Minneapolis: Cabdirisaaq Xaaji Xuseen oo Tacsi u diray Qoyskii
ay ka geeriyootey Sucdi Cabdille Cusmaan
TACSI :
Cabdirisaaq, Cabdinaasir, Cabdiwaaxid,
Cabdiqafaar iyo Cabdiwahaab Xaaji Xuseen, iyo dhammaan qoyska Reer Xaaji Xuseen
waxay tacsi tiiraanyo leh u dirayaan qoyskii ay ka geeriyootay Alla-u-naxariisey
Sucdi Cabdille Cusmaan (Dayuurad), siiba waalidkeed - Cabdille Cusmaan (Dayuurad)
iyo Asli Sugulle Cali Dafle iyo walaalaheed iyo ehelada kale ee marxuumadda.
Geeridu waa xaq, laakiin waxaa jirta mid aan
sahal looga samri karin. Sucdi Cabdille waxay ku dhalatay magaalada Galdogob, oo
kamida gobalka Mudug (Soomaaliaya). Waxayse ku kortay Caasimadda Muqdisho. Waxay
ka kamid ahayd dadkii dibedda u qaxay oo soo galay dalka Mareykanka. Waxay ka
qalin jabisay Jaamacadda Minnesota University ee magaalada Minneapolis. Dabadeed
waxay isku qortay laantaTakhtarnimada (medicine), taasoo ay dhigatay sannadkii
ugu horreeyey. Sucdii mar kasta heer sare ay kaga jirte waxbarashada. Si lama
filaan ah ayaa Sucdi u geeriyootay. Dhamaan dadkii, siiba eheladii iyo dhallintii ay si gaar ah u yaqiin, waxay Sucdi ku sifeeyeen inay ahayd: “mid
la’is tusay iyo mid aan la calfanayn”. Iyadoo aan loo firiin Sucdi xaghee ku
dhalatay iyo yay u dhalatay toona, dhammaan Soomaalida ku nool magalaada
Minneapolis iyo agagaarkeed waxay isku si uga xumaadeen oo uga tiiraanyoodeen
geerida lama filaanka ah ee Sucdi Cabdille. Waxaan Ilaah uga baryeynnaa Sucdi in
hooygeeda uu ka dhigu Jannatul Firdows, Annagoo dhanna, siiba waalidkeed iyo
walaalaheed, in samir iyo iimaan naga siiyo. Aammiin.
Sucdi Cabdille Cusmaan |
hussen100@yahoo.com | Mpls, MN, USA
Geeddi oo deg ugu yeeray Wasiirkiisa Maaliyadda
Ra’isul Wasaare Geeddi oo
shalay u ambabaxay magaalada Nairobi ayaa markii uu gaaray magaalada Nairobi,
waxa uu kulamo la yeeshay mas’uuliyiin ka tirsan Hay’adaha Samafalka oo ay isla
soo qaadeen sidii hay’adahaasi gacan u siin lahaayeen Dowladda Federaalka.
Ra’isul Wasaare Geeddi ayaa
waxa uu si dhaqsi leh ugu yeeray ku xigeenka Ra’isul Wasaaraha ahna Wasiirka
Maaliyadda Saalim Caliyow Ibrow, waxaana la filayaa in Saalim uu maanta u
ambabaxo Magaalada Nayroobi, sababaha loogu yeeray ayaa lagu sheegay in ay tahay
si deeq bixiyayaasha loo hor dhigo Miisaaniyadda Dowladda Federaalka oo gaareysa
34 Milyan oo Doolar oo lixda bilood ee sanadkaan ka dhiman ah, waxaana maalintii
doraad ahayd ansixiyay Golaha Wasiirada mar ay kulan ku yeesheen Baydhabo.
Warar ayaa waxay sheegayaan in
Ra’isul Wasaaraha uu gali doono baaritaan caafimaad kaddib markii maalmihii la
soo dhaafay uu ku xanuunsaday Magaalada Baydhabo, waxaana howshaan ansixinta
Miisaaniyada wadi doona Wasiirka Maaliyadda Saalim Caliyow Ibrow. Tagista
Ra’isul Wasaaraha ee Nayroobi waxay ku soo beegan tahay xili uu Golaha
Baarlamaanka uga fadhiyay waxa laga yeelayo Wasiirada hubeysan ee ku sugan
Muqdisho, kuwasoo dagaal kula jira Midowga Maxaakiimta Islaamiga ah, inkastoo
Wasiirka dib u dhiska iyo dib u dejinta uu sheegay in uu u hogaansamayo amarka
Ra’isul Wasaaraha.
500 oo Booliis ah oo maanta tababar uu uga furmayo
xerada…
Wararka naga soo gaaraya
magaalada Baydhabo waxay sheegayaan in 500 oo Booliis ah oo laga keenay Gobalada
Dalka uu maanta tababar uga furmayo xerada Labaatanjirow oo dhowr Kiilo Mitir u
jirta Magaalada Baydhabo.
Ciidankaan ayaa waxaa loo
tababarayaa siday u hanan lahaayeen ammaanka iyo xasiloonida magaalada Baydhaboa,
waxaana mudada uu socdo tababarkaan la sheegay in qarashka ay bixin doonto
Dowladda Federaalka, waxaana shalay Saraakiisha ciidamadaasi la shiray wasiiro
ka tirsan Dowladda Federaalka.
Deegaanka Manaas ayaa iyana
waxaa ku xareysan labo kun oo askari kuwaas oo xoogooda laga keenay Maamul
Gobaleedka Puntland waxaana la sheegay in ay yihiin ciidamo qaran oo gacan ka
gaysan doona Nabadgelyada dalka.
Max’ed Dheere oo ganta ku dhigay Gaari siday hub…
Ciidamo daacad u ah Max’ed
Cumar Xabeeb (Max’ed Dheere) ayaa gacanta ku soo dhigay Gaari 110 ah oo la
sheegay in uu siday hub saanad, waxaana gaarigaasi uu ku soo jeeday Magaalada
Muqdisho iyadoo markii la qabanayayna uu marayay meel dhowr Kiilo Mitir u jirta
magaalada Jowhar, gaariga ayaa markii la qabtay waxaa ku yimid cilad, kaddib
rasaastii iyo hubkii uu siday ayaa lagu rogay Gaari TM ah oo haatan la sheegay
in uu dhex yaalo saldhiga Booliiska Magaalada Jowhar.
Gaarigaan ayaa waxaa hubkii
saarnaa u badnaa qoryaha Dhashiika ah, waxaana la sheegay in hubkaani ay
lahaayeen dad ganacsato ah oo ka soo iibsaday qaar ka mida Gobalada dalka si ay
uga ganacsadaan.
Qabshada hubkaaan waxa uu ku
soo beegmay xili ay dagaalo culusi ka socdaan Magaalada Muqdisho oo u dhexeeya
Midowga Maxaakiimta Islaamiga ah.
120 qof oo ka kala socday Bulshada rayidka ah oo aqoon
is weydaarsi uga furmay …
Waxaa maalintii shalay ahayd
Hotel Ambassador ee Magaaladda Muqdisho ka furmay aqoon si-weydaarsi loo qabtay
120 qof oo ka kala socday qaybaha kala duwan ee bulshada, waxaana aqoon is-
weydaarsigaasi soo qaban-qaabiyay Hay’adaha CRD, COGWO iyo FPENS iyagoo gacan ka
helaya Jaamacadda Muqdisho, Banaadir iyo Machadka Simad.
Aqoon is weydaarsigaan ayaa
waxaa uu ka mid yahay mashruuca loogu magac daray JNA (Joint Needs Assessment),
waxaana shalay looga hadlay Baahida Bulshada ku nool Gobalka Banaadir ay u
qabaan dhinaca dib u heshisiinta, nabadgelyada, Tacliinta, Caafimaadka,
Nadaafadda iyo deegaanka, Beeraha, HOrumarinta Xoolaha iyo Horumarinta
kaabayaasha dhaqaalaha.
Xubnihii ka qaybgalay ayaa
waxay hoosta ka xariiqeen in dadweynaha ku nool Gobalka Banaadir ay u baahan
yihiin dib u heshiisiin dhab ah, taasoo ay sheegeen in ay ku imaan karto
Nabadgelyo.
Aqoon is-weydaarsigaan oo
socon doona mudo labo maalmood ah, ayaa ujeedadiisu tahay sidii loo heli lahaa
ama qiimeyn loogu sameyn lahaa baahida dadweynaha ee ku nool Gobalka Banaadir,
waxaana mashruucaan socon doona mudo aad u fog, iyadoo xitaa la gaarsiin doono
sida lagu wado dhamaan gobalada uu wadanku ka kooban yahay, si loo helo baahida
jirta.
Midowga Jabhadda xoreynta Soomaali Galbeed
oo dagaal culus la gashay...
15/5/2006 ayaa waxaa dagaal
culusi ka dhacay halka lagu magacaao Bali Sareedo oo ka tirsan Gunagaada ee
Gobalka Dhagax-Buur, waxa uuna dagaalkaasi u dhexeeyay midowga Jabhadda
Xorreynta Soomaali Galbeed iyo ciidamada Itoobiya.
Dagaalkaas ayaa ciidamada
Itoobiya la sheegay in looga dilay 39 Askari, waxaana looga dhawaacay dhowr
askari oo kale., dagaalkaan oo mudo dheer socday ayaa waxaa dhinaca Jabhadda uga
geeryooday lix nin oo magacyadooda kala yihiin C/xakiim Xuseen Salaad, Muscab
Daahir Badal, Shukri Muxumad Kheyr, Mukhtaar Guure, Maxamuud Mujaahid iyo
Ismaaciil Jano Doon.
Dagaaladaan ayaa qayb ka ah
dagaalada ay jabhaddu kula jirto ciidamada Xabashida, waxaana Warbixintaan
wargeyska soo gaarsiiyay C/llaahi Cimsaan Gaashaan oo ka mid ah Saraakiisha
Jabhadda.
Dagaalo xoogan oo shalay ka dhacay
Muqdisho...
Maaltinii shalay ahayd ayaa
dagaalo aad u xoogan oo la isku adeegsaday hubka culus iyo midka fudud waxay ka
dhaceen deegaanka Sii-Sii ee Degmooyinka Yaaqshiid iyo Kaaraan, waxana uu
dagaalkaasi u dhexeeyay Midowga Maxaakiimta Islaamiga ah iyo Isbahaysiga la
dagaalanka Argagixisada.
Dagaalkaan ayaa waxaa la
xaqiijiyay inay ku dhinteen ilaa iyo lix ruux oo badankoodu ahaa dad rayid ah oo
rasaastu ugu tagtay guryahooda, waxa uuna dagaalkaani ku soo beegmay xili
Odoyaal iyo waxgarad ka tirsan Beesha Mudullood ay labada dhinac ka wadeen waan
waan.
Midowga Maxaakiimta Islaamiga
ah waxay iyagu horey u ogolaadeen waan waantaas ay wadeen odoyaasha iyo
waxgaradkaasi, balse dhinaca Isbahaysiga waa ay diideen in ay xabad joojin ah
sameeyaan.
Dadweyne shalay guryahoodii ku
soo laabtay ayaa mar kale waxaa la soo darsay walwal iyo walbahaar kaddib markii
uu dagaalkaan uu sabab u noqday, waxaana la arkayay iyadoo dib uga soo laabanaya
goobahaasi.
Qaar ka mida beelaha Digil iyo Mirifle oo
isu celiyay gawaari iyo hub ...
Maalintii shalay
ahayd waxaa beelo ay ka soo kala jeedaan Max’ed IBraahim Xaabsade iyo Shiikh
Aadan Madoobe isku celiyeen todobo Baabuur oo ay kala dhaceen, waxaana
arrintaani ka shaqeeyeen odoyaal iyo waxgarad ka tirsan Beelahaasi.
Gawaarida la
celiyay waxaa ku jiray Qorey Dhashiika ah oo horey loo dhacay mid ka mid ah
beelahaasi, Iyadoo sidoo kale la isku celiyay, waxaana soo dhaweeyay dadweynaha
ay ka soo kala jeedaan labadaasi beelood.
Isku celintaan
gawaaridaani waxay wax ka tareysa ammaanka Magaalada Baydhabo oo waayadan ahayd
mid isa soo tareysay, inkaatoo Magaalada Baydhabo ilaa iyo haatan aan loo
sameynin wax ammaan ah iyo ciidamo suga ammaanka Magaalada Baydhabo oo xarun ku
meel gaara u ah Dowladda Federaalka, waxaana isku khilaafsan Beelaha Dega
Magaalada Baydhabo.
Heshiiskaan la
isugu celiyay gawaaridaan ayaa waxaa mudo ka soo shaqeynayay Odoyaasha iyo
waxgaradka Beelaha Digil iyo Mirifle.
W/D: Amiin Yuusuf Khasaaro
E-Mail:
amiinkhasaaro@hotmail.com
Faafin: SomaliTalk.com | May 25, 2006
Cabdi Qaybdiid oo
shuruud adag hordhigey Guddigii dhex dhexaadinta ee…
»Soomaali
ku hor banaanbaxday safaaradda US ee London..
»Geeddi
oo maanta u ambabaxaya Nairobi..
»Xafladdii
Munaasabada Caleemo Saarka Garaadka oo...
»Qabridaharre:
Niman gumaysiga u adeega oo dadwyanaha..
»Bosaso:
Ururka dhakhaatiirta oo bixiyey mucaawino...
Wararka oo dhan
ka akhri halkan.... May 24
Daabaco
Boggan | Print