Qoodhiin
iyo Xeradiin Maxaa Baajuun & Jareer Looga Qadiyay Maamulka
J/Hoose
Maxaakiimta Islaamiga
Soomaaliyeed ayaa ku dhawaaqay Maamulka gobalka Jubada Hoose,
ka dib markii ay kala wareegeen Ururkii xoogga ku haystay
muddo ka badan 7 sanno. Maxaakiimtu waxay sheegeen in
beelaha dega gobalka ay u dhan yihiin maamulkaas oo kulli ay
raali ka yihiin. Nasiib darrose waxaan ku jirin oo laga
qadiyay asalkii dhulka (Native) kuwaasoo ah Baajuun iyo
Jareer, waxayna quud darraynayeen in mar uun illaah u keeno
wax caddaalad ah oo cadkooda siiya, rajada ugu wayn waxay
ahayd maxaakiimta oo runtii tan iyo intii ay dalka kasoo
baxeen ahaa nuur lagu diirsday.Waxaa wax qaybiyay dad aan
dadka iyo dhulka kala aqoon oo ka soo hayaamay carro fog
sida Kilinka Shanaad.
Xasan Turki waxuu ku dhashay
meel u dhaw Qabridaharre, maantana isagaa uga xaq yeeshay
Baajuun iyo Jareer J/Hoose. Ilaahow adaa caadil ah oo
xaqsoor ah banii-aadam kuwii wax la bidaba warkood daa.
Xasan Turki muddooyinkii la eryoonayay ee lagu daray Liiska
Argagixisada waxaa saldhig u ahayd deegaan Baajuun oo ah dad
lagu yaqaan Ehlu diin, dagaal la'aan iyo martisoornimo.
Baajuun waa dadka aasaasay magaalada kismaayo magacuna waxuu
kasoo jeedaa luqadooda (Kisii= ceel; Maayo=biyo) waxay taxan
yihiin laga bilaabo Kismaayo ilaa Xuduudda Kenya. Waxaa
looga tagay qori maydan qaadan oo dagaalkii is xasuuqa kama
aydun qayb galin. Sidoo kale Jareer wayn waa dadka ugu cufan
oo beeralay ah kasoo bilow Bu'aale ku gee Kismaayo ayagaa
taxan oo sidii koronkorta urursan, iyagana waxaa looga tagay
dagaal-ooge muuqda malihidin, mana haystaan tikniko iyo
baaruud wax gumaadda.
Haddaba Maxaakiimta waa inay
dib isugu noqdaan oo qolo walba wixii ay dalkeeda ku
lahaydahay siisaa, haddii kale caddaaladii laga filayay
amase laga arkay waa naaqus. Tixgelin gooniya waa in
lasiiyaa dadka ehlu nabadeedka sida Baajuun, Jareer iyo
Banaadiriga. Maxkamdohow yaan la idinka raacin dadkaas
dulman oo galti dhulkeedii ka boobtay.
Daabaco
Boggan | Print
