WARARKII MAY 6, 2006

• Itoobiya oo safaarad ka furaneysa Magaalada Baydhabo.

• Indha-Cadde “Mareykanka waxa uu igu yiri Shan Malyan qaado wan ku diidey..

• Max’ed Dheere “Yuusuf Indha-Cadde waa nin Hormuud u ah in uu Gabaadsiiyo..

• Dowladaha Yemen, Itoobiya iyo Soomaaliya oo si wadajir ah u codsadey…

• Faadumo X. Cali “Dhagxaanta iyo ciidda ay wada ku gonayaa may ku shubaan …

  ---

  

  ---

Itoobiya oo safaarad ka furaneysa Magaalada Baydhabo.

Warar aanu ka helnay Madaxtoonyada Dowladda Federaalka ee Magaalada Baydhabo ayaa waxay sheegayaan in maalmaha soo socda Magaalada Baydhabo ay xafiis safaaradeed ay ka furan doonto Dowladda Itobiya, waxaana furitaanka xafiiskaas ka soo qaybgali doona saraakiil sarsare oo ka tirsan Wasaaradda Arrimaha Dibadda ee Dowladda Itoobiya. Waxaa kalloo furitaanka xafiiskaas ka soo qaybgali doona Danjiraha Dowladda Federaalka u fadhiya Magaalada Adis-Ababa C/kariin Faarax Laqanyo. Furida Safaaraddan ayaa waxay noqoneysaa middii uu horeysay ee Dowladda Itoobiya ka furato Soomaaliya tan iyo markii ay dhacday Dowladdii Max’ed Siyaad, iyadoo dhawaan Magaalada Hargeysa ay Dowladda Itoobiya ka furatay Xafiis taasoo si weyn uga careysiisay dhamaan shacabka Soomaaliyeed, kuna tilmaamay xafiiskaasi mid ay Dowladda Itoobiya ku kala qaybineyso Bulshada Soomaaliyeed. Xildhibaanada Baarlamaanka ayaa iyagu si aad ah ugu kala qaybsan furitaanka safaaraddaani, qaarkood waxay sheegeen in Dowladda Itoobiya aysan safaarad ka furan karin gudaha Soomaaliya, waayo ayay yiraahdeen waa dowlad caddow ku ah qaranimada Soomaaliyeed, kuwo kalana waxay soo dhaweeyeen in Itoobiya aya ka furato xafiis Magaalada baydhabo taasoo ay sheegeen in ay wax ka taryso in ay wada shaqeyn dhex martoDowladda Federaalka iyo Dowladda Itoobiya, maadaama Dowladda Itoobiya ay ka mid ahayd dowladihii gacanta ka gaysatay shirkii dib u heshiisiinta Soomaaliyeed ee lagu qabtay dalka Kenya Madaxweynahana loogu doortay C/llaahi Yuusuf axmed

Indha-Cadde “Mareykanka waxa uu igu yiri Shan Malyan qaado wan ku diidey..

Yuusuf Max’ed Siyaad (Indha-Cadde) oo ah guddoomiyaha gobalka Sh/hoose ayaa waxa uu iska fogeeyay in uu wax lug ah ku lahaa dagaaladii ka dhacay Magaalada Muqdisho, isagoo sheegay in dagaaladaasi ay u dhexeeyeen midowga Maxaakiimta Islaamiga ah iyo Isbahaysiga la dagaalanka argagixisada balse uu isagu ugu yeeray Isbahaysiga Sheydaanka, mar uu ka jawaabay hadalo ka soo yeeray Max’ed Qanyare oo ahaa in Yuusuf Indha-Cadde uu gabaad siiyo kooxo argagixiso ah, ayaa waxa uu yiri Yuusuf Indha-Cadde “ma jiraan cid aan gabaad siiyo, waxaa wax gabaad siiya, waa Qanyare iyo wax la mid ah”, waxa uuna intaas sii raaciyay “Anigu Mareykanka waan la kulmay waxa uuna igu wargeliyay in aan qaato Shan Milyan oo Doolar, waana ka diiday, Max’ed Qanyarena goob joog ayuu ka ahaa markii aan lacagtaa ku gacanseyrayay, waxaana muuqata in Max’ed Qanyare uu xoogaa lacag ah ka helay Mareykanka”.

“Dadka Soomaaliyeed waxay u dagaalameen qabiil qabiil, dad baa doonaya in arrimaha Mareykanku wato ay kaga faa’iideystaan waxyaabo kale oo ay ugu horeyso aargoosi qabiil, marka waxan leeyahay Mareykanku waa in uu si toos ah noola soo xiriiro si ay noola ogaadaan xaqiiqda jirta” ayuu yiri Indha-Cadde oo ku daray “Max’ed Qanyare Waa Murusade, aniguna waxaan ahay Cayr, isagoo Murusadaa waxba igama soo dooni karo, isna waxba ka aan dooni karo, waxaan leeyahay beeshiisu ha ka digtoonaato waxyaabaha uu wado Max’ed Qanyare”.

Waxaa kale oo uu sheegay Yuusuf Indha-Cadde in haddii uu Max’ed Qanyare ka waantoobi waayo arrimaha wado ay noqon doonto Inshaa Allaah middii uu ku bixi lahaa.

Ugu dambeyntii mar wax laga weydiiyay bal in uu wali jiro xiriirkii isaga iyo Max’ed Dheere u dhexeeyay, waxa uu yiri “Horta dooni maayo in aan ka hadlo arrimahaasi, balse waxaan aaminsanahay in uu weli jiro xiriirkaasi, gaar ahaan dhinaceyga, hase yeeshee Max’ed Dheere ayaa waxa uu ku eedeeyay Yuusuf Indha-Cadde in uu yahay abaabulaha koowaad ee dagaaladii dhawaan ka dhacay Magaalada Muqdisho.

Max’ed Dheere “Yuusuf Indha-Cadde waa nin Hormuud u ah in uu Gabaadsiiyo..

Max’ed Cumar Xabeeb (Max’ed Dheere) oo ah guddoomiyaha Gobalka Sh/dhexe ayaa waxa uu sheegay in rag ay ka mid yihiin Yuusuf Indha-Cadde, Xasan Turki, Shiikh Xasan Daahir Aweys iyo Abuukar Cumar Caddaani ay yihiin rag gabaad siiya waxa uu ugu yeeray kooxaha argagixisada oo sheegay in ay dambi ka soo galeen wadama-doodii, waxaa la weydiiyay Max’ed Dheere cidda u xilsaartay in ay argagixiso ka goobaan Soomaaliya, isagoo ka jawaabayana waxa uu yiri “waxaa nagu qasabaya Wadaninimada, iyo Badbaadinta shacabka”, wuxuuna intaa sii raaciyay in raggaasi ay yihiin rag dhaqaale ka hela ragga ay hayaan.

Max’ed Dheere mar waxa laga weydiiyay in uu wali sidiisii u taagan yahay xiriirkii Dowlada iyo isaga, waxa uuna yiri “Sidii ayuu u taagan yahay xiriirkii aan dowladda la lahayn, balse C/llaahi Yuusuf ma ahan nin isku keenaya shacabka Soomaa-liyeed, ee waa nin xitaa isku diraya Beelaha Hawiye.

Sidoo kale waxaa wax laga weydiiyay in uu wali jiro heshiiskii dhex maray isaga iyo Guddoomiyaha Gobalka Sh/hoose Yuusuf Indha-Cadde waxa uuna yiri “markii aan ogaaday in uu ka mid yahay kooxaha gabaad siiya dambiilayaasha, isla markaana uu hormuud yahay dagaaladii ka dhacay Magaalada Muqdisho ayaa anaga iyo Shacabka kalsoonidii kala laabanay Yuusuf Indha-Cadde.

Max’ed Dheere waxa uu sheegay in shirkadaha Isgaarsiinta, kuwa xawaaladaha ay yihiin kuwo garab siiya argagixisada isla markaana ka maaleystay dhiiga shacabka Soomaaliyeed, wuxuuna sheegay in xitaa la bililiqeystay nambarkii isgaarsiinta ee Qarankii Soomaaliyeed ee 25, wuxuuna ugu dambeyntii uu sheegay in horumarka ay sameyn lahayd Dowladda Federaalka ay caqabad ku noqdeen waxa uu ugu yeeray kooxaha argagixisada ee ku sugan.

Dowladaha Yemen, Itoobiya iyo Soomaaliya oo si wadajir ah u codsadey…

Waxaa kulan Magaalada Sanca dhawaan ugu dhamaaday Wasiirada arrimaha dibadda ee wadamada Itoobiya Yemen iyo Soomaaliya, waxaana kulankaasi la iskula soo qaaday sidii saddexdaa wadan uu iskaashi u dhex mari lahaa.

Soomaaliya waxaa kulankaasi uga qaybgalay Wasiirka Arrimaha Dibadda ee Dowladda Federaalka, Danjire C/llaahi Shiikh Ismaaciil oo ugu baaqay wadamada Itoobiya iyo Yemen in ay sii wadaan gacan siinta Dowladda Federaalka.

Gebagabadii kulankaasi ayaa wadamada Itoobiya iyo Yemen ay sheegeen in ay diyaar u yihiin in Soomaaliya u diran ciidamo nabad ilaalin ah si ay uga qayb-qaataan dib u soo celinta nabadda iyo kala dambeyntii.

Waxaa kalloo ay kulankooda ku sheegeen in Qaramada Midoobey looga baahan yahay in Soomaaliya ay ka qaadaan cunaqabteynta si ay u fududaato in Soomaaliya ay galaan ciidamo nabad ilaalin ah.

Madaxweyne C/llaahi Yuusuf ayaa dhawaan waxa uu sheegay in Dowladda KMGF ah ay u baahan tahay ciidamo gacan ka siiya dib u soo celinta maamulkii iyo waliba hub ka dhigista kooxaha Maleeshiyooyinka.

Faadumo X. Cali “Dhagxaanta iyo ciidda ay wada ku gonayaa may ku shubaan …

Waxaa Magaalada Muqdisho maalmahan ka socda jid-gooyooyin ay sameynayaan kooxihii dhawaan ku dagaalamay taasoo ujeedadoodu tahay sidii midba midka kale uu isaga difaaci lahaa.

Jid-goooyooyinkaasi waxay dhibaato u keentay dadkii iyo gaadiidkii waana arrin ugub ah oo ku soo koradhay Magaalada Muqdisho, iyadoo la og yahay in shacabka Soomaaliyeed ay ku jireen mudo 16 sano ah dagaalo sokeeye.

Faadumo X. Cali oo ah haweenay aan shalay kula kulmay Isgooska Nambar4 waqtigaas oo aan wada daawaneynay Gawaari sida dhagxaan iyo caro oo wadada lagu goynayo, taasoo aan si aad ah ula yaabnay, Faadumo ayaan weydiiyay sida ay u aragto arrintaan, waxayna tiri “Dadku xoog badanaa markii la yiraah dagaal ha la abaabulo, marka la yiraah nabad ha la abaabulanaya taakdaranaa, war kaarikadan iyo ciidan lagu goynayo wadooyinka, may ku shubaan wadooyinka Burbursan ee Biyo dageynka ah, taasoo ay faa’iido ka helayaan”.

“Haddii aan shacabka Gobalka Banaadir aysan ka hor tagin arrimahaan ku soo kordhay Gobalka Banaadir ee jidgooyada waxaan imaan doonta meel la maro gaadiid iyo dadba” ayay tiri Faafumo X. Cali.

W/D: Amiin Yuusuf Khasaaro
E-Mail: amiinkhasaaro@hotmail.com