Wararkii Nov 12, 2006
- Maxaakiimta kaddib oo uu dhul
boob si xoog leh loogu hayo Goobihii Qaranka.
- Kenya oo joojineysa Duulimaadka
Diyaaraha tegaya Soomaaliya
- Ra’isul Wasaare Geeddi iyo
Golihiisa Wasiirada..
- Maxkamad Islaami ah oo looga
dhawaaqay..
- Gole la magac-baxay golaha
Suugaanleyda oo..
- Hablo u shaqaynayay Radio
Hargaysa oo shaqadadoodii ku waayay labiska Xijaabka.
Maxaakiimta kaddib oo uu dhul boob si
xoog leh loogu hayo Goobihii Qaranka.
Waxaa maalinba maalinka ka dambeeya sii xoogeysanaya dhul boobka lagu
hayo hantidii qaranku lahaa tan iyo markii ay Maxaakiimtu la wareegeen
inta badan Koonfurta Soomaaliya, waxa uuna dhul boobka ugu xoogani ka
socdaa Magaalada Muqdisho gaar ahaan goobihii danta guud ee bulshada ka
wada dhexeysay.
Waxaa guryo dhaadheer iyo dabaqyo laga dhistay dhul dan guud, waxaa
sidoo kale sii xoogeystay iska hor imaadyada dhul boobka, iyadoo
maalintii doraad ahayd agagaarka warshadda Kabka dhul boob halkaasi ka
socday uu ku dhintay hal qof.
Maxaakiimta Islaamiga ah oo dhistay Maxkamad u gaar ah ayaa ilaa iyo
haatan aysan jirin wax laga qabtay, iyadoo Maxaakiimta looga fadhiyey in
ay burburiyaan dhulkii danta guud ee la dhistay iyo waliba in ay
shacabka ka saaraan Wasaaradihi, Iskuulaadkii, Derjiinooyinkii iyo gobo
kale oo muhiim ah, waxaana dhul boobka haatan socda si aad ah ula yaaban
qaar ka mid ah shacabka Soomaaliyeed oo iyagu sugayey inay Maxaakiimtu
wax ka qabtaan.
Dowladda Kenya oo lagu cadaadiyey inay
gebi..
Dowladda Kenya ayaa lagu cadaadiyey i nay gebi ahaanba joojiso
duulimaadyada tagaya wadanka Soomaaliya, ha noqdaan kuwo Beecmushtar iyo
kuwa kalaba ee ay adeegsadaan Hay’adaha Samafalka, waxa uuna
cadaadiskaani ka yimid dowladda Mareykanka kaddib markii Dowladda
Mareykanku sheegtay inay diyaaradaha tagaya Soomaaliya ay halis gelin
karaan ammaanka dalka Kenya. Dowladda Kenya ayaa la sheegay inay u
hogaansami doonto cadaadiskaasi, waxayna shalayba bilowday in ay joojiso
qaar ka mid ah diyaaradihii tagayey Soomaaliya.
Mas’uuliyiinta Diyaaradaha ayaa waxaa
la sheegay in ay si aad ah uga xumaadeen joojinta Duulimaadyadaasi,
waxayna ku tilmaameen mid aan faa’iido uga jirin wadamada Kenya iyo
Soomaaliya oo xiriirkooda beecmushtar mudo fog soo tixnaa, waxay kaloo u
soo jeediyeen Doweladda Kenya in ay il gaar ah ku eegto arrimahaasi.
Sidoo kale waxaa arrintaani si aad ah uga carooday ganacsatada Wadanka
Kenya oo iyagu sheegay inay faa’iido weyn ku qabeen ganacsiga kala
dhexeeya Wadanka Soomaaliya, waxayna ka codsadeen Dowladda Kenya in ay
dib uga laabato arrintaasi. Su’aasha isweydiinta mudani waxay tahay
wadanka Kenya waxaa sanad kasta Soomaaliya ka soo gala malaayiin doolar
oo dhinaca ganacsiga ah siiba ka ganacsiga Qaadka, hadda ganacsatada
Kenay maxay sameyn doonaan, iyadoo dhanka laga yaabo in Soomaaliya laga
soo dhaweeyo gaar ahaan maamulka Maxaakiimta Islaamiga ah oo iyagu aad u
daneynaya in gebi ahaanba la joojiyo ka ganacsiga Qaadka iyo Sigaarka.
Ra’isul Wasaare Geeddi iyo
Golihiisa Wasiirada..
Ra’isul Wasaare Cali Max’ed Geeddi oo shalay shir guddoominayey shirkii
golaha Wasiirada ee Dowladda Federaalka ku yeesheen Magaalada Baydhabo
ayaa waxaa si weyn looga hadlay arrimo ay ka mid ahaayeen heshiiskii ay
dhawan wada gaareen Guddoomiyaha Baarlamaanka iyo Golaha Maxaakiimta.
Dood dheer iyo falanqeyn kaddib waxay golaha Wasiiradu isku raaceen in
heshiiskii uu Guddoomiye Shariif Xasan la galay Maxaakiimta Islaamiga uu
ahaa mid shaqsiyadeed oo aan ka tarjumeyn hadafka Dowladda Federalka.
“Shariif Xasan waxa uu ku xadgudbay axdigii Dowladda, waxa uuna si gaar
ah faraha ula galay golayaashii Dowladda” ayaa lagu yiri Shirkaasi
Jaraa’id.
Waxaa kaloo shirka lagu sheegay inay jiraan shaqsiyaad ka tirsan
Dowladda Federaalka oo doonaya in ay burburiyaan Dowladda Federaalka oo
uu sheegeen in laga soo maray dhibaato aad u weyn.
Guddoomiyaha Baarla-maanka ilaa iyo haatan kama jawaabin go’aanka ka soo
baxay golaha Wasiirada, sidoo kale Maxaakiimtu iyana wax hadal kama soo
saarin qodobada ay soo saareen Golaha Wasiirada ee Ra’isul Wasaare,
qodobada ay soo saareen waxaa kaloo ka mid ahaa in aan marnaba wada
xaajood lala galin Maxaakiimta oo ay ku tilmaameen kuwo aan fulineyn
go’aamada la gaaray.
Maxkamad Islaami ah oo looga
dhawaaqay..
Wararka naga soo gaaraya Magaalada Gaalkacyo waxay sheegayaan in
maalintii shalay ahayd Magaaladaasi looga dhawaaqay maxkamad Islaami ah
oo loogu magacdaray Nasrudiin oo ay yeelaneyso Beesha ku dhaqan
Koonfurta Gaalkacyo, waxaana ka qaybgalay furitaankeedii Culuma’udiin,
Odoyaal iyo Waxgarad ka tirsan Koonfruta Gaalkacyo.
Culima’udiinkii halkaasi ka hadlay ayaa waxay sheegeen in wixii haatan
ka dambeeya ay ku dhaqmi doonaan shareecada Islaamka. Warar ayaa waxay
sheegayaan in sababaha loo aasaasay maxkamadaani ay tahay mid loogu
googol-xaarayo soo dhaweynta golaha Maxaakiimta kaddib markii uu khilaaf
soo kala dhex galay maamulkii dhawaan looga dhawaaqay Koonfurta
Gaalkacyo iyo maamul gobaleed Puntland, waxayna mas’uuli-yiinta Gal-Mudug
ay sheegeen in ciidamada Puntland ee ku sugan deeganadooda ay si dhaqsi
leh uga baxaan.
Gole la magac-baxay golaha
Suugaanleyda oo..
Shir ay isugu yimaadeen fanaaniinta Soomaaliyeed ee ku sugan magaalada
Muqdisho ayaa waxay ka wada hadleen sidii ay uga qayb-qaadan lahaayeen
wacgelinta bulshada marxaladaan lagu jiro loona heli lahaa suugaan ka
tarjumeysa ku dhaqanka Diinta Islaamka iyo waliba difaaca Diinta, Dalka
iyo Dadka Soomaaliyeed. Dood dheer kaddib ayaa waxaa halkasi looga
dhawaaqay gole la magac-baxay Golaha Suugaanleyda Soomaaliyeed, waxaana
Guddoomiye loogu doortay Abwaan C/qaadir Axmed Cabdule (ciro),
Guddoomiye ku xigeena waxaa loo doortay C/kariin Shire Xuseen,
Xoghayahana waxaa loo doortay Max’ed Maxamuud Sahal (Shido).
Golahaan ayaa sidoo kale waxa uu isku dubaridi doonaan sidii uu uruurin
lahaa abwaanada Soomaaliyeed meel kasta oo ay joogaan, iyagoo sheegay in
ay suugaantooda ku saleynaan doonaan ku dhaqanka Shareecadda Islaamka.
W/D Amiin Yuusuf Khasaaro
E-Mail
amiinkhasaaro@hotmail.com
Hablo u shaqaynayay Radio Hargaysa oo
shaqadadoodii ku waayay labiska Xijaabka.
Laba hablood oo ka mid ah shaqaalaha
radio hargaysa ee Maamulka la magac baxey Somaliland ayaa shaqadoodii ku
waayay xiritaanka labiska xijaabka
Labadan Gabdhood oo ka tirsanayaa maamulka iyo shaqaalaha idaacada radio
hargaysa ayaa saxaafada waxa ay u sheegeen in la yaab ku noqotay kadib
markii uu wasiirka warfaafinta ee Maamulka la magac baxday Somaliland
Axmed Xaaji Daahir Cilmi uu ku wargeliyay in aysan shaqada tegi karin
labadaan gabdhood iyaga oo lebisan xijaabka.
Labadan gabdhood oo ku adkaystey in aysan iska bixin labiska xijaabka
ayaa waxa uu wasirka warfaafinta maamulka somaliland amar ku bixiyay in
aysan idaacada labadaan gabdhood aysan soo gali karin.
Mid ka mid ah labadan suxufi oo lagu magacaabo Hoodo Imaan Maxamed ayaa
waxaa ay sheegtay in talaabadan uu qaaday wasiirka wafaafinta somaliland
ay tahay mid qofkasta oo leh damiir fiyow oo islaam ah uusan ku
talaabsan karin waana wax aan layaabney ayay tiri hoodo.
Sidoo kale suxufiyada kale ee la yiraahdo Zeynab Yusuf Axmed ayaa
iyaduna sheegtay in ay ilaa iminka qaadan waa uu ku noqday falka
wasiirku Warfaafinta somaliland uu nagula kacey.
Labadan Gabdhoood oo ka tirsan shaqaalaha iyo maamulka idaacada radio
hargaysa ayaa waxa ay ugu baaqeen madaxweynaha Somaliland Daahir Riyaal
kahin in uu arrinta wax ka qabto.
Labadan gabdhood mid ka mid ah u warameysey saxaafada gudaha ayaa waxa
ay tiri arintan uu nagula kacey Wasiirka Warfaafinta somaliland waa mid
xaqiiqadii aan si aad ah ola yaabney waxay kaloo tiri markii aan wax ka
baranayay dalka kenya ayaan watey xijaabka haatan oo aan joogo
dhulkaygii hooyo waa adag tahay si aan iskaga dhigo xijaabka.
Yusuf Maxamed Ismail (Gaduudow)
E-mail yusufgaduudow@hotmail.com
Daabaco
Boggan | Print
SOOMAALIDA
DIBADDA IYO ISBEDELADA CUSUB!:: Qormadii Sh. Xasan
Jaamici... 
Hay’adda
DBG oo soo Bandhigtay Khatarta 15 Haamood oo ku soo Caariyey Xeebaha
Soomaaliya...