Waxaa maalintii
shalay ahayd dadweynaha ku nool Magaalada Muqdisho ku waabareysteen xabad
la’aan kaddib markii mudo afar maalmood ah dagaal qaraar uu ka socday W/bari
ee Magaalada Muqdisho oo u dhexeeyay Maleeshiyooyin kala taabacsan Bashiir
Raage iyo Abuukar Cumar Caddaani, kuwaasoo gacan ka kala helayay Isbahaysiga
la dagaalanka Argagixisada iyo Midowga Maxaakiimta Islaamiga ah, iyadoo
dagaalkaan ay ku dhinteen dad aad u fara badan, waana dagaalkii ugu qaraaraa
ee mudooyinkaan laga maqlay Magaalada Muqdisho.
Guddi is xil-qaamay
oo ka tirsan beesha Mudulood ayaa iyagu dadaal u galay joojinta dagaalkaasi,
waxayna maalintii shalay ahayd kulan ku yeesheen Mowlacaha Shiikh Muxiyadiin,
waxayna markii hore u yeereen wakiilo ka socday Bashiir Raage si wanaagsan
ayay u soo dhaweeyeen hashiiska ay wadaan guddigaasi, waxayna sheegeen in ay
qaadanayaan wax kasta oo loo gooyo, sidoo kale waxay kulan la yeesheen
wakiilo ka socday Abuukar Cumar Caddaani iyana si wanaagsan ayay u soo
dhaweeyeen heshiiska ay wadaan guddigaasi.
Shiikh Shariif Shiikh
Muxiyadiin oo ka mid ah guddigaasi ayaa waxa uu Saxaafadda u sheegay in
labada dhinac ay diyaar u yihiin in ay wada hadlaan wixii khilaaf ahna lagu
dhameeyo wada hadal iyo is afgarad, Shiikh Shariif waxa uu sheegay in manta
wakiilo ka socda labada dhinac la isa soo hor fariisin doono si ay uga wada
hadlaan wixii dhaliyay dagaalka, sidoo kale guddiga waxay sheegeen in xitaa
ay la xiriireen Max’ed Dheere, maadaama uu qayb ka ahaa dagaalkii ka dhacay
Magaalada Muqdisho ee u dhexeeyay Bashiir Raage iyo Abuukar Cumar Caddaani.
Dhinaca kale waxaa shalay si aad ah u socday howlihii dekedaha Ceel-Macaan
iyo Ceel-Cadde kaddib markii ay la wareegeen Maleeshiyooyin daacad u ah
Abuukar Cumar Caddaani, waxaana la arkayay gawaari fara badan oo ku soo
qulqulaya Magaalada Muqdisho kaddib markii ay halkaasi ku xayirnaayeen
afartii maalmood ee dagaalku socday.
Guddoomiyihii Diinsoor
oo xilkii laga qaaday kaddib lagu eedeeyay in uu gudan waayay waajibaadkii
ka saarnaa..
Warqad ay ku saxiix-naayeen 13 xubnood oo
ka tirsan Waxgaradka, Culuma’udiinka, Dhallinyarada iyo Haweenka Beesha
Dabare ayaa waxay xilkii guddoomiyaha Diinsoor ka qaadeen Dr. C/xafiid
Shiikh Xuseen kaddib markii ay ku eedeeyeen in uu gudan waayay
waajibaadkiisii ku aadanaa deegaankaasi.
Warqad oo uu na soo gaarsiiyay Siiday
Xaaji Max’ed Nuur ayaa waxaa kalloo lagu sheegay in xilkii degmada Diinsoor
loo magacaabay Xaaji Ma’xed Ibraahim Macallin Aadan (Gaal-Jeele).
Qoraalka waxaa kalloo ku qornaa in mudo
dhowr todobaad ah ay kulamo u socdeen waxgaradkaasi, ayna ku isku afgarteen
in xilka laga qaado Guddoomiyaha degmada Diinsoor oo ka mid ah Degmooyinka
Gobalka Bay, 140Km u jirta Magaalada Baydhabo.
Guddi uu soo magacaabay
Guddoomiyaha Baarlamaanka oo soo gaaray Magaalada Muqdisho..
Waxaa maalintii shalay Ahayd Magaalada
Muqdisho soo gaaray Guddi uu soo magacaabay Guddoomiyaha Baarlamaanka uuna u
xilsaaray in ay dhex dhexaadin ka galaan kooxaha ku dagaalamaya Magaalada
Muqdisho.
Guddigaan oo ka kooban dhowr xubnood ayaa
waxaa ka mid ah Faysal Cumar Guuleed, iyadoo mar uu u waramayay saxaafaddana
uu sheegay in maalmaha soo socda ay kulamo la yeelan doonaan kooxihii u
dagaalamay Magaalada Muqdisho.
Dhinaca kale Guddoomiyaha Baarlamaanka
iyo wafdi uu hogaaminayo ayaa shalay ka ambabaxay Magaalada Baydhabo isagoo
ku sii jeeda dalka Suudaan caasimaddiisa Khartuum oo uu kaga qaybgalayo
shirka Madaxda Jaamacadda Carabta, wuxuuna Guddoomiyuhu shalay ku hakaday
Magaalada Nairobi, halkaas oo uu kulamo kula sii heelanayo xubno ka tirsan
Dowldda Federaalka oo haatan ku sugan Magaalada Nairobi.
Idaacadda Baydhabo oo dib loo furay
kaddib markii ay xirneyd mudo..
Xaflad si
heer sare ah loo agaasimay uuna ka q aybgalay xubno uu hogaaminayay
Guddoomiye ku xigeenka Golaha Baarlamaanka Max’ed Cumar Dhalxa dibna loogu
furayay Idaacadda Baydhabo ayaa waxay ka dhacday xarunta idaacaddaasi ee
Magalada Baydhabo.
Idaacaddaan oo xoogeedu ku hadli doonta afka Maay Maayga ayaa u jeedada loo
aasaasay ay tahay sidii macluumaad kala duwan ay u heli lahaayeen dadka ku
nool Koonfur Galbeed ee Soomaaliya iyo waliba sidii ay uga qayb-qaadan
lahayd dib u heshiisiinta.
Col. Amed
Mayow Cabdule (Col. Ruush) oo maamule ka ah Idaacaddaasi ayaa waxa uu
sheegay in Idaacaddaani ay gaarsiin doonaan maqalkeeda dadka ku nool Koonfur
Galbeed, waxaa kalloo uu sheegay in Idaacaddaan suba hore ay ku hadli doonto
afka Maxaa Tiri oo isna looga hadlo gobalo kale oo Soomaaliyeed.
Korneelku waxa uu sheegay in Idaacaddaani
ay tahay mid horey oo furay lana furay 2004-tii balse ay hakatay xilgiii ay
socdeen dagaalada sokeeye ee Gobalada Bay iyo Bakool.
Nin Suudaaneys ah oo
lagu qabtay hotel ku yaala Magaalada Baydhabo..
Ciidanka
Nabadgelyada ee Magaalada Baydhabo ayaa habeen hore waxay u dhaceen Hotelka
Baydhabo halkaas oo loogu sheegay in uu jiifo nin u dhashay wadanka Suudaan,
laguna tilmaamay in uu yahay argagixiso.
Ciidanka
nabadgelyada oo ninkaasi dhowr su’aalood weydiiyay ayaa waxaa markii dambe
goobtii yimid rag si aad ah u garanayay oo sheegay in ninkaani uu ka tirsan
Hay’adaha samafalka ee Gobalada Bay iyo Bakool u yimid wax u qabashada dadka
ay waxyeeladu ka soo gaartay abaarta iyo biyo la’aanta.
Aadan Max’ed Nuur (Saransoor) oo ah
guddoomiyaha nabadgelyada magaalada Baydhabo ayaa saxaafadda u sheegay in
markii hore ay ku soo duuleen war qalad ah, waxayna raaligareyn u direen
ninkaas suudaaneyska ah oo shalayba u ambabaxay goobaha ay abaaruhu ka
jiraan .
Jidka isku xira
Dekedaha Ceel-Macaan iyo Ceel-Cadde oo mar kale shalay dib loo furay..
Iyadoo
afar maalmood uu dagaal ka socday W/bari ee Magaalada Muqdisho, dagaalkaas
oo u dhexeeyay ganacsatada kala ah Abuukar Cumar Caddaani iyo Bashiir Raage
oo taageero ka kala helayay Maxkamadaha Islaamiga ah iyo Isbahaysiga la
magacbaxay la dagaalanka argagixisada ayaa jidka isku xira Dekedda
Ceel-Macaan iyo Magaalada Muqdisho uu dib u furmay kaddib markii halkaasi ay
gacanta ku dhigeen Ciidamo taabacsan Abuukar Cumar Caddaani.
Xaaladda
oo shalay aad u dekeneyd ayaa waxaa la arkayay Gawaari fara badan oo sida
Shidaal iyo Raashin kala duwan waxaana dekedda ku xiran dhowr Markab oo wada
badeecooyin kala duwan iyo Gawaari, sidoo kale Dekedda Ceel-Cadde oo iyana
uu ka degayay Shidaal ayaa waxaa gacanta ku haya Shirkadda Banaadir oo hoos
tagta Ganacsade Abuukar Cumar Caddaani iyadoo gawaarida ka soo baxda
Ceel-Macaan ay Muqdisho imaanayeen isbaaro la’aan.
Bootaan Ciise “Wax heshiis ah oo aan la
gaarnay Maxaakiimta Islaamiga ah ma jiraan”..
Bootaan Ciise Caalin oo ah Wasiirka hub
ka dhigista iyo dhaqancelinta Dowladda Federaalka oo u waramayay saxaafadda
ayaa waxa uu beeniyay warar sheegayay in beesha Max’ed Hiraab ay heshiis la
gaartay Maxkamadaha Islaamiga ah.
“Nin aniga I dilaya sidee ayaan heshiis
ula gaarayaa” ayuu si kulul u yiri Bootaan Ciise Caalin oo sheegay in
fariisimo ka tirsan maleeshiyooyinkiisa uu sheegay in ay soo weerareen
Maxaakiimta Islaamiga ah.
“Anigu
waxaan xubin ka ahaa isbahaysiga la dagaalanka argagixisada, waxaana
fulinayaa ujeedooyinka Isbahaysigaasi oo ah in la soo qabto kooxaha
Argagixisada ajnabiga ah ee ay magangeliyeen shaqsiyaad Soomaaliyeed” ayuu
yiri Bootaan.
Amiin Yuusuf Khasaaro
E-mail: amiinkhasaaro@hotmail.com