Madaxweynihii hore ee dowladdii Carta C/qaasim Salaad Xasan ayaa shaley booqdey dugsiga Indhoolayaasha Alnuur ee magaalada Muqdisho, maadaama uu ka mid ahaa xubnihii bulshada ku dhiirageliyey in dadka Indhoolayaasha ah wax ka baro, wuxuuna C/qaasim soo kormeerey fasalada ay ardayda wax ku bartaan iyo waliba qaabka ay wax u bartaan, wuxuuna sheegey in Indhaha aysan aheyn kaliya in wax laga arko ee ay tahay Qalbiga, isagoo sheegey in 16-kii sano ay shacabka Soomaaliyeed ay ahaayeen kuwa qalbiga ka bukey.

Dr. C/qaasim Salaad Xasan wuxuu u soo jeediyey shacabka Soomaaliyeed ee dalka gudihiisa iyo dibaddiisa ku nool in dadkaasi indhaha la’ ay gacan siiyaan maadaama goobta hadda ay wax ku bartaan ay tahay goob ijraar ah, taasoo uu sheegey in dugsigu aanu awoodin, wuxuuna si gaar ah baaq ugu soo jeediyey dadka samafalayaasha ah iney il gaar ah ku eegaan carruurtaasi indhaha la’ ee doonaya iney wax la qeybsadaan bulshada kale ee indhaha leh.

Maamule ku xigeenka dugsiga C/fitaax Max’ed Daahir ayaa isna ka warbixiyey heerarkii uu soo marey dugsiga Indhoolayaasha ee Al-Nuur wuxuuna sheegey in ciddii dooneysa iney u kaalmeyso dadkaasi indhaha la’ iney deeqdooda u soo marin karaan Account Number 2039 ee Dahabshiil.

C/qaasim Salaad Xasan ayaa wuxuu ballan qaadey inuu intii awooddiisa ah uu gacan siin doono carruurtaasi oo uu sheegey inuu la yaabay sida ay wax u baranayaan, iyadoo carruurta wax lagu baro farta loo yaqaano Brail-ka .

Xiriirkii u dhaxeeyey Maxkamadaha iyo Kenya oo soo hagaagaya ...

Intii uu socdey Shirkii Khartuum fashilmey ayaa waxaa si aad ah u xumaadey xiriirkii u dhaxeeyey Maxkamadaha Islaamiga ah iyo dowladda Kenya kaddib markii dowladda Kenya maxkamaduhu ku eedeeyeen ineysan dhex dhexaad ka aheyn arimaha Soomaaliya, ayna tahay dowlad aan dooneyn in Soomaaliya ay gaarto horumar waana midda keentey in gebi ahaanba uu burburo shirka Khartuum tan iyo markii uu yimid Muqdisho guddoomiyaha Baarlamaanka Muqdisho, ayaa wadahadaladii dhex marey guddoomiyaha Baarlamaanka iyo Maxamadaha ayaa waxaa lagu soo dhaweeyey dowladda Kenya doorka ay ku leedahay arrimaha Soomaaliya gaar ahaan soo dhaweynta qaxootiga Soomaaliyeed.

Maalintii shaley aheyd ayaa waxaa Muqdisho yimid safiirka Kenya u fadhiya arrimaha Soomaaliya, Danjire Max’ed Cabdi Afey wuxuuna kulamo gaar ah la yeeshey mas’uuliyiinta ugu sarreysa Maxamadaha Islaamiga ah, waxeyna isla soo qaadeen sidii loo xoojin lahaa xiriirka Maxkamadaha iyo dowladda Kenya, waxeyna sheegeen mas’uuliyiintii ka qeybgashey kulanlkaasi mar ay la hadlayeen saxaafadda in wadahadaladii dhex marey mas’uuliyiinta Kenya iyo kuwa Maxkamadaha uu ku dhamaadey jawi isfaham.

Danjire Max’ed Cabdi Afey wuxuu sheegey in baal cusub uu u furmey Midowga Maxaakiimta Islaamiga ah iyo dowladda Kenya, kuwaasoo ku aaddan in la joogteeyo xiriirka labada dhinac, mar uu Danjiraha mar uu ka hadlayey joojintii duullimaadyadii diyaaradaha ee Soomaaliya iyo Kenya wuxuu yiri, “Arrintan oo kale horey ayey u dhici jirtey waxaan rajeynayaa iney in yar socon doonto, maxaa yeeley labada shacab waxaa ka dhaxeeya xiriir soo jireen ah oo dhinaca ganacsig ah. Sh. C/raxmaan Janaqow oo ah guddoomiye ku xigeenka Golaha Fulinta ee Maxaakiimta ayaa mar uu ka hadlayey wuxuu sheegey in wadahadaladii dhex marey iyaga iyo mas’uuliyiintii dowladda Kenya ay noqdeen kuwa si aad ah isugu soo dhaweeyey labada dhinac, waxaana lagu ballamey in la joogteeyo xiriirka labada dhinac ee Maxaakiimta iyo dowladda Kenya.

C/llaahi Yuusuf oo kulan degdeg ah la yeeshey Saraakiishiisa Ciidamada..

Madaxweynaha dowladda Federaalka ee Soomaaliya C/llaahi Yuusuf Axmed ayaa kulamo degdeg ah la yeeshey saraakiishiisa ciidamada ee ku sugan magaalada Beydhabo wuxuuna kulankaasi ahaa mid looga hadleyey xaaladda ku soo korodhey dalka Soomaaliya gaar ahaan dagaaladii dhawaan ka dhacey deegaanka Bandiiradley.

Inkastoo aan la faahfaahin wixii ka soo baxey kulankaasi, haddana, warar ayaa waxey sheegayaan in saraakiishaasi lagu amrey iney heegan buuxa geliyaan ciidamada dowladda federaalka, sidoo kale Madaxweynaha wuxuu soo dhaweeyey go’aankii Golaha Wasiirada ee ahaa in heshiiskii ay wada gaareen Maxkamadaha iyo Shariif Xasan uu yahay mid shakhsiyadeed

kooxda Dekedaha oo xaflad dhiiragelin ah u sameeysey  cayaartoyda kooxdooda...

Guddoomiyaha Xiriirka Soomaaliyeed ee K/cagta Muxuddiin Xasan Cali (Darbaweyne) ayaa ka qeybgaley xaflad dhiiragelin ah oo maamulka kooxda Dekedaha u sameysey ciyraartoyda kooxda Dekedaha, kaddib markii uu soo gabegeboobey horyaalkii 35-aad ee K/cagta Soomaaliya.

Xafladan oo ay ka qeybgaleen 3-da Guddoomiye ku xigeen ee xiriirka Soomaaliyeed ee K/cagta, Saciid Max’ed Nuur (Saciid Mugaambe), Cali Saciid Guuleed iyo Salaad

Macallin Max’ed (Salaad Gaab), xubnaha xiriirka Soomaaliyeed ee K/cagta, ciyaartoyda Kooxda Dekedaha iyo marti sharaf kale, waxaa ugu horreyntii halkaasi hadal ka soo jeediyey Guddoomiyaha Naadiga Cali Jiinow, wuxuuna sheegey in sababaha ay u dhigteen xafladan ay tahay sidii ay sare ugu qaadi lahaayeen niyadda ciyaartoyda, waxaa kaloo halkaasi ka hadley xoghayaha xiriirka Soomaaliyeed ee K/cagta, Cabdiqani Saciid Carab, wuxuuna kooxda kula dardaarmey iney yeelato xarun, sidoo kale ciyaartoyda wuxuu u soo jeediyey iney sameeyaan isku xirnaan.

Waxaa kaloo xafladdaasi ka Hadley Guddoomiyaha Xiriirka Soomaaliyeed ee K/cagta Muxuddiin Darbaweyne, wuxuuna ku dheeraadey taariikhda kooxda Dekedaha, isagoo sheegey in Nadigu uu soo marey heerer kala duwan, wuxuu kaloo sheegey in Xiriirka Soomaaliyeed ee curdanka ah uu gacan siin doono kooxaha Soomaaliyeed, iyo baahida kale ee Isboorti ee dhinac K/cagta ah.

Waxaa kaloo ha dadley Guddoomiyaha Olombikada gobolka Banaadir Xaaji Cabdulle Macallin, wuxuuna kula dardaarmey ciyaartoyda Naadiga iney halkaasi ka sii wadaan isku xirnaantooda, waxeyna xafladdaasi ku dhammaatey sidii loogu talagaley, oo ku dheehneyd jawi farxadeed.

Golaha Midnimada iyo Badbaabada oo si taxadar leh u soo dhaweeyey..

Golaha Midnimada iyo Badbaadada Soomaaliyeed ayaa shaley soo saarey war Saxaafadeed uu kaga Hadley doorashadii Mareykanka iyo doorka Carabta ee Dunida Islaamka, waxaana war saxaafadeedkaasi lagu sheegey in Goluhu uu si taxadar leh u soo dhaweynayo doorashadii Mareykanka ee uu aqlabiyaddii labada gole ku guuleystey xisbiga Dimuquraadiga, maadaama ay doorashadaasi ay saameyn ku yeelatey arrimaha Siyaasadda, Dhaqaalaha iyo Gaashaandhiga.

Goluhu wuxuu sheegey in 12-kii sano ee Xisbiga Jamhuuriga uu maamulayey dalka Mareykanka awooddii Mareykanka waxey noqotey musiibo caalami ah, gaar ahaan adduunka Muslimka iyo Soomaaliya.

Wuxuu kaloo sheegey Goluhu in doorashadani ay caddeyneyso in Shacbiga Mareykanku fahmey sida xun ee uu Xisbiga Jamhuurigu u adeegsadey awooddii Mareykanka ee adduunka, sidoo kale. Goluhu wuxuu bogaadiyey doorka wadajirka ah ee Jaamacadda Carabta ka qaadaneyso arrimaha Dunida Islaamka, gaar ahaan, khilaafka Soomaaliya iyo qadiyadda Falastiin, waxaan war-saxafadeedkaasi ku saxiixnaa Xoghayaha golahahaasi Xuseen Salaad (Qoor-gaab)

Idaacad loogu magac darey Xurmo oo laga furey Muqdisho..

Mar aan booqadey xarunta Idaacadda Xurmo ee Daarta Soobe, ayaa waxaa halkaasi nagu soo dhaweeyey guddoomiyaha Hay’adda Inxa oo ah midda hormuudka u ah Idaacaddaasi, Mudane C/naasir Axmed Cusmaan, wuxuuna sheegey in Idaacadani ay ugu talagaleen iney ka hadasho nabadda, isu soo dhawaanshaha bulshada iyo horumarinta waddanka.

C/naasir wuxuu sheegey in Idaacaddani ay mowjadeedu tahay FM 105MHZ, wuxuu sheegey iney saacado kooban hawada ku jiri doonto, wuxuuna sheegey in Idaacaddu aysan xayeysiin doonin Caana-Booraha, Sigaarka, daawooyinka iyo wax walba oo wax u dhimaya horumarka waddanka

W/D Amiin Yuusuf Khasaaro
E-Mail amiinkhasaaro@hotmail.com