidankaan oo ku labisnaa Tuutaha ciidamada lagu yaqaano, waxaana goob kasta oo ay marayeen si weyn ugu soo dhaweynayay dadka Soomaaliyeed, lamana garanayo sababihii ay shalay dhoolatuska u sameynayey, balse warar ayaa waxay sheegayaan in ciidamadaasi ay ahaayeen ciidamo uu tababar ugu soo dhamaaday xerada Hiilweyne waxaa la filayaa in ay dhawaan hawlgal ka sameeyaan Magalada Muqdisho oo la xiriira hub uruurin, halka ay warar kale sheegayaan in ciidankaan loo diyaariyey sidii ay dalka uga difaaci lahaayeen ciidamada Itoobiya ee maalin walba soo galaya gudaha dalka Soomaaliya.

Gudoomiye ku xigeenka Maxaakiimta islaamiga ah Sheekh C/raxmaan Janaqow ayaa waxa uu sheegay dhawaan hubka yaala Magaalada Muqdisho ay Maxaakiimtu uruurin doonaan, sidoo kale sheegay in wixii nabadgelyo ah ay Maxaakiimtu damaanad qaadeen, isla markaana aysan ogolaan doonin cid dambe oo hub ku dhex wata Magaalada Muqdisho iyo Gobalada kale ee Dalka, balse lama sheegin waqtiga uu bilaabanayo hawlgalka hub uruurinta.

Waxaa waayadan khilaaf u dhexeeyay Xeer ilaaliyaha guud ee qaranka ee Dowladda Federaalka iyo Guddoomiyaha Maxkamadda Sare waxa uuna khilaafkaasi ka dhashay qaabka ay u wada shaqeyn karaan labadaasi mas’uul.

Guddi ka kooban xubnood ayaa loo saaray inay xaliyaan khilaafkaasi, waxaana shalay la soo afjaray wixii khilaaf ah ee u dhexeeyay labadaasi mas’uul.

Sidoo kale waxaa guddi loo saaray khilaaf isna soo kala dhex galay Wasiirka Cadalaada Sheekh Max’ed Nuur (Sheekh Aadan Madoobey) iyo Guddoo-miyaha Maxkamadda Sare, khilaafkaan oo la sheegay in uu ka dhashay qaabka loo baarayo dilkii loo gaystay Allaha u naxariistee Cabdala Deerow Isaaq iyo Kiisas kale oo ka dhacay Magaalada Baydhabo.

Guddigaan ayaa la filayaa in maanta ay isa soo hor fariisiyaan labadaasi xubnood iyagoo ka dhageysanaya waxyaabihii dhaliyey khilaafkooda, waxaana guddigaasi ku jira Ra’isul Wasaare ku xigeenka Dowladda Federaalka Ahna wasiirka arrimaha guddaha Xuseen Caydiid.

Waxaa maalintii shalay ahayd Fagaaraha Dugsigii Sare ee Booliiska lagu tooktay gacan ku dhiigle Mahad Cusmaan Ugaas oo bishii Agoosto magaalada Muqdisho ku dilay Marxuum la oran jiray Cabdi Aadan Siyaad (Ukurow).

Gacan ku dhiglahaan oo dhowr jeer dib loo dhigay dacwadiisa ayaa aakhiritaankii waxaa loo saaray guddi garsoorayaal ah waxayna iyana caddeeyeen in gacan ku dhiiglahaani uu dilay ninkaas ganacsada ah uuna u dilay taleefanka Gacanta awgiis.

Xukunka qisaasta ah oo ay ka qaybgaleen dadweyne aad u fara badan ayaa waxaa amniga goobta si weyn u sugayey ciidamo ka socday Maxaakiimta Islaamiga ah, waxaa markii labaad oo fagaraasi lagu dilo gacan ku dhiigle dad horey u dilay.

Waxaa maalintii shalay ahayd maydkiisii loo qaaday Magaalada Nayroobi Wasiir ku xigeenkii Maaliyadda ee Dowladda Federaalka Cabdi Mire Faarax kaddib markii uu mudooyinkaan ku xanuunsanaa magaalada Baydhabo oo xarun u ah Dowladda Federaalka ah.

Wasiir ku xigeenka ayaa waxaa u geeyooday cudurka Dhiig-Karka waxaa maydkiisa sii raacay mas’uuliyiin ka tirsan Dowladda Federaalka, waxaana isla shalay lagu aasay magaalada Nayroobi, sidoo kale waxaa Magaalada Baydhabo ku geeryooday ku xigeenkii xeer ilaaliyaha Guud ee Qaranka AVV. Caraaye oo isna la sheegay in uu u geeryooday cudurka Dhiig-Karka.

Mas’uuliyiinta ugu sareysa Dowladda Ayaa tacsi u diray qoysaskii ay ka kala geeryoodeen labadaasi marxuum waxayna Allaah uga baryeen in Janadii Fardowso ka waraabiyo.

Maydka Wasiir ku xigaynkii Maaliyada oo Nairobi la keenay si loo baaro sababaha keenay geeridiisa.

Waxaa magaalada Nairobi ee caasimada Kenya la keenay Subaxnimadii Jimacada maydka Marxuum Mire Xaaji Faarax wasiir kuxigeenka Maaliyada oo xalay magaalada Baydhabo ee xarunta DFKMG ku geeriyooday isbitaalka magaalada baydhabo ku geeriyooday .

Marxuumka ayaa waxaa ay qaraabadisu sheegeen inuu in muddo ah dhinaca wadnaha ka xanuunsanaa oo aysan xaaladiisu ahayn mid caadi ah isagoo halkaasi la dhigay balse dhaqaatiirdii joogtay isbitalka aya shegay inaysan wax daawo ah u qorin oo uu dhintay ka hor inta aan la barin waxaana uu noqon mudanihii labaad oo ku geeriyooday magaalada baydhabo kana tirsan golaha wasiirada tan iyo markii ay dawladu dagtay magaalada baydhabo.

Ehelada Marxuumka ayaa waxay saxaafada u sheegeen in baartaan dheeraad ah lagu samayn doono magaalada Nairobi isbtaal ku yaal sabaha keentay geeridiisa iyadoo lagu wado in lagu aaso magaalada boosaaso ee xarunta gobolka bari sida ay sheegeein dad ku dhaw dhaw marxuumka geeriyooday .

Faa faahin Somali Talk

Jaamacada Nugaal: Dhisida Xarun Cusub 2006-2007

Intii ka dambeysey burburkii ku habsadey Soomaalida 1991, waxa dhumey tacliintii hoose iyo midii sareba dhamaan dalka oo dhan. Si dib loogu soo celiyo waxbarashada luntey waxa u guntadey dhamaan dadka Soomaaliyeed kuwa dibada jooga iyo kuwa gudaha joogaba. Warqadan waxa aanu kaga hadli doonaa dhisida xarunta cusub ee Jaamacada Nugaal ee ku taala magaalada Laascaanood ee gobolka Sool, Soomaaliya. Waxa kale oo aanu ku qaadaa dhigi doonaa: taariikhda jaamacada, marxalada hada ku jirto jaamacada, iyo hindisaha cusub ee lagu dhisi doono xarunta cusub ee jaamacada Nugaal.... Akhri...

Barnaamijkii Radio Xoriyo

13 October 2006

Qaramada Midoobey oo ku baaqday inaan la celinin qoxootga Itoobiya.

Itoobiya oo ciidammo badan keentay Ogaadeenya iyo Hiiraan
Safiirka Talyaaniga: Ciidamo ilaalo ha loo diro Soomaaliya iyo Itoobiya.
Barnaamij (Waari Mayside War Hakaahadho).

======================

Qaramada Midoobey oo ku baaqday inaan la celinin qoxootga Itoobiya.

Hay¢adda Qaramada Midoobey u qaabilsan arrimaha qoxootiga ee UNHCR ayaa maamulka Puntland ee dalka Soomaaliya ugu baaqday talaadadii inuu joojiyo celinta uu celinayo dadka ka soo qaxaya dalka Itoobiya ilaa iyo inta laga hubinayo xaaladaha dadkaas iyo inay ku jiraan dad magangelyo doon ah iyo in kale.

Baaqani wuxuu ka denbeeyay ka dib markii axaddii la soo dhaafay uu maamulka Puntland gacanta u galiyay xukuumadda Itoobiya qiyaastii 1300 oo qof oo markoodii hore ka soo qaxay Itoobiya, halka 500 oo kale oo soomaali ah ay iyaguna kaga xidhan yihiin magaalada Boosaaso, kuwaasoo la doonayo in loo masaafuriyo gobolladii ay ka kala yimaadeen.

Waxaan maamulka soomaalida ka codsanay inay si ku meelgaadh ah u joojiyaan dadka ay qasabka ugu celinayaan Itoobiya ilaa iyo intaan ka hubinayno in dadkaas ay ka mid yihiin dad ay naftoodu khatar gali karto oo magangelyo u baahan, sidaas waxaa tidhi afhayeen u hadashay Hay¢adda UNHCR oo lagu magacaabo Jennifer Pagonis.

Maamulka Puntland ayaa billabay inuu masaafuriyo dadka ka yimaada Itoobiya iyo gobollada kale ee Soomaaliya, ka dib markii uu madaxwaynaha Puntland waregto soo saaray bishii Sebtember, taasoo uu uga dan-lahaa sidii loo joojin lahaa dadka faraha badan ee u tahriibaya dhinaca Yeman ee badankoodu Badda ku dhammaada.

Hase yeeshee tallaabadan ay Puntland qaaday waxay dhibaatada u badan ka soo gaadhay dadka qoxootiga ah ee magangelyo doonka u imanaya Puntland, sidaas waxaa tidhi Jennifer Pagonis.

Hay¢adda UNHCR waxay sheegtay in qoxooti gaadhaya 2000 oo qof ay toddobaad dhammaadkii hore u carareen dhinaca Kenya, kuwaasoo ka soo cararay qabsashadii ay Itoobiyaanku qabsadeen magaalada Buurhakaba iyo dagaalka laga cabsi qabo inuu ka qarxo gobollada Jubbooyinka ee dalka Soomaaliya oo ay hadda gacanta ku hayaan maxkamadaha islaamiga ah oo awood ku muquuniyay maamulkii Dooxada Jubba ee sannadihii denbe ka talinayay gobollada Jubbooyinka.

Itoobiya oo ciidammo badan keentay Ogaadeenya iyo Hiiraan

Xukuumadda gumaysatada Itoobiya ayaa ciidammo aad u fara badan ku soo daabushay nawaaxiga magaalada Feerfeer oo ku taalla xadka u dhexeeya Ogaadeenya iyo gobolka Hiiraan ee dalka Soomaaliya.

Ciidammadan ayaa tiradooda lagu qiyaasay 3000 oo askari, kuwaasoo la sheegay inay ku hubaysan yihiin noocyada kala duwan ee hubka millatariga iyo gawaadhida gaashaaman.

Ciidammadan Itoobiyaanka ah ayaa la sheegayaa inay dhoollatus ku sameyeen buur lagu magacaabo Sariiraale oo ku taalla duleedka magaalada Feerfeer. Waxay kaloo wararku intaas ku darayaan in ciidammo kale oo Itoobiyaan ah oo 2000 oo askari gaadhaya ay ka soo kicitimaan dhinaca degmada Balanballe ee gobolka Galguduud ee dalka Soomaaliya, kuwaasoo ku soo jeeda dhinaca Ferfeer, lana rumaysan yahay inay ku soo biiri doonaan ciidammada lagu soo uruuriyay nawaaxiga Feerfeer.

Waxaa meel aan magaalada Feerfeer ka fogayn fadhiisin ku leh ciidammada maxkamadaha Soomaaliya ee gobolka Hiiraan ka hawlgala.

Isniintii ayay ahayd markii ay ciidammo Itoobiyaan ahi qabsadeen oo muddo kooban haysteen magaalada Buurhakaba, hase yeeshee xukuumadda Itoobiya ayaa ku andacootay inayna jirin ciidammo ka jooga gudaha dalka Soomaaliya.

Safiirka Talyaaniga: Ciidamo ilaalo ha loo diro Soomaaliya iyo Itoobiya.

Safiirka dalka Talyaaniga u qaabilsan arrimaha Soomaaliya Mario Raffaelli ayaa ku baaqay in ciidammo ilaalo ah oo caalami ah la geeyo xuduudda u dhaxaysa Soomaaliya iyo Ogaadeenya, si ay isha ugu hayaan in ciidammada labada dal ee Soomaaliya iyo Itoobiya ay xadka isaga gudbaan, sidaas darteedna ay u sii holciyaan khilaafka labada dhinac u dhexeeya.

Golaha Maxkamadaha Islaamiga ayaa isniintii ku dhawaaqay in jihad lala galo ciidammada Itoobiya eek u sugan dalka Soomaaliya, wax yar ka dib markii ay ciidammada Itoobiya qabsadeen magaalada Buurhakaba oo 30 km oo kaliya u jirta magaalada Baydhabo ee xarunta u ah dawlada ku meelgaadhka ah ee Soomaaliya.

Waxaan filayaa in ciidammada ilaalada ahi ay xal u noqon lahaayeen dhibaatada Soomaaliya iyo Itoobiya, sidaas waxaa yidhi safiirka Tayaaniga u qaabilsan arrimaha Soomaaliya Mario Raffaelli, oo tilmaamay inaan baahi loo qabin in ciidammadan ilaalada ahi ay noqdaan kuwo hubaysan, balse ay lagama maarmaan tahay inay noqdaan kuwo madaxbannaan oo dhexdhexaad ah.

Wuxuu kaloo intaas ku daray ciidammadan ilaalada ah ayna noqonin kuwo cudud mllatari wax ku xalliya oo awood sheegta, balse ay noqdaan kuwo laga keeno wadammo dhexdhexaad ah.

Wuxuu kaloo sheegay in ciidammadan ilaalada ah ay soo diyaarin karaan dalalka xubnaha ka ah ururrada arrimaha Soomaliya gacanta ku haya ee Jaamacadda Carabta, IGAD ama kooxda uu Maraykanku sameeyay ee International Contact Group on Somalia.

Raffaelli ayaa qaba in haddii ciidamadan ilaalada ah la geeyo xadka ay hadhi lahayd eedaha ay is-dhaafsanayaan dawlada ku meelgaadhka ah iyo Maxkamadaha Islaamiga, isla markaana la kala ogaan lahaa xaqiiqada iyo boqobogaandhada.

13 October 2006.

Axmed Gaal-Eri

Info@radioxoriyo.com
raadioxoriyo@yahoo.com

Radio Xoriyo waxaad ka dhegaysan kartaa Mawjadda 31 MB ee dhererkeedu yahay 9820 KHZ,iyo internetka Radioxoriyo.com,Ogaden.com Maalmaha Talaadada iyo Jimcaha 7: 30PM waqtiga Afrikada Bari

Dugsiga Al-Nuur ee Indhoolayaasha oo lagu qabtay maalinta Arragga iyo Maalinta Usha Cas...

Waxaa Dugsiga Al Nuur ee Indhoolayaasha lagu qabtey labo xafladood oo mid ay ahayd maalinta Aragtida Aduunka oo ku beegneyd 12 Ocktobar iyo maalinta Usha Cas ayaa waxaa ka qeyb galay munaasabadaasi qeybaha kala duwan ee bulshada waxaana ugu horeyntiiba halkaasi ka hadlay Ustaad Ibraahiim Maxamed oo ka mid ah Macalimiinta Dugsiga Indhoolayaasha ee Al Nuur ee magaalada Muqdisho si aad ah ugu dheeraadey qoraalka farta Brail-ka oo wax lagu baro Indhoolayaasha taasoo laga joogo 200 oo sano “Waa nasiib daro in far soo jirtey labo boqol oo sanno in ay maanta soo gaarto dalkeena”ayuu yiri ustaad Ibraahim oo sheegay in aqoonyahano Soomaaliyeed oo wax ku soo bartey dibadaha ayagoo indhaha la’ ayaa suurta geliyey in ay dalka ka furan Dugsi lagu barto farta Brail-ka “Aniga waxaan ka mid ah dadka wax ku soo bartey dibadaha waxaana maanta go;aansadey inan wax baro dadka indhaha la’ ayuu yiri ustaat Ibraahim oo dadka ka qeyb galay Munasbadaas tusiyey sida loo qoro farta Brail-ka sidoo kale dadka waxaa uu tusay kutub Quraan ah oo ku qoran farta Brail-ka oo uu ka aqrinaayey Aayadaha Quraanka kaasoo si aad ah ula yaabeen dadkii ka soo qeyb galay munaasabada maalinta Araga iyo maalinta Usha cas.

Inta ay socotey munaasabada ayaa ardeyda wax ka barata dugsigaasi waxay dadka ku maaweelinaayey Nashiidooyin ka hadlayey faaiidada waxbarashada.

Xafladaasi waxaa kaloo ka hadlay C/laahi sheikh Maxamed Nuur asagoo qorey Buug ka hadlaaya farta Brail-ka iyo heerarka ay soo martey iyo sida wax loogu baro caruurta, C/laahi sheikh waxaa uu sheegay in sababta ku kaliftey buugaasi ay tahay si ugu kaalmeeyo dhinaca waxbarashada wiilkiisa oo wax ka barta dugsiga Al nuur “waxaa igu qasbay inaan barto fartaan si aan cunugeyga wax ugu tuso caruurta kalana wax ku baro” ayuu yiri C/laahi oo u mahadceliyey dadka isku howshay furitaankii Dugsigaas.

Waxaa kaloo ka hadlay Gudoomiye ku xigeenka Dugsiga Al Nuur C/ fitaax Maxamed Daahir oo si aad ah ugu dheeraadey heerarka uu soo marey Dugsiga Al--Nuur iyo maalinta araga waxaa uuna sheegay in sababta loo sameeyey maalinta araga ay tahay si dadka indhaha la’ ay u soo bandhigaan waxyaabihii ay barteen iyo sidii kaalmo loogu fidin lahaa waxaa uuna u mahadceliyey dhamaan Hayadihii Ganacsatadii gacanta ku siiyery furitaankii dugsiga waxaa uuna sheegay in la furay 21 dii bisha 7- 2005 waxaa uu si gaar ah farta ugu fiiqey Jaaliyada Soomaliyeed ee Magaalada Birmingham ee cariga Igiriiska, shirkada Hormuud, shirkada Al- Towba, Muasasada Imaamu shaafici, shirkada Jubba Air ways, shirkada Telecom Somaliya, Muslim/ AID UK iyo shaqsiyaad kheyr jecel ee Soomaliyeed waxaa uu sheegay C/fitaax in ujeedooyinka loo aasaasey dugsi uu yahay in la helo jiil indha la’ oo awood u leh inay wax qoraan waxna akhriyaan,waxbarashadana si siman ula wadagaan asaagooda indha leh, in la tababaro dadka indhaha la’a, inuu ku wacyigeliyo Dugsiga bulshada dadka indhaha la’a hadii la diyaariyo loona tababaro inay baahidooda daboolan karaan bulshadoodana wax u tari karaan.

XafladaAsi oo si heer sare ah loo soo agaasimay ayaa waxaa lagu soo bandhigay qalabka wax lagu baro caruurta iyo waliba Usha ay adeegsan karaan marka ay soconaayaan.

Halkudhigyada dugsiga ku dhegnaa waxaa ka mid ahaa ku shugri nimcada araga ee ilaah kugu maneystey uguna Gargaar kuwa nimcadaasi ka maqan tahay, Al Nuur aad SI asaagaaga ula jaanqaadid.

Fax:- 002521-216370

E-mail:-somliblind@hotmail.com
E-mail Amfarah231@hotmail.com
Web-site www.somaliblind.org

W/D Amiin Yuusuf Khasaaro
E-Mail : amiinkhasaaro@hotmail.com

Gabdhaha Soomaaliyeed ee Woqooiga Ameerika oo Deeq Gaarsiiyey Qaxooti Ku Sugan Muqdisho..

Dadka soo barakacay oo magaalda Mugdisho loogu Qeebiyay Raashiin iyo lacag..

Boqolaal ruux oo ah dadka ku jira xerooyinka qaxootiga magaalda mugdisho qaarkood kuna soo barakacay dagaaladii sokeeye ee dalka ka dhacay iyo abaaro galaaftay duunyo waxay lahaayeen ayaa Khamiistii fursad u helay inay gaarto raashiin isugu jira bariis, saliid, iyo lacago kaash ah oo lagu talo galay inay kaga gudbaan dhibaatada ka haysata cunto la'aanta, ayna ku afuraan.

Gabdho Soomaliyed ee ku dhaqan Waqooyga Amerika ayaa iska xilsaaray inay gagaar dhaqaale u fidiyaan dad soo barakacay ee ku jira xeryaha ku yaala gaar ahaan kuwa agoonta iyo kuwa da'da ah gargaarkaas oo dhan 1500.Us una dhiginta sh.So lacag dhan 20.250 iyadoo gargaarkani ay u soo wakiisheen Abwaan Abshir nuur faarax abshir Bacale oo tel:lr:002521-5959 70- ee mudisho.

Abwaan nuur abshir bacadle oo ay wehliyaan xubno kale ayaa ugu horeen waxaa uu booqday lix kaam isagoo la kaashanayaa horjooogayaasha kamaamkaas dabadeed waxay si gaar ah ugu xusheen caruurta agoonta dadka liita, kuwa curyaanka, iyo kuwa da'da ah . dabadeedna waxaa lixdaasi kaam si habsami leh ugu qeebayay gargaakaasi ay soo gaarsiyeen gaar ahaan gabdhaha ku nool Waqooyga Amerika, ayna soo wakiisheeb Abwaan Abashir Nuur faarax oo isaga ku sugan magaaldda Mugdisho.

Dadka Khamiistii fursadaan gaargaaka helay waxay ahaayeen agoon, dad da'da ah , indhoolayaal. Iyo kuwo liita, oo ka soo barakacay guud ahaan Goboladda qaarkood iyo gudah dalkooda ayaa u badnaa dad Oromo ah oo qaxooti ahaan ilaa 1977-dii ayaa si weeyn u soo dhaweeyay deqdaasi wax ku oolka ah oo ay u fidiyeen gabdhaha soomaliyeed oo ku dhaqan dibada gaara ahaan wadanaka mareekanka waxana ugu mahad ciliyeen gacantaan binaadaminada oo ay fidiyeen walaalood waxaayna ilaaheey ugu bariyeen inuu badalkeeda uu ku siiyo meel fudud.

Dadka soo barakacay ee ku jira magaalada mugdisho ayaa haataan waxaa ka muuqda baahi iyo macluul daran oo ay u wehliso nafaqo la'aan mana jirta cid si gaar ah u daryeesha. Ha'yadaha gaargarka dhag jalaqa uma siiyaan baaqyada isdaba joog ah ee loo soo jeediyo sidaa darteeda gaargaakaan oo maanta la gaarsiiayay lixdaasi kaam xili lagu jiro bishii barakeesneed ee ramadan ayaa waxaa xaqiiqo ah in uu culees weeyn oo saarnaa dadkaasi uu ka dabcindoono inkatoo aaan la'oronkarion waxaa la daboolay baahida guud ee ka jirta xeredaasi ,waxayna qaarka mid ah dadkii ay codsi guud u jeediyeen dadka soomaliyeed gaar ahaan Jaaliyaddaha ku dhaqan dalka dibadiisa inay xasuustaan oo ay il gaar ah ay ku soo eegaan .