Golaha Deegaanka ee
Gobalka Banaadir oo Cadde Gaabow u doortay Guddoomiyaha...
Maalinnimadii
shalay aheyd ayaa xarunta Xisbiga ee magaalada Muqdisho waxaa ka dhacay,
doorashadii guddoomiyaha iyo duqa magaalada Muqdisho ee golaha Deegaanka Gobolka
Banaadir, waxaana shir guddoominayey gudoomiyaha Golaha Deegaanka Max’ud Cumar
Tootow.
Waxaa ka soo qeyb
gashay 45-xildhibaan oo Golaha Deegaanka Gobolka Banaadir, waxaana u tartamayey
guddoomiyaha iyo duqa magaalada Muqdisho, Max’ud Xasan Cali Cadde {Gaabow},
Daahir Hilowle Max’ed, waxaana goob joog ka ahaa qeybaha kala duwan ee bulshada
iyo siyaasiyiin ay ka mid ahaayeen, Xuseen Xaaji Bood, Max’ed Nuur Galaal, Sh.
Yuusuf Indhacadde iyo siyaasiyiin kale.
Doorashada oo
aheyd cod qarsoodi ah oo lagu ridayay dhalo muuqata ayaa waxaa 35-cod u
guuleystay Cadde Gaabow, iyadoo Daahir Hilowle uu helay 10-cod, waxaana Max’ed
Cumar Tootow uu ku dhawaaqay in Max’ud Cadde Gaabow uu yahay, Guddoomiyaha
gobolka iyo Duqa magaalada Muqdisho, waxaana u dhacay sacaba aad u tira badan.
Cadde Gaabow oo
ka hadlay xafladdii cod bixinta ayaa u mahadceliyey intii dooratay iyo intii aan
dooranba, wuxuuna u soo jeediyey qeybaha kala duwan ee bulshada in lala shaqeeyo,
Cadde Gaabow waxaa horey u soo magacaabay, Ra’isul wasaare Geeddi, waxaana
doorashadiisa ka hor yimid xubnihii labada gole ee ku sugnaa magaalada Muqdisho,
su’aasha isweydiinta mudan ayaa waxey tahay Ra’isul wasaare Geeddi maku qanci
doonaa doorashadaasi mar kale loo doortay goddoomiyaha gobolka iyo duqa
magaalada Cadde Gaabow iyo qaabka uu u shaqeeyo golaha Deegaanka, maadaama
dowladdu ay ku hawlan tahay sidii loo dhisi lahaa golayaasha deegaanka ee
gobolada, dhinaca kale Max’ed Cismaan Dhagaxtuur oo ku xigeen u ahaa Cadde
Gaabow ayaa si aad ah uga soo horjeestay doorashada, iyadoo guddoomiyihii
gobolka ee hore C/llaahi Firimbi uu daboolka ka qaaday in uu xilka ku wareejin
doono Cadde Gaabow.
Madaxweyne C/llaahi Yuusuf oo
sheegay in Ururka Midowga Yurub ay ka go’an...
Madaxweyne C/laahi Yuusuf Axmed oo dhawaan
dowladdiisu ay heshiis la gashay ururka midowga Yurub heshiiskaasi oo dhigaya in
dowlada laga taageero dhinacyada dib u dhiska iyo adeegyada bulshada, ayaa waxaa
uu sheegay in midowga Yurub ay ka go’an tahay in ey gacan siiyaan dowaladda
federaalka oo ilaa hadda uu sheegay ineysan helin wax dhaqaale ah oo ay ku
shaqeyso. Madaxweynaha waxa uu Midowga Yurub u soo jeediyey in loo dadajiyo
hawlaha mashaariicda ee ay ka fulinayaan gudaha dalka Soomaaliya. Waxaa kaloo uu
u soo jeediyey in gargaar dag dag ah ay la soo gaaraan shacabka Soomaaliyeed oo
uu sheegay inay dhibaato ka soo gaartay abaaro iyo biyo la’aan. Madaxweyne C/llaahi
Yuusuf Axmed oo uu wehliyo Ra’isul wasaare Cali Max’ed Geeddi ayaa waxaa la
sheegay inay marti qaad ka heshay dowlada Talyaaniga, waxaana la filayaa in
maalmaha soo socda ay gaaraan cariga Talyaaniga, iyadoo dowladda Talayaaniga ay
aheyd dowladdi horseedka u aheyd heshiiska dhex maray midowga Yurub iyo dowladda
fedraalka ah, inta ay joogaan dalka Talyaaniga waxaa lagu wadaa iney saxiixaan
heshiisyo la xiriira dib u dhiska dalka oo ay bixineyso dowladda Talyaaniga, oo
aheyd dowladihii sida weyn u taageeray dowladda fedraalka ah xiligii ay ku
sugneyd magaalada Jowhar. Warar ayaa waxey sheegayaan in guddoomiyaha
Baarlamaanka isna uu gaari doono dalka Talyaaniga si uu goob joog ugu noqdo
barnaamijyada ay dowladda Talyaaniga ka fulineyso dalka Soomaaliya. Deeqaha uu
bixiyo Midowga Yurub waxaa inta badan ay u soo marsiiyaan dowladda Talyaaniga,
iyadoo heshiiska dhex maray C/laahi Yuusuf iyo Midowga Yurub uu socon doono ilaa
sannadaha soo socda.
Soomaalida ku nool K/Afrika oo
intooda badan helay Sharciga wadankaas..
Wararka ka imaanaya dalka K/Afrika waxey
sheegayan in maalintii shalay aheyd boqolaal Soomaaliyeed ay heleen sharciga
degenaashaha waddankaasi oo isagu sharcigiisu ahaa mid si adag lagu qaato.
Dad fara badan oo Soomaali ah ayaa sanadahan
dambe ku sii qulqulayay waddankaasi, kuwaasi oo halkaasi ka sameystay mehrado
kala duwan oo aad u fara badan, iyadoo la sheegay in ay wax ka badaleen
ganacsigii waddankaasi, hase yeeshee shacabka Soomaaliyeed waxaa u dheer dilka,
dhaca iyo kufsiga loo geysanayo, waxaa labadii sano ee la soo dhaafay
waddankaasi lagu dilay ilaa lixdameyo qofood oo Soomaali ah kuwaas oo loogu
dhacay guryahoodii.
Bixinta sharcigan cusub ayaa waxaa si weyn u
soo dhaweeyey shacabka Soomaaliyeed ee ku nool dalkaasi, iyagoo ku tilmaamay mid
sii xoojinaya xiriirka u dhaxeeya shacabka Soomaaliyeed iyo reer K/Afrika,
waxaana la filayaa in sannadka soo socda iyana ay qaataan sharcigan boqolaal
qofood oo Soomaali ah.
Deegaanka Galinsoor oo maanta la isugu keenayo
Maleeshiyooyinkii halkaasi ku dagaalamay……
Wararka ka imaanaya gobolada dhexe ayaa waxey
sheegayaan in maanta lagu wado in deegaanka Galinsoor la isugu keeno
maleeshiyooyinkii ku dagaalamay deegaankaasi, waxaana heshiiskaasi ka soo
shaqeeyey wasiiro ka tirsan dowladda federaalka ah oo ay ka mid yihiin Wasiirka
Hawlaha guud iyo Guriyeynta Cismaan Cali Caato, Wasiirka Hormarinta Reer Miyiga,
Max’ed Max’ud Guuleed Gacmadheere, Wasiiru dowladaha Badda iyo Dekadaha Max’ed
Jaamac Furux iyo Xildhibaan Axmed Ducaale Geelle Xaaf.
Maanta ayaa deegaanka
Galinsoor labada dhinac ay ku hilba qalanayaan kuna faataxeysanayaan, waxaana
halkaasi lagu soo gaba gabeynayaa wajigii hore ee heshiiska beelaha Sacad iyo
Suleymaan, waxaana kaddib loo gudbi doonaa dhinaca degmada Hobyo oo iyana la
gaarsiin doono heshiiska dhex maray labada beelood, kulanka maanta ayaa waxaa
hadalo ka jeedin doona mas’uuliyiinta ka socda dowladda federaalka ah iyo
odayaasha Dhaqanka labadaasi beelood.
Jaamacadda
Carabta oo Soomaaliya u ballan qaaday in ay u fureyso sanduuq dhaqaale..
Iyadoo maalintii doraad aheyd magaalada
Kharduum ee dalka Suudaan lagu soo gaba gabeeyey Shir madaxeedkii Jaamacadda
Carabka ee 18-aad ayaa waxaa looga hadlay arrimo fara badan oo ay ka mid
ahaayeen Falastiin, Suudaan, Soomaaliya, Ciraaq, iyo waddamo kale oo carbeed oo
ay ka jiraan dhibaatooyin.
Mar ay isla soo qaadeen Jaamacadda Carabta
arrimaha Soomaaliya ayaa waxey Jaamacadda Carabta ballan qaaday iney Soomaaliya
ka taageeri doonto dhinaca dib u heshiisiinta iyo soo celinta kaabayaasha
dowladda.
Shirkaani oo uu Soomaaliya uga qeyb galay Guddoomiyah
Baarlamaanka Shariif Xasan Sh. Aadan ayaa waxaa la filayay iney soo xaadiraan
Madaxweynaha iyo Ra’isul wasaaraha balse illaa iyo haatan lama garanayo
sababihii ay uga baaqsadeen kulankaasi, hase yeeshee warar ayaa waxey sheegayaan
in Jaamacadda Carabta ay Soomaaliya u furi doonto sanduuq dhaqaale oo lagu
taakuleeyo shacabka Soomaaliyeed iyo dowladdooda
Max’ed Dheere oo si
deg deg ah ugu duulay Magaalada Nairobi..
Tan iyo markii uu istaagay
dagaalkii u dhaxeeyey kooxihii isku magacaabay la dagaalanka argagixisada iyo
midowga maxaakimta Islaamiga ah, iyadoo uu dagaalkaasi qeyb ka ahaa, Max’ed
Dheere ayaa wararka naga soo gaaraya magaalada Jowhar waxey sheegayaan in Max’ed
Dheere uu si deg deg ah ugu duulay magaalada Nayroobi kaddib markii loo soo
diray diyaarad gaar ah oo aan la garaneyn ciddii laheyd.
Inksatoon faahfaahin dheeraad
ah laga bixin ambabaxa Max’ed Dheere ee dhinaca Nayroobi ayaa warar waxey
sheegayaan in ay u yeertay safaaradda Mareykanka uu ku leeyahay magaalada
Nayroobi, si uu warbixin uga siiyo dagaalkii dhawaan ka dhacay magaalada
Muqdisho.
Dowladda Mareykanka waxey
horey u sheegtay inaysan wax lug ah ku laheyn dagaalkii dhawaan ka dhacay
magaalada Muqdisho kuna tilmaantay in uu yahay mid dano dhaqaale ku dhisnaa.
Xarunta Dr. Ismaaciil Jimcaale oo
ku baaqday in la adkeeyo heshiisyada...
Xarunta Ismaaciil Jimcaale oo
inta badan aruurisa xadgudubyada ka dhaca Soomaaliya ayaa waxey soo saartay baaq
nabadeed, iyadoo soo dhaweysay gogoshii nabadeed ee la dhigay Mowlaca Sh.
Shariif Sheekh Muxuddiin taasoo ah bay tiri xaruntu mas’uuliyad nabadeed oo xal
loogu raadinayo dhinacyadii dagaalamay iney xabad joojin ku dhawaaqaan,
wadahadal nabadeedna ay yeeshaan, iyadoo xaruntu ay soo dhaweysay dadaalkaasi
nabadeed oo ay ku tilmaantay in lagu badbaadinayo shacbiga Soomaaliyeed oo horey
ugu noolaa duruufo qalafsan, intii gacanta ka geysatayna waxey xaruntu ku
sheegtay in ay taariikhda xusi doonto.
Xarunta Ismaaaciil Jimcaale
waxey wax laga xumaado ku sifeysay in xukuumadda KMG ah aysan qaadin talaaabo
muuqata oo ay wax kaga qabaneyso dagaalada galaafanaya nolosha bulshada, waxeyna
ugu baaqday xaruntu in dowladdu ay maanka ku hayso in ka hortagga dagaalada
qabaa’ilka iyo sugida nabadgalyada ay yihiin waajib saraan iyada, shacabkana
waxey ku bogaadisay iney u istaaagaan daminta colaadaha ahliga ah oo ay ku
sheegtay kuwo abaabulan, waxaana warsaxaafadeedkaasi ku saxiixnaa guddoonka
xarunta Marwo Maryan Awreeye.
Ibraahim Shaaweeye
“Aniga ayaa ah duqa Magaalada Muqdisho cid xilkaa iga qaadayna ma jirto”...
Ibraahim Cumar Sabriye
Shaaweeye oo duq magaalo ka noqday gobolka Banaadir xiligii ay jiray dowladdii
Carta ayaa mar wax laga weydiiyey sida uu u arko doorashadii shalay ka dhacday
xarunta Xisbiga ee golaha Deegaanka ayaa waxaa uu ku tilmaamay doorashadaasi mid
riyo ah, “Aniga ayaa ah duqa magaalada Muqdisho meel xilkaasi la igaga qaadayna
ma jirto” ayuu yiri Ibraahim Cumar Sabriye Shaaweeye oo sheegay in xilka uu hayo
uu wareejin doono markii la helo doorasho sax ah oo ay raalli ka yihiin
dadweynaha gobolka Banaadir.
C/llaahi Xasan Ganey Firimbi ayaa soo
dhaweeyey doorashada isagoo isla maalintii shalay aheydna ku wareejiyey Cadde
Gaabow xilka guddoomiyaha gobolka Banaadir
Amiin Yuusuf Khasaaro
E-mail: amiinkhasaaro@hotmail.com
Daabaco
Boggan | Print