Uncle Sam’s Alliance (Warlords of Mass Destruction)

 Ilaah baa mahad leh. Nabadgelyo iyo naxariis nabi Muxamed korkiisa ha ahaato. 

Maaddaama la hadalhayo bannaanbax looga soo horjeedo Maraykanka oo lagu qabanayo magaalada London ayaan rabaa inaan hal-ku-dhigyo ku soo qoro halkan si dadku  usoo qaataan boorar iyo looxyo ay hadalladaasi ama kuwa la mid ah ku qoranyihiin. 

“The law of the Bush” maxaan ka wadaa? Akhristayaal waxaa la sheegaa in nin reer baaddiye ah oo dad tujinayey uu akhriyey mar uu akhrinayey Suurat Ar-Ruum: ALIF LAAM MIIM Θ QULIBATU ATTURKU! Markaasaa dadkii ku dhaheen war Turki maahee waa Ruum. Dabadeed ninkii wuxuu yiri maxaa faraq ah oo u dhaxeeya! Hadda waxaan uga danleeyahay maxaa faraq ah oo u dhaxeeya oraahda Ingiriiska ah ee oraneysa “ the law of the jungle” iyo taas kor ku xusan. Sidoo kale waxaad mooddaa in Bush leeyahay: “a warlord in the Mogadisho is worth two in the Baydhabo. Muhiimadda Xamar leedahay darteed ayuu u doortay kuwa Xamar jooga si ay u damiyaan Nuurka Ilaahay ee Xamar ka baxaya. 

Madaxweyne Bush magaciisa ayaa laga fahmayaa qofkuu yahay. Waa ninka Soomaali oo intaas oo sano dowlad la’aan ku soo jirtay ooy sidoo kale haysato mid ka mid ah abaarihii ugu xumaa ee weligeed soo marta Soomaaliya; meeshuu ka caawinlahaa shacabkaas Soomaaliyeed ee duunyo iyo dalagba ka martay sidoo kalana intaas oo carruur iyo waayeel ahiba ka dhinteen; taageero siiyey niman la isku raacay iney yihiin kuwii ugu xumaa ee taariikhda adduunka soo mara. Xitaa Hitler wey ka liitaan maxaa yeelay Hitler wuxuu ku doodayey in dadka iyo dalka Jarmalku ka sarreeyaan dadka iyo dalalka kale. Wuxuu leynayeyna waxaa u badnaa dad aan Jarmalka asal ahaan ka soo jeedin. Ma waxaad maqasheen cid Hitler ku tiri dadkaaga laa? Halka dagaaloogayaasheennu leeyihiin Xamar iyo Soomaaliya dan kama lihine waxaan marka hore caawineynaa Maraykan iyo wadamada dariska ah! 

Runtii ahaantii Soomaaliya waxay taqaaney magacii ahaa USAID ee  ku dulqornaanjiray cawimo kala duwan oo naga soo gaarijirtay Maraykanka. Magacaas wuxuu u taagnaa: United States Agency for International Development  laakiin deeqda Maraykanku hadda noogu deeqay waxay noqoneysaa sidan: Uncle Sam’s Alliance for International Destruction “USAID” oo ah dagaaloogayaasha Xamar. 

War bal fiirsha caqliga dagaaloogayaasha Xamar! Midkood baa leh: dadkii maxkamadaha ka dhintay oon dhaqsaha loo duugin waxaa jirkooda galay dixri sidoo kalana waa soo ureen! Sida caamka ah qofkastoo dhinta ha ahaado muslim ama gaal jirkiisa waxaa galaya dixri iyo qurun marka laga reebo nabiyaasha iyo ciddii kale ee Ilaahay u garto laakiin caam ahaan waa sidaas. Qisooyin la sheegsheego waa jiraan laakiin weligay ma maqal cid tiraahda qofka shahiidka ah ee dhinta jirkiisu ma qurmo ama dhulku ma cuno. Keliya waxaa axaadiistu sheegtaa in marka qiyaamaha la isa soo saaro uu shahiidku yimaado isagoo dhaawiciisu cusubyahay sidoo kalana dhiiggiisu ka udgoonyahay miskiga. Marka goormaa xaafadda sii sii noqotay maxsharkii?Marka farqi baa u dhaxeeya arwaaxda iyo jirka. Jirka ciid buu ka yimid waana in loo celiyaa. WALLEE dadkii ay kuwaasi horjooge uu noqdaan waa hoogayaan. 

Marka waxaan sheekada kusoo xirayaa in laga soo qeybgalo bannaanbaxaas laga sameynayo safaaradda Mareykanka horteeda sida la sheegayo. Qof kasta waxaa loo qabanayaa waxa niyaddiisa ku jirta. Marka dad baa ka damqanaya waxa Maraykanku ku hayo diinta, dalka iyo dadka Soomaaliyeed; qaarkeenna waxaa dhibaya taageerada uu Maraykanku siinwaayey dagaaloogayaashooda madaxda ah. Si kastaba ha ahaatee dan baa noogu jirta ineynu halkaas tagno.