Ma Maraykan baa Itoobiya naga Hortaagan

Ilaah baa mahadleh. Nabadgelyo iyo naxariis nabi Muxamed korkiisa ha ahaato. 

Ma Maraykan baa Itoobiya naga hortaagan? Wasiirka amniga, Qanyare wuxuu yiri haa! Laakiin sida dad kale sheegeen arrintu saas maahane waxaa naga hortaagan Ilaah. Maaddaama aan rabo inaan soo gudbiyo qeybtii koowaad ee: ka qabiil ku Qur’aan haddii Ilaah idmo ayaan rabaa keliya inaan xuso dhowr qodob oo cinwaankaas kore ku saabsan: 

1. In uusan Maraykan Itoobiya naga hortaagneyne ee Ilaah naga hortaaganyahay.
2. Dowladda la sheegayo oon timahoodu dhan u xiirmin. Wakaas Qanyare leeyahay waxaan heshiis la soo galay Maraykan si Soomaaliya u badbaaddo halka C/hi leeyahay: waxa Maraykanku wado waa khalad ee yuusan dagaaloogayaal caawin ee annaga hanala soo xiriiro.
3. Caqliga maamulka Maraykanka oo adduunkii oo dhami la yaabbanyahay marba hadduu inta dagaalooge la shiro leeyahay haddaad saas yeeliweydaan waxaan idin ku soo deynayaa dowlado kale oo xor ah sida Itoobiya. Marka hadal baa uga furan wasaaradda arrimaha dibadda ee Itoobiya iyagoo leh: Maraykan ma adaa Itoobiya xukuma?
4. Halka Maraykanku ka taaganyahay shacabka Soomaaliyeed marba hadduu maalinba la shirayo dhurwaayadii intaas oo sano dadka iyo waddanka baabi’iyey.
5. In Qanyare oo wasiir sheeganaya uu u gefo Itoobiya isagoo leh: haddaannaan Maraykana suu rabo u yeelin waxuu waddanka kusoo fasaxayaa Itoobiya. Marka sidoo kale waa arrin ay Itoobiya ku qabsankarto Qanyare iyagoo sida Maraykanka dhihi kara: Itoobiya soo ma aha dal xor ah makaad leeyahay Maraykan baa soo fasaxaya? Waxaana filayaa iney dacwo u qabsandoonaan.
6. Inta Qanyare iyo waxa la halmaala ay danaha Maraykanka ka hadlayaan meeye koodii qarannimo? Muxuuse qofka Soomaaliga ah ee tiisii gabay u tarikaraa Maraykan iyo cid kale toona? Mise Xamar bey ka jirtaa oraah ah: tiisaa daryeeli waayaa mid kale daryeela?!
7. Isla wasiirka Qaryare oo ku ceshay hadalkii gefka ahaa ee ahaa: haddaan Maraykan la raalligelin waxaa Soomaaliya qabsanaya Itoobiya! Bal hadduu cid raalligelinayo muu Ilaaheygii Maraykan, Itoobiya iyo adduunkoo dhan lahaa raalligesho. Maxaase shukrigii Ilaah lahaa uu shisheeyaha u siiyey?
8. Waxaa qabiillooyin iyo dad ugu nasiibdarran kuwa ay nimanka noocaas ahi hogaamiyaan. Waxaana shaki iiga jirin iney meel daran ku furidoonaan.

 Marka qodobbadaas oo si ahaan qabiilka ula xiriira maaddaama dadka dagaaloogayaasha taageera ay qabiil ku raaceen intaas baan uga baxayaa waxaana ku xigidoona haddii Ilaah idmo maqaalkii ahaa: ka qabiil ku Qur’aan.